Il Comûne de Zêna in sce Internet (segóndo atto)

• Moçión prezentâ da Roberto Quaglia (L.Pannella)
• Órdine do Giórno n. 1 (Quaglia) (L.Pannella)
• Órdine do Giórno n. 2 (Azzarelli) (Partîo Democratico della Sinistra)
• Intervénto de Roberto Quaglia (Lista Pannella)
• Intervénto de Roberto Di Prima (Lega Nord)
• Intervénto de Flavio Azzarelli (Partîo Democratico della Sinistra)
• Intervénto de Carlo Schenone (Grùppo Misto)
• Intervénto de Franco Bampi (Polo Nord)
• Intervénto de Umberto Testori (Alleanza Nazionale)
• Intervénto de Lucia Deleo (Partîo Della Rifondazione Comunista)
• Intervénto de Anna Maria Cassol (Assessô a l'informàtica)
• Dichiaraçión de vöto de Roberto Quaglia (Lista Pannella)
• Dichiaraçión de vöto de Flavio Azzarelli (Partîo Democratico della Sinistra)
• 2. Dichiaraçión de vöto de Roberto Quaglia (Lista Pannella)
• Dichiaraçión de vöto de Carlo Schenone (Grùppo Misto)
• Dichiaraçión de vöto de Luca Borzani (Partîo Democratico della Sinistra)
• 3. Dichiaraçión de vöto de Roberto Quaglia (Lista Pannella)
• Intervénto do Prezidénte e Scàngio de Dichiaraçioìn
• Dichiaraçión de vöto de Franco Bampi (Polo Nord)
• Ùrtima Dichiaraçión de vöto de Roberto Quaglia (Lista Pannella)
• Órdine do Giórno Versción definitîva)(Quaglia) (L.Pannella)
• Èxito
• Rasségna Stànpa

Ill.mo Sìndaco
do Comûne de Zêna

Torna a l'ìndice

Intervénto de Roberto Quaglia (Lista Pannella)

Repétte i pròpi argoménti za espòsti o l'é, da 'n pùnto de vista filosòfico, 'na gran pèrdia de ténpo, soviatùtto se tâle repetiçión a sucède inte 'na mæxima sede rivòlta a-o mæximo uditòrio. Da 'n pùnto de vista pràtico, tuttavîa, o pêu èse necessâio. Pe questo ancheu me son ritrovòu costréito a riportâ in Conseggio Comunâle a discusción in sce Internet. Pe questo evitiò, inta mezûa poscìbile, de repétte quànto a sto propòxito za dîxi l'estæ passâ, quàndo za ne parlàmmo co-a dovûa anpiéssa.
Dêvo però primma de tùtto regordâ quæ o fû l'èxito de tâle nòstra discusción estîva. L'assessô Cassol a domandò che no se votéssan i nòstri Órdini do Giórno, inpegnàndose a accettâli tùtti comme raccomandaçión. Niâtri fiduçiozaménte accettàmmo, sottolineàndo che però aviéscimo riportòu a questión in Conseggio casomâi no ne avésse soddisfæto a relaçión in sci-i progrèssi in materia che l'assessô a s'inpegnâva a espónne in Conseggio ò in Commiscion intra trêi méixi da-o 22 de lùggio do 1996. Ancheu, 17 de Frevâ do 1997, o l'é dificile pe niâtri dî se tâle relaçión a n'agge soddisfæto ò meno, dæto che nisciùnn-a relaçión a l'é stæta a tùtt'ancheu - a ben sètte méixi de distànsa! - portâ in Conseggio nì in Commiscion da l'Assessô, o quæ, ascì questo o va dîto, o l'à çercòu de rinviâ o ciù poscìbile pûre l'odièrna discusción. Fórse l'assessô a pensâva de podéi repétte a performance de l'anno passòu, quàndo a riuscì a fâ slittâ a discusción in sce sto téma de ben sètte méixi. Prezentài a mæ precedénte moçión in efètti ciù d'un anno fa, e a discutémmo sólo a metæ estæ. Repeténdo ascì st'anno, pâ pâ, a dinàmica de quànto sucèsse l'anno passòu, a fìn do cìclo amministratîvo a n'aviæ trovòu lì ancón in càndida aspêta. I espediénti tàttichi, tuttavîa, son de nòrma 'na cattîva polìtica, e spésso no fonçiónan dôe vòtte de seguîo, tànto o l'é vêo che ancheu sémmo chì giustaménte a discûte quello ch'o l'andâva da niâtri discùsso.
Sebbén l'assessô Cassol a l'agge fìnn-a òua ritegnûo de no dovéi sottopónne a-o Conseggio quànto o Comûne o stésse fasendo in materia de Internet, dovémmo tuttavîa osservâ che 'na prezentaçión pùbrica de-e pàgine Internet do Comûne a l'é avegnûa, quarche settemànn-a fa, prezentaçión da quæ tuttavîa sémmo stæti informæ a-l'urtimìscimo istànte, (mì ascì l'ho saciûo quàndo a l'éa za in córso) coscì che sólo pe pûa fortùnn-a sémmo riuscîi a presençiâ a pàrte da mæxima.
Gh'é da dî che o travàggio compîo da-o grùppo de funçionâri tècnichi ch'o l'à cuòu e pàgine do Comûne o l'é òttimo. E pàgine do Comûne òfran 'na bónn-a gamma de servìçi informatîvi a-i çitadìn, 'na gamma ch'a l'é sénsa âtro destinâ a arricchîse in futûro, a prescìnde da-o fæto che niâtri ancheu se pârle de questo. Tùtto questo o l'é benaugurànte. Perché allóa discùtine chì e òua? Dovémmo affrontâ sta discusción in Conseggio Comunâle no pe-o travàggio che in sce Internet za s'é fæto, ma pe quello che no s'é fæto e che, a nòstro avîzo, o rìschia de no èse fæto mâi se o Conseggio Comunâle o no s'esprìmme ancheu ciaraménte in propòxito.
Pe primma cösa, o manca in efètti totalménte, da-e pàgine Internet do Comûne de Zêna, 'n inpiànto multilingùistico e multimediâle vòlto a-a promoçión de Zêna into mondo, 'n eleménto che ritégno ùtile, necessâio e inprescindìbile pe-e ambiçioìn turìstiche de Zêna, dæto che son oramâi 'na çinquantìnn-a de milioìn e persónne into mondo ch'an accèsso a Internet, e tâle numero o crésce con increménto esponençiâle. E mòlto m'allàrma quello che a tâle riguârdo a l'à ritegnûo d'affermâ l'Assessô Cassol into contèsto da prezentaçión pùbrica de cui s'é dîto. Inte tâle ocaxón, in efètti, quàndo notài l'assénsa da pàrte che ho dîto, mì ho cortezeménte domandòu a l'Assessô se a foîse prevìsta a realizaçión de 'na pàrte multilingùistica vòlta a-a promoçión internaçionâle da çittæ. L'Assessô Cassol a l'à sarcasticaménte rispòsto ch'a no crêde che a-i inglêixi i interèssan i orâri di nòstri âxili. O l'é 'n sarcàsmo che ritégno pezanteménte mâreposto. Mì armeno ritégno che se tràtte de sarcàsmo, a meno che l'Assessô Cassol veraménte a no l'agge creddûo che inti mæ discórsi mì agge vosciûo inténde - e no sólo duànte a prezentaçión de-e pàgine Internet, ma ascì l'estæ passâ into mæ lóngo intervénto in propòxito chì in Conseggio - da necessitæ de fâ conósce Zêna a-o mondo a mèzo Internet sólo pe comunicâ a-i inglêixi i orâri di nòstri âxili. Inte tâle câxo, l'assénsa de sarcàsmo a saiæ degnaménte sostituîa da 'n'offéiza a l'inteligénsa da mæ persónn-a. E a scànso d'equìvochi tégno a spiegâ a l'Assessô Anna Cassol con caritatévole ciaréssa: VIÂTRI NO DOVÉI MÉTTE IN SCE INTERNET, IN INGLÊIZE, I ORÂRI DI NÒSTRI ÂXILI. O no l'é questo o vòstro dovéi.
Se invéce, comme o l'é ciù probàbile, l'Assessô Cassol dabón a fâva do sarcàsmo into respónddime coscì, ben, allóa l'offéiza a no l'é ciù a-a mæ persónn-a, ma a-a mæ çittæ, o che, into nòstro contèsto, o l'é assæ pézo. Inta discusción ch'avémmo inte sta mæxima sede conseggiâle inta sedûta do 22 de lùggio do 1996, mì spiegài mòlto ben, con 'na dovìçia de particolâri che no repéto dæto che chi vêu o pêu andâ a rilêzeseli, e fòrti raxoìn pe-e quæ Zêna a dovésse realizâ 'n'articolâ rapprezentaçión multimediâle de lê mæxima in sce Internet - ascì in Inglêize! - e l'Assessô, voéndo scongiurâ che se votésse in sciâ questión, a s'inpegnò, comme dîto, a accettâ i mæ Órdini do Giórno a riguârdo comme raccomandaçión. A tâle inpegno, no formalizòu da 'na votaçión do Conseggio, l'Assessô Cassol evidenteménte a ritégne de no dovéi tegnî féde, se a respónde comme s'é dîto a 'na nòstra cortéize domànda in sce a seu intençión de fâ ò no fâ quello che a paròlle a s'éa precedenteménte inpegnâ a çercâ de fâ. Vorriéiva inôtre portâ a conoscénsa do Conseggio 'n âtro pìccolo anèddoto. Sùbito dòppo a-a prezentaçión de-e pàgine Internet do Comûne de Zêna, discuténdo con un di responsàbili tècnichi de-e mæxime, ribadî a mæ convinçión in sce a necessitæ de 'n tâle apròccio de promoçión internaçionâle da çittæ a mèzo Internet. A tâle mæ argoménto lê o replicò che questo o no l'éa cómpito do Comûne. 'Na opinión personâle perfettaménte legìttima, in quànto tâle. Ma into moménto in cui tâle opinión a se traduxésse in scélte operatîve coerénti co-a mæxima, se trattiæ de 'na scélta polìtica. De competénsa da giùnta e de sto Conseggio. Comme niâtri ancheu in efètti decidémmo in sede polìtica che Zêna a dêbbe superâ a siderurgîa, coscì, sénpre in sede polìtica, decidémmo ch'a vêu dâse ascì 'na neuva identitæ turìstica, e che tra i vâri critêri d'autopromoçión a dêbbe adêuviâ adeguataménte ascì quello de Internet, no foîse âtro che pe-a straordinâia poténsa e economicitæ che sto neuvo struménto o pòscede. E allóa mì domàndo, no sólo a l'Assessô Cassol ma a-a giùnta tùtta, quæ a segge l'orientaménto de l'amministraçión a sto riguârdo. Dòppotùtto, fórse a l'à raxón l'Assessô Cassol, pur inta seu brevemirànsa, a ritegnî che a promoçión de Zêna a mèzo Internet a no segge cómpito ch'o spétte a lê. A l'Assessô a-a Promoçión da Çittæ Guala domàndo allóa se lê o l'agge in progètto de fornî a-o grùppo de travàggio in sce Internet indirìssi in mérito a-a promoçión da çittæ in sce Internet. A l'Assessô a-a Cultûa Meriana domàndo se lê o l'agge in progètto de fornî a-o grùppo de travàggio in sce Internet indirìssi in mérito a-a rapprezentaçión da cultûa zenéize in sce Internet. E se âtri assessoî an da dî quarcösa a riguârdo, son benvegnûi.
No se preténde che a giùnta a l'agge za fæto di pàssi inte sta direçión, dæto che a génexi de-e pàgine Internet do Comûne de Zêna a l'é sólo a-i iniçi. Ma se preténde de savéi con estréma ciaréssa quæ direçioìn a giùnta a voriâ indicâ a-i tècnichi che stàn abilménte aprontàndo a nòstra Zêna Virtuâle. E a scànso d'equìvochi, a vegniâ tra pöco votâ, co-a mæ moçión, che spêro a racôugge i ciù ànpi consénsi poscìbili, quella ch'a l'é l'opinión di çitadìn in propòxito.

O l'é ùtile rimarcâ che niâtri émmo prezentòu sta moçión e efettuémmo sto intervénto in quànto fòrsa de maggiorànsa inte sto Conseggio. Quarchedun o pêu de vòtte nutrî di dùbbi in sce o fæto che niâtri se fasse pàrte da maggiorànsa, perché sémmo 'na fòrsa atìpica. Ùnichi inta maggiorànsa, in efètti, mâi émmo domandòu nì otegnûo poltrónn-e ò poltroncìnn-e e manco scagnétti. Émmo, in pràtica, sólo i svantàggi de fâ pàrte da maggiorànsa, vâle a dî a scàrsa vixibilitæ in sci-i giornâli dæto che no essèndo minorànsa no se tuffémmo a pésce in sce quæsìasi quisquìlia pe finî in sci-i giornâli, unîi a-i tìpichi svantàggi da minorànsa, vâle a dî a carénsa de consideraçión che ne vegne da-o no avéi un de niâtri in mèzo a quelli che comàndan e dirîzan a mûxica. O l'é 'na condiçión ch'a no ne distùrba, ne andémmo ànsi fêri dæto ch'a ne permétte d'èse 'na Maggiorànsa Scòmoda. Niâtri no violémmo in efètti o patto che stipulàmmo co-i nòstri eletoî, quàndo decidémmo de sostegnî sto sìndaco (un patto che no l'é dîto che niâtri se decîde de rinovâ a-e pròscime eleçioìn, comme no l'é dîto manco o contrâio; pe-a stagión di bilànci definitîvi màncan ancón parécchi méixi). Generalménte, comme se véde, votémmo a favô da Giùnta, into rispètto do mandâto de chi o n'à elètto. Tuttavîa, pe l'assénsa di privilêgi che no émmo nì mâi émmo çercòu, se poscémmo concêde o rêuo de Maggiorànsa Scòmoda, ch'a se distìngue da quella còmoda pe 'na fòrte carénsa de consénso plebiscitâio acrìtico e indiscriminòu inti confrónti de l'operòu da Giùnta ò di sìngoli assessoî. O l'é 'n Conseggio Comunâle ciuttòsto bùffo, questo, sótta çèrti aspètti. Perché ghe trovémmo ascì 'na Minorànsa Còmoda, ch'a se distìngue da-a Minorànsa Scòmoda pe-a seu notévole capaçitæ de podéise trasformâ a mèzo 'n miràcolo de transustançiaçión polìtica inte 'na Maggiorànsa Còmoda. Inte sto câxo, comme se véde, a continuitæ into ténpo de-e idêe e de-e açioìn, a l'é garantîa da-a Comoditæ.
Sémmo dónca 'na Maggiorànsa Scòmoda e in quànto tâle no émmo remôe a esprìmme con trasparénsa e ciaréssa quarche stortûe tròppo palêixi perché e se pòsse tâxe. Niâtri credémmo in efètti che o segge ciù salutâre, pe-o bon operòu mæximo da Giùnta, espónne e crìtiche con grànde limpidéssa e inequivocabilitæ, sénsa paludâse in tortuoxìsmi mimètichi inti quæ ciascùn o pêu lêze i significæ ch'o preferìsce. Errâ o l'é umàno, ma perseverâ o l'é sciòcco, e niâtri dónca invitémmo con grànde serenitæ o Sìndaco e a Giùnta intêga che d'âtronde sostegnémmo a meditâ in sce-e inperfeçioìn che esplicitaménte denonçémmo, e a-e seu inplicaçioìn annésse e connésse.

