‹ Ìndice do scîto · Pàgina do mûzeo · 🌐 Lingua / Language

INDIVÌDUI UMÀN

significativaménte in relaçión con Roberto Quaglia
opûre nò

A photo of Roberto Quaglia



Da quàndo son divegnûi popolâri i social network, sta pàgina a l'à pèrso bónn-a pàrte da seu utilitæ. A lascio online pe motîvi archeològichi, e pöi perché continuo a stimâ bónn-a pàrte de-e persónn-e elencæ chì. Ovviaménte no agiórno sta pàgina da mòlto ténpo.

 

Questa a l'é 'na restrétta lista de indivìdui umàn significativaménte in relaçión con Roberto Quaglia. Opûre nò. In efètti, lô son in relaçión ascì con âtri eleménti da Realtæ. Da 'n çèrto pùnto de vista, tùtto o pêu èse consideròu comme in relaçión con Roberto Quaglia, coscì comme con tì e con quæsìasi âtro. A ben védde e cöse son tùtte interconésse inte 'n grànde, Grànde Tùtto.

Tuttavîa, poscémmo fâ distinçioìn tra e pàrti de sto Tùtto, che senò o devénta 'n'entitæ ecessivaménte inquietànte. Poscémmo fâ distinçioìn ascì perché fâ distinçioìn o l'é o passaténpo preferîo de quæsìasi un ch'o segge vîvo.
Dónca ne trovémmo de frónte a 'na lista de indivìdui contradistìnti da 'na lô particolâre e significatîva relaçión con Roberto Quaglia, quæsìasi cösa questo o vêugge dî. Tuttavîa questo o l'é o mæximo fâso, dæto che de tànto in tànto pòan vegnî elencæ chì sótta ascì persónn-e de no ecélso valô, ò che pe câxo ò entropîa an çessòu d'èse ò an smìsso de diventâ quello ch'aviêscian posciûo èse. In sto câxo a lô prezénsa inte l'elénco a l'é ûtile pe confónde e ægue. Âtre, a-e quæ invéce tegno mòlto, chì sótta no ghe son, perché magâri no l'an 'na homepage (quànta génte a-o mondo a no l'à 'na homepage!) ò sénplicemente mì no sô ch'a ghe l'an. Mêgio coscì. No se pêu calâ tùtte e carte. Divertîve dónca a giragiâ pe-e lô pàgine se pròpio no avéi de mêgio da fâ, sénsa mâi scordâ l'estrêma vaghéssa do significòu de quello che stæ fasèndo. E çercàndo de distìngue i indivìdui ciù significatîvi da quelli meno rilevànti, se ghe n'é (poriæ ascì no gh'én èsighe). Sô che con 'n pò de bónn-a voluntæ poéi fâghela. Aténti a-e alucinaçioìn. E de pù a l'assénsa de alucinaçioìn.


 



AVERTÊNSA: Quarche pàgina elencâ a poriæ èse in costruçión. Ascì e persónn-e mæxime chì sótta elencæ poriæn èse in costruçión. In efètti, o l'é mêgio ch'én in costruçión piuttòsto che in distruçión, spece se pe putrefaçión. Stæ a l'euggio. Aténti a-i cólpi de lànpo. O no dovéiva èsighe tròppa spùssa.


Tùtte e persónn-e inte sto elénco existan davéi. Ho verificòu personalménte. Insomma, mì e conòsco. Magâri no bìblicamente, ma e conòsco. E, cösa ciù importànte, me regòrdo de conóscile. Quarchedùnn-a e ho ascì toccâ. Ma pòco però. Comunque, no tròppo. Ò invéce scì?
   
