|
Torna a l'ìndice
Intervénto de Antonio BRUNO (P.D.R.C.)
  "Scignôr Prezidénte e coléghi, condivîddo tànte de-e cöse dîte da-o conseggié Quaglia, condivîddo meno l'enfâxi solaménte positîva, rispètto a 'n struménto che, çertaménte o l'é interessànte e ch'o pêu agiûtâ a rezòlve tànti problêmi.
In efètti o resta o problêma da promoçión do rêuo turìstico de Zêna, ch'ascì a tràverso sta réte, o pêu èse sviluppòu, coscì comme o sottoscrîto, donde andâ in vacànsa, o l'à çercòu 'n pòsto a bàsso cösto, a tràverso Internet, coscì o-o pêu fâ chiunque.
Però dêvo dî che sto aspètto o dovéiva, scì, promeuvilo o Comûne, i enti locâli, ma fórse i privæ dovéivan contribuî, ascì lô, in quarche mòddo.
Estremaménte interessànte, ma comùnque pùnto crìtico, o l'é quello da publiçitæ di atti conseggiâli, da comunicaçión, da poscibilitæ, pe-o çitadìn, d'accêde a informaçioìn. O l'é evidénte che no basta memorizâ 'na sêrie de paròlle pe podéi, pöi efettivaménte, rénde consultàbile tùtto questo, into senso ch'o ghe voriâ, segóndo mì, 'na grànde capaçitæ organizatîva pe podéi permétte, eventualménte, a consultaçión de tùtto sto materiâle.
O l'é evidénte che, se into dibàttito in sce 'n çèrto téma, i grùppi ò i çitadìn consultiàn o scîto zenéize, doviàn èse in gràdo de discriminâ, drénto a 'na grànde quantitæ d'informaçioìn, quello ch'o pêu interessâ.
Quello in sce cui no son coscì d'acòrdio o l'é l'enfâxi comme sto struménto pitturòu, ch'o poriâ rezòlve tùtti i problêmi de comunicaçión. O l'é vêo che ògni anno o se raddòppia o numero d'uténti che pòan accêde a tùtte ste informaçioìn, o l'é pûre vêo, però, che inte sto grànde mercòu mondiâle, a frónte de 'na percentuâle de l'umanitæ sénpre ciù rìcca, sénpre ciù con poscibilitæ de comunicaçión, o existe, ascì inta nòstra çittæ, fæte e debite proporçioìn, 'na quòta sénpre cresciénte de popolaçión sénpre ciù missa a-i màrgini.
Allóa, no riduémmo o problêma da comunicaçión tra i enti, a Giùnta, o Conseggio Comunâle e a popolaçión a-a disponibilitæ de pàgine Web, in sce Internet. Mì ritégno ch'a segge 'na cösa importantìscima e ch'a se pòsse fâ ascì fàcilmente, perché o no serve ciù èse 'n grànde programmatô pe costruîse da sólo 'na pàgina, basta sólo avéi 'n programma comme "Word 6.0" e o-o traduve lê, 'na pàgina multimediâle.
O resta, però, o problêma prinçipâle da comunicaçión tra e amministraçioìn, i conseggi e i çitadìn, che no pòan rezòlvise a questo, perché comùnque a saiâ 'na minorànsa ch'a poriâ permêtise o computer, avéi a vêugia d'adêuviâlo, avéi a vêugia de colegâse a Internet e, eventualménte, avéi a vêugia de no limitâse a-e pàgine ciù osè e ciù pornogràfiche ch'én disponìbili, comme tùtte.
O ghe vêu a poscibilitæ de 'na comunicaçión tra cöse o sucède drénto a-e amministraçioìn e e informaçioìn disponìbili e i çitadìn, poscibilitæ de 'n diàlogo ch'o no pêu restrénzise a-o aspètto che o coléga Quaglia o n'à propòsto, aspètto in sce cui son d'acòrdio. O no pêu restrénzise sólo a quello, ascì se l'Amministraçión a sviluppésse tùtto quello ch'o l'à dîto apénn-a o coléga Quaglia, o resta 'n problêma de comunicaçión tra niâtri e a çittæ, tra i çitadìn e e istànse intermêdie e 'n problêma de partecipaçión.
Çèrto, sto struménto, pe 'na çèrta quòta da nòstra çittæ, o pêu èse 'n struménto importànte, ascì de partecipaçión, perché se pòan fâ i cosidîti scîti Internet, in cui no gh'é sólo 'n aspètto passîvo da pàrte do çitadìn, ma ascì 'n aspètto propozitîvo, comme pe exénpio a pòsta eletrònica e tànte âtre questioìn.
Niâtri sémmo favorévoli a-i órdini do giórno propòsti da-o coléga Quaglia, evidenteménte però inte 'n quàdro de no esaustivitæ da risoluçión di problêmi de comunicaçión tra Giùnta e Conseggio; Conseggio e çittæ e fòrse polìtiche, ch'o dêve vâlise de sto struménto, ma o no pêu assolutaménte pensâ de rezòlvilo in toto con questo".
Antonio Bruno
Torna a l'ìndice
Intervénto de Claudio BASSO (P.P.I.)
  "Scignôr Prezidénte e coléghi conseggié, ascì mì voéiva fâ quarche consideraçión in sci-i problêmi che a moçión do coléga Quaglia a l'à posto a l'atençión do Conseggio.
De seguo con 'na enfâxi diversa, rispètto ascì a-e magnìfiche sòrte e progressîve de sto struménto.
Çertaménte ancheu in bâze a quarche dæto che émmo racòrto, Internet o l'é raggìonto da incirca 300.000 uténti ufiçiâli, in Italia, e incirca 1 milión d'uténti indòtti, se pensémmo che, a frónte d'ògni accèsso, existan armeno âtri trêi fruitoî, i cosidîti no ufiçiâli, do servìçio.
Però o l'é sénsa dúbbio vêo che tùtte e proieçioìn ne pòrtan, inte 'n pròscimo futûro, a 'n allargaménto quæxi geomètrico da potençialitæ d'accèsso a sti servìçi.
Créddo che ancheu o segge importànte parlâ de sta poscibilitæ, pe armeno doî motîvi fondamentâli: primma de tùtto perché gh'é da èse assolutaménte preparæ a sta evoluçión. Segóndo motîvo: perché o l'é assolutaménte necessâio èse prezénti e dónca èse pàrte attîva inte sto procèsso evolutîvo da réte.
Gh'é da èse assolutaménte preparæ a sta evoluçión, ascì perché l'atuâle tecnologîa a no rapprezénta çertaménte 'n pùnto d'arîvo. L'evoluçión tecnològica, pe assegurâ a-o çitadìn 'n servìçio ch'o segge a-l'avanguârdia e de longo puntuâle, in tèrmini de qualitæ e quantitæ, a l'é ancón tùtta da descrôve. Tùtto o fenòmeno de-e fîbre òttiche o se pón inte sta direçión.
Çertaménte questo o consentiâ d'ofrî e fornî servìçi a còsti economicaménte ciù contegnûi, senscibilménte ciù contegnûi, rispètto a quànto, ancheu, e normâli proceduâ ne indûan a fâ, ma gh'é da èse prezénti e dónca avéi 'na pàrte attîva inte sto procèsso evolutîvo, ascì perché se considerémmo a réte Internet comme 'n procèsso de mòda, sémmo conpletaménte feua strâda. A dêve èse vìsta comme 'n servìçio che, in particolâre inte-e realtæ locâli, o serve a discôre co-o çitadìn.
Poscibilitæ d'allargâ a dismizûa o baxìn d'uténsa e d'accèsso a-e informaçioìn, con servìçi ch'én attîvi in manêa quæxi continuatîva, o consentiâ l'accèsso d'informaçioìn che normalménte e struttûe pùbriche no son in gràdo d'attivâ co-i normâli procèssi informatîvi.
O l'é pròpio sta caratterìstica do servìçio d'informaçión a servìçio di çitadìn uténti, ch'a dovéiva connotâ in manêa particolâre a prezénsa de 'na Civica Amministraçión inte sto settô.