E coscì arivémmo a 'n âtro pùnto rilevànte ch'o me spìnze a consciderâ necessâia a nòstra odièrna discusción in sce Internet. Sénpre duànte a prezentaçión de-e pàgine Internet do Comûne, domandài a l'Assessô Cassol se a foîse stæta prevìsta 'na pàrte ch'a comprendésse a missa in lìnia in sce Internet de tùtte e trascriçioìn de-e sedûte de Conseggio Comunâle, comprensîve evidenteménte de tùtte e delìbere da giùnta, inte l'òttica da conpléta trasparénsa di atti amministratîvi. In rispòsta a-a mæ domànda, l'Assessô Cassol a rispòze de no regordâse che de tâle argoménto avéscimo discùsso in Conseggio Comunâle. Òua, chì ho comme l'imprescion de cattâ, a-o pòsto do za citòu precedénte sarcàsmo mâreposto, 'na tùtt'âtro che mòdica quantitæ d'arrogànsa, ancón ciù mârepòsta do sarcàsmo precedénte. O saiæ in efètti arrogànsa mêgio repòsta, se dabón niâtri no avéscimo mâi discùsso da faccénda in Conseggio. O fæto invéce o l'é che niâtri n'émmo abondanteménte parlòu de questo inta discusción do 22 de lùggio do 1996! N'ho parlòu mì, n'à parlòu o Conseggié Basso, e n'à parlòu ascì l'Assessô Cassol, a quæ letteralménte a dichiarò a riguârdo: "O saiæ bèllo". O l'é sconfortànte constatâ che dòppo tùtto sto ténpo trascórso, no sólo o no l'é stæto progettòu ninte inte sta direçión, ma o no l'é stæto manco pensòu, ò sa che amnêxia totâle a l'é calâ in sciô importantìscimo argoménto da niâtri sviluppòu in sciâ conpléta trasparénsa di atti amministratîvi a mèzo Internet. No poscémmo savéi, evidenteménte, se tâle amnêxia a segge de tìpo neurològico ò polìtico. Savémmo però che ghe vêu rinfreschâ a memòria e esprìmme ancheu inte st'âula quelle ch'én e voluntæ e i interèssi popolâri a riguârdo.
Dæto che into "o saiæ bèllo" co-o quæ l'Assessô Cassol a commentò l'estæ passâ a mæ propòsta o l'éa contegnûo implicitaménte ascì 'n concètto do tìpo "ma no se pêu", opûre "no sémmo in gràdo de fâlo", opûre "o l'é tròppo dificile pe niâtri" ò ciù senplicemente "ma comme se fa?" ho ritegnûo mæ dovéi fâ da sólo, a mæ spéize, in mòddo esenplâre, quello che mì sostégno che o Comûne o dêbbe métise in gràdo de fâ da sè: ho vâle a dî provvisto a métte in sce Internet a trascriçión INTEGRÂLE de quarche discusción efettuâ chì in Conseggio Comunâle, e ciù specificaménte a mæxima discusción ch'avémmo in sce Internet l'estæ passâ, e quella in sciâ dròga do 19 de dexénbre do 96. Tùtti i intervénti son ordinataménte catalogæ, co-i sìnboli di partîi e e fòto di intervegnûi, e pe-a discusción in sciâ dròga gh'é in lìnia ascì 'na rasségna stànpa di artìcoli in sciâ vicénda. E allóa mì póngo a domànda, a-a quæ exìggio rispòsta: o pêu acascâ che o Comûne, co-o seu bilàncio de miliàrdi e e seu mijæ de dipendénti, o no segge in gràdo de fornî sistematicaménte quello servìçio che pe 'na vòtta mì ho fornîo da sólo pe dimostrâ quànto o segge fàcile da fâ? Créddo che se tràtte de 'na domànda retòrica, ma exìggio 'na confèrma. Con questo no se sostegne che da 'n giórno a l'âtro o Comûne o dêbbe èse in gràdo de fâ sto travàggio. Ma se preténde che se decîde e se s'inpegne formalménte a fâlo. O dêve èse ciæo 'na vòtta pe tùtte che tra i dovéi do Comûne ghe segge quello de rénde poscìbile a tùtta a çitadinànsa in gràdo de colegâse con Internet ('na percentuâle ch'a auménta con cresciénte rapiditæ) a consultaçión cazalìnga de tùtto quànto o vegne discùsso inte st'âula. O no l'é amiscìbile che o pòsse de neuvo acascâ che l'Assessô competénte "o se diméntega" che o Comûne o l'agge sto dovéi, dovéi che mì fortìscimamente sostégno ch'o l'agge, confidàndo che o Conseggio o concòrde, e ch'o sénpre o doviâ avéi. E ghe son âtre domànde a-e quæ mì exìggio che l'Assessô Cassol a respónde: za duànte o mæ intervénto do 22 de lùggio ho publicaménte dichiaròu che aviéiva misso in sce Internet l'intêga trascriçión da discusción. Vêuggio savéi se l'Assessô ch'a l'à dîto che "o saiæ bèllo" fâ quello che mì ho dichiaròu che aviéiva fæto e che ho fæto e che exìggio che o Comûne o fasse, a l'agge mâi vìsto quelle mæ pàgine co-e quæ dâva l'exénpio, e cöse a ne pénsa.
Tornémmo a-o téma da missa in lìnia di Conseggi Comunâli. Ritégno, co-o mæ exénpio, vixìbile a chiunque in sce Internet, d'avéi dimostròu con suffiçénte incontestabilitæ che quello che mì domàndo che o Comûne de Zêna o s'inpegne a fâ inte sto senso o segge tecnicaménte realizàbile con facilitæ. Se ghe riêscio mì, ghe dêve riuscî ascì o Comûne de Zêna. Quarchedun o poriæ però azzardâ l'argoménto che mì aviéiva realizòu quànto ho fæto in settemànn-e ò fórse méixi de travàggio, e che a môle de travàggio da missa in lìnia da trascriçión de-e intêge sedûte de Conseggio Comunâle a segge in realtæ insostenìbile e insoportàbile. Ho fæto parécchio travàggio, o l'é vêo. A chi voésse cavâsela, adêuviàndo o mæ zêlo contra de mì, coscì mì respóndo: me dichiâro ufiçialménte disponìbile a demolî sta têxi con 'na dimostraçión pùbrica: se convòca 'na commiscion, voéndo se invîtan ascì notâi e giornalìsti, me se métte in man o dischétto contegnénte i "file" da mêra trascriçión de 'n'intêga sedûta de Conseggio Comunâle, e in càppo a 'n'ôa m'inpegno a avéi misso tùtto in sce Internet. Davànti a-i éugi de tùtti. Sénsa trùcchi. Inte 'n'ôa! E se ghe riêscio mì, o-o repéto ancón 'na vòtta, no accètto che o Comûne o no se métte in gràdo de fâ otrettànto. A gran pàrte do travàggio a l'é quella da trascriçión da registraçión audiofònica de-e sedûte, ma esso o vegne za fæto. O rèsto o l'é assæ fàcile da fâ, purché ghe ne segge a voluntæ. Purché no se se "dimentéghe" che gh'é da fâlo!
E i efètti de 'na tâle operaçión saiéivan clamoróxi e meravegiôxi. Rivoluçionâri! E nòstre sedûte conseggiâli son pùbriche, ma raraménte quarchedun o vegne a ascoltâne. E perché mâi doviéivan? Chi o travàggia o l'à raraménte da dedicâ 'n intêgo dòppodisnâ pe vegnîsene chì a aspeitâ che se discûte de quello ch'o interèssa. Eppûre, i zenéixi son interessæ, son mòlto interessæ a quello ch'o vegne discùsso inte st'âula. Inte 'n anno ho domandòu a centenâ e centenâ de persónne cöse ne pénsan da poscibilitæ de lêzese i verbâli di Conseggi Comunâli in sce Internet. Mâi ghe n'é stæto un o quæ o no se segge entuziasmòu de frónte a st'idêa. Ascì quelli che Internet no conóscian, apprövan l'idêa a l'unanimitæ, apénn-a compréndan de cöse se tràtta! Tra 'n pâ d'anni a-o màscimo, tùtti i televixoî de neuva produçión aviàn probabilménte Internet integròu in lô, comme ancheu an o televideo. E niâtri vogémmo dabón créde che i zenéixi no voriàn ammiâse in sci-i schèrmi de câ cöse niâtri se stagghe chì a combinâ co-i seu dénæ? Za ancheu, chiunque into mondo, a Oregina comme in Argentina, o çèrche in sce Internet tànti di coléghi prezénti inte st'âula, o trêuva i mæ documénti e in lô, i seu discórsi. 'N domàn, quæsìasi Conseggié e Assessô o saiâ mòlto ciù responsàbile de ancheu de tùtto quello ch'o dîxe, affèrma e sostegne, e a coerénsa e a bónn-a polìtica saiàn premiæ mêgio che ancheu, perché ògni eletô o l'aviâ accèsso a l'archîvio de tùtto quànto o l'é stæto dîto e fæto da chiunque lê o l'agge in precedénsa votòu. Se tràtta de 'n notévole sâto de qualitæ da democrazìa rapprezentatîva. Chi o n'à puîa o s'esprìmme contra de lê, savéndo che e seu paròlle son fìn d'òua 'n milión de vòtte ciù pùbriche de quànto âtre vòtte generalménte e séggian, dæto ch'evidenteménte surrogaiò mì mæximo ancón 'na vòtta quelli che ritégno dêbban èse i dovéi do Comûne, affidàndo ascì a prezénte discusción integrâle a l'exibiçión into ciberspâçio.
Resta ancón da dî a riguârdo che a scélta che mì invîto ancheu o Conseggio a fâ, a no l'é se métte i verbâli di Conseggi Comunâli in sce Internet opûre nò. A l'é se decîde de fâlo pe primmi ò pe ùrtimi in Italia. Se dâ a tùtta l'Italia 'n grànde exénpio d'avanguârdia into cànpo da trasparénsa, opûre d'aspeitâ d'èse costréiti a fâlo in sciâ scîa de tùtti i âtri Comûni che primma ò pöi deciddiàn de fâlo, perché o l'é senplicemente 'na cösa normâle da fâ. E questo, comùnque, o l'é sólo o primmo pàsso, atençión! Perché za ancheu o l'é poscìbile - e repéto: za ancheu o l'é poscìbile, da 'n pùnto de vista tècnico - trasmétte 'n evénto in diretta audio e video in sce Internet. O futûro pròscimo - tra 'n cìclo amministratîvo ò doî - o saiâ dónca quello de fornî a-i çitadìn a vêa e pròpia trasmiscion in diretta de-e nòstre sedûte de Conseggio. Se poriæ fâ ascì primma - se poriæ fâ ascì ancheu! - ma dùbito che ghe segge a voluntæ polìtica de zonze a tànto coscì in frétta. Se me sbàglio, saiò liêto d'èse smentîo.

In futûro, e risórse comunâli destinæ a-o sviluppo de ste funçioìn, andiàn çertaménte potençiæ. No se dîxe che questo o dêbbe avegnî da 'n giórno a l'âtro. O l'é ùtile però affermâ che in futûro o Comûne o no poriâ prescìnde da 'n potençiaménto di orgànichi e de-e risórse destinæ a ste funçioìn de comunicaçión. Ancheu émmo quarche muzéo çitadìn, con 'na dexìnn-a d'addétti ciascùn, ògnidun di quæ o no riçéve quotidianaménte ciù de 'na dexìnn-a de vixitatoî. 'N vixitatô pe ògni addétto. No dîgo che questo o segge ben ò mâ. No pòsso però tâxe che 'n'ànpia rapprezentaçión multimediâle e multilingùistica in sce Internet a pêu racôugge centenâ ò mijæ de vixitatoî quotidiàn, e otrettànti i nòstri verbâli de Conseggio Comunâle, ò 'n domàn a trasmiscion in diretta do mæximo. Sólo che e mæ pàgine co-i verbâli de-e discuscioìn ch'émmo efettuòu chì drénto an za accugéito fìnn-a òua centenâ e centenâ de vixitatoî, e mì son a questo l'ùnico addétto, d'âtronde manco stipendiòu. In futûro, dónca, con rapiditæ proporçionâ a l'eficénsa, o Comûne o doviâ, voénte ò noénte, potençiâ e struttûe prepòste a-a edificaçión da Zêna Virtuâle.

