Ant ël 1962 Roberto Quaglia a l'é vnù a cost mond sensa riesse pì a torné a l'àutr. A l'ha decidù antlora d'ambienté-se.
Prima a l'é chërsù, teis anvers le dimension e peui le forme atuaj, sensa trascuré ëd libaré-se ëd tùit coj cavèj ch'a-j servìo nen. Ciapà possess dlë spassi ocupà da chiel, a l'ha afrontà ël temp ch'a-j corìa adòss. Coma prodòt ëd scart ëd soa permanensa spassiotemporal i trovoma fumèt, fotografìe ëd arserca, , carta scrita, e notèivol resta ëd resta orgànich. A l'é stàit però mach quand an tròp a së son butà dzortut a lese-lo ch'a s'é ancorzù d'esse dzortut un scritor ch'a s'era dzortut convinch d'esse-lo. Da col moment, coerentement, a l'ha dzortut scrivù, dësmentiand-se, ant ij moment pì ossessiv, bele che ëd vive, riessend però a sorvive listess. Combin ch'a sia ancora relativament pòch conossù an Italia, Roberto Quaglia a l'é ancheuj un dij scritor pì originalment iconoclast an gir. Ij sò nombros scrit (quat romanz bondos, quaranta cont, des comedie, doe racòlte ëd sagi, un clamoros tòm ëd 500 pàgine ansima a l'11 setèmber, ecc.), paradossalment (ma nen tròp...) an bon-a part inédit an Italia, a son anvece tradòt an vàire lenghe, e publicà ant ij pais parèj dit forëst con forte tiradure e con notèivol suces. l'ùltima euvra ëd Roberto a l'é un incredìbil lìber scrit ansema al scritor britànich Ian Watson. Certi cont ëd cost lìber a son ëstàit publicà ansima a riviste e antologìe an Canada, USA e Italia. Àutri a son comparì ansima a riviste online.
An vàire sìrcoj literari, ij sò test a son sorprendentement dventà ogét ëd cult. As san ëdcò nombros cas andoa che a esse obligà a ogét ëd cult, a furor ëd pòpol, a l'é stàit l'istess Roberto Quaglia. Ël misteri a continua...
Tra parèntesi, a caval tra j'agn 80 e 90 a l'ha gestì la Panteca ëd Gënoa. Për ij feticista dle formalità, i riportoma che dal 1995 al 1997 coma conseguensa ëd na campagna eletoral surealista a s'é artrovà a esse ëdcò Consijé Comunal a Gënoa, n'esperiensa anteressanta ëdcò da un pont ëd vista antropològich. Dal 2002 a l'é visepresident dlaESFS (European Science Fiction Society)
Tut sòn a l'é mach n'esempi. |
Coma Cristòfo Colomb Roberto Quaglia a pieuv da Genoa, andoa ch'a l'é stàit barman e Consijé Comunal prima ëd dventé n'esplorator, ant ël sò cas ëd l'Est Euròpa e dël Surealism. Adess a l'é ëd ca a Bucarest. Vàire vòlte Robert Sheckley a l'ha vivù con Roberto an Italia e Romanìa, e ant la granda veja e bianca Mercedes ëd Roberto, scrivend ëdcò na prefassion al surreal e satìrich dobia romanz ëd fantasienza sò Pane, Burro e Paradossina (publicà an inglèis da Delos international). Roberto e Ian a l'han ancaminà a colaboré a na serie ëd cont “My Beloved” an n'albergh misteriosament veuid ansima a na bosca colin-a davzin a la frontiera tra Ungherìa e Slovachia ant ël 2003. Ex fotògrafo vincitor ëd premi, Roberto a continua a scaté mijara ëd foto. Sò barba a viv a Mònich ëd Baviera, parèj chiel a l'ha da parlé an tedesch; ma amprende ël romen a l'ha dëstruvù ël fransèis ëd Roberto, parèj a l'é bin che chiel a l'àbia nen un barba a Paris.
|
Roberto Quaglia da Genoa ëd sòlit a viv a Bucarest parland romen, combin ch'adess a sa ëdcò imité ël russ pro da convince ij russ che chiel a staga efetivament parland russ. Coma conseguensa, a l'ha ëd recent posà për l'edission russa ëd Penthouse. L'amirassion për Bob Sheckley a l'é la càusa për cui Roberto a l'ha anvità Sheckley an Italia, për peui scaroçé-lo antorn për l'Euròpa për divers agn ant la granda Mercedes bianca soa etichetà www.surreal.info fin a che le létere a son nen dëslivà via dal lunòt posterior. Ex-barman, premià fotògrafo, e na vòlta Consijé Comunal surealista ëd Gënoa, Roberto a l'é autor dël esilarant dobia romanz Pane, Burro e Paradossina disponìbil an inglèis – e an pì a l'é Vice-President dla Associassion Europenga ëd Fantasienza (ESFS), ch'a presid ij Eurocon ch'a së ten-o an diverse nassion coma la Bulgarìa e l'Ucraina ëd recent, e ant ël 2007 la Danimarca. Roberto e Ian a l'han ancaminà a scrive stòrie ansema an n'albergh stranament desert an un bosch colinos davzin al confin ungherèis/slovach ant ël 2003, e adess a-i é un lìber antregh, The Beloved of My Beloved, avidament a la arserca ëd un coragios e mat editor. Àutri cont ëd cost progetà volum a son ansima a Helix, Clarkesworld e Flurb. Un a l'é an Lust for Life e n'àutr a l'é an Weird Tales e Robot.
|