Sto obiettîvo de prezénsa in sciâ réte Internet, da pàrte do Comûne de Zêna, ascì in sciâ bâze d'esperiénse che za son stæte avviæ, pur con tànte dificoltæ, in âtri comûni, o se raggìonze, a mæ giudìçio, a tràverso trêi passàggi: a colettivitæ, a gestión de-e informaçioìn e a fornitûa de vêi e pròpi servìçi a l'uténsa.
In sce sto pùnto gh'é da dî che existan za, in sciô tesciûo çitadìn, realtæ ch'én in gràdo de fornî 'n ànpio suppòrto informatîvo, relativaménte a-a poscibilitæ de trasmétte informaçioìn locâli in sciâ réte Internet. O saiæ mòlto oportûno, da sto pùnto de vista, evitâ duplicaçioìn e no framentâ quànto o l'é za immésso in sciâ réte, çercàndo, invéce, colaboraçioìn, in tèrmini de fornitûa de servìçi che, de seguo, rendiéivan meno onerôza a creaçión e a gestión de 'na banca dæti in sciâ çittæ e portiéivan de seguo a esténde a bâze informatîva, praticaménte a còsti economicaménte mòlto contegnûi.
A colettivitæ, comme za o l'é stæto realizòu in quæxi tùtti i comûni italiàn za prezénti in sciâ réte Internet, a dêve èse attuâ a tràverso fornitoî de servìçi, ch'én za prezénti e operànti inta nòstra çittæ, ch'én in gràdo de garantî 'na elevâ qualitæ, in tèrmini de continuitæ e poténsa de-e connescioìn.
Naturalménte ghe son ascì tùtte e questioìn derivànti da l'assisténsa e da-a competénsa che sti servìçi an de bezéugno 'na vòtta avviæ.
O l'é oportûno che st'ativitæ a vegne fæta da apparæ za existénti, che conséntan 'na riduçión do cösto d'inplementaçión e 'na provâ competénsa. A questo o dêve èse gionto a poscibilitæ de predeterminâ totalménte i còsti de quello che se stâ aprontàndo, evitàndo, coscì situaçioìn de bilàncio imprecîze ò pòco ciæe, che âtre vòtte, pròpio into cànpo de l'informàtica, o l'à costréito e Civiche Amministraçioìn a continue córse pe 'n ulteriô aumento de còsti no prevìsti e no programmæ in sede d'installaçión.
Çertaménte, pöi, a disponibilitæ de spâçi Internet, a pêu portâ a immagazinâ moltéplici informaçioìn che van da-i verbâli di Conseggi Comunâli, de-e Commiscioìn, a-e delìbere, a-e ordinànse do Sìndaco, a-i atti amministratîvi, che pòan èse anpiaménte consultàbili in ténpo reâle, con tùtte e proceduâ ch'én za nòte a tànti uténti de sto tìpo de servìçio.
Ma quello ch'o rénde particolarménte eficâce sto tìpo de servìçio, o l'é sta immediatéssa inte l'attuâ 'na sòrta de fî dirètto co-o çitadìn, ch'o pêu mandâ suggeriménti, conséggi, domànde a l'Amministraçión Comunâle; a poscibilitæ de creâ mòduli miræ, che conséntan de racôugge informaçioìn za preventivaménte catalogàbili rapidaménte in sce data base, pe ulteriôri analixi; o consénte d'avéi, in fórma dirètta, a tràverso questionâri miræ, quello ch'o l'é l'ìndice de gradiménto in sce 'na eventuâle propòsta, ò quello ch'a l'é a reâle exigénsa de 'n quartê ò de 'na pàrte de lê, rispètto a-i problêmi da Civica Amministraçión.
Sta réte cìvica çitadìnn-a, a pêu èse creâ a còsti competitîvi e controllæ, fìnn-a da sùbito, e o l'é auspicàbile che da sto pùnto de vista, mì m'auguro che pöi l'Assessô, in sce questo, o pòsse za fornîne quarche indicaçión, 'na indàgine informatîva, in sce quànto o resulta èse za existénte e o coordinaménto de-e risórse intèrne a-a Civica Amministraçión, ma ascì prezénti in sciô teritòrio zenéize, o pòsse consentî d'analizâ fìnn-a in fóndo i còsti pe l'attivaçión de 'n servìçio sperimentâle inte sto senso, ma ascì a seu capaçitæ d'evoluçión, a poscibilitæ de fornî servìçi, a capaçitæ d'èse flescìbili inta interconnescion de realtæ existénti co-i problêmi da Civica Amministraçión.
Vorriéiva conclûde con quarche osservaçión, che meritiéivan de seguo ascì 'n aprofondiménto inte 'n âtro contèsto: inte sto dibàttito, vegnan pòsti i acénti in sce-e caratterìstiche positîve ch'o l'à sto tìpo de servìçio.
Créddo che, comme dixéiva a-o prinçìpio, a necessitæ che o Conseggio Comunâle o se pónne sto tìpo de problêma, pe èse preparæ a sta evoluçión e pe èse prezénti e dónca pe fâ 'n rêuo attîvo inte sta direçión, a no ne pòsse fâ asconde che con sta evoluçión dirompénte se prezéntan scenâri totalménte inêditi, che ciàman in câuza ascì o mòddo mæximo de fâ polìtica, che ciàman in câuza i critêri da cosidîta democrazìa rapprezentatîva, coscì comme l'émmo vivûa e aprofondîa fìnn-a òua. A poscibilitæ d'introdûe 'na sòrta de vöto telemàtico, sólo pe conósce e opinioìn, ma inte 'n futûro oramâi pròscimo, ascì pe favorî l'acénto in sce 'na propòsta, in sce 'na decixón da piggiâ inte 'n senso, ciuttòsto che inte 'n âtro, o ne dêve métte giustaménte in condiçioìn d'aprofondî ascì o rêuo de 'na Civica Amministraçión, ch'a se pónne de frónte a sta evoluçión telemàtica con 'na iniziatîva contra i rìschi de 'na neuva esclusción, contra i rìschi de neuve discriminaçioìn ch'én indòtte da-a innovaçión tecnològica.
Inte sto senso mì véddo importànte l'iniziatîva de 'na Civica Amministraçión, ghe son problêmi d'accèsso che, pe-i rilevànti còsti de tìpo econòmico, a tànti no son consentîi, ghe son problêmi d'educaçión a neuvi lenguàggi, d'educaçión a neuve proceduâ. Quarchedun za o pârla de sénsa-tétto digitâli, ò o pârla de sùd digitâle, inte 'na realtæ mondiâle ch'a prevéde a divixón, fìnn-a òua, tra 'n nòrd e 'n sùd do mondo, sólo in sci-i aspètti quantitatîvi ò qualitatîvi, pe comme sémmo stæti tradiçionalménte portæ a consciderâli.
Sta innovaçión tecnològica a arve sti scenâri conpletaménte diversci. Créddo ch'o segge importànte che 'n livèllo locâle d'autonomîa e d'intervénto in sciâ realtæ, in sciâ vìtta quotidiànn-a di çitadìn, o se dêbbe pónne, giustaménte, sto tìpo de problêmi e o pòsse èse 'na ocaxón pe rezòlvili e pròpio pe consentî 'na neuva e maggiô libertæ".
Claudio Basso
Torna a l'ìndice
Intervénto de Franco BAMPI (Polo Nord)
  "Scignôr Prezidénte e coléghi, in sce a moçión prezentâ in sce Internet, vêuggio dî che son sostançialménte d'acòrdio co-i órdini do giórno prezentæ da-o conseggié Quaglia, armeno pe quelli che no riguârdan l'accèsso, o fæto che o Comûne o dêbbe garantî accèssi, perché créddo ch'a segge lì, o nödo do problêma e o l'é praticaménte o contribûto che inténdo dâ a sta discusción.
L'ho za dîto âtre vòtte, quàndo émmo parlòu da riorganizaçión informàtica do Comûne: ò o Comûne o ariva a adêuviâ, a avéi comme struménto de travàggio Internet, o Comûne mæximo e dónca a avéi de-e bâze de dæti accescìbili e dónca, eventualménte, con pìccola manutençión, senplicemente pe, magâri, fâ 'na pàgina che pöi a vegne missa in sciô circùito Internet, o pêu, apónto, métte i dæti a pròpia disposiçión in sciô circùito Internet, opûre l'operaçión Internet a no fonçionn-a.