E pe conclûde, dæto che ûnn-a de-e pöche credénse a-e quæ coscienteménte indùlgio a l'é quella do rispètto de l'inteligénsa unîa a-o dispétto a l'arrogànsa, mençionaiò 'n tèrso anèddoto (ò fórse sémmo za a-o quàrto?) tròu da-a prezentaçión pùbrica de-e pàgine Internet do Comûne, a premissa do quæ confèsso o mæ difètto de créde ascì a-a validitæ de 'n antîgo mòtto popolâre: "Quàndo no se sa ninte de 'n çèrto argoménto de cui se stâ discuténdo, o l'é mêgio stâ mùtti, lasciàndo a-o uditòrio o sospètto che no se sàcce de cöse se stagghe parlàndo, ciuttòsto che arvî bócca e fugâ ògni dùbbio a riguârdo." Ebbén, o 22 de Zenâ, duànte a prezentaçión de-e pàgine Internet do Comûne, l'Assessô Cassol a l'à dimostròu de no avéi o mæ difètto, confondéndo into seu discórso palezeménte, a 'n tràtto, i programmi de l'uténte pe-a navegaçión (comme Netscape, Microsoft Explorer, eccétera) co-i gràndi motoî de ricèrca de Internet (Comme Yahoo, Lycos, eccétera). O l'é 'n pìccolo infortùnio che âtri Conseggié prezénti regordiàn benìscimo. Ròbba de pòco cónto, insómma, o cui significâto çèrto o sfuggiâ a chi ninte o sàcce da materia. O fæto o l'é che ascì 'n figgeu ch'o l'agge passòu ascì sólo pöche ôe a navegâ in sce Internet o conósce sta basilâre diferénsa, l'ignorànsa apparénte da quæ a riversa 'n'ulteriô ómbra sinìstra into nòstro discórso, tànto che sciòrte e o l'é dificile ricacciâ a tentaçión de domandâse se i boìn resultæ iniçiâli consegûi da-i àbili tècnichi addétti a Internet séggian stæti raggionti no in virtù, ma a dispétto da direçión operâ in mérito da l'Assessô Cassol.
Sêro chì, regordàndo che ògni cösa che ancheu chì dixémmo inte sta discusción, a exénpio do futûro ch'o n'aspêta, a saiâ indefinitivaménte a disposiçión di çitadìn in sce Internet. 'Na vòtta se dixéiva, ascì in polìtica, "Verba volant". Con Internet, d'òua in pöi, soviatùtto in polìtica, "Verba Non Volant Ciù".

Roberto Quaglia

Torna a l'ìndice

Intervénto de Roberto Di Prima (Lega Nord)

"Primma de tùtto voéiva ringraçiâ o coléga Quaglia de sta moçión e pe-a seu espoziçión conpléta ch'a ne trêuva in pénn-a sintonîa in ògni seu pàrte. Però, a pàrte e argomentaçioìn dòtte za adottæ da-o coléga, vorriéiva soffermâme in sci-i vantàggi che porriéscimo avéi con sto ingrèsso in sce Internet. Se referémmo a-i vantàggi scîa da çittæ, scîa di çitadìn, scîa do Conseggio Comunâle.
Pe quànto riguârda a çittæ o l'é evidénte che 'na maggiô descriçión de quello che in lê o pêu èsighe da-o pùnto de vista turìstico o pêu çertaménte portâ a 'n maggiô afflùsso de turìsti in quànto, comme o dixéiva giustaménte Quaglia, i 50 milioìn a ancheu d'uténti de Internet stàn aumentàndo in mòddo veraménte esponençiâle. Dónca podéi portâ notìçie interessànti de Zêna (pârlo de l'Acquario, da Fêa, do Centro Stòrico, ecc.) in sce Internet o saiæ çertaménte 'n vantàggio.
Porriéscimo prefissâ ascì di itinerâri turìstichi interessànti e chì o vegne o bèllo e o brùtto a segónda do pùnto de vista e a segónda de chi o immétte sti dæti in sce Internet perché, pe exénpio, 'n interessantìscimo itinerâio turìstico o poriæ èse quello ch'o pârte da-a Fêa do Mâ duànte 'na manifestaçión, o procêde pöi pe vîa di Pescatori, con 'na sòsta a-o bellìscimo cànpo di nòmadi, pe terminâ con 'na vixîta a-o incenitô con facoltæ magâri de 'n sguàrdo a quella ch'a l'éa a Lanterna. Naturalménte a Lanterna pe allóa a saiâ indicâ comme 'n eleménto d'archeologîa industriâle, mentre o incenitô in sce Internet o andiâ comme exénpio d'ârte modèrna a Zêna. Questo pe dî, in senso irònico ò meno, quæ o pêu èse comùnque o vantàggio che se pêu dâ a-a çittæ.
Pe quànto riguârda a missa in lìnia de tùtte e trascriçioìn di intervénti comunâli, di verbâli, de-e delìbere de Giùnta, di atti preparatòri, questo o saiæ çertaménte 'n vantàggio pe-o çitadìn ch'o sénpre ciù o se colêga con Internet e ascì pe-o conseggié comunâle mæximo o quæ, con minô aggrâvio de spéize pe l'Amministraçión, o poriæ domandâ documentaçión dirèttamente vîa Internet, facilitàndo e levàndo o distùrbo a quarche Assessô ch'o magâri, comme l'Assessô Cassol, o se nêga a-o dirìtto sacrosànto do conseggié comunâle, inta fattispéçie Roberto Di Prima, o sottoscrîto, ch'o l'aiva domandòu di documénti che ghe son stæti negæ.
O l'é importànte dónca védde quànto o pêu èse ùtile métte sti dæti in Internet, ma o pêu èse ùtile ascì analizâ quànto o segge poscìbile fâ questo con l'Assessô Cassol perché, quàndo niâtri émmo domandòu, o 7 de zenâ, con dôe rîghe a documentaçión preparatòria a-a stezûa do regolaménto do referendum, a l'à rispòsto: " ... ... pertànto o no l'é poscìbile dâghe nisciùnn-a documentaçión preparatòria perché a Giùnta a no l'à ancón discùsso a propòsta definitîva".
Con 'n scìmile Assessô, che mì definìscio arrogànte e arrogànte inti mæ confrónti, ch'o l'à dimentegòu che da-o tèsto magnetofònico do 16 de dexénbre o dîxe in téma de regolaménto: "Niâtri émmo travagiòu in sce questo tànto che stémmo praticaménte definéndo i ùrtimi aspètti che son de tìpo operatîvo. Sémmo praticaménte prónti. Sémmo dónca praticaménte a pùnto. Émmo za fæto stûdi aprofondîi pe capî e modalitæ operatîve", con 'n scìmile Assessô, dónca, ch'o l'à dîto quànto mì ho lezûo adesso, comme poscémmo sperâ de podéi arivâ in sce Internet? Niâtri dónca poscémmo dubitâ che, mâr-grado sta moçión a pòsse vegnî votâ ascì a l'unanimitæ, a pòsse pöi avéi 'na pràtica attuaçión se affidâ unicaménte a-a discreçionalitæ de l'Assessô Cassol.
Vêo o l'é che ancheu émmo riçevûo, in dâta 17.2, 'na lèttia de l'Assessô Casissa o quæ, pe ottemperâ a 'n inpegno pigiòu ascì co-o sottoscrîto, o l'à mandòu a bózza do regolaménto in sciô referendum. Questo o l'é za 'n primmo pùnto, però quello che mì aiva domandòu a l'Assessô Cassol éran i documénti preparatòri che lê a l'à dîto èse stæti fæti, ma evidenteménte sólo in mòddo orâle perché i ho domandæ pe scrîto e no me son ancón arivæ. Adesso però a competénsa de questo a l'é de l'Assessô Casissa, dónca sperémmo (e i fæti d'ancheu o-o dimostran) de cangiâ conpletaménte registro pe quànto riguârda i inpegni da piggiâ e quello che se dêve ascì ottemperâ.
Ghe son documénti che, domandæ da 'n conseggié comunâle, van consegnæ. Dónca quàndo o coléga Quaglia o domànda che giustaménte sta moçión a vegne discùssa e approvâ e pöi o domànda de prezentâ rigorozaménte a-o Conseggio intra e no otre 3 méixi da ancheu 'na particolaregiâ relaçión di progrèssi consegûi in materia, mì, che no me fîo pe l'esperiénsa avûa, dîgo che inta commiscion competénte dêvan èse portæ i argoménti che son stæti svòlti intra 'n méize e mêzo. Into succescîvo méize e mêzo andiêmo in Conseggio Comunâle.
Comùnque niâtri sémmo parêgio ottimìsti in sciô fæto che se pòsse andâ in sce Internet co-e modalitæ espòste da-o conseggié Quaglia, avéndo però 'n attegiaménto ciù responsàbile da pàrte de l'Assessô. Mì regòrdo brevemente che o regolaménto in sciô referendum a Milano o l'é in vigô da doî anni.
Çerchémmo d'èse comùnque ottimìsti perché sto fæto o l'é estremaménte importànte pe Zêna e pe-o Conseggio Comunâle. Quello che s'é discùsso ancheu o restiâ comùnque pe anni inti scîti Internet a disposiçión da çitadinànsa. Pe exénpio a Buenos Aires o existe 'n quartê de zenéixi che poriéivan èse interessæ a colegâse e a seguî da vixìn quæxi in diretta quello ch'o se sviluppa a Zêna e quello ch'o l'é o svolgiménto di Conseggi Comunâli.
Porriéscimo, comme o dixéiva Quaglia, èse primmi e questo o poriæ èse 'n primâto interessànte diversaménte da l'èse primmi in aspètti negatîvi che son za in sce Internet, pe exénpio o fæto che probabilménte i estracomunitâri poriàn votâ pe-e amministratîve. Questo o ne poriâ portâ çertaménte in sce Internet in cànpo nazionâle, ma in cànpo locâle niâtri porriéscimo 'n giórno fórse avéi 'n trìste primâto, quello d'andâ in sce Internet perché magâri saiêmo a primma çittæ che, otre a èse sénpre ciù invâza da estracomunitâri, a poriâ avéi 'n Sìndaco de coô.
O l'é pe questo che niâtri vogémmo ascì che i Grùppi àggian accèsso in sce Internet perché o l'é 'n âtro struménto a seu disposiçión pe podéi portâ avànti maggiorménte e pròpie ativitæ, e pròpie espoziçioìn, magâri in contràsto con quello ch'o l'aviâ portòu a Giùnta. O l'é 'n sistêma ascì pe podéi illustrâ a-i çitadìn quello che niâtri intendémmo fâ pe difénde a çitadinànsa ascì da sti problêmi, da sti perìcoli che, repéto, son oramâi imminénti e inti confrónti di quæ çertaménte a Lega a l'aviâ 'na opoxiçión ben determinâ.
Andâ in sce Internet pe-i çitadìn o saiâ interessànte ascì perché poriàn no sólo avéi notìçie in sce personàggi importànti comme Madonna, Tomba ò Clinton, ma poriàn invéce avéi accèsso pròpio a ste informaçioìn. Ho sólo citòu quarche paròlla ciâve perché, man man che vegnan registræ inti computer, a ògni nómme de persónn-a regordòu o vegne colegòu çertaménte l'argoménto. Pe exénpio quàndo a vegniâ portâ in sce Internet sta moçión, se quarchedun o dovésse ciamâ o nómme de Bill Clinton ò Madonna, o trovâ ascì l'intervénto de Quaglia e de Roberto Di Prima e magâri o trovâ ascì citòu l'Assessô Cassol pe-a seu arrogànsa che mì, condividéndo ascì o giudìçio do coléga Quaglia, ho ben precizaménte vosciûo rimarcâ."

Roberto Di Prima

Torna a l'ìndice

Intervénto de Flavio AZZARELLI (P.D.S.)