Adaleta Maslo-Krkovic Artìsta e gràfica cròata trapiantâ otreoceàno.
Alessandro Fambrini Profesô a l'Univerxitæ de Trénto, vàlido scritô e de pù persónn-a squizîa.
Alessandro Testa Grànde pianìsta jazz, ecélso bongustâio, manager eficénte, fìn umorìsta e òttimo pensatô. Pe-o rèsto o l'é mato, cösa ch'a rénde tùtto mòlto ciù interessànte.
Andi Caragea Tuttòlogo de straordinârio acûme. De sòlito i tuttòloghi son di grén belinoìn. Andi nò. Perché o l'é 'n gênio. E o l'é in sciô sêrio.
Augusto Minoja Espèrto de Data Flow Management, quarcösa che mascìmo o me segge stæto spiegòu continuo a no capî cöse a segge.
Bernd Zillich Ecelénte fotògrafo e bón pensatô. Discréto bàrba, ma no pe tùtti.
Bobo Barbieri Probabilménte o mêgio gràfico ch'o gh'é in Ligùria. E pöi, comme dîxe Popi, Bobo o l'é Bobo.
Boris Dolingo Scritô e organizatô de Aelita, o prêmio profescionâle pe-e mêgio òpere de fantasciénsa russa, l'equivalénte di prêmi Nebula americàn.
Bruno Medicina (2) (3) Espèrto de comunicaçión, programmaçión neurolinguìstica, ârti marçiâli e âtro, fìn pensatô e ecelénte pianìsta.
Cecilia Dart-Thornton Scritôa australiànn-a de narratîva fantasy, a me s'é rivelâ sùbito comme 'na ciù ûnica che râra alchimîa de beléssa, inteligénsa e profóndo e positîvo senso da realtæ. Insomma, 'n fenòmeno. E dî che se sémmo conosciûi mòlto fugacementè.
Òttimo scritô italiàn de science fantasy e, mascìmo o fa l'avocàto, o l'é 'n èse umàn de grànde spessô e inteligénsa.
David Anderson Creatô de 'n çéntro de ricèrca in sci-i viaggi into ténpo. E de 'n'organizaçión de scànbi culturâli USA/Romania.
Florin Munteanu Scenziòu rumèno de grandìscima imaginaçión. Inventô. Espèrto de teorîa do càos, contròllo do càos, analixi frattâle di sistêmi complèssi e mòlte âtre cöse. Descrovitô do Volûme Àureo. Sheckley, dòppo che mì o portâi a çénn-a da lê, o comentò: Che òmmo fantàstico!
Francesco Grasso Affermòu scritô italiàn de fantasciénsa con spiccòu senso de l'umorìsmo.
Franco Forte Giornalìsta, crìtico e validìscimo scritô de fantasciénsa da-e mìlle iniziatîve.
Gabi Boiangiu Artìsta rumèna de 'na çèrta originalitæ, òua residénte in Inghiltèra.
Gennady Gilmanov Òttimo amîgo russo. Inteligénte e pregno de quella giùsta dòze de follîa necessâria a rénditi 'n indivìduo ûnico. O pârla 'n sacco de léngue, ma o seu blog o l'é in russo e o l'é mòlto cirìllico.
Gigi Picetti Nisciùnn-a definiçión a pêu racchiûde Gigi Picetti. Spésso, manco Gigi Picetti o riêsce a racchiûde Gigi Picetti.
Guido De Vecchi Grànde sonatô de viòlla e rafinòu costruttô d'archétti da viòlla.
Herman Prigann Originalìscimo artìsta austrîaco, autô de quarchedun tra i ciù vixonâri progètti vìsti inti ùrtimi deçénni.
Ian Watson