Mì ritégno ch'a segge improponìbile 'na organizaçión Internet parallèla a quella do Comûne, perché allóa o cösto de manutençión de st'operaçión o poriæ divegnî rilevànte. Invéce o l'é diverso se o Comûne o struttûa a pròpia gestión informàtica di pròpi dæti, in mòddo tâle che pöi Internet o pòsse accêde e che se ghe pòsse accêde, eventualménte, con di còdichi d'accèsso, ò in sce scîti donde no gh'é tùtto. Mentre i atti pùbrici, che pòan èse e delìbere de Giùnta, de Conseggio Comunâle, e determinaçioìn dirigençiâli, pòan èse mìssi in sce scîti donde no se contròlla, basta inibî a poscibilitæ de scritûa, ma comùnque in sce scîti eventualménte duplicæ, donde no gh'é contròllo, pòan èsighe di dæti che no dêvan èse difûxi necessariaménte, opûre pòan èse difûxi sólo con di particolâri còdichi d'accèsso.
Però a lògica a l'é e a mì me pâ d'avéi rilevòu sta lògica inti órdini do giórno, armeno inti nn. 1, 2 e 3 fæti da-o conseggié Quaglia, ch'a l'é quella de stìmolo a-l'adêuvio ò a-a creaçión de 'n sistêma informàtico de travàggio pe-o Comûne, ch'o segge immediataménte adattàbile a 'n scîto Internet e dónca a èse pöi distribuîo in Internet.
Mì créddo che ò se fa coscì, ò gestî 'n scîto Internet separòu, o divénta onerôzo e a-a fìn o divénta obsolêto, sto scîto, comme dæti, comme agiornaménto, ecc.
Se questa a l'é a tendénsa, vâle a dî quella d'andâ a creâ di scîti, dónca di computers, donde i dæti pùbrici vegnan immagazinæ e dónca senplicemente réixi vixìbili da Internet, allóa poscémmo pensâ che questo o segge 'n scîto ch'o se agiórna automaticaménte, senò o divénta 'n scîto donde d'acordìscimo con quànto o dixéiva o conseggié Quaglia, poscémmo trovâ notìçie stòriche e e notìçie stòriche pòan èse multimediâli, pòan èse da tèsti, da mûxiche, da animaçioìn, da fotografîe, che se màndan in diretta, pensémmo a cöse o stâ fasendo adesso "Primonet", dónca efettivaménte a bellésse de Internet a l'é a multimedialitæ. Dónca poscémmo fâ ascì 'n'operaçión d'archîvio e d'accèsso a bâze d'archîvio, ma se vogémmo ascì ch'o segge 'n accèsso, pe exénpio, a-i travàggi do Comûne, o segge 'n accèsso in cui o çitadìn ch'o adêuvia Internet o pêu andâ a védde cöse se fa into Comûne, comme o òpera, atualménte, o Comûne, inte sto câxo, segóndo mì, Internet o dêve èse 'n mòddo con cui o Comûne o travàggia, senò no riusciêmo a tegnî agiornòu o scîto.
A mì me pâ che o conseggié Quaglia o l'agge pròpio cattòu sto aspètto inti órdini do giórno ch'o l'à propòsto".
Franco Bampi
Torna a l'ìndice
Intervénto de Flavio AZZARELLI (P.D.S.)
  "Scignôr Prezidénte e coléghi, Mì voéiva métte l'acénto in sce 'n aspètto che o conseggié Quaglia o no l'à esaminòu a basta, ò armeno, fórse, baddàndo a sto aspètto internettìstico de 'na vixón de Zêna in sce Internet e dónca apertûa globâle a-o mondo, fórse o s'é dimentegòu ch'o l'é importànte ascì 'n rappòrto de Zêna co-a çitadinànsa.
E allóa créddo che a creaçión de 'na réte cìvica, ch'a l'é 'na cösa ch'a ne prême particolarménte, fórse a segge ascì 'n aspètto ulteriô d'evoluçión da nòstra çittæ e d'apertûa a sto mondo. Internet savémmo tùtti cöse o l'é e no perdémmo ténpo a rispiegâlo. A mì o no me fa manco tànta puîa d'èse riportòu in sciâ réte de-e réti, in quànto essèndo 'n mèzo de comunicaçión democràtico o l'é giùsto che ghe stagghe tùtto e tùtti, comme d'âtra pàrte o l'é e comme se pêu verificâ a tràverso 'n colegaménto ò 'na navegaçión. O nòstro grùppo ciù vòtte inte sta sede o l'à peroròu a creaçión de 'n scîto e a missa in lìnia do servìçio de pòsta eletrònica e domànda d'informaçioìn, cösa che o Comûne o pariæ ipotizâ pe-a fìn de setténbre. Acquixîi sti dæti, ne piaxiæ che sto tìpo de missa in lìnia d'informaçioìn o no foîse 'n mêro e sénplice bollettìn comunâle, o no foîse quarcösa de passîvo ma o foîse o ciù poscìbile interattîvo. Niâtri credémmo che 'na comunitæ struttuâ ch'a permétte a-a maggiô pàrte de-e famìggie de stâ, convîve, comunicâ in sciâ réte e scangiâse informaçioìn e esperiénse a segge 'n gròsso travàrdo.
O Comûne inte sto senso o pêu fâ mòlto: a tràverso 'na promoçión "internettiànn-a" de quella ch'a poriæ èse a vixón de un di tànti comûni ch'én in sce Internet se poriæ comensâ a raxonâ in sce 'n coinvolgiménto globâle d'associaçioìn, enti e quànti âtri én inta nòstra çittæ e inta nòstra provìncia. Comunitæ ch'a poriæ tranquillaménte rexéde in sce 'n quarcösa che porriéscimo ciamâ pe comoditæ "réte cìvica". Réte cìvica ch'a poriæ èse quello pèrno e quello quarcösa ch'o permettiæ a chi o no l'é specificaménte connèsso e o no pêu permêtise de connêtise a Internet de comunicâ e scangiâ informaçioìn. Regòrdo pe brevitæ che a réte cìvica a l'é 'na struttûa ch'a no gîa in sce Internet ma ch'a se pêu ciamâ e contattâ in ògni moménto a 'n sénplice numero de telèfono. O protocòllo ch'o vegne de sòlito adêuviòu pe Internet o l'à di passàggi 'n pö tècnichi, o l'à di caratterìstiche software e hardware che domàndan 'n maggiô appòrto da pàrte de l'uténte e o l'à di còsti vîvi d'accèsso che vegnan de sòlito sostegnûi da-o privòu pe-a mêra e sénplice connescion.
