Astounding Quagliapsace, osia ël strani mond ëd Roberto Quaglia

Analogament a lë spassi mental ëd mincadun, Astounding Quagliaspace a l'é un rifless singolar ëd l'univèrs, qualsëssìa còsa che l'univèrs a sia fòra dla ment ëd quaidun. Viagé traverse Quagliaspace a l'é un pòch coma vnì a contat con Roberto Quaglia midem, qualsëssìa còsa che Roberto Quaglia a sia fòra ëd sé. Lòn ch'as ancontra an Quagliaspace a aparten a la Granda Famija dle Trass ëd Quaglia, osia cola ròba ch'a vansa quand quaidun ch'as ciama Quaglia a esist sensa fé-ne un segret ch'a servirìa nen. Ël mond virtual ant ël qual it chërde ëd trové-te an cost istess istant (it ses o it ses nen convint ëd "esse ansima a Internet"?), ch'a tend a risucé-te ant ël monitor andoa che ij tò euj a së son già perdù, a l'é mach un-a dle pì tènue e insignificante estension ëd l'ùnich, ver, amp, antregh e complès Astounding Quagliaspace ch'a l'é stàit creà da Roberto Quaglia midem ant soa propia ment, parèj che soa propia ment a podèissa creé Roberto Quaglia. Un truch ch'a fonsion-a e a dura. Ël miràcol dla creassion ëd sé dal nen, e dzortut dla ricreassion ëd sé da l'identità precedenta lesera e chità. Bon apetit.

...a l'avìa decidù ëd vive eternament, o ëd meuire ant ël tentativ.
(Joseph Heller)

Roberto Quaglia, photo by Konstantin Krasnobaev, Moscow, 2006

Con ël truch ëd l'audiovisiv Roberto Quaglia adess as mòv ëdcò! E a parla! Cliché sì dzora për vëdde na strana intervista a Roberto Quaglia dla durà ëd n'ora. Ël fàit a l'é capità ant l'istà dël 2003 an Ungherìa. Ël sonòr a l'é an inglèis.

Giugn 2017. A Teheran, Iran, Roberto Quaglia a ven intervistà da Teša Tešanović e ël tema dla discussion a l'é ël mond real - dëdlà dle cortin-e fumògene dij mit e dj'ingann. L'àudio a l'é an inglèis, dòp un preàmbol an serbo-croat.

Luj 2004. Ël grand scritor american Rober Sheckley a l'é mé òspit a Gënoa për quàich mèis. Ecco n'intervista, da mi realisà a Gënoa Quinto. Un ann dòp, Sheckley a vnirà belavans a mancé. Ël sonòr a l'é an inglèis.

Aost 2004. A Bucarest, an Romanìa, a va an onda an television un talk show dabon inconsuet. Robert Sheckley, Ian Watson e ël sotoscrit a parlo për n'ora ëd fantasienza. Moderator, Alexandru Mironov. Ël sonòr a l'é an inglèis.

Se i pense che j'àutri vìdeo a sio tròp difìcij për voi, i peule consolé-ve con cost curt vìdeo ëd bin-vnùa ansima al mé sit, sémplice sémplice, fàcil fàcil da capì. E a l'é ëdcò scasi an italian!