Vulcànico scritô britànnico d'estrêma originalitæ. In virtù do seu evidénte gênio o l'é in gràdo in quæsìasi moménto d'intrâ in ecelénte sintonîa con e flutuaçioìn surreâli da realtæ, e restâghe. Pe quelli a-i quæ sto argoménto o dîxe pòco, regordémmo che Stanley Kubrick o-o assùnse pe éutto méixi pe agiûtâlo into sviluppo de-e seu idêe.
Imants Belogrivs Editô lèttone da l'aspètto particolâre: o pâ comme 'na versción stilizâ d'Einstein, ma rispètto a quest'ùrtimo o l'é probabilménte 'na persónn-a ciù interessànte, e certaménte mòlto ciù vîva.
Jack Cohen Inconsùeto scenziòu britànnico, espèrto in scénsa da riproduçión sessuâle e autô de 'n bèl lìbbro in sciô Càos.
Jonathan Cowie Scenziòu ingléize, pe lóngo ténpo consulénte da Càmera di Lord britànnica in téma d'ecologîa, e organizatô de congrèssi de fantasciénsa.
Juraj Maxon Ascì conosciûo comme Mad Maxon. Artìsta slovàcco de notévole personalitæ.
Kamila Nemcova Notevolìscimo soggètto umàn sótta tùtti i aspètti.
Klaus N. Frick Capo-redattô da rivista todésca de fantasciénsa seriâle Perry Rodan.
Konstantin Krasnobaev Grànde fotògrafo russo, autô de diversci mæ ritræti (quarchedun publicòu da Penthouse), e grànde naratô d'aneddòti russi, talménte russi che ascì odôran de cirìllico.
Leonardo Wild (2)(3) Scritô equadoregno mòlto conosciûo in Germània. Persónn-a de grànde simpatîa.
Luigi Pachi Scritô de fantasciénsa, co-creatô de Delos, a rivista de Fantascienza.com e do Corriere della fantascienza, e manager e indivìduo squizîo.
Marco Vimercati Estrôzo publicitâio, autô de lìbbri in sciâ comunicaçión e ànima da trasmisción radio cult "Onde Storte".
Mario Quaglia Tra e seu ciù grâvi responsabilitæ, quella do fæto che mì existe. A bón intenditô...
Maurizio Frizziero Amîgo de Sheckley. Pöi o s'ocupa de publicitæ e comunicaçión da quarànt'anni, o comerçializa e mêgio câze pe-e vacànse in gîo e into ténpo lìbero o coleçionn-a exalka, cartolìnn-e e rànne.
Maurizio Manzieri Un di illustratoî SF italiàn ciù conosciûi a-o foestê.
Max Morando O mæ amîgo ciù pantagruèlico. Ma questo o l'é irrilevànte, ascì se no invixìbile. Attualménte, o ciù lésto elaboratô semàntico in gîo e Grànde Maìstro Internaçionâle d'Umorìsmo Nêgro. A-o bezéugno ascì discréto feticìsta.
Norman Spinrad Un di ciù interessànti scritoî de fantasciénsa in gîo. Tùtto quello che de lê ho lezûo, o valéiva a pénn-a d'èse lezûo. A l'é 'na cösa che no se pêu dî de tànti.
Paolo Gastaldo Architétto zenéize e artìsta originâle.
Quentin Gausset Antropòlogo bèlga, docénte d'antropologîa a l'Univerxitæ de Copenhagen. A pàrte questo, o l'é 'na persónn-a ecelénte de notévole inteligénsa.
Robert Sheckley Un di ciù geniâli scritoî de fantasciénsa che ghe s'én mâi stæti. Grànde amîgo quàndo o l'êa vîvo, ma ascì òua ch'o l'é tècnicaménte mòrto o persiste comme grànde amîgo. I amîxi son in efètti tâli quàndo vîvan drénto de niâtri e contribuìscian a-a composiçión da nòstra identitæ. Sheckley o continua a fâ sto seu cómpito mascìmo o segge stæto cremòu ténpo fa.
Saverio Soldani Attô eclèttico e fìn dixitô.
Silvio Sosio Ûnico e inimitàbile. Re di Webmaster. Probabilménte o ciù profescionâle realizatô italiàn de scîti web. Pöi Deus Ex Machina do Fandom SF italiàn e creatô de Fantascienza.com. In ciù, tànto pe gradî, pensatô lucidìscimo.
Sorin Repanovici Un di mæ ciù antîghi amîxi in Romania. O organiza tùtti i anni 'n eventâle culturâle inte 'n'ìzoa spèrsa into Danûbio, donde mòlto voentê tórno anno dòppo anno.
Tom Putzki Sviluppatô de videogames, o l'é indivìduo de râra simpatîa e inteligénsa, con 'n splèndido e immediâto senso da realtæ. In çìnque minûti êrimo za amîxi pe-a vìtta.
Ugo Malaguti Pria miliâre da fantasciénsa italiànn-a, scìa comme autô che comme editô. O primmo profescionìsta italiàn da fantasciénsa ch'o sêppe apprezzâ i mæ travaggi into cànpo, mòlto primma de quæsìasi âtro.
Valerio Evangelisti Grànde scritô e persónn-a d'acûta inteligénsa. Un di pochìscimi autoî italiàn vivénti che me piâxe léze. E scuzæme se l'é pòco.
Vittorio Curtoni Autô e curatô de fantasciénsa, un di archetìpi da fantasciénsa italiànn-a.
Yana Botsman Brillànte scritôa ucraìnn-a de fantasy ch'a se çêla insémme a Dmitry Gordevsky derê a-o pseudònimo d'Alexander Zorich.