Inte st'òttica créddo che o Comûne o poriæ arvîse a-i çitadìn che fondamentalménte no son interessæ: a tràverso 'na campàgna de comunicaçión e informaçión se poriæ ciaraménte dî che o Comûne o l'à 'n neuvo mòddo de parlâ co-i çitadìn, 'na neuva modalitæ, 'na neuva metodologîa. Coesisteriéivan a sto pùnto dôe realtæ: ûnn-a quella, comme me piâxe definîla mì, televixîva, ò sa 'na modalitæ televixîvo dinàmica (Internet, e pàgine Web in sce Internet e eventuâli servìçi), 'na realtæ ciù de comunitæ, ò sa 'na réte cìvica, ch'a permettiæ a quæsìasi persónn-a, da quæsìasi pùnto da çittæ, de connêtise co-o fornitô d'informaçioìn. Fornitô ch'evidenteménte o saiæ o Comûne, ma no sólo o Comûne, ma quànti an interèsse a stâ in sce sta réte. Regòrdo che o Comûne de Torino o l'à deliberòu, con 'na delìbera se no sbàglio de Giùnta, a poscibilitæ d'offrî spâçio in sciâ pròpia réte cìvica a tùtte e associaçioìn e i enti che n'avéssan fæto domànda. Questo o l'à permìsso de creâ 'na gròssa struttûa a livèllo comunâle. O Comûne de Torino ancheu 15 mìlla çitadìn iscrîti che pàrlan, discôran, comùnican e se scàngian informaçioìn e opinioìn tra de lô. Questo o l'à permìsso de creâ 'na gròssa struttûa ch'a vîve e a s'autoaliménta de quello ch'o l'é l'appòrto d'associaçioìn, enti e privæ che fornìscian a-a struttûa réte cìvica informaçioìn quotidiànn-e. O comûne dónca o l'à misso a disposiçión 'n spâçio gratuîto drénto a 'na struttûa cìvica. O mæximo comûne o l'à realizòu 'n progètto ambiçiôzo. Ascì o l'é riuscîo a rimodellâ d'in gîo a 'n specìfico protocòllo, quello ch'abitualménte o l'é o protocòllo adêuviòu pe Internet, o TCPIP, o l'é riuscîo a ridefinî quarche ànbito do SED e dónca adêuviâ 'n protocòllo ch'o l'é tìpico de 'na réte a ànpio respîo in sce 'na struttûa comunâle, con notévoli facilitaçioìn inte l'inplementaçión evidenteménte de quelle ch'én e delìbere e atti che necessariaménte, co-i ténpi che se reputiàn ciù oportûni da pàrte de l'Amministraçión comunâle, doviàn inte 'n çèrto mòddo èse mìssi a disposiçión da çitadinànsa. Quella ch'a l'éa a lìnia che se tentâva de definî a l'éa 'n giùsto mixing tra e istànse prezentæ da-o coléga Quaglia, diverse, dovûe, e fórse a vòtte altisonànti sótta çèrti aspètti, ma comùnque inte-e intençioìn òttime, e quella ch'a l'é 'na istànsa fondamentâle, quella vâle a dî de no ritegnî o çitadìn forçatamente benestànte e de no ritegnîlo comùnque 'na persónn-a che in quæsìasi moménto o pêu acatâse 'n computer, piggiâse 'n modem, pagâ 'n alàccio e andâ a navegâ. Questo perché fondamentâle che sta comunitæ, se a saiâ coltivâ da l'Amministraçión, a l'agge tùtti i presuppòsti pe èse 'na comunitæ o ciù poscìbile avèrta, democràtica e eterogénea.
A sto propòxito niâtri émmo prezentòu 'n órdine do giórno, e a sto propòxito domandiéscimo de votâ sto órdine do giórno ch'o sommariaménte o propón i presuppòsti de 'na creaçión de réte cìvica a prescìnde da-i presuppòsti internettìstichi."
Flavio Azzarelli
Torna a l'ìndice
Intervénto de Renato PENCO (L.N.I.P.)
  "Scignôr Prezidénte, scignôr Sìndaco, assessoî e coléghi, a l'é 'na bonìscima idêa quella d'inserî Zêna inte 'n sistêma Internet mondiâle, perché Zêna çertaménte a l'à mòlto da dâ e mòlto da offrî. O conseggié Quaglia o l'à fæto 'n intervénto mòlto tècnico: evidenteménte o se n'inténde mòlto de sto settô. Ma vogémmo fâ conósce Zêna pe cöse? Pe fâ védde e bellésse, d'acòrdio. Fórse émmo 'n archîvio ùnico a-o mondo, che ascì i inglêixi vegnan a consultâ. Ghe fémmo védde l'Acquario, bellìscimo, segónda ò tèrsa struttûa mondiâle. Pöi quàndo vegnan i turìsti cöse ghe fémmo védde? Di gabinétti che son costæ centenâ de milioìn særæ co-i lucchétti, 'n sottopàsso che da sètt'anni no se riêsce a finî, ghe fémmo védde e strâde che pàian percórsi da giùngla amaçònica, di marciapê che no son manco ciù dégni de sto nómme, gallerîe che no son ciù gallerîe ma son di camìn orizontâli, ciìn de rumenta. Çîto a tâle propòxito quello sótta vîa Madre di Dio, çîto quello in vîa Albertazzi ch'o l'é 'n ricettàcolo de rumenta. Ghe faiêmo védde tùtte e rumente ch'émmo a Zêna. Comùnque sémmo favorévoli a fâse védde pe-o mondo."
Renato Penco
Torna a l'ìndice
Intervénto de Carlo SCHENONE (G. Misto)
 
"Dòppo sto intervénto coscì specìfico e tècnico ch'o l'à ascì riscòsso l'aplàuso do pùbrico me sentiò 'n pö imbarassòu a fâ de-e valutaçioìn ciù precîze. Quàndo, me pâ a setténbre, son stæte fæte de-e anticipaçioìn da-i giornâli in sce 'na pròscima réte cìvica do Comûne me domandâva apónto cöse o saiæ stæto. No ho capîo perché allóa o vegnîva prezentòu comme assessô competénte l'Assessô Cosma: no sò se adesso invéce a cösa, comme probabilménte me pâ ciù corrètta, a l'é passâ a-l'assessô ch'o s'interèssa de l'informàtica. Êo interessòu pe riuscî a capî che tìpo d'intervénto o l'éa stæto prevìsto relativaménte a-a prezénsa do Comûne in sce Internet. In pàrte se n'éa za parlòu de 'na prezénsa da pàrte de-e Istituçioìn Scolàstiche con l'esperiénsa da connescion de quarche istitûto zenéize, però quello ch'o vegnîva prezentòu o l'éa quarcösa de seguo ciù orgànico, in cui o Comûne o divegnîva reâle fornitô de servìçi in sciâ réte. Me interessâva perché ritegnîva importànte che l'inpostaçión de 'na prezénsa do Comûne in sce Internet a dovésse èse prevìsta a-o moménto da riorganizaçión do Comûne. Ritégno che l'introduçión e a prezénsa do Comûne in sce Internet a dovéiva èse l'ocaxón pe arivâ a 'n adêuvio intèrno a-o Comûne de ste tecnologîe, quella che òua comme òua a vegne dîta Intranet. A poscibilitæ vâle a dî de connêtte e vârie sottopàrti do Comûne con ste tecnologîe: o che o pêu èse a sénplice connescion missa a disposiçión di vâri ufìçi comunâli de cazélle de pòsta eletrònica a tràverso e quæ ascì scangiâse a documentaçión, sénsa aspeitâ che i fattorìn gîan pe tùtta a çittæ, comme quarcösa de ciù sostançiâle comme tùtto 'n sistêma de distribuçión eletrònica di documénti. Questo o l'é 'n pàsso importànte, 'n pàsso ch'o rendiæ realménte eficâce ascì 'na prezénsa do Comûne in sce Internet, in sce quæsìasi meccanìsmo ch'o permétte d'accêde telematicaménte a-o Comûne. Fasso 'n exénpio mòlto sénplice. O podéi seguî 'na pràtica ascì da 'n pùnto de vista eletrònico, fâ in mòddo che 'na pràtica a mîgre drénto a l'organizaçión comunâle dirèttamente in sce suppòrto eletrònico o permétte scîa drénto de verificâ comme se mêuvan sti documénti, e dónca l'eficàccia de l'organizaçión mæxima, scîa o divénta facilménte 'n meccanìsmo a tràverso o quæ 'n quæsìasi çitadìn o pêu savéi quæ o l'é o stâto a cui a l'é arivâ 'na pràtica de seu interèsse.