"Mì pénso che, comme tùtte e cöse, atualménte Internet a segge 'n pö tròppo divegnûa 'na mòda e fórse 'n pö meno se riêsce a raxonâ in sce quello ch'o l'é essençialménte: vâle a dî 'n concètto de réte, de réte allargâ e ascì 'n concètto democràtico de domìnio, ma ascì democràtico de libertæ d'esprescion, de paròlla e de sentiménti.
E allóa créddo che pròpio da questo o dêbbe partî 'na analixi compîa de quello ch'o l'é o percórso intraprézo da-o Comûne, ma ascì de quello che o Comûne o s'é dimentegòu perché o l'é giùsto e legìttimo criticâ, però se pêu ascì construî. E allóa pròpio inte sto spìrito çerchiêmo comme Grùppo d'intervegnî, dàndo 'n ulteriô appòrto a quella ch'a l'éa stæta a fâze primâia de construçión de 'na vixibilitæ do nòstro Comûne a livèllo "internettiàn".
O Comûne de Zêna finalménte, dòppo 3 anni e mêzo, a-a scadénsa da legislatûa, o l'à fæto quello che o nòstro Grùppo o l'à caldaménte peroròu da-i primmi méixi do 1994. Into moménto in cui o-o fa o l'é però indispensàbile pónne di problêmi in sciô tòo a-o scòpo d'avvixinâse a tâli mèzi co-o spìrito e e idêe giùste e no spreccâ inutilménte risórse umàne, intellettuâli e finançiârie.
Son nòti e evidénti i vantàggi in tèrmini de ténpo e velocitæ connèssi a-l'adêuvio de struménti comme Internet. O vêo problêma o l'é rapprezentòu da-a scàrsa reâle conoscénsa, esclûza 'na élite foltaménte rapprezentâ, ma no çèrto indicatîva da situaçión in sciô teréno, di struménti informàtichi da pàrte da màssa di addétti a-o sviluppo pràtico de tâle comunicaçión. Ghe vêu pertànto puntâ primma de tùtto a-o raggiungiménto de 'n numero crìtico d'alàcci a-a réte ch'o rénde veraménte ùtile e econòmico l'adêuvio de tâli tecnologîe, sénsa che inbûti d'obsolescénsa tecnològica ne vanìfichan i sfòrsi.
Inte sto senso o va primma de tùtto avviâ 'na campàgna capillâre d'alfabetizaçión a-o scòpo de rénde edòtti e capaçi a manezâ i struménti quànti drénto a-o Comûne deventiàn fruitoî, ma soviatùtto emettitoî de-e informaçioìn.
A ragnatélla mondiâle a no l'à e a no pêu èse o struménto prinçipâle de sviluppo de l'informaçión in quànto adàtto ciù a 'na vixibilitæ vèrso l'estèrno che a 'na reâle comunicaçión tra e persónne. Struménti comme a pòsta eletrònica e i scîti FTP d'archiviaçión di documénti son e vîe maéstre pe 'n adêuvio âto e eficâce de-e tecnologîe de réte pe-a rapiditæ de difuxón de l'informaçión che da-a réte a poriâ pöi èse veicolâ, a tràverso struménti ciù tradiçionâli, vèrso 'na màssa sénpre ciù vasta d'uténsa.
Creâ 'na réte cìvica comunâle, questo o l'é o pùnto che a niâtri o ne prême mòlto, con 'na prezénsa parziâle in sce Internet o significa primariaménte èse 'n liner raggiungìbile da-a soçietæ civîle, o significa imparâ a no omogeneizâ i media, passàndo da 'n eccèsso de no adêuvio a-a prezunçión che o net o segge a panacêa de tùtti i disguîdi da comunicaçión intèrna.
A veitæ a l'é ben âtra: o net o gionze 'n struménto potentìscimo e specìfico a 'n sistêma de comunicaçión-passàggio de l'informaçión che da sta emiscion a dêve resultâ mejorâ in tùtte e seu componénti mediâli, no appiattîo in soluçioìn onnicomprensîve dettæ ciù che da 'na reâle meditaçión in sciô mètodo da-a passezéia mòda do moménto.
'N Comûne comme quello de Zêna o dêve devegnî 'n mémbro attîvo e partêcipe da comunicaçión, offréndo spâçi de sviluppo e apertûa vèrso e istànse da bâze e da soçietæ civîle, o dêve favorî o sviluppo de neuve tecnologîe avéndo 'n éugio atténto a quello ch'o sucède a l'estèro, ma soviatùtto capéndo a realtæ nazionâle in cui o se mêuve e o òpera. A ancheu in Italia i uténti de Internet son pöchi in rappòrto a-a popolaçión e soviatùtto concentræ in fàsce mòlto precîze da soçietæ. Pensâ che ancheu Internet o pòsse rapprezentâ 'n importànte struménto de promoçión a l'é 'na panzànn-a de dimenscioìn bìbliche. A raxón a l'é prèsto dîta: inta soçietæ civîle o manca o numero crìtico de persónne connèsse che fàccian viagiâ l'informaçión pe fòrsa d'inèrçia. Cómpito dónca de 'n Comûne illuminòu comme quello de Zêna o l'é quello de sviluppâ e facilitâ l'accèsso de ciù persónne poscìbile a-e neuve fórme de comunicaçión, proponéndo a-o mæximo ténpo di modélli de fruiçión a-o pàsso co-e reâli exigénse da comunitæ.
'Na recénte inchiésta efettuâ da-a Telecom a l'à dimostròu che, se gh'é 'na fòrte aspêta in Italia inti confrónti de-e neuve tecnologîe e de-e réti, l'ostàcolo ciù gròsso o l'é tuttòua rapprezentòu da-i problêmi connèssi a-o teritòrio pe cui o no l'é imaginàbile pensâ a 'n villàggio globâle sénsa confìn nazionâli quàndo no émmo rezòlto i nòstri problêmi intèrni. Internet o l'é 'n concètto topològico e no topogràfico; èse in réte o significa effettivaménte superâ e barrêe do nòstro localìsmo, ma se questo o pêu èse ùtile pe 'na ràpida e capillâre difuxón in ténpo reâle de l'informaçión, dovémmo pensâ a-e tecnologîe de réte comme a 'n struménto ch'o pòsse agiutâ a superâ armeno quarchedun di problêmi locâli che condiçiónan pezanteménte a vìtta pràtica do çitadìn.
Inte sto senso pròpio a-o scòpo de raggiùnze rapidaménte 'n numero crìtico d'uténti e dónca de rénde o nòstro sfòrso con 'n significâto pregnànte ascì vèrso a difuxón de-e nòstre idêe, créddo che ciù in sce Internet o Comûne de Zêna, pròpio perché o l'é Comûne de Zêna e comme tâle o l'é prezénte a livèllo territoriâle, o dêve favorî a nàscita de 'na réte cìvica con 'n sistêma a cêrci concèntrichi che, sfruttàndo o protocòllo TCP/IP, o permétte o sviluppo de 'na vêa réte ch'a interconnétte a tràverso gateway sénpre ciù lârghi e diversificæ prezénse territoriâli: e associaçioìn, o volontariâto, i çitadìn, i enti locâli. Tùtto questo in manêa autònoma e con modalitæ personalizæ sótta 'na ùnica regîa poscibilménte, quella do Comûne de Zêna.
Inta nòstra ipòtexi imaginémmo 'n'amministraçión locâle ch'a crêe e a contribuìsce a creâ réti con "gateway" de pòsta vèrso o mondo ma con servìçi e funçioìn rivòlte prinçipalménte a-e realtæ spésso complèsse in cui òperan a livèllo locâle. L'accèsso a tâli réti o dovéiva èse gratuîto limitataménte a-a réte locâle, pe no interferî co-o travàggio di providers, importànte pormón da pìccola e mêza inprêza zoenîle.
Sto sistêma o permettiæ l'accèsso a-e tecnologîe de réte de 'n numero elevòu de çitadìn, che poriéivan fruîne no sólo da câ ma ascì da pùnti d'accèsso cìvichi spàrsi in sciô teritòrio, imparàndo, coscì, a conósce i servìçi e e informaçioìn offèrte, e devegnéndo a pöco a pöco di utilizatoî primma indirètti e pöi, auspicabilménte, dirètti di servìçi.
O mondo de l'associaçionìsmo o dovéiva èse coinvòlto offréndoghe spâçio gratuîto in sciô modèllo torinéize (che tànto o pâ piâxe a-a nòstra Giùnta) ò in sciô modèllo de-e âtre çittæ che pràtican soluçioìn de sto tìpo. L'atençión a-i problêmi locâli a l'é l'ârma vincénte pe sviluppâ a réte do Comûne, ascì pe dimostrâ che con tâli tecnologîe se poîan rezòlve gròssi problêmi d'informaçión e difuxón ràpida de fónti spésso inaccescìbili a-o çitadìn ò dificilménte consultàbili.
Çèrto questo o significa primariaménte modificâ a vixón intèrna da comunicaçión tra i enti locâli, o significa adottâ o ciù poscìbile mètodi automatizàbili vèrso a réte pe-i documénti e o significa passâ a tràverso 'na fâze de fadigôza imputaçión de dæti che se rendémmo cónto a no pêu èse rezòlta into contingénte ma che s'auspichémmo in quarche mòddo realizàbile inte 'n futûro immediâto. Questa a l'é a sfîda che 'na sinìstra ch'a govèrna e Amministraçioìn locâli a dêve pónnise inte l'ànbito do sviluppo de 'na comunicaçión do domàn.
Ghe vêuan sistêmi de trasmiscion a ónde cùrte, a tràverso i quæ 'n flùsso costànte d'informaçioìn ùtili e no ridondànti o pòsse permétte a-o çitadìn d'èse e sentîse partêcipe de l'ativitæ amministratîva. No ne spàventa, ànsi o ne trêuva conpletaménte in sintonîa a poscibilitæ de dotâ o çitadìn e e associaçioìn a-o çitadìn de 'na cazélla de pòsta eletrònica personâle e gratuîta.
No existe sólo a Telecom oramâi, e a grànde scomméssa do domàn a no l'é in sciâ tècnica ch'a va avànti da sólo ma in sci-i contegnûi che, gràçie a Dîo, dipéndan sénpre da niâtri òmmi. I contegnûi no dêvan spaventâne se savémmo amministrâli e se vogémmo métteli a disposiçión do çitadìn. Questi son fondamentâli e, se me permétte 'na digrescion, pàrtan pròpio da-o zoêno formòu e alfabetizòu a-o neuvo mondo, quello mondo ch'o-o dovéiva rénde e fâ devegnî çitadìn do mondo.
Se tràtta, segóndo niâtri, de 'na pìccola ma necessâia rivoluçión copernicànn-a inte l'utilizo de-e réti informàtiche. Métte a-o çéntro e necessitæ e e exigénse do çitadìn normâle, ciuttòsto che l'utopîa, a ancheu, perloméno de 'n villàggio globâle virtuâle, do quæ no vogémmo discûte i poscìbili mêriti, che d'âtronde riconoscémmo 'na vòtta l'utopîa a foîse effettivaménte realizâ armeno in pàrte, ma che ancheu o ne pâ ancón tròppo distànte da-e domànde, da-e necessitæ e da-e exigénse di çitadìn. Ànsi credémmo che pròpio pe contribuî a-a construçión de quella utopîa o segge necessâio operâ concretaménte pe-a difuxón coscénte do mèzo informàtico a stràti sénpre ciù ànpi de popolaçión.
Se àrvan chì doî ulteriôri problêmi in sci-i quæ o l'é necessâio soffermâse: quello da difuxón de conoscénse e competénse informàtiche e quello di accèssi a-a réte. A difuxón mascìccia de tecnologîe informàtiche e de l'utilizo de struménti informàtichi modèrni o l'é 'n procèsso estremaménte recénte ma ascì estremaménte ràpido. Questo o pón moltéplici problêmi, tùtti inta sostànsa riconducìbili a-o gràdo de difuxón de-e competénse de tìpo informàtico inta soçietæ.
A scheua a l'à comensòu da 'na dexìnn-a d'anni e progressivaménte a l'à estéizo l'insegnaménto, d'âtronde no ancón capillarménte difûzo, de quarche conoscénsa de tìpo informàtico, ma o no l'é pessimìstico sostegnî che sémmo ancón ben a-o de sótta perfìn de 'n sénplice stâdio d'alfabetizaçión informàtica, trànne che pe quarche indirìsso da scheua mêza superiô.
O saiæ d'âtronde illuzòrio ritegnî che a scheua, ascì se a n'avésse a capaçitæ in tèrmini de risórse umàne e finançiârie, a pòsse fornî 'n livèllo de conoscénse stabilménte adeguæ a-e exigénse da soçietæ e do mondo do travàggio, vìsti soviatùtto i rapidìscimi progrèssi scîa in tèrmini de componentìstica eletrònica, scîa in tèrmini d'ingegnerizaçión, scîa in tèrmini d'evoluçión di programmi disponìbili. In âtre paròlle quello che se insègna ancheu o rìschia d'èse obsolêto into gîo a-o ciù de 'na dexìnn-a d'anni, se no se métte chi o l'imprénde inta condiçión de podéi in futûro continuâ a imprénde fornîo ciù de 'na bónn-a conprenscion de-e lògiche de fonçionaménto che de 'na sêrie de nozioìn aplicæ.
No poscémmo, però, no pónnise o problêma perloméno pe trêi motîvi. Primma de tùtto perché pròpio inte sti giórni se stâ comensàndo a discûte da propòsta de rifórma da scheua e di cìcli formatîvi, co-o scòpo dichiaròu de mejorâ e capaçitæ de ciascùn d'adattaménto a-i mutaménti soçiâli e econòmichi, modificàndo da 'n lâto percórsi formatîvi primâri e programmi, ma ascì prevedéndo a necessitæ ascì succescîva a-l'inseriménto into mondo do travàggio e dónca o dirìtto soggettîvo a accêde a-i succescîvi cìcli formatîvi, ò sa a formaçión continua.
In segóndo lêugo perché l'inseriménto sénpre ciù estéizo de proceduâ informàtiche into mondo do travàggio e da soçietæ o rìschia d'esclûde e d'emarginâ chi za o travàggia e o no l'à ò o no pêu avéi suffiçénte capaçitæ d'adattaménto. In prospettîva o se pón infìn o problêma de fâ scì che l'utilizo de neuve tecnologîe, in particolâre de quelle informàtiche dirètte, o no resùlte 'na neuva e ciù sofisticâ fórma d'alienaçión da-o travàggio ò d'emarginaçión e diversificaçión soçiâle pe quelli travagiatoî ò quelli çitadìn che ò no son in gràdo d'utilizâle ò son in gràdo sólo d'utilizâne sólo quarchedun mìnimi aspètti, pe de ciù in mòddo sostançialménte subordinòu.
Se tràtta de problêmi a cui soluçión no credémmo a pòsse avegnî addossâ esclusivaménte a-o mondo da scheua, manco inta prospettîva de 'na pûa e auspicâ rifórma. A necessitæ de cìcli formatîvi pòst-secondâri e l'affermaçión do dirìtto soggettîvo a-a formaçión continua, prevìsto d'âtronde da-o recénte patto pe-o travàggio tra o Govèrno e pàrti soçiâli, àrvan evidenteménte a questión di soggètti che tâle formaçión doviàn fornî e in quæ mòddi.
O l'é dónca ciæo - stémmo chì restringéndo volutaménte o cànpo a quello ch'o l'é de pertinénsa de sto Conseggio Comunâle - che a polìtica che in particolâre i enti locâli seguiàn rispètto a-l'informatizaçión, a-e réti e a-l'utilizo de-e neuve tecnologîe a l'é pe niâtri de cruciâle importànsa no sólo rispètto a-a poscibilitæ de mejorâ a qualitæ di servìçi fornîi ma ascì rispètto a-a poscibilitæ che a difuxón graduâle ma capillâre de conoscénse informàtiche essençiâli, a tràverso a promoçión de réti cìviche a mezûa do çitadìn, a pòsse èse struménto no secondâio de promoçión soçiâle e civîle.
Domandémmo che sta Amministraçión Pùbrica in sce sti têmi a àrve 'na discusción in quarche mòddo puntuâle, ch'a consénte de programmâ 'n intervénto capâce d'andâ a-o de là de-e operaçioìn, pur legìttime e necessârie, de creaçión de 'na sénplice struttûa Internet, e dónca prettaménte d'imàgine, construéndo a partî da-o teritòrio e da-i çitadìn 'n neuvo adêuvio da réte e contribuéndo a-a necessâia e fondamentâle ativitæ d'indirìsso de tùtte e istituçioìn locâli che stàn approdàndo a-a réte. 'N grùppo de penscéro e d'indirìsso, do quæ fàccian pàrte espèrti do settô, o poriæ contribuî a-a concretizaçión de 'n progètto "réte cìvica", ben taròu e ben dimenscionòu a-e aspettatîve di çitadìn e di attoî prinçipâli.
Me pâ ciæo d'avéi restréito l'ànbito de l'intervénto a-o discórso da réte cìvica e dónca no tànto a quello ch'émmo realizòu in sce Internet, che giudichémmo èse sólo 'n mòddo comme 'n âtro pe fâse védde e no costituî, però, 'na necessâia sostànsa. Mì créddo, comùnque, che pe quànto riguârda a moçión prezentâ da-o coléga Quaglia o nòstro Grùppo o domànde 'na discusción aprofondîa in sede de commiscion, perché o ne pâ che, a prescìnde da 'n mêro vöto d'assénso ò dissénso, quarchedun di aspètti trattæ dêbban èse anpiaménte dezaminæ inte 'na sede oportûnn-a, vìsto che se tràttan aspètti specificaménte tècnichi e in quarche mòddo da analizâ o ciù compîamente.
Dónca pénso che inte sta discusción, se o coléga Quaglia o accettiâ, se poriæ tranquillaménte intesce e raxonâ in sce-e domànde e in sce-e istànse prezentæ da-o coléga ma ascì in sce comme effettivaménte strutturâse pe portâ avànti o procèsso de creaçión de réte."

