Discussion polìtiche, mossion, at ant ël Consèj Comunal dël Comun ëd Gënoa

Discussion polìtiche, mossion, at ant ël Consèj Comunal
dël Comun ëd Gënoa

Durant un-a dle soe identità (ant la qual a l'ha butà-se ad art la màschera ëd na sòrt ëd pseudo-serietà) Roberto Quaglia a l'é stàit Consijé Comunal e Capgrup dla Lista Pannella ant ël Consèj Comunal ëd Gënoa dal ancamin dël 1995 a la fin dël 1997. A la scadensa eletoral, combin le vàire ofèrte për na ricandidatura, a l'ha decidù ëd nen ripresenté-se a le elession, e adess a së dédica a facende decisament pì amportante e bin distante da la polìtica.
La polìtica a l'é servù mach a amprende certe còse. Për esempi che gnente ëd lòn ch'i lesreve ansima a ste pàgine a l'é an efet servì a Gënoa e ai genovèis o a chicheséssia. GNUN-A dle mossion faticosament conduvùe a aprovassion da Roberto Quaglia a l'é peui stàita butà an at da la giunta (an total sprèss, parèj, dla dignità dël Consèj Comunal) e, pes ancora, ël Consèj Comunal midem a së n'é belament fregà dla sistemàtica inadempiensa dla giunta rispet a le votassion consijar (dzortut cole ëd Quaglia). Ciapà at ëd tut sòn, Roberto Quaglia a l'ha avù ël bon gust ëd torné a ocupé-se ëd còse serie. Coma ël surealism.

Lòn ch'a séguita a l'é un residuo fòssil ëd col perìod, e mach an quant tal a va ciapà an considerassion.

I chërdo che l'avent d'Internet a trasformerà profondament ël rapòrt tra ij sitadin e ij sò elet ant j'istitussion. Internet a podrà fornì an futur na trasparensa total ansima a tùit j'at polìtich e aministrativ. Fin dal Gené 1997 mi i-m bato, ant ël Consèj Comunal ëd Gënoa, për angagé ël Comun a buté ansima a Internet tùit ij sò at pì significativ, con ël but ëd garantì ai sitadin la possibilità ëd seguì an detaj j'ativ dël Sìndich, dla Giunta e dij sìngoj Assessor e Consijé. Ij sitadin a l'han ël pien dritt ëd podèj savèj coma ch'as comporto an detaj ij sò elet e ij sò aministrator pùblich. Da ancheuj, Internet a fornìss ël mojen ideal për dé concreta eficacia a cost dritt.

ROBERTO QUAGLIA

Quand cost mé esempi un pòch pionerìstich a sarà finalment la nòrma, tùit ij sitadin a podran sèmper controlé ansima a Internet coma ch'as comporto ij polìtich ch'a l'han elegiù. Còsa a diso ant ël Consèj Comunal o ant ël Parlament coj ch'it l'has elegiù? Coma a vòto? It ses sigur ch'a rapresento sèmper ij tò anteresse e le toe volontà? Coma ch'it fas a fidé-te ëd lòn ch'a scrivo ij giornaj dzora ij polìtich ch'it l'has votà? Quala a l'é la verità ëd soe assion? Internet a darà rispòste credìbij a ste toe domande legìtime e doverose.

Sta pàgina a conten certe mossion da mi portà an discussion ant ël Consèj Comunal ëd Gënoa. Për certe mossion i l'hai ritnù ùtil buté online tuta la discussion efetuà an Consèj. I trovreve an mérit minca paròla pronunsià da Consijé e Assessor. Tùit j'intervent. Tùit le posission. Tùit le votassion. E ëdcò quàich rassëgna stampa. A l'é n'esempi ch'i l'hai vorsù fornì dzora coma ch'a podrà esse impostà la butà online dij verbaj ëd Consèj Comunal ëd na granda sità. Mé esempi e mé tentativ a son për ël moment ùnich an Italia. I spero ëd perde 'l pì prest possìbil cost inùtil privilegi.