A-o aspètto da trasparénsa o dovéiva pöi colegâse, e o Comûne da sto pùnto de vista o l'é l'ùnico ch'o realménte o pêu fâlo comme pròpio interèsse, tùtto o discórso da partecipaçión. A partecipaçión di çitadìn che, òua comme òua, càngian ascì soçialménte l'interaçión polìtica tra de lô, a l'à de bezéugno de neuvi canâli. Se 'na vòtta a partecipaçión polìtica di çitadìn a l'éa fæta quæxi esclusivaménte con assemblêe fumôze, òua comme òua ste modalitæ de partecipaçión stàn sénpre ciù perdéndo d'interèsse e eficàccia, mentre ghe son âtri aspètti e metodologîe che permettiéivan de raggiùnze 'na partecipaçión che senonò a discàpito da democraticitæ mæxima da vìtta polìtica andiéivan a pèrdise. Da sto pùnto de vista, se ritégno importànte che o Comûne o arîve a 'na organizaçión intèrna ch'a prevéde 'na connescion in réte de tùtta quànta a seu struttûa in mòddo da podéi rénde fàcile, agevolâ, e agiornâ ascì a trasparénsa vèrso l'estèrno, d'âtra pàrte o l'é ascì importànte che o Comûne o se dòtte de struménti che perméttan 'na partecipaçión. Me rifasso inte sto câxo a quello ch'o proponéiva Azzarelli. Ciù che pensâ d'installâ e realizâ e cosidîte ciàsse telemàtiche, dónca lêugi d'incóntro telemàtico di çitadìn in sce Internet, cösa ch'a domànda d'âtra pàrte ascì 'n mìnimo ma significatîvo inpegno ascì da pàrte do çitadìn se no âtro pe avéi 'na connescion Internet a disposiçión, ascì mì preponderiæ maggiorménte in sce l'apròccio fæto a tràverso réti cìviche ò comme se dîxe in gèrgo BBS, réti cìviche organizæ in fórma de BBS, dónca con 'n accèsso ch'o domànda esclusivaménte 'n calcolatô ch'oramâi o l'é prezénte no dîgo inta maggiorànsa ma inte 'na bónn-a percentuâle de-e câze italiànn-e, e 'n modem ch'o domànda 'na spéiza ùnica de 'n centenâio de mijæ de lîe ò pòco ciù. 'Na réte cìvica dónca ch'a l'agge 'na maggiô facilitæ d'accèsso, a dagghe a disponibilitæ d'incóntro, 'n confrónto e ascì 'n scàngio d'informaçioìn, e ch'a pòsse èse, pe-a pàrte ch'a pòsse èse interessànte e ùtile, connèssa a-i servìçi de Internet. Inte sta manêa, se da l'âtra pàrte o Comûne o l'é struttuòu in manêa tâle da avéi 'na pròpia organizaçión cablâ, o saiæ poscìbile métte a disposiçión da réte cìvica ascì informaçioìn che parêgio saiéivan accescìbili a tràverso Internet. Però no ritegnîæ, se ritégno ùtile e importànte che l'accèsso o pòsse avegnî a tràverso Internet, ch'a segge l'ùnica poscibilitæ. Se un o ipotîza 'na réte cìvica o pêu integrâla con 'n accèsso a Internet, fasséndo migrâ e informaçioìn che se çèrcan in sciâ réte cìvica ascì in sce Internet; o contrâio o no l'é coscì automàtico.
Da sto pùnto de vista o l'é importànte che o Comûne o arîve a sti doî aspètti: l'organizaçión intèrna ch'a permétte 'na trasparénsa e a partecipaçión a tràverso de-e réti cìviche. Comme questo o se realîze, son convìnto ch'o dêbbe realizâse ascì appoggiàndose in sce quello ch'o existe za. Otre tùtto in çittæ, contrariaménte a âtre çittæ, émmo ascì ciù de un fornitô de servìçi de sto génere ch'o l'à competénse e professionalitæ, che poîan ascì ridûe notevolménte i còsti rispètto a 'na struttûa de sto génere organizâ dirèttamente da-o Comûne. Da sto pùnto de vista son convìnto che o Comûne o dêbbe avéi ciù 'na funçión d'organizatô de l'accèsso, dòppo de che se pêu appoggiâse in sce-e realtæ existénti pe-a seu concretizaçión. In qualitæ d'organizatô probabilménte ûnn-a de-e cöse che o poriæ fâ o Comûne a l'é quella de prezentâ 'n vîzo orgànico da çittæ. Òua comme òua in sce Internet, a mæ conoscénsa, ghe son sètte ò éutto scîti che prezéntan Zêna. Én scîti che prezéntan a çittæ spésso con informaçioìn repetûe, comme i orâri di muzéi ecc.. Inta fattispéçie gh'é o Comûne de Zêna con 'n scîto de l'Assessoròu a-a Scheua, 'n âtro scîto fæto da Pangea Informagiovani, 'n'âtra sottopàrte do Comûne, 'n âtro ch'o se ciamma Genova Virtuale on Page, con 'na bachéca donde lasciâ mesàggi in sce Genova, donde generalménte nisciùn o lascia 'n gran che; 'n âtro ancón de l'Ènte do Turìsmo, e 'n âtro infìn donde ghe son informaçioìn d'Afrodite de l'Università di Genova, con rimàndi a teàtri e cöse de sto génere. In ciù se pêu gionze ascì Primonet ch'o l'é 'n âtro exénpio de sto génere. Ghe son dónca tànti scîti in sci-i quæ se poîan avéi informaçioìn in sce Zêna, ma spésso e voentêa ste informaçioìn no son agiornæ. A cösa che o poriæ fâ o Comûne a l'é fâ in mòddo che, gràçie ascì a-i sistêmi che perméttan 'na navegaçión multimediâle, l'apròccio a Zêna o segge un ma ch'o segge fæto in manêa che e risórse séggian adêuviæ pe avéi 'n agiornaménto de 'n scîto ascì complèsso, costituîo da ciù fornitoî d'informaçioìn, ma ch'o vegne fæto in manêa eficâce pe-a çittæ.
O statûto do Comûne o prevéde l'existénsa de 'n notiziâio: o-o prevedéiva primma ancón che vegnîsse a léze in sciâ trasparénsa e o l'é 'na cösa che o Comûne o dêve doverozaménte realizâ. Questo o poriæ èse, ascì se o no poriæ esaurî l'intençión ch'a l'é into statûto, 'n notiziâio prezénte in sce réte cìvica ò Internet. A sto pùnto sciòrto 'n àtimo da l'argoménto specìfico, però rónpo 'na lància açochè sto notiziâio o vegne realizòu finalménte; gh'é de bezéugno che o Comûne o sciòrte, che armeno quello ch'o sucède drénto a sta âula, ma in generâle quello ch'o sucède into Comûne o sciòrte e o segge maggiorménte conosciûo, no sólo comme comunicaçión de l'Amministraçión ma ciù in generâle comme comunicaçión de tùtto o Comûne, dónca ascì into câxo do Conseggio Comunâle. 'Na vòtta gh'éa stæta 'na propòsta de trasmétte i conseggi comunâli vîa televixón; 'na vòtta vegnîvan trasmìssi vîa radio. O l'é poscìbile ipotizâ comme in quarche âtra çittæ 'n giornâle menscîle, produto dirèttamente da-o comûne, ascì autofinançiòu con publiçitæ ò cöse do génere, in cui e vârie realtæ, scîa quelle dirètte da l'Amministraçión, scîa ascì quelle polìtiche, dónca ascì i vâri grùppi, poîan sciortî e comunicâ a-i âtri. Dónca in ògni câxo sto vìncolo do statûto ch'o prevéde o notiziâio o no l'é stæto realizòu a parécchi anni da-o moménto in cui sto statûto o l'é stæto approvòu. Càtto dónca l'ocaxón de sto invîto d'adêuviâ Internet pe fâ in mòddo che o Comûne o sciòrte vèrso i çitadìn pe allargâ l'invîto prevìsto drénto o statûto.
'Na ùrtima cösa a riguârda l'accescibilitæ. Òua comme òua a Biblioteca Berio a l'aviâ 'na neuva sede in cui o l'é prevìsta 'na notévole disponibilitæ de neuve tecnologîe pe podéi accêde a-e informaçioìn. Inte sto câxo 'n âtro aspètto atualménte existénte én i spòrtelli Citycard, in cui di sénplici calcolatoî vegnan adêuviæ senplicemente comme spòrtelli. Coscì pûre ghe son âtre de-e situaçioìn in cui coscì pûre ghe son vâri pòsti pùbrici ch'an a disposiçión calcolatoî pe l'accèsso e o reperiménto d'informaçioìn fornîe da-o Comûne. Allóa, pròpio pe evitâ quella ch'a vegnîva citâ da Basso e in pàrte da Bruno, l'emarginaçión informàtica, vâle a dî che chi o no pêu permêtise d'avéi i struménti suffiçénti pe 'n accèsso o vegne esclûzo da tùtte ste poscibilitæ che vegnan fornîe, sti struménti poriéivan èse adêuviæ rendéndoli meno specìfichi pe fâ in mòddo che e persónne quæsìasi poîan accêde a-e informaçioìn che âtri fornîi de 'n pittìn ciù de risórse riêscian a procuâse senplicemente acatàndose i struménti."