Flavio Azzarelli

Torna a l'ìndice

Intervénto de Carlo SCHENONE (G. Misto)

"No pòsso ezimîme, evidenteménte, da-o intrâ inta stòria ascì mì, adesso che ho saciûo che saiò in sciâ réte pe l'eternitæ. A maggiô raxón consideròu che incirca 6 menûti fa i giornalìsti, tùtti insémme, an pigiòu "baràcca e buratìn" e se ne son andæti vîa, dónca l'ùnica manêa pe intrâ inta stòria a l'é questa in quànto i giornâli de seguo no poriàn referî quello che diò.
Ve dàggo 'n'informaçión ch'a pêu èse interessànte in sciô scîto personâle do conseggié Azzarelli, donde son segnæ e seu mûxiche preferîe, i seu amoî e tànte âtre cöse (argoménto interessànte ma no estremaménte interessànte): ebbén ghe son stæti 1137 accèssi fìnn-a a dêri. Dêri an installòu Internet in sciâ mæ màcchina, ho provòu a colegâme e ho rilevòu sto dæto. Questo o significa che de persónne che viàggian in Internet ghe ne son. Dónca i numeri no son pöi do tùtto trascuràbili e inte 'n scîto donde ghe son de-e indicaçioìn de tìpo polìtico de seguo i accèssi saiàn ascì mòlti de ciù.
Questo in quarche manêa o significa avéi za 'n canâle che atualménte o no l'é attivòu ciù de tànto no sólo inte 'n senso ma ascì inte l'âtro. Fasso riferiménto a quello ch'o dixéiva primma l'Assessô a-o Bilàncio in sce l'informatizaçión do Comûne. Internet o pêu èse 'na dorsâle importànte pròpio pe l'automatizaçión do Comûne pe avéi 'n sistêma intèrno a-o Comûne pe-a comunicaçión.
Niâtri émmo tùtti quànti coscénsa de comme se vîve co-i fattorìn; ebbén, Internet a pêu èse adêuviâ con 'n tèrmine ch'o vegne dîto "Intranet" - e dónca co-a mæxima tecnologîa de Internet ma con scòpi 'n pö diversci - pròpio pe rezòlve tànti problêmi d'organizaçión intèrna do Comûne. Dîgo questo perché, otre a èse evidenteménte favorévole a quello ch'o indicâva l'assessô in mérito a-l'informatizaçión do Comûne, ritégno che o segge pròpio da 'n pùnto de vista d'eficénsa 'na svòlta pe doî motîvi. De seguo o permettiæ de mejorâ a comunicaçión intèrna e o l'aviæ ascì 'n efètto laterâle e vâle a dî co-a notévole difuxón de 'n sistêma comme questo se no âtro perché i dipendénti comunâli saiéivan invogiæ (se no costréiti) a imparâ sto struménto e podéilo dónca adêuviâ e difónde inte sta conoscénsa drénto a-a çitadinànsa.
Evidenteménte gióngio quarcösa de specìfico in sce-e mæ competénse. 'N sistêma informatîvo comunâle basòu in sce Internet o divénta a 'n çèrto pùnto 'n sistêma informatîvo mòlto ciù facilménte integràbile con âtri sistêmi informatîvi inte 'n sistêma informatîvo territoriâle che realménte o l'agge a capaçitæ e a poscibilitæ de gestî 'n teritòrio, cösa ch'a l'é precìpua di Enti Locâli ciù ancón che di enti privæ.
Dónca l'avéi a disposiçión Internet scîa pe connêtte tra de lô i vâri scîti, i vâri lêugi de travàggio do Comûne pe-o scàngio d'informaçioìn, scîa pe podéi pöi integrâ i pròpi sistêmi informatîvi con quelli d'âtri Enti Locâli ò âtre struttûe e organizaçioìn o divegniæ 'n sistêma realménte eficâce d'eficientizaçión da màcchina comunâle.
L'efètto ulteriô o saiæ quello che, 'na vòtta che tùtta a comunicaçión intèrna do Comûne a se basésse in sce 'n meccanìsmo comme Internet, o resultiæ mòlto fàcile a sto pùnto adêuviâ a comunicaçión intèrna e rendila armeno parzialménte trasparénte vèrso l'estèrno, realizàndo quella trasparénsa amministratîva che tùtti quànti àuspican ma ch'a mòlte vòtte a divénta complicòu realizâ, se no âtro pròpio pe questión de còsti e de poscibilitæ d'accèsso.
In sce a trasparénsa amministratîva o Statûto do Comûne de Zêna o prevéde che o vegne realizòu e dónca ascì publicòu 'n notiziâio. Questo fìnn-a òua o no l'avegne, ascì se o l'é 'n inpegno che o Comûne o s'é pigiòu ben primma ascì de l'avénto de sto cìclo amministratîvo, e dónca, ascì se s'auspica de podéi dâ 'n'informaçión difûza a-i çitadìn, questi no l'an a poscibilitæ d'accêde ciù de tànto a quello ch'o l'avegne drénto a-o Comûne. Podéi accêde in quarche manêa, perloméno a tràverso Internet, a informaçioìn intèrne a-o Comûne che in quarche mòddo son za informatizæ (se no za conpletaménte informatizæ) o poriæ armeno sopperî a-a carénsa de 'n notiziâio da pàrte do Comûne.
Me colêgo a quello ch'o dixéiva Azzarelli. Ascì mì son d'acòrdio in sciô fæto che, se Internet o l'é de seguo 'na dorsâle intèrna ch'a pêu avéi tànti aspètti positîvi, no se pêu pensâ d'avéi 'n accèsso da pàrte di çitadìn esclusivaménte a tràverso Internet, e o l'é poscìbile benìscimo, però, dâ 'n accèsso a-e informaçioìn a tràverso 'na réte cìvica, 'na BBS, sénsa còsti particolâri se no quello de 'n modem e de 'n calcolatô che, comme savémmo, son za difûzi, e dónca sénsa còsti d'abonaménto e cöse de sto tìpo.
Questo sò che o l'é za inte-e intençioìn de l'Amministraçión e de seguo o l'é 'na scélta da perseguî ascì, perché inte sta manêa o l'é poscìbile dâ accescibilitæ a-i çitadìn abbastànsa pöco attrezæ a tùtte e informaçioìn intèrne a-o Comûne, pròpio pe realizâ sta trasparénsa.
'N âtro passàggio o l'é quello de realizâ di lêugi donde i çitadìn poîan accêde a Internet (e questo, se no sbàglio o l'é ascì prevìsto da l'Amministraçión) in manêa tâle che 'n quæsìasi figgeu sedixénne intraprendénte ch'o l'agge vêugia de fâ 'n pö de navegaçión de Internet pe andâ a descrôve quarche cösa o pêu benìscimo recâse aprêuvo a 'n Conseggio de Circoscriçión e trascórre quarche menûto ò magâri quarche ôa a "vagâ in gîo". Questo, evidenteménte, o necescîta de 'na regolamentaçión, senonò se rìschia d'installâ de-e apparecchiatûe che vegnan adêuviæ sénpre e solaménte da quarche persónn-a, ma questo o l'é 'n aspètto secondâio.
Dêri ho provòu a vixitâ o scîto do Comûne ma o no rispondéiva, comùnque ho posciûo vixitâlo o giórno da prezentaçión e o me paréiva ben fæto. De seguo o pêu èse estéizo - n'avéivimo discùsso ascì duànte a prezentaçión - dàndo a poscibilitæ a cascâta de chìnâ ulteriorménte inte l'èrbo de-e ricèrche pe andâ a fornî âtre informaçioìn da colegâ a quelle za prezénti.
Dónca Internet, che za o l'é prezénte drénto a-o Comûne, o pêu èse 'n meccanìsmo d'eficientizaçión intèrna e o pêu èse ascì 'n meccanìsmo de trasparénsa vèrso l'estèrno. E inte sta òttica de trasparénsa comme conseggié comunâle son do parê che o saiæ mòlto ùtile podéi fornî a-i grùppi conseggiâli 'n pö de spâçio pe avéi de-e pàgine a tràverso e quæ prezentâse a l'estèrno, prezentâ e pròpie iniziatîve e prezentâ in generâle quella ch'a l'é l'ativitæ a-o intèrno, che spésso e voentêa, 'n pö ascì pe-a carénsa da stànpa e in generâle pe 'na carénsa de comunicaçión, no se riêsce e o no l'é poscìbile (se no in mòddo estremaménte costôzo ò particolarménte vizioso) prezentâ a l'estèrno.
In sce l'âtra propòsta fæta da-o conseggié Quaglia de métte i verbâli do Conseggio Comunâle in lìnia intànto a primma consideraçión a l'é che probabilménte doviéscimo tùtti quànti autoregolamentâse inta discusción perché 'n tèsto tròppo lóngo o no vegne manco lezûo. Comùnque son convìnto che o segge poscìbile fâ questo, che in efètti o no compòrta 'n gròsso aggrâvio de spéiza. Comme dixéiva primma, publicâghe otre che a-l'Àlbo Pretòrio e delìbere o significhiæ senplicemente métte a disposiçión 'n file ch'o l'é za reperìbile drénto a l'Amministraçión in quànto tùtti i tèsti a-o moménto son realizæ a tràverso calcolatoî.
Dónca probabilménte o l'é poscìbile inserî 'n çèrto insémme d'informaçioìn comme i verbâli do Conseggio Comunâle ma fórse ancón de ciù l'elénco de-e delìbere de Giùnta e de Conseggio e ascì i tèsti de-e sìngole delìbere sénsa 'na gròssa spéiza. Probabilménte quarche delìbera a no vegniæ lezûa da nisciùn, ma se no sólo i sìngoli çitadìn ma ascì i vâri enti pùbrici ò privæ comenséssan a avéi 'na frequentaçión, se pe exénpio e soçietæ che poîan èse interessæ a-l'indiçión de gâre ò cöse de sto génere poîssan accêde a ste informaçioìn dirèttamente da-i pròpi ufìçi, magâri essèndo za fornîi de Internet, ebbén a quello pùnto riduiéscimo l'aggrâvio de tràffico vèrso o çéntro çitadìn pe vegnî a Tursi pe-a consultaçión e a-o mæximo ténpo aviéscimo 'n aumento da trasparénsa e de l'eficénsa do Comûne."