Se ve consideræ particolarménte in relaçión con mì, e no v'è trovæ tra i ligàmmi, no ve lasciæ piggiâ da-o pànico. Né inebriæve de gòttio. A-o mascimo mandæme 'na cortéize email. Ma primma assegûræve d'avéi 'na homepage. E pöi impîe a televixón. Perché a televixón? Perché tànto a l'avesci impîa o mæximo.

Quarche amîgo m'à dæto i ligàmmi de-e lô webcam. Naturalménte spésso no fonçiónan ò no se véde ninte ò se véde di fòto de dêxe anni fa, pròpio comme in sciâ mæ webcam in real time. Tuttavîa, se l'é vêo che gh'é génte ch'a vâ a savéi cöse inti fóndi de caffè ò ammiàndo e nîvie, chì sa che quarchedun o no l'agge 'n'iluminaçión ammiàndo e imàgine de ste prezùnte webcam:

 

MaxCam

Max Morando in unreal time

 

Sto pòsto, suponèndo che questo o segge 'n pòsto, o l'é continuaménte in costruçión, pròpio comme l'Univèrso. Marcæ sta pàgina tra i vòstri bookmark e mettéighe 'n ligàmme dapertùtto, ascì in sce vòstra mâ. Pöi adêuviæ o çervèllo, divertîve, soffrî, accorzîve d'èsighe fìnn-a che poéi, amæme e se o vòstro amô o no l'é pròpio d'òttima qualitæ mandæme ciuttòsto di denæ, poscibilménte mòlto.

PÀGINA PRINÇIPÂ | ÌNDICE | BIOGRAFÎA | I MÊ SCRÎTI | FANTASCIÉNSA | FIGÛE | | RASSEGNA DE STAMPA | LIBRARÎA | POSTER | POLÌTICA | SÀTIRA | GUSTI | AMIXI | UMANITÆ VÀRIA | CONTRIBUISCI A-A VÌTA DE ROBERTO | CONTÀTTI | LIGÀMMI |

Photo of Roberto Quaglia Photo of Roberto Quaglia

Se voéi contatâ sto mutante
che co-o ténpo o càngia a seu fàccia,
saéi cómme fâ.

Se no o saéi, SCHISCIÆ CHÌ

Se pròpio no ghe riuscî, anæ a fâve benedî

Ùrtima mòdifica, 12 d'ötobre do 2005

© 1995-2006 by Roberto Quaglia

Tûtti i tèsti e e figûe contegûî in "Astounding Quagliaspace" se pòan léze, ammî, adorâ, scarigâ in sciô conputer, stanpâ e apíccâ inta seu càmbara, e copâ sénsa límiti, SOLO PE ÛZO PERSONÂLE. Tûtti i tèsti e e illustraçióin sòn proprietæ de Roberto Quaglia e no se pòan dêuviâ in tûtto ò in pârte sénsa autorizaçión. O progètto gràfico e e conponénti gràfiche de stè pàgine sòn proprietæ reservâ de Roberto Quaglia. Nigùnn-a de stè côse a se pò mette in véndita ò comerciâ a nínte títolo sénsa autorizaçión previa.