Carlo Schenone
Torna a l'ìndice
Intervénto de Anna Maria CASSOL (Assessô a l'Informàtica)
 "Çercaiò d'èse brêve, ma no perché vêugia elûde a questión che d'âtra pàrte a l'é estremaménte importànte e interessànte, ma perché pénso che dovémmo trovâ 'n sistêma d'informaçión continua, recìproca, in sce l'evoluçión di travàggi rispètto a sto tìpo de struménti, coscì che no se trovémmo a inpegnâ o Conseggio Comunâle con ténpi mòlto lónghi in sce 'n téma de cui d'âtra pàrte émmo za parlòu into setténbre de l'anno passòu e che sénsa âtro o no l'à di moménti in cui se dàn rispòste, indicaçioìn, e o finìsce lì. Tùtt'âtro. Consentîme a brevitæ e consentîme o rimàndo che d'âtra pàrte inte un di órdini do giórno o conseggié Quaglia o domànda da chì a trêi méixi, poscibilménte preventivaménte in commiscion mì ritégno; dòppo i trêi méixi che o conseggié Quaglia o dâva, mì ve domàndo ch'o segge vèrso i primmi de novénbre pe consentî o travàggio che adesso ve illùstro. Créddo che no séggian ciù sfugìbili a riflescion, a preparaçión e o travàggio rispètto a-i struménti che ghe son ancheu into mondo. No se tràtta d'èse fanalìn de cova: se tràtta de travagiâ into mòddo ciù apropriòu co-e risórse che ghe son, risórse in tèrmini econòmichi e in tèrmini umàni. No l'é 'na Amministraçión, no sémmo niâtri Giùnta, no séi viâtri Conseggio che poscémmo çertaménte con 'n tòcco de bacchétta màgica métte in atto e modalitæ sùbito pe fâ fonçionâ e cöse into mòddo che séggian pöi accescìbili comme informaçioìn a tùtti i çitadìn. Vêuggio dî che quello che dixéivan i conseggié Basso, Schenone, Bampi, Bruno, vâle a dî che inpostâ o travàggio de flùsso d'informaçioìn drénto a l'ènte perché questo o l'agge ascì aspètti e poscibilitæ immediâte d'accèsso da l'estèrno o no l'é 'n travàggio da pòco. Çèrto o saiæ estremaménte costôzo costituî 'na dòppia organizaçión ch'a produve informaçioìn, in sce Internet ciuttòsto che in sce réte cìvica. Da 'n anno a sta pàrte gh'é 'n grùppo de chìnze persónne drénto a-o Comûne, persónne ch'òperan in vâri servìçi, ch'én travagiàndo, che s'én preparæ, ch'an fæto córsi, ch'an valutòu oportunitæ e modalitæ pe adêuviâ a-o mêgio i struménti mìssi a disposiçión da-e tecnologîe atuâli pe fâ de-e propòste che séggian veraménte fruìbili, e che no réstan quarche pàgina avèrta mâi ciù agiornâ, quarche banca dæti comensâ e mâi ciù réiza vitâle.
A questión fondamentâle a l'é çertaménte quella che inti vòstri intervénti avéi posto. Vâle a dî Internet e réte cìvica; modalitæ d'alimentaçión d'ind'i doî sti sistêmi d'informaçión e de comunicaçión co-i çitadìn, in mòddo tâle che no ghe segge spréxo d'energîe, sovrapposiçioìn de banche dæti, construçioìn ridondànti. O no l'à tànto senso colegâse a Internet pe avéi informaçioìn ch'én tìpiche da comunitæ locâle. O l'à senso pónne in sce Internet informaçioìn che o mondo o vêu avéi in sce Zêna. Se stâ travagiàndo: gh'é sto grùppo costituîo formalménte con ordinànsa do Sìndaco ch'o stâ travagiàndo in scî doî sti frónti. Dónca, cöse o significa e comme partî pe-a réte cìvica, quæ informaçioìn, e quæ de ste informaçioìn no ricostruîe ma allargæ, perché an o mæximo protocòllo de bâze de comunicaçión, portâ in sce Internet, e vixevèrsa. Niâtri pensémmo, e de questo ve tegniò informæ inta commiscion che faiêmo a-i primmi d'ötobre, d'èse pe quella dâta prónti a arvî o rappòrto co-o mondo a tràverso quarche pàgina in sce Internet e o rappòrto co-a çittæ a tràverso 'n sistêma de réte telemàtica çitadìnn-a, donde çertaménte ghe segge 'n rêuo do Comûne ma ghe segge ascì quello ch'o dixéiva o conseggié Azzarelli, ò sa 'n rêuo importànte de-e associaçioìn e âtri enti che vêuan métte in comunitæ e informaçioìn ùtili e scangiâse e comunicaçioìn ùtili.
O problêma ch'o l'é stæto posto, e o no l'é da pòco, de chi se esclûde e de chi no se esclûde, pensémmo d'affrontâlo, savéndo che ghe saiâ 'na evoluçión complesciva de sti struménti, dotàndo da sùbito sistematicaménte tùtti i spòrtelli do çitadìn di colegaménti necessâri. De mòddo che i çitadìn che no l'àggian dirèttamente in câ i struménti poîan avéi no sólo e mæxime informaçioìn, ma poîan ascì èse quelle sedi in cui se fa informaçión, se crea educaçión, comme sottolineâva o conseggié Basso. I spòrtelli do çitadìn vivificæ ascì da ste informaçioìn; 'n colegaménto de réte cìvica ch'o no segge necessariaménte con tùtte e mæxime informaçioìn de Internet, e naturalménte o continuâ tùtti i sviluppi in sce Internet che za ghe son, tìpo o colegaménto e o progètto, a cui o fâva riferiménto Schenone, relatîvo a-e Istituçioìn Scolàstiche e a-i colegaménti tra scheue. Quello che se dixéiva o giùsto mix o l'é quello in sce cui se stâ travagiàndo pe capî comme partî co-o pê giùsto. No poscémmo, e son segua che viâtri no o domandæ manco, imaginâ 'na apertûa e 'na immediâ preparaçión d'informaçioìn in sce tùtto quello ch'o existe drénto a-o Comûne. Savémmo ben che a ancheu o materiâle de cârta ch'o viàgia o l'é enòrme, e dónca gh'é da contemporaneaménte - cösa che se stâ fasendo - travagiâ pe informatizâ e banche dæti comunâli. L'atençión, e questo o l'é o cómpito de sto grùppo de travàggio, a l'é che tùtto o segge sénpre estremaménte colegàbile. Sti aspètti no son aspètti fàcili, e se capìsce a complescitæ organizatîva quæ a segge: se tràtta de partî con di tasélli che vàddan man a man a construî 'n puzzle ciù complescîvo, sénsa che pöi se descêurva de dovéi cacciâ vîa quarcösa perché quello tòcco che s'é fæto o no l'é ciù ùtile. In sce questo se stâ travagiàndo. Mì riprométto a-i primmi d'ötobre de fâ 'na prezentaçión orgànica do stâto d'avansaménto di travàggi, scîa pe quànto riguârda a questión da réte cìvica, scîa pe quànto riguârda a questión da connescion Internet. O problêma gròsso de l'educaçión in sce sti aspètti, educaçión da pàrte de chi o travàggia drénto a-o Comûne e da pàrte di çitadìn o l'é 'n pö a scomméssa che se stâ zugàndo de sti ténpi 'n pö da tùtte e pàrti. E dónca l'âtro aspètto importànte o l'é adêuviâ tùtte e esperiénse positîve che se son fæte inte sto senso. Inte sto moménto sto grùppo de travàggio, e mì mæxima insémme co-l'Assessô Cosma émmo riscontròu che efettivaménte a çittæ de Torino a l'é quella, comme citâva Azzarelli, ch'a ne stâ dàndo ciù agiûto e con cui sémmo ascì operàndo pe travagiâ a-o mêgio in sce sti aspètti d'interconnescion tra 'n sistêma e l'âtro.