Carlo Schenone

Torna a l'ìndice

Intervénto de Franco BAMPI (P. Nord)

"I intervénti che ho seguîo me pâ che a-a fìn se ricondûan, con vârie articolaçioìn, a quànto mì avéiva dîto l'ùrtima e ùnica vòtta ch'émmo discùsso de Internet, vâle a dî che pe rénde eficénte o scîto e pe fâ scì che sto scîto o segge agiornòu (e o no divénte dónca 'n travàggio in ciù) ghe vêu che l'utilizo de Internet o divénte 'n struménto mæximo con cui o Comûne o travàggia. O divénta, in efètti, complicòu se tùtte e vòtte dovémmo trasferî e delìbere in sce Internet perché pöi ce e poscémmo dimenticâ, dónca o pòsto donde ste delìbere vegnan conservæ o dêve èse in quarche mòddo dirèttamente accescìbile con Internet, lasciàndo feua da-a réte sólo tùtte quelle questioìn che domàndan particolâre rezervatéssa comme, pe exénpio, o schedâio anagràfico, ch'o poriæ èse misso feua réte in quànto savémmo che i meccanìsmi software de protençión no son ancón eficientìscimi e dónca poriéivan èse violæ. Tùtte e vòtte che ghe vêu rezervatéssa o l'é ciæo che 'n dæto o dovéiva èse inserîo feua réte, però a réte a fonçionn-a sólo se a divénta 'n struménto de travàggio. Me pâ d'avéi cattòu sti riferiménti con vârie diversificaçioìn ciù ò meno in quæxi tùtti i intervénti che m'an precedûo.
Dêvo dî che a l'é stæta invocâ mòlto a trasparénsa e in mérito a-o fæto che Internet o poriæ creâ trasparénsa òua no m'é ciarìscimo se questo o va a favô de Internet ò o va contra, perché se i çitadìn poîssan accêde dirèttamente, pe exénpio, a-e delìbere de Giùnta e se accorzéssan dónca di dénæ che vegnan spéixi pe consulénse e pe spéize vârie comme pe exénpio 800 milioìn pe rifâ 'n cànpo-nòmadi, ò 150 milioìn pe mandâ a câ "bilàncio ciæo sótta a lanterna", ebbén quàndo se accorzéssan che effettivaménte o Comûne o amministra i dénæ pùbrici into mòddo con cui o-i amministra o poriæ quarchedun avéi quarche resipiscénsa.
Quàndo se accorzéssan che effettivaménte sto Comûne o amministra i dénæ pùbrici into mòddo con cui o-i amministra o pêu dâse che quarchedun o pòsse avéi quarche resipiscénsa, magâri ascì 'n eletô do Sìndaco. Adesso, gh'é da dî a veitæ, eletoî do Sìndaco o l'é dificile trovâne, però, magâri, se se foîse in sce Internet ascì quelli pöchi residoî poriéivan avéi quarche verecóndia a dî "scì l'ho votòu ascì mì", dónca no m'é ciæo che a trasparénsa in sce Internet a segge 'n eleménto ch'o zêughe a favô.
Voéiva fâ ancón 'n comménto a-i intervénti. In efètti ho vìsto 'n Quaglia stupîo do fæto che l'assessô a se segge dimentegâ che in realtæ de Internet avéivimo za discùsso inte 'n'assemblêa precedénte. Questo o l'é curiôzo perché l'Assessô Cassol a s'é dimentegâ repetutaménte de tànte cöse; pe exénpio duànte a campàgna eletorâle, quàndo se fâva o seu nómme pe assessô, a s'éa dimentegâ d'èse into P.D.S. e a dixéiva "mì son indipendénte", dòppodiché, 'na vòtta nominâ assessô, a l'à dîto "mì son into P.D.S.". E ancón a s'é dimentegâ ch'a stâva pe firmâ ò a l'aiva za firmòu 'n'ordinànsa pe portâ i zìngari a Quarto Alto e a l'à dichiaròu in sci-i giornâli "no, nisciùn blitz" e o giórno dòppo i zìngari stâvan andàndosene; mì prezùmo che a se ne foîse dimentegâ e che a no foîse sarcàsmo quello.
Quarche vòtta no se diméntega, ma no son mì a èse pezànte con l'Assessô Cassol, ma i sindacâti che quàndo an indîto 'n sciòpero contra a Giùnta an fæto 'n volantìn in cui an scrîto "a Cassol a mente". Ma mì créddo che a se foîse dimentegâ, vâle a dî a l'aiva dîto quarcösa e a s'éa dimentegâ d'avéi dîto 'na cösa diversa primma ò d'avéi fæto 'n atto diverso primma. E probabilménte a s'é dimentegâ ascì de quello che ho regordòu mì adesso, ma questo o no l'é 'n grànde problêma.
Dêvo, però, dî - e vorriéiva dâ questo comme contribûto significatîvo a sto mæ intervénto, perché o rèsto l'avéiva za dîto e dónca, comme o mæximo conseggié Quaglia o regordâva, o no l'é coscì stimolànte dî e ridî cöse che son stæte dîte, ascì se o serve perché o l'é ùtile, pe exénpio, a fâ conprénde mêgio e con maggiô dovìçia de detàlli o pròpio penscéro - ebbén dêvo dî che se pêu fâ 'na cösa: ho saciûo, ancheu, da-a relaçión de l'Assessô Luzzati in sciô bilàncio che finalménte sémmo sciortîi da-o sfàscio de-e Amministraçioìn precedénti.
Magâri o P.D.S. o no l'à ninte da dî perché o s'é dimentegòu (fórse in lìnia con l'Assessô Cassol) che inte-e Amministraçioìn precedénti o amministrâva ascì lê, comùnque l'Assessô Luzzati o parlâva de sfàscio de-e Amministraçioìn precedénti. No l'ho dîto mì, l'à dîto o vòstro assessô, dónca créddo che no se pòsse accuzâ mì de 'na frâze coscì, perché l'à dîto o vòstro assessô, o risanatô de bilànci, che sciortìmmo da-o sfàscio.
Allóa, sìccome effettivaménte son za dôe e vòtte ch'émmo discùsso do problêma de Internet (ascì se de ûnn-a ce ne sémmo dimentegæ) e no vorriéiva discûtilo ascì 'na tèrsa, conséggio de fâ 'na S.p.A.: "Internet de Zêna S.p.A.", coscì sottraémmo Internet a-o contròllo dirètto do Conseggio Comunâle e no poriêmo ciù discûte de ste cöse, coscì comme émmo sottràtto e âree do Pòrto Antîgo a-o contròllo do Conseggio Comunâle, coscì comme sottraémmo e âree do Ponénte sottopòste a bonìfica da-o Conseggio Comunâle, coscì comme émmo sottràtto i parchéggi da-o contròllo do Conseggio Comunâle.
Fondamentâle pe fâ 'na S.p.A. ch'a fonçionn-e, ch'a ne lêve da-o sfàscio, comme l'Assessô Luzzati o l'à regordòu, o l'é ch'a segge a capitâle conpletaménte pùbrico, questo o l'é importànte. Ma partners pùbrici, a Zêna, tùtti do mæximo coô ghe ne son tànti. Mì créddo, Assessô Cassol, e sta vòtta me rivòlzo pròpio dirèttamente a lê, ch'a dovéiva fâse promotrîce de "Internet de Zêna S.p.A.", coscì armeno Quaglia o tâxe."

Franco Bampi

Torna a l'ìndice

Intervénto de Umberto Testori (A.N.)

"Mì no vêuggio intrâ inta polêmica che se discûte de 'na cösa e pöi se spàzia in tànte âtre cöse. Me segge permìssa 'n'ùnica battûa (no dîgo polêmica ma vêuggio sperâ spiritôza) e vâle a dî quàndo l'assessô o parlâva de-e precedénti Amministraçioìn o poéiva ascì allûde a tànte âtre Amministraçioìn, pe exénpio, da-o '45 in zù e no in sù, perché o no l'à specificòu l'assessô l'ùrtima ch'émmo ereditòu ma o l'à parlòu de-e precedénti e dónca, pe exénpio, o poéiva parlâ do Podestà e probabilménte allóa o l'aiva raxón, pe cui o no gh'é da polemizâ in sce sto fæto.
No vêuggio manco intrâ a polemizâ con l'Assessô Cassol pe vâri motîvi. 'N pö perché ritégno che o no segge stæto fæto ad ârte; secondariaménte, sìccome son 'n gentilòmmo, eventualménte me a piggio con quarche assessô màscio e mâi con 'n assessô scignôa. A cösa ch'a m'interessâva in particolâre a riguârda o coléga Quaglia ch'o m'à notevolménte e positivaménte inprescionòu pròpio quàndo o l'à çercòu, ahimè pe lê e ahimè pe mì, d'inserîme inte 'n discórso che purtròppo pe mì o l'é àrabo, però o m'à inprescionòu e affascinòu pròpio perché ritégno che a cösa a segge mòlto ma mòlto interessànte. E questo soviatùtto pe 'n Conseggio Comunâle che, ben ò mâ, o travàggia, pe de-e Commiscioìn che, ben ò mâ, travàggian, ma che da pàrte da stànpa locâle, a meno che un o no dîxe de tùtto a 'n assessô ò a-o Sìndaco, no se pârla mâi, ascì quàndo quarchedun o travàggia dignitozaménte e positivaménte pe çercâ de portâ o pròpio contribûto.
Comme dixéiva, saiò brevìscimo, perché, ho interèsse a intrâ inte sto argoménto che, repéto, o m'affàscina, però se o coléga Quaglia o no continuiâ a inserîme pénso che poriò ben dî pöco. A cösa, da quello pöco che ho capîo, me pâ mòlto interessànte perché a ne permettiâ de dâ a-l'opinión pùbrica, ascì se ancheu comme ancheu no son in mòlti a podéise inserî, 'n quarcösa che atualménte o Comûne o no pêu dâ a meno che no se métte a fâ de-e spéize enòrmi e pazzésche, mentre invéce ritégno che con sto Internet e spéize doviéivan èse limitæ. Pe cui dichiâro o nòstro vöto favorévole a-l'órdine do giórno do coléga Quaglia, ritegnéndose a disposiçión pe imparâ sénpre de ciù."

Umberto Testori

Torna a l'ìndice

Intervénto de Lucia Deleo (P.D.R.C.)

"Saiò brêve ascì perché mòlto o l'é stæto za dîto da-i âtri. Ciù che âtro me esprimiò in sci-i órdini do giórno e in sce-e propòste fæte da-o conseggié Azzarelli, perché ascì mì ritégno che, tùtto sommòu, se o Comûne o riuscésse a andâ avànti inta strâda da réte cìvica o saiæ za 'n gròsso pàsso avànti.
Votiò a favô scîa da moçión scîa de l'órdine do giórno prezentæ da Quaglia, però voéiva sottolineâ ascì mì a necessitæ de tornâ in commiscion pe védde in manêa ciù aprofondîa da-o pùnto de vista tècnico comme eventualménte andâ avànti in sce sta strâda, tegnûo cónto che sémmo a-a fìn do cìclo amministratîvo e che comùnque, se riuscéscimo a comensâ o percórso, o saiæ 'n lasciâ 'n'ereditæ positîva pe-o futûro. L'âtra questión da tegnî in consideraçión a l'é o fæto che ghe vêu pensâ a-a formaçión do personâle do Comûne ch'o doviâ pöi agiutâne e o doviâ agiutâse a adêuviâ sta réte. Conclûddo auspicàndo che se tórne in Commiscion."

Lucia Deleo

Torna a l'ìndice

Intervénto de Anna Maria CASSOL (Assessô a l'Informàtica)