>> ÀUTRI VÌDEO <<

OPZIONI

BIOGRAFIA	Chi son? Chi i son nen? Përché i son sì ëdcò essend ëdcò an d'àutri pòst? Tut lòn ch'it savìe nen ëd vorèj savèj ansima a Roberto Quaglia e ch'at gioverà un pòch. Opura nò.
EUVRE LITERARIE	Un milion ëd paròle. Ecco còsa ch'a conten-o ij mé lìber butà ansema. Acomòdate. 200.000 paròle it le regalo sì. Fidé-te nen ëd lòn ch'a signìfico. Le paròle a esisto nen fòra ëd nòstra sùca, lòn ch'a l'é tut dì.
FANTASCIENZA	Còsa i-i intro mi con la fantasienza? ma dzortut: còsa i-i intra la fantasienza con mi? Investiga ansima al lat scur dla fantasienza italian-a.
IMÀGINE	Ideal për chi ch'a sa nen lese e ant la vita coma ant l'aldilà a preferiss vardé mach le figure. Preòcupe-te nen: prima o peui a càpita a tùit. A mi a l'é capità. Peui a passa. Opura nò.
VIDEO	Se la television a l'é ël nemis a cui it riesse nen a scapé, ecco-te certi vìdeo andoa che mi e d'àutri i-s compiasoma ëd vanegé con ël but ëd confonde j'idee a chi ch'an vëd. Ciapa an man toa vita! Serni ti a quala confusion mental esse soget! Se it l'has na conession internet a banda larga ël sbal a l'é garantì.
SATIRA	A par ch'a vàire gent a-j pias la sàtira. Mi i l'hai miga bin mai capì còsa a sia, però na vòlta ch'i m'son dëstraéd i l'hai fàit-la. Prima o peui i la foma tùit. L'important a l'é nen afessioné-se e savèj quand tiré la caden-a.
AMIS	Ëdcò sémplice conossent e dësconossù. Dësconossù për voi, benintèis. Mi i-j conòsso. E a son dij geni opura teste ëd bala o gnun dij doi o tut e doi le còse. Ansoma na còsa un pòch coma l'umanità, ma an cit. O forsi an grand, i m'confondo sèmper, probabilment apòsta. Còsa a amporta?
SHECKLEY	Robert Sheckley a fa categorìa a sé. A l'é part ëd mia vita e mi i son stàit part ëd la soa. I l'oma viagià ansema për mèis e abità ansema an divers perìod e leugh. Sì i trové tute j'imàgine relative.
IAN WATSON	Ëdcò Ian Watson a fa categorìa a sé. Ël pì brilant scritor britànich second ij mej crìtich. Da quàich ann i soma vàire amis e i l'oma scrit un lìber ansema. Sì i trové ij link a quàich nòstra euvra a 4 man e fòto ëd viagi ch'i l'oma condividù.
VARIA UMANITÀ	A-i é gent ch'i conòsso nen epura a esist listess da quàich part. Vàire a lasso nen an mi trass ch'i m'arcòrda. Àutri anvece sì. Econe certi.
RASSEGNA STAMPA	Vansi fòssij ëd trass ëd vita sota forma d'efìmere signëtte ansima a feuj ëd carta che rispet a la carta igènica a duro mach un pòch ëd pì e a son scasi sèmper meno necessarie. E a-i é gent ch'a-i chërd. Se ti it ses parèj, acomòdate. Për piasì peui la caden-a.
GUESTBOOK	Prima o peui i lo riativerai. Opura nò. Se it veule perde temp con vej coment assortì, preuva pura.
POLITICA	A par incredìbil ma ant la vita a-m é capità ëd fé ëdcò polìtica, o pitòst la polìtica a s'é fàita mi fin al dì an cui i l'hai molà-la. Comsëssìa, gnente ëd serio. A l'é stàita mach na facenda ëd sess. Për ij feticista e vardon, ecco coma a l'é andàita.
GUST	Banal elench ëd còse ch'am piaso. Un-a ëd cole còse ch'as buto ant soa propia homepage për sémplifiché soa propia personalità ai euj dël visitator impassient.
LIBRARÌA	Prima o peui i-i metrai na selession ëd grand lìber an grad ëd rende vòstra vita vàire pì bela, se mach peui voi i lesèisse. Ant ël fratemp a-i é quaicòsa, ma i m'arcòrdo nen còsa.
POSTER	Se tut at noia, forsi it l'has damanca ëd taché un poster ant toa cambreta. Miraco un poster con un gròss cul incombent. Opura quaicòsa ëd meno rafinà.
CONTRIBÙT	Për quant a peussa inissialment parèj-e strani, contribuì an mòd ativ a mia vita a l'é sémplice e a la portà ëd tùit. Sì i-v dago ëdcò un bon sugeriment an mérit.
COPERTINA	A-i son ëdcò imbecij che quand a van spaesà an un sit a finisso sèmper për torné a la copertina. Cost link a-j veul giuté.

	POSOLOGÌA
	Gnente por ëd intré an Quagliaspace! A l'é comsëssìa tròp tard. Se it l'has nen chità ëd lese it ses già drinta. Avis: Quagliaspace a l'é controindicà a le mòmie. A l'é soens risultà letal për ij cadàver. Ëdcò ij zombi a coro quàich rìsigo. Se ancora it ses drié lese, sertament it ses nen un cadàver, probabilment it ses nen na mòmia, e forsi gnanca un zombi. O forsi sì. Boh? A fa dabon diferensa? Bin-vnù donca an Astounding Quagliaspace! Ch'a par scrit an inglèis ma anvece a l'é italian. E se ste pàgine at piaso sugerìss-je ai tò amis ëd carn e coj eletrònich. E già ch'it ses-ie buta un link ansima a toe pàgine, se it j'has, e miraco ëdcò se it j'has nen. Dësmentié-te nen che a le set at speto andoa ch'it sas bin për fé la pipì.	...e sòn, a l'é mach l'ancamin. Se Internet a colasserà nen, se ël Mond a colasserà nen, se ël Sistema Solar a colasserà nen, se la Via Làtea a colasserà nen, se l'Univèrs a colasserà nen, se Roberto Quaglia a colasserà nen, Astounding Quagliaspace as dësvloperà indefinitivament, a la arserca ëd na sèmper pì granda propia incredibilità, la qualità dl'ecelensa për ecelensa... opura nò, l'assolut contrari e ëdcò ël contrari dël contrari dël contrari ëd tut sòn. Ël servel av s'é spatarà? Bon. A l'é pì digerìbil parèj. Sèmper mefié-se dle paròle, ël Caval ëd Tròja ëd Tute le Mistificassion! Da l'àutra part quaicòsa i dovìa pur scrive, për përmëtte a sta session ëd test d'ocupé n'area sìmil a cola dël trafilet sì da fianch. I chërdo nen ch'a-i vada d'àutre paròle.

Oltra che a livel mìtich, da ancheuj Roberto Quaglia a esist ëdcò an temp real, almanch an teorìa. Pròpi parèj! Podèj dla QUAGLIACAM™ . La fòto a drita a l'é con tuta probabilità la pì recenta dj'imàgine esistente ëd Roberto Quaglia. Con un pòch ëd fortun-a (o ëd scarògna) it peule vëdde còsa ch'a sta fasend RQ (ch'a peui a sarìa mi) an cost istess istant. Quand la QUAGLIACAM™ a l'é anvischà, l'imàgine a ven agiornà minca 5 minut. Quand a l'é dëstissà, as vëd l'ùltima imàgine registrà. Se la carega a l'é veuida, a veul dì che lòn ch'it vëde a son nen mi. La data e ora ansima a la fotografìa a l'é relativa al pianeta e fus orari dël leugh an cui i-m trovo (soens a l'é nen an Italia). Vàire visitator a m'han però fàit noté che soens l'imàgine a l'é nen stàita agiornà da eut o neuv mèis. Mi i chërdo a costor, e parèj i l'eve da fé ëdcò voi. I son tròp saviament pìgher për controlé se i l'hai na webcam anvischà ant ij mé dintòrn. Soens an efet a-i na son nen.

= RQ HIC ET NUNC

ÙLTIME PART

Less recension nùmer un
Less recension nùmer doi

IT VEULE APROFONDÌ?

Pensiero Stocastico a l'é un lìber ch'a racòj le còse pì strane tracimà dal servel ëd Roberto Quaglia. Lese për chërde. O për nen chërde. Për sbalé. O rinsavì. Lese për lese. Digerì për digerì. Vive për vive. Amé për amé. Opura nò.

Cost corpos volum ëd 450 pàgine a racòj desin-e d'artìcoj american ëd controinformassion. Comprèis un longh artìcol ëd Roberto Quaglia ansima ai fàit ëd l'11 setèmber. A l'é ël prim artìcol dl'antologìa, recensì ëdcò ansima a Repubblica, ansima al Venerdì ëd Repubblica (1 e 2), ansima a Liberazione e quàich desin-a d'àutre testà.

Se i veule contaté cost mutant
ch'a càmbia soa facia con ël temp,
i seve com fé.

Se i lo seve nen, CLICHÉ SÌ

Se pròpi i-i rive nen, andé a fé-ve benedì

Ùltima modìfica, 2 fëvré 2006

Tùit ij test e j'imàgine contnù an "Astounding Quagliaspace", a peulo esse lesù, vardà, adorà, scarià sù 'l computer, stampà e tacà ant la propia cambreta, e copià sensa lìmit, MACH PËR USO PERSONAL. Tùit ij test e j'ilustrassion a son proprietà ëd Roberto Quaglia e a peulo nen esse dovrà antregh o an part sensa permess. Ël proget gràfich e le componenti gràfiche ëd ste pàgine a son proprietà riservà ëd Roberto Quaglia. Gnente ëd sòn a peul esse butà an vèndita o comsëssìa comersialisà a gnun tìtol sensa permess prima.

Buta un link a ROBERTOQUAGLIA.COM


	Ecco certi boton ch'it peule dovré për linké a cost sit CLICHÉ SÌ për trové ÀUTRE gràfiche tra cui serne