Pe quànto riguârda l'insémme di órdini do giórno ch'o l'à prezentòu o conseggié Quaglia, me sentiæ d'accettâli comme raccomandaçioìn. In sce quarchedùn niâtri sémmo d'acòrdio in pàrte. Ghe n'é un donde o conseggié Quaglia o dîxe che o s'inpegna o Sìndaco e a Giùnta a métte in sce Internet, in sce-e pàgine Web, tùtte e sedûte do Conseggio Comunâle conpréixi i atti, e delìbere, i regolaménti, e ògni génere de regolaménto in sciô quæ se pòsse fâ a ricèrca co-a tècnica de l'ipertestualitæ ecc.. Niâtri in sce sta cösa no poscémmo che dî ch'o saiæ bèllo. No pòsso dabón, o-o dîgo onestaménte, garantî i ténpi pe 'na cösa de sto génere, coscì comme no créddo de podéi garantî i ténpi in sciô fæto che tùtti i grùppi conseggiâli poîan accêde a Internet inte 'n dæto ténpo, se no analizàndo i còsti di accèssi attîvi e passîvi, che d'âtra pàrte stémmo verificàndo. A mì o resultiæ veraménte spiaxévole dî che 'n órdine do giórno o va ben, 'n âtro nò, 'n âtro fìnn-a a 'n çèrto pùnto. L'insémme o l'é 'n insémme d'ùtili e importànti indicaçioìn che sénto de podéi dî che tegnémmo in giùsta consideraçión, conpréize e indicaçioìn in sci-i accèssi. Ascì chì se tràtta de valutâ i còsti; mì no créddo che saiêmo in gràdo de garantî l'accèsso gratuîto a Internet a tùtti i çitadìn ch'o-o domàndan. Én tùtti aspètti che van attentaménte valutæ in tèrmini de còsti, in tèrmini de ténpi, in tèrmini de reâli poscibilitæ, perché no créddo onèsto dî de scì e no savéi quàndo o-o fémmo. Pe-o quæ scîa i seu órdini do giórno, scîa quello do conseggié Azzarelli, i acugémmo voentêa comme indicaçioìn, comme importantìscime raccomandaçioìn e suggeriménti, sénsa dovéi arivâ a votâli a un a un. Se andémmo a votâli a un a un comme precîxi órdini do giórno, in sce questo franchaménte ho 'n pö de dificoltæ perché vorriéiva che foîsan realìstichi i ténpi de realizaçión."
Anna Maria Cassol
Torna a l'ìndice
2. intervénto de Roberto Quaglia (L. Pann.)
  "Son disponìbile açochè vegnan acugéiti comme raccomandaçión a patto che, quàndo d'in gîo a ötobre novénbre ò quàndo o saiâ, o vegniâ relaçionòu da pàrte da Giùnta in sce quello che se saiâ pe quell'època fæto, mì no me ritegnésse soddisfæto, me segge consentîo de riportâ a l'órdine do giórno inte 'na quantitæ de ténpo minô de quella ch'a gh'é vosciûa sta vòtta o mæximo argoménto, e allóa riproponiò questi ciù tùtti i âtri che ritegniò oportûni. Ho prezentòu sta moçión o 25 de zenâ e a l'é stæta trattâ adesso. A ripresentiæ, casomâi e relaçioìn da Giùnta no me soddisféssan, però a quello pùnto vorriéiva avéi a garançîa de riuscîla a portâ in discusción primma da scadénsa do mandâto. D'âtra pàrte accètto che vegnan accettæ comme raccomandaçión dòppo avéi sentîo 'n parê do Segretâio Generâle o quæ in efètti o annotâva che in sce çèrte vôxe, comme quella da fornitûa gratuîta d'accèsso a-i çitadìn, cösa che d'âtra pàrte continuo a créde oportûnn-a e necessâia, o saiæ necessâio verificâ l'attuabilitæ in tèrmini de còsti e a velocitæ. A maggiô raxón sólo pe sti motîvi, pe-o fæto che compréndo a dificoltæ reâle de piggiâ decixoìn coscì ànpie inte 'n ténpo brêve, accètto che vegnan acugéiti comme raccomandaçión. Nondiméno dêvo regordâ che pròpio pe-a complescitæ do téma, ammìssa da l'Assessô e portâ a exénpio da-a mæxima, sostégno e ribadìsco che a maggiô raxón 'na commiscion specialménte dédita a-a gestión mêgio, ciù democràtica, de sta transiçión vèrso sto neuvo mass media ch'o l'é Internet a saiæ decizaménte oportûnn-a."
Roberto Quaglia
Torna a l'ìndice
2. Intervénto de Flavio Azzarelli (P.D.S.)
"Me paréiva che into nòstro órdine do giórno voéscimo pónne sólo 'n acénto in sciâ realizaçión de 'n stûdio de fattibilitæ e dónca l'eventualitæ de stançiaménti de 'n progètto esecutîvo. Me pàian fondamentalménte di atti amministratîvi, ò perloméno 'na procedûa e 'n iter. Se acugéi comme raccomandaçión 'n iter, me pâ 'na cösa 'n pö stràn-a. Me paréiva 'n mòddo de dî che a réte cìvica a podéiva avéi 'na attuabilitæ a tràverso di passàggi amministratîvi. Comùnque, me rimétto a-o vòstro giudìçio."
Flavio Azzarelli
PRESIDENTE GUGLIELMINO (P.D.S.):
"Dò lettûa di órdini do giórno prezentæ:"
Torna a l'ìndice
Órdine do Giórno n.1
Conscideròu che
- Zêna a l'à o màscimo interèsse de mejorâ a pròpia Comunicaçión vèrso l'estèrno da çittæ, coscì comme ascì de rénde ciù eficénte e scorrévole a Comunicaçión tra o Comûne e i çitadìn
- Internet o pêu çertaménte rapprezentâ 'n vâlido struménto pe consegoî sti progrèssi de Comunicaçión
- 'na inpostaçión illuminâ e stratègica, in mérito a-a Comunicaçión e Internet, a compòrta 'na notévole môle de travàggio protràtta into ténpo
- o contribûto che e fòrse polìtiche poîan apportâ, inta definiçión di contegnûi da rapprezentaçión che de Zêna se vêu dâ in sciô proscénio mondiâle de Internet, o l'é rilevànte e o no va dispèrso, costituéndo lê ascì 'na garançîa de democrazìa pe quello ch'o riguârda a scélta di contegnûi
O s'inpegna o Sìndaco e a Giùnta
a operâ, in materia de Internet, segóndo 'n lùcido disségno stratègico, istituéndo 'na commiscion pe-a Comunicaçión e Internet, a quæ a l'agge o cómpito de confrontâse in sce-e ativitæ de Comunicaçión do Comûne, e ascì in sciâ strutturaçión e in sci-i contegnûi da rapprezentaçión de Zêna che se inténde métte a disposiçión do Villaggio Globale in sce Internet, a garançîa do raggiungiménto da màscima qualitæ poscìbile e a tûtela de-e legìttime istànse polìtiche in materia.
Proponénte: R.Quaglia
(L.Pann).
Torna a l'ìndice
Órdine do Giórno n.2
Conscideròu che
- Internet o l'é o neuvo mass media emergénte
- 'na tempestîva e eficénte rapprezentaçión de Zêna in sce Internet, e in particolâre in sciô World Wide Web, a produiæ efètti vantaggiôxi pe-a çittæ, soviatùtto pe quànto o riguârda e ambiçioìn turìstiche da mæxima
O s'inpegna o Sìndaco e a Giùnta
a sviluppâ e rénde disponìbile in sce Internet 'n vasto archîvio dinàmico ch'o rapprezénte Zêna, o quæ o conprénde 'n'ànpia gamma e quantitæ de tèsti d'ògni argoménto con attinénsa a Zêna (es.: stòrico, turìstico, scientìfico, sportîvo, ecc.), coredæ d'imàgini, fotografîe, brani de mûxica zenéize, animaçioìn multimediâli, e travagiâ in futûro sénsa sòsta in sce sto archîvio, ò sa in sce sta Zêna Virtuâle, pe rendila de longo adeguâ a-i livèlli qualitatîvi e de poscibilitæ che o proséguo de l'sviluppo tecnològico o rendiâ man man poscìbili e necessâri
Proponénte: R.Quaglia (L.Pann).