"Scignôa Prezidénte, scignoî conseggié, son franchaménte 'n pö stupîa do fæto che se pârle chì de Internet comme se o foîse 'na cösa ch'a ancón no gh'é. De Internet émmo parlòu - comme o regordâva o conseggié Azzarelli - into '94, n'émmo parlòu in mòddo aprofondîo into màzzo do '96 e n'émmo parlòu into lùggio in sce prezentaçión de 'na moçión do conseggié Quaglia. Émmo pöi fæto 'n incóntro de prezentaçión do scîto Internet do Comûne o 21 de zenâ de st'anno, a cui émmo invitòu tùtti i capigrùppo.
No tùtti gh'éan, e vêuggio precizâ che l'émmo fæto co-o adeguòu preavîzo sottolineàndo no sólo che o l'éa 'n moménto importànte de prezentaçión de 'n travàggio ch'avéivimo promìsso e in sce cui se s'éa inpegnæ ma ascì o fæto che quella sede - e coscì o l'é stæto pe chi gh'éa - a rapprezentâva ancón 'n'ocaxón pe sviluppâ quarche problemàtica, perché savémmo tùtti che Internet ò quæsìasi âtro struménto de comunicaçión, se o no vegne alimentòu e o no vegne sviluppòu adeguataménte, o l'é sólo fadîga e dénæ cacciæ vîa.
Mì me scûzo ma ritégno o segge necessâio regordâ a tùtti - perché l'avéivimo decîzo insémme - che o sviluppâ 'na cultûa Internet drénto a-o Comûne o l'éa da fâse segóndo 'n percórso a tàppe ch'o coinvolzésse sistematicaménte tùtta a struttûa de l'ènte e no 'n grùppo de "marziàn" che construéssan pàgine che quarche âtro a l'estèrno o andésse a consultâ.
No émmo vosciûo fâ di marziàn e gràçie a Dîo no ghe son di marziàn ma di tècnichi estremaménte competénti che pe fortùnn-a sàn, lô scì, cöse son i motoî de ricèrca. E no créddo che 'n assessô o dêbbe èse espèrto, ànsi saiéiva preoccupâ d'assessoî espèrti e maniàchi de motoî de ricèrca. Mì no sò ninte de motoî de ricèrca Internet e me ne vànto, e son conténta che sta Giùnta a l'agge scélto de dâ a personâle comunâle struménti, modalitæ, rappòrto con qualificæ soçietæ de consulénsa, perché drénto a sta organizaçión - e no sólo pe pascion de 'na Giùnta ò de 'n Conseggio - se crêan de-e pàgine e se consòlide 'na fòrte cultûa da comunicaçión, e coscì o l'é.
E pàgine in sci-i muzéi son tra e ciù bèlle in Italia. e pàgine che se stàn construéndo de sviluppo de quelle ch'én e ricchésse culturâli de Zêna védan inpegnæ tècnichi do Comûne che no son tècnichi informàtichi, perché no ne inpòrta ninte di tècnichi informàtichi che sàccian de Internet, ma ne inpòrta che drénto i servìçi culturâli, drénto a gestión do teritòrio e drénto tùtte e direçioìn ghe séggian de-e persónne che otre a-o seu travàggio an in man i struménti pe fâ scì che o seu travàggio o vagghe in sce réte Internet ò réte cìvica (e adesso ghe arîvo) perché questo o serve e o serviâ sénpre.
Questa a l'é a cultûa do cangiaménto che niâtri émmo sviluppòu chì drénto e o l'é stæto 'n sfòrso no indiferénte, perché o l'é fàcile construî de-e pàgine esteticaménte gradévoli e stàtiche. Queste, invéce, no son stàtiche, ma son gradévoli e in sce queste gh'é l'inpegno d'andâ avànti e coscì mì ho dîto inta prezentaçión ch'émmo fæto e donde gh'éan tùtti i tècnichi ch'an travagiòu. E gràçie a Dîo a prezentaçión a l'é stæta fæta a-i grùppi conseggiâli (chi gh'éa se-o regòrda) no da mì ma da chi o l'à travagiòu, e questo o l'é importànte.
No l'é l'assessô ch'o va a dî cöse s'é fæto, ma o l'é chi ghe travàggia ch'o l'à çertaménte l'orgóglio, a consapevoléssa e a cultûa de continuâ e d'esténde questo, evidenteménte, a-o maggiô numero de persónne poscìbili che drénto l'ènte travàggian e an necessitæ de comunicâ. Questo o l'é 'n percórso avviòu ch'o se dêve consolidâ e o l'é 'n percórso fondamentâle ch'o serve çertaménte a snellî o mòddo de travagiâ do Comûne e a rénde profittévole o rappòrto di çitadìn co-o Comûne, ascì a tràverso struménti neuvi.
A Zêna, gràçie a Dîo, e côe a-i spòrtelli comunâli son ridottìscime. Ghe son in çèrti moménti cruciâli e ascì in sce questo - pârlo do problêma di tribûti - ariviêmo a de-e soluçioìn, ma pe exénpio a çittæ de Zêna a l'é a çittæ ch'a l'à meno côe a-l'anàgrafe, perché evidenteménte a l'é riuscîa a organizâse inte sto mòddo. Ben, allóa niâtri çerchiêmo ò mêgio chi o travàggia drénto o Comûne e o stâ avéndo sénpre de ciù sta consapevoléssa o çerchiâ de fâ scì che tantìscime informaçioìn séggian pòste ascì in réte in sce quella che Azzarelli giustaménte o ponéiva comme réte çitadìnn-a.
A propòxito d'anèddoti mì ho dæto (l'an dæto ascì i tècnichi) l'inpegno a adêuviâ l'inglêize e no françéize-inglêize-todésco, perché inte sto moménto, scuzæ, no sémmo in gràdo d'arivâ a sta molteplicitæ de léngoe. Émmo scélto l'inglêize, o saiâ 'n problêma de "colonialìsmo" statunidénse ò britànnico, comùnque émmo scélto l'inglêize pe cuâ (comme émmo dichiaròu) a pàrte d'informaçioìn che ritegnémmo séggian ùtili pe-o mondo.
No ho dîto in mòddo sarcàstico che no mettéivimo i orâri di âxili nîo, l'ho dîto dixéndo ch'a l'é 'na scélta, 'na scélta pe-a quæ me sentîva suffragâ da quarche discórso fæto ascì con quarchedun di conseggié in mérito a-o fæto che chi o vîve a Zêna e o l'à de bezéugno de savéi di âxili comunâli ò o vêu vegnî a Zêna pe andâ inti âxili comunâli o pêu fâ o sfòrso de lêzeseli in italiàn, mentre invéce, evidenteménte, tùtte e pàgine de Zêna comme çittæ da vixitâ e da conósce saiàn progressivaménte (me pâ che za in sce quarche muzéo sto travàggio o se stâ fasendo, e no sólo pe-i muzéi ma ascì pe l'agénda e pe-i gràndi evénti) fæte ascì in inglêize.
In sciâ réte cìvica, dónca, questo o ne pòrta a dî che niâtri dovémmo construî 'na réte çitadìnn-a comunâle. Se sémmo inpegnæ, comme émmo dîto, e ghe stémmo travagiàndo. Gh'é 'n problêma de risórse e no sólo de tìpo econòmico ma ascì de tìpo umàno, into senso che chi o stâ travagiàndo in sce questo o l'à de bezéugno de perfeçionâ e de trovâ e modalitæ corrètte. E mì avéiva dîto inte quella sede, a zenâ, che mettéivimo in preventîvo incirca 6 méixi pe podéi avéi 'na réte comunâle. Questo o significa, sostançialménte, 'na poscibilitæ pe tùtti i çitadìn zenéixi d'accêde a-e informaçioìn gratuitaménte e no a tràverso l'accèsso Internet, perché niâtri pensémmo ch'o segge giùsto che tùtta 'na sêrie d'informaçioìn séggian pe-a çittæ accescìbili.
Émmo ascì dîto e discùsso sénpre inte quella sede in sce comme e chi o poriâ adêuviâ into scîto comunâle a poscibilitæ de comunicaçión. Ghe dêvan èse de-e cazélle eletròniche individuâli? Beh, mì créddo che dabón de questo se dêbbe discûte in commiscion, perché no son segûa che chì sémmo tùtti convìnti ò ch'émmo capîo perfettaménte cöse questo o significa. Mì créddo ch'o segge giùsto, comme o dixéiva o conseggié Azzarelli, ezaminâ e esperiénse che ghe son, pe exénpio, in Italia de réti comunâli ch'an offèrto a 'n çèrto numero d'associaçioìn sta poscibilitæ. Créddo che se ne dêbbe discûte perché gh'é 'n problêma de còsti e ascì 'n problêma de gestión.
Probabilménte a-o prinçìpio poriàn èse pöchi i çitadìn che faiàn sta domànda de cazélla eletrònica, però progressivaménte sta cösa a pêu aumentâ. Allóa sémmo segûi de questo? Mì ritégno che in sce questo o vagghe sviluppòu 'na discusción e dónca ritégno vâlida a propòsta fæta da-o conseggié Azzarelli, e racòrta da-o conseggié Schenone, d'intrâ profondaménte into mérito de questo, coscì comme créddo che rispètto a tùtti i pùnti prezentæ inta moçión o segge importànte discûte.
O l'é ùtile che i Grùppi poîssan avéi 'na seu pàgina? Mì créddo pròpio de scì, ma créddo che questo o dêbbe èse regolamentòu. Créddo che i Grùppi dêbban avéila, però dovémmo èse consapévoli che inte sto moménto e risórse organizatîve do Comûne no son in gràdo de supportâ immediataménte i Grùppi, dónca questi dêvan èse autònomi inta construçión de-e pàgine. Però, pe exénpio, créddo che a Commiscion Conseggiâle e pöi o Conseggio dêbban approvâ 'n regolaménto.
Stémmo intràndo in fâze eletorâle ma ascì se coscì o no foîse mì créddo ch'o segge necessâio 'n regolaménto de cöse i Grùppi méttan inte-e pròpie pàgine in sciô scîto do Comûne, dòppodiché, evidenteménte, ciascún Grùppo o pêu avéi o seu scîto. Mì créddo che questo o dêbbe èse ogètto de discusción e de 'na fórma de regolaménto.
Se domànda d'inserî a trascriçión de-e sedûte do Conseggio. Ebbén, quàndo émmo fæto a prezentaçión émmo dîto ch'o existe za 'n scîto ò sa 'na sêrie de pàgine cosidîte istituçionâli donde gh'é za o Statûto do Comûne e donde s'é dîto che utilménte doviàn èse inserîi delìbere e órdini do giórno. O l'à senso métte a trascriçión integrâle? Mì créddo ch'o segge oportûno decîde in mérito con 'na aprofondîa riflescion, perché, vedéi, tùtto o l'é banâle e ninte o-o l'é, a tecnologîa ancheu a consénte tùtto, però se dâ o câxo che ghe vêuan de-e risórse, de-e persónne ch'àggian 'n mìnimo de competénsa e de capaçitæ.
No se piggian e trascriçioìn de AMI-PRO pe cacciâle brutalménte in sce-e pàgine Internet. No créddo manco ch'o segge sensòu e vorriéiva che se ne discutésse. Créddo che un di prêxi do scîto do Comûne o l'é ch'o l'é gradévole e fàcile inte l'accèsso. No gh'é senplicemente 'na "sbrodolâ" de pàgine. O-o póngo comme problêma domandàndo se o segge ùtile e giùsto che i çitadìn che poîan conósce delìbere e órdini do giórno séggian ascì invitæ, pe comme son mìssi e into mòddo in cui son mìssi, a consultâ tâli trascriçioìn.
Mì créddo che tùtti sti aspètti contegnûi inta moçión poîan èse discùssi in mòddo aprofondîo, dòppodiché son personalménte convìnta che ghe vêu 'na struttûa organizatîva ch'a garantìsce 'n çèrto mòddo de fâ e cöse. A Segretarîa Generâle ch'ancheu a cûa a trascriçión di verbâli e tùtte e cöse relatîve a dêve organizâse e èse capâce de fâ scì che tùtto questo o vagghe a finî in sce-e pàgine de Internet e da réte cìvica. Allóa valutémmo ben cöse o dêve andâghe a finî.
O l'é giùsto che ghe segge 'na ridondànsa e 'n pêzo d'informaçioìn che pöi, magâri, nisciùn o va a lêze? No l'é importànte che se decîde in mòddo aprofondîo cöse o serve che i çitadìn sàccian e che o Conseggio e a commiscion fàccian 'na scélta, pe exénpio ascì progressîva, in relaçión a-e poscibilitæ organizatîve ch'o l'à 'n Servìçio, tegnûo cónto che o l'é o mæximo Servìçio ch'o dêve fâlo e o no l'é çèrto quarchedun âtro a azonzîse.
Allóa tùtti sti aspètti che éran za stæti affrontæ duànte l'incóntro de prezentaçión do scîto, che o no voéiva èse solaménte 'n incóntro pe dî "queste son e pàgine do Comûne", ma ch'o voéiva èse ascì 'n'ocaxón (comme o l'é stæta pe chi o l'à in mòddo costruttîvo partecipòu) pe dî comme se continua, o l'é interessànte portâli avànti, çertaménte no se pêu fermâse chì, o saiæ ridìcolo.
Coscì comme (chi o l'éa prezénte a quell'incóntro se-o regòrda) s'é dîto ch'o l'éa importànte che o Comûne o divegnîse promotô, pùnto importànte da réte, di enti e de-e istituçioìn çitadìnn-e che ò an za scîti Internet ò stàn pe avéili ò poriéivan, in mòddo che se agge 'n sólo accèsso, dónca 'na çittæ de Zêna drénto cui ghe segge o Comûne e drénto cui se pòsse colegâse co-e pàgine da Provìncia, da Region, do Carlo Felice, do Ducale, ò sa de tùtte e istituçioìn ch'an interèsse a sviluppâ a pàrte de promoçión da çittæ. In sce questo stémmo travagiàndo, in quànto questo o l'éa l'inpegno pigiòu.
Ghe son cöse che se stàn construéndo, ghe son de-e persónne, di èsei umàni che travàggian con questo. No basta dîlo perché miracolozaménte o segge fæto, ma ghe vêu che 'na màcchina coscì complèssa a l'agge in tùtte e seu pàrti e risórse pe fâlo, coscì comme émmo dîto e se sémmo inpegnæ perché in ténpi brêvi in sce Internet ghe segge a poscibilitæ de fâ l'accèsso a-a cartografîa informatizâ. E poscibilitæ d'espanscion son effettivaménte enòrmi, però ghe vêu regordâ che mì no son l'Assessô a Internet, perché no existe l'Assessô a Internet. Tùtti son Assessoî a Internet e tùtti son direttoî, dirigénti e funçionâri responsàbili d'informaçioìn che van in sce Internet.
Mì son senplicemente l'Assessô a l'Informàtica ch'a dêve garantî a struttûa de bâze drénto cui pöi gh'é da travagiâ, vâle a dî l'infrastruttûa in sce cui pöi viàggian tùtte e informaçioìn e e competénse. 'Na vòtta ch'a l'é stæta fæta sta scélta - e a l'é stæta fæta in sce indicaçión do Conseggio a partî da-o '94 - tùtti travàggian in sce questo e tùtti dêvan progressivaménte travagiâ perché ghe segge sto arricchiménto. Ma questo o l'é 'n procèsso avviòu. Se pêu védese ascì tùtte e settemànn-e; mì no ho nisciùn problêma a védeme in commiscion tùtte e settemànn-e pe referî do stâto d'avansaménto: de vòtta in vòtta portiò e poriàn vegnî tùtti i funçionâri che in sce questo stàn travagiàndo, che, repéto, son funçionâri de tùtti i settoî che appartégnan a tùtti i assessoræ. No gh'é quarchedun de specìfico, se no quarchedun ch'o garantìsce, evidenteménte, o suppòrto e quarchedun ch'o invéce o stâ travagiàndo in sciâ réte cìvica.
Pe cui, concludéndo, ribadìsco d'èse assolutaménte disponìbile a-a propòsta ch'a l'é stæta fæta d'affrontâ in mòddo orgànico, sistemàtico e puntuâle sti argoménti in commiscion conseggiâle, ascì pe èse realìsti e stabilî i tèrmini intra cui realizâ determinæ cöse e eventualménte dî, pe exénpio, e cöse che se dêvan rimandâ a-o pròscimo anno, in efètti o l'é inùtile fâ finta de dî che fémmo de-e cöse quàndo ancón no ghe son e competénse. Pe exénpio, pe quànto concèrne l'alfabetizaçión se stâ esténdendo o numero de persónne, però ascì chì se tràtta de ténpi graduâli ligæ a risórse e prioritæ da valutâ drénto a ciascùnn-a direçión.
Pe cui son assolutaménte d'acòrdio in sce questo. Personalménte ho de-e perplescitæ in sciô votâ a moçión into seu insémme perché in sce mòlti di pùnti mì, franchaménte, no son convìnta, coscì comme pe quànto riguârda l'órdine do giórno dêvo dî che son contrâia, órdine do giórno che tra l'âtro o dîxe "...che o Comûne o pòsse in futûro fornî a tìtolo gratuîto a navegaçión in sce Internet ò ascì sólo valutâla". Ebbén, me pâ che o conseggié Azzarelli o l'agge parlòu ciaraménte de providers e dónca o Comûne o no se métte a fâ a concorénsa a-i providers dàndo l'accèsso gratuîto a-i çitadìn.
O Comûne, comme ho dîto sénpre inte quella prezentaçión, o mettiâ inta neuva Biblioteca Berio 'na postaçión Internet e coscì pûre inte-e neuve Circoscriçioìn ghe saiàn de-e postaçioìn Internet, dónca da sto pùnto de vista o Comûne o fa a seu pàrte de poscibilitæ d'accèsso, ma che o Comûne o pòsse sostegnî e pagâ i accèssi Internet di çitadìn franchaménte créddo ch'o vagghe contra quæsìasi sêrio discórso de rispètto di pròpi rêuli e de-e pròpie funçioìn istituçionâli. Créddo che 'na quarche autoritæ a vegniæ immediataménte a denonçâne in sce questo.
Son ascì mòlto perplèssa in sciô fæto de patroçinâ sto convégno de l'Università di Firenze. Beh, franchaménte créddo che chì a Zêna ghe séggian stæti e ghe saiàn convégni otrettànto interessànti, pe cui pénso ch'o segge ùtile patroçinâ i convégni inta nòstra çittæ. Pregaiéiva o conseggié Quaglia in quànto son restâ corpîa da-a paròlla "proficua" scrîta co-a "q" a propòxito da proficua colaboraçión domandâ inta lèttia do laboratòrio de ricèrca educatîva. Son restâ 'n pö sconcertâ, ma evidenteménte questo o fa pàrte di sviluppi da léngoa che son infinîi."

Anna Maria Cassol

Torna a l'ìndice

Dichiaraçión de vöto de Roberto Quaglia (Lista Pannella)

"In sce quello ch'o l'à dîto l'assessô intendéiva sólo specificâ che no ho mâi parlòu mâ de-e competénse tècniche che se son sviluppæ da pàrte di ufìçi comunâli, nì de l'inpostaçión complessivaménte positîva do travàggio, ghe mancaiæ. Ho criticòu, probabilménte adêuviàndo 'na fôga superiô a quella ch'a normalménte a me distìngue, çèrte caratterìstiche che ho ravvizòu into comportaménto de l'assessô. Questo o no lêva, comme ho dîto, ninte a-a qualitæ do travàggio fìnn-a òua svòlto. Ho mòsso de-e crìtiche in sciô travàggio che no l'é stæto svòlto (o discórso de Internet a-o prinçìpio) e o l'é normâle che no segge stæto svòlto, però o va decîzo ch'o saiâ svòlto e a sto pùnto mantégno a moçión.
L'ùnico pùnto ch'o poéiva èse preoccupànte o l'é quello da cazélla postâle, che eventualménte se pêu modificâ rendéndola posibilìsta e dónca fasséndola ogètto de-e discuscioìn che faiêmo in commiscion. Ritégno, comùnque, importànte che Zêna a no pèrde l'ocaxón de dimostrâ d'èse a-l'avanguârdia, in Italia, inte sto cànpo e o saiæ 'n peccòu conclûde de neuvo a discusción sénsa 'na votaçión. Dónca, eventualménte porriéscimo cangiâ a frâze "garantî a ògni çitadìn ch'o ne fa domànda" co-a frâze "valutâ a poscibilitæ de garantî...".
L'argoménto ciù importànte o l'é quello da rapprezentaçión con finalitæ turìstiche in mérito a-o quæ l'assessô a l'à dîto d'èse d'acòrdio. Mì primma avéiva osservòu comme sta voluntæ a no foîse evidénte ò armeno mì no l'avésse cattâ inta prezentaçión che gh'é stæta o méize passòu, ma adesso che a l'à dîto che o va ben diéiva che no doviéivan èsighe problêmi.
A propòsta in sce-e sedûte do Conseggio Comunâle ritégno ch'a rapprezénte 'n pùnto importànte da moçión, in sciô quæ d'âtronde créddo che ghe segge ascì 'na çèrta unanimitæ in Conseggio, dónca a dovéiva èse vincolànte. Pe-i âtri argoménti che son quelli d'avviâ 'n stûdio e pianificâ o sviluppo diéiva che problêmi no ghe ne doviéivan èse.
In sce l'órdine do giórno son stæto contattòu da sto profesô de l'Università di Firenze, ch'o l'à d'âtronde mandòu ascì 'na lèttia a-o Sìndaco che alêgo a-o mæ órdine do giórno, in sce l'oportunitæ d'èse co-patroçinatoî ('na cösa che créddo segge ciù scìnbolica che âtro, in quànto no créddo che ghe segge quarche tìpo d'onêre finançiâio connèsso) a 'n convégno che ritégno mòlto interessànte.
In efètti niâtri partémmo mòlto spésso co-o preconcètto che Internet o segge 'n struménto de comunicaçión assimilàbile, pe exénpio, a-i televixoî ò a-i telêfoni e coscì vîa, quàndo in realtæ o l'é ascì 'n struménto - ò o pêu èselo - d'educaçión. E inte sto convégno, che tra l'âtro o véde ascì o patroçìnio do Conseggio di Minìstri, do Ministêro di Affâri Estêri e d'âtri, se analîza apónto o problêma da materia de l'interattivitæ con particolâre riferiménto a-e finalitæ educatîve.
Internet o l'é 'n ambiénte anàrchico, o che o l'é ascì bèllo, ma o l'é ancón mêgio se se riêsce a creâ de-e oportunitæ educatîve drénto a-o mæximo. In efètti, in sce i prinçipâli argoménti de discusción:
Innovaçión didàttica e scientìfica in sciô World Wide Web,
difuxón di béni culturâli telemàtica e multimedia interattîvi,
interattivitæ e mass-media inte l'educaçión permanénte;
consideròu che o Comûne o l'à ascì finalitæ educatîve (comme i âxili e e scheue comunâli), pénso che 'na tâle partecipaçión a no pòsse nuôxe a 'n Comûne, soviatùtto vìsto che a no compòrta di onêri. E a sto propòxito o pâ che o Sìndaco de Venézia, Cacciari, o se segge za esprèsso a favô e o l'agge za patroçinòu sta iniziatîva. Ebbén, mì ho espòsto de-e raxoìn, o saiâ pöi o Conseggio a decîde. Me pâ ch'a segge 'na cösa ch'a pêu azonze 'n quarcösa sénsa levâ ninte a sto Conseggio, a sta çittæ, a sta Amministraçión."

Roberto Quaglia

Torna a l'ìndice

Dichiaraçión de vöto de Flavio AZZARELLI (P.D.S.)

"A niâtri o pâ fondamentalménte che e intençioìn de dezaminâ in sce l'argoménto e d'analizâlo ciù aprofondîamente ghe séggian, allóa me domàndo se 'n vöto contrâio, favorévole ò d'astenscion rispètto a-a moçión o no significhe rimandâ a quæxi ninte.
Dónca me pâ che ghe segge l'intençión da pàrte de l'assessô d'andâ a 'n ezàmme ciù aprofondîo di pùnti trattæ inta moçión e pertànto o nòstro Grùppo fondamentalménte, nòstro mâr-grado, o doviâ esprìmme 'n vöto contrâio rispètto a-a moçión, a meno che o coléga Quaglia o no se fîe do parê de l'assessô rimandàndo e dàndo o seu assénso a discûte e dezaminâ ciù anpiaménte in commiscion tùtti i pùnti prezentæ."

Flavio Azzarelli

Torna a l'ìndice

2. Dichiaraçión de vöto de Roberto Quaglia (Lista Pannella)

"Ritégno che ghe saiæ 'na çèrta responsabilitæ d'avéi cassòu 'n'operaçión de trasparénsa che ritégno a pòsse sólo zovâ a-o futûro de sto Conseggio e de sta çittæ, perché a l'é 'na rifórma de cui se vediàn i efètti inti pròscimi cìcli amministratîvi, in quànto a l'é 'na cösa ch'a no riguârda manco niâtri.
Òua, aviéscimo posciûo fâla inte sti sêi méixi a commiscion, into senso che aviéscimo dovûo avéi in commiscion sto argoménto intra trêi méixi da l'estæ passâ. Adesso capìscio che ghe pêuan èse stæte de-e prioritæ da antecêde, però diéiva che o no l'é particolarménte problemàtico pe-a Giùnta accettâ a votaçión de sto Conseggio òua che ho modificòu a primma vôxe ch'a l'é quella e a l'é l'ùnica ch'a poriæ costituî 'n ostàcolo de tìpo tècnico e econòmico. Tùtte e âtre vôxi son eminenteménte polìtiche.
A discusción l'émmo efettuâ e a sto pùnto quæsìasi decixón a l'é no sólo poscìbile ma ascì doverôza, into senso che gh'é da decîde se vogémmo procêde inta direçión da trasparénsa e pénso che o vogémmo, perché parlàndo inte st'âula con tùtti i coléghi scîa de l'ûnn-a che de l'âtra pàrte mì créddo che fondamentalménte ghe segge 'na condivixón quæxi unànime ò fórse ascì unànime, in efètti no ho ancón trovòu a livèllo privòu quarchedun ch'o l'agge mòsso crìtiche a sto inpiànto."

Roberto Quaglia

Torna a l'ìndice

Dichiaraçión de vöto de Carlo SCHENONE (G. Misto)

"Comme dichiaraçión de vöto dîgo che o primmo pùnto e o tèrzùrtimo pùnto da moçión me làscian perplèsso. Un di doî, quello da cazélla, se no ho capîo mâ, o l'é stæto eliminòu; l'âtro o l'é relatîvo a-o discórso da trasmiscion audio pe-o quæ, sinceraménte, no inpieghiéiva a-o moménto ciù de tànto risórse, vìsto che za ghe ne son pöche e gh'é da fâ in mòddo che a génte ch'a travàggia in sce Internet a travàgge pe fâ 'na difuxón.
Ho, però, 'n problêma. Son ascì mì do parê che ghe vorriæ parlâne in commiscion ciù aprofondîamente e magâri ascì ciù eficacemente, però in qualitæ de Prezidénte da commiscion competénte ho o problêma di ténpi, in quànto za adesso émmo de-e dificoltæ a iscrîve i argoménti a-l'órdine do giórno. Questa a l'é 'na consideraçión de tìpo prettaménte pràtico, comùnque ascì mì preferiéiva discûtine in commiscion, ascì pe affrontâ quarche aspètto. In efètti mì me son segnòu doî pùnti in sci-i quæ no éa d'acòrdio, âtri in sce cui éa perplèsso comme pe exénpio o discórso di verbâli.
Dónca se ghe son sti doî pùnti no son d'acòrdio e se rèstan i âtri pùnti pòsso èse d'acòrdio in sce sto órdine do giórno. Vorriéiva podéi parlâ in commiscion, però vorriéiva fâve consciderâ o fæto che probabilménte ghe son di problêmi e vêuggio dî questo primma in mòddo che nisciùn o pòsse dî "ma allóa o-o fæ pe no métilo a-l'órdine do giórno"."

Carlo Schenone

Torna a l'ìndice

Dichiaraçión de vöto de Luca BORZANI (P.D.S.)

"Vorriéiva dî 'na cösa in sciâ moçión a-o conseggié Quaglia, perché st'ùrtimo o s'é ciù vòtte esprèsso in sce sti têmi in Conseggio Comunâle solleçitàndo 'na discusción. Ebbén, créddo ch'a segge 'na discusción importànte e positîva che pe èse eficâce a dêve racôugge in sce de sè ascì 'n consénso ànpio. E créddo che o senso da discusción d'ancheu o segge stæto de 'n ulteriô moménto de ciarificaçión drénto a-o Conseggio tra Conseggio e Amministraçión in sce quello ch'o l'é 'n percórso ch'o se stâ seguéndo.
Da sto pùnto de vista a propòsta che ciù conseggié fàn de rinviâ a-a commiscion a no l'é tànto pe no assùmise o valô de 'n vöto contrâio, comme o rischiæ d'èse, no l'é questo o problêma, ma a l'é perché a daiæ garanzîa de continuitæ a 'na discusción ch'a l'é 'na discusción ch'a resta avèrta drénto a-o Conseggio. Questo me pâ 'n segnâle polìtico vêo, importànte e in sce cui no varriæ a pénn-a, allóa, d'insìste in sce 'n vöto a cui mì créddo se poriâ arivâ intra a fìn do mandâto inta manêa ciù ànpia poscìbile.
Dónca mì faiéiva 'n invîto a-o conseggié Quaglia, con grànde franchéssa, de no domandâ a votaçión da moçión e d'assùmme, invéce, a propòsta de ripiggiâ a discusción in commiscion conseggiâle intra ténpi e spâçi definîi che perméttan effettîvi aprofondiménti e che perméttan ascì a 'n numero ciù ànpio de conseggié d'intrâ into mérito de quelle ch'én quarche neuva fórma da comunicaçión. Ecco, tùtto questo me pâ 'n eleménto importànte e dónca questo o l'é 'n invîto che mì fasso.
Pe quello ch'o riguârda l'órdine do giórno pénso che a primma inpegnatîva se pòsse condivîde, mentre me pâ singolâre - conseggié Quaglia, o me làsce adêuviâ sta esprescion - l'idêa de 'n patroçìnio do Comûne de Zêna a 'n convégno de l'Università di Firenze e de sta colaboraçión fattîva, in quànto dùbito che l'Università di Firenze a l'agge particolâre interèsse da pàrte do Comûne.
Construímmo, invéce, 'n percórso a-o tèrmine do quæ ghe pòsse èse 'n raxonaménto avèrto a-a çittæ in sce sti têmi, chì a Zêna. Me pâ 'na propòsta polìtica ch'a pòsse trovâ in sintonîa o conseggié Quaglia ch'o pêu coscì védde o gèsto polìtico compîo inte l'avvîo de 'na discusción, a cui âtri conseggié nòstri comme Azzarelli e Angusti an ciù vòtte contribuîo. Pe quànto riguârda st'órdine do giórno mì domandiéiva dabón o scòrporo tra a primma propòsta de l'inpegnatîva e e âtre, eventualménte votàndo l'o.d.g. pe pàrti separæ."

Luca Borzani

Torna a l'ìndice

3