Torna a l'ìndice
Órdine do Giórno n.3
Conscideròu che
- i verbâli de-e sedûte do Conseggio Comunâle vegnan de régola trascrîti e immagazinæ in sce computer sótta fórma de files, de mòddo che o saiæ assæ sénplice, pe no dî elementâre, gionzéndo a sti files i pöchi còdichi HTML necessâri, rénde sti verbâli consultàbili in sce Internet a chiunque a Zêna ò into mondo o l'interessésse consultâli
- a missa in lìnia in sce Internet di verbâli de-e sedûte do Conseggio Comunâle de Zêna e ascì de tùtte e delìbere, a saiæ 'n'operaçión tecnicaménte elementâre, 'na vòtta che o Comûne o se foîse dotòu de l'indispensàbile scîto de connescion permanénte a Internet, e che sta iniziatîva a se metteriæ a-l'avanguârdia, in Italia e in gran pàrte do mondo, pe quello ch'o riguârda i valoî da trasparénsa in sci-i atti amministratîvi e in sce-e posiçioìn e ativitæ de-e pàrti polìtiche
O s'inpegna o Sìndaco e a Giùnta
a rénde disponìbili in sce Internet, e in particolâre in sciô World Wide Web, e trascriçioìn integrâli de tùtte e sedûte (a partî da 'n dæto moménto) do Conseggio Comunâle, conpréixi i atti, e delìbere, i regolaménti e ògni génere de documénto ùtile, ordinæ e catalogæ, co-a tècnica de l'ipertestualitæ, segóndo 'na vâria e esaustîva gamma de critêri d'ìndixi e de ciâvi de ricèrca
Proponénte: R.Quaglia (L.Pann).
Torna a l'ìndice
Órdine do Giórno n.4
Conscideròu che
- l'importànsa da pòsta eletrònica, comme struménto de comunicaçión tra e persónne, a l'é in continuo aumento
- rispètto a-a pòsta tradiçionâle, a pòsta eletrònica a se distìngue pe-i minoî onêri ch'a compòrta, no essèndo necessâio o traspòrto fìxico de-e lettie, e pe 'na totâle ecologicitæ, no fasséndose con lê nisciùn adêuvio de cârta
- âtre çittæ e istituçioìn za fornìscian gratuitaménte a-i çitadìn indirìssi de pòsta eletrònica
- o l'é vantaggiôzo pe Zêna che a maggiô quantitæ poscìbile de çitadìn a segge fornîa de 'n indirìsso de pòsta eletrònica, primma de tùtto pe facilitâ e seu comunicaçioìn, e in segóndo lêugo ascì pe podéighe mandâ con maggiô rapiditæ, economicitæ e eficénsa eventuâli comunicaçioìn da pàrte de l'amministraçión
O s'inpegna o Sìndaco e a Giùnta
a garantî a ògni çitadìn ch'o ne fa domànda a poscibilitæ de 'n accèsso gratuîto, vîa modem, a-i servìçi speçìfichi da réte cìvica, e ascì 'na cazélla postâle eletrònica individuâle gratuîta, con eventuâli onêri mìnimi relatîvi a-o tràffico efettuòu
Proponénte: R.Quaglia (L.Pann).
Torna a l'ìndice
Órdine do Giórno n.5
Conscideròu che
- a l'é inprescindìbile e sénpre ciù o-o saiâ in futûro l'utilitæ de Internet pe chiunque o çèrche informaçioìn d'ògni génere
- Internet o rapprezénta o ciù eccellénte struménto atualménte existénte pe intrâ in comunicaçión con persónne de tànte âtre çittæ e de tànti âtri paêixi
- maggiô a l'é a quantitæ de Comunicaçión che i çitadìn zenéixi, in particolâre i zoêni, riêscian a stabilî con çitadìn de âtre localitæ, maggiô a l'é l'accresciménto spirituâle e o vantàggio a lóngo tèrmine da çittæ mæxima
- ciù saiàn i zenéixi in gràdo de navegâ in sce Internet, ciù Zêna a saiâ rapprezentâ into cosidîto ciberspâçio, con efètti positîvi a lóngo tèrmine de vâria natûa
O s'inpegna o Sìndaco e a Giùnta
a garantî a ògni çitadìn ch'o ne fa domànda, a poscibilitæ d'accèsso, a tràverso a réte cìvica, a-a navegaçión in sce Internet e in sciô World Wide Web, in mòddo gratuîto opûre a-o prêxo de cösto
Proponénte: R.Quaglia (L.Pann).
Torna a l'ìndice
Órdine do Giórno n.6
Conscideròu che
l'organizaçión di dæti in sce Internet, in assénsa de 'na corrètta organizaçión e coordinaçión, a pêu facilménte resultâ caòtica
O s'inpegna o Sìndaco e a Giùnta
a agî, in materia de Internet, in coordinaménto co-i âtri Enti Lìguri za attîvi into cànpo, comme pe exénpio a Provìncia, pe evitâ ridondànse e confuxoìn inta creaçión da Zêna Virtuâle.
Proponénte: R.Quaglia (L.Pann).
Torna a l'ìndice
Órdine do Giórno n.7
Conscideròu che
- Internet o l'é o struménto modèrno ideâle pe-a ricèrca d'informaçioìn d'ògni génere
- pe-e fòrse polìtiche che concórran a amministrâ sta çittæ o l'é fondamentâle e o-o saiâ sénpre ciù in futûro podéi dispónne da maggiô quantitæ e mêgio qualitæ poscìbile de struménti pe-a ricèrca d'informaçioìn ùtili
- quæsìasi çitadìn ch'o voésse métise in contàtto co-e fòrse conseggiâli, pe domandâ informaçioìn ò espónne problêmi, o dovéiva podéilo fâ ascì a mèzo pòsta eletrònica
O s'inpegna o Sìndaco e a Giùnta
a fornî a tùtti i grùppi conseggiâli l'oportunitæ d'accêde a Internet, pe fâ ricèrche e pe ricéve mesàggi e segnalaçioìn vîa pòsta eletrònica da pàrte da çitadinànsa
Proponénte: R.Quaglia (L.Pann).
Torna a l'ìndice
Órdine do Giórno n.8
Conscideræ urgénte a necessitæ de garantî 'na adeguâ prezénsa de Zêna in sce Internet
O s'inpegna o Sìndaco e a Giùnta
a prezentâ a-o Conseggio, intra trêi méixi da ancheu, 'na particolaregiâ relaçión in sce quànto o saiâ stæto za fæto in materia, e ascì 'n particolaregiòu progètto in sce quànto se saiâ stabilîo de fâ in futûro
Proponénte: R.Quaglia (L.Pann).
Torna a l'ìndice
Órdine do giórno n. 9:
- "Internet o l'é çertaménte un di moltéplici aspètti da comunicaçión interattîva e multimediâle.
- A réte de-e réti a resénte ancón, mâr-grado l'ànpia difuxón, de notévoli problêmi che into rappòrto çitadìn Pùbrica Amministraçión no dêvan èse tralasciæ; pe accêde a Internet o çitadìn uténte o dêve èse in posésso de ûnn-a ò ciù connescioìn e programmi adeguæ a-e exigénse do protocòllo Internet, a-a velocitæ de caregaménto de-e pàgine da vixonâ, a-a gestión quotidiànn-a de-e operaçioìn da fâ.
- Bologna a pâ èse ûnn-a de-e çittæ italiànn-e ch'a l'à realizòu 'na ipòtexi de fornitûa gratuîta a-o çitadìn de l'accèsso Internet, in realtæ e modalitæ son diverse e ciù scìmili a 'na bbs.
- A réte cìvica a dêve èse 'n pàsso fondamentâle da Civica Amministraçión perché a seu creaçión a permettiâ a-o çitadìn d'otegnî 'na sêrie d'informaçioìn scîa de sentîse pàrte de 'na "comunitæ" ch'a discôre, dibàtte, comùnica.
O s'inpegna o Sìndaco e a Giùnta
- a esegoî 'n stûdio de fattibilitæ in sciâ creaçión de 'na réte cìvica çitadìnn-a modellâ d'in gîo a l'esperiénsa de âtre çittæ italiànn-e (Torino, Milano, Roma, tànto pe citâne quarcheûnn-a);
- a provvéde a-a destinaçión de-e necessârie risórse inte l'ànbito do bilàncio preventîvo 1997 da inpiegâ inte l'attivaçión da réte cìvica zenéize;
- a no ritegnî a realizaçión de-e pàgine Internet in sciô Comûne de Zêna l'ùnica pàrte de 'n progètto de vixibilitæ e interaçión multimediâle co-a çitadinànsa.
Proponénti: F. Azzarelli, M. Fisci (P.D.S.).
I órdini do giórno da-o n. 1 a-o n. 9 vegnan acugéiti comme raccomandaçión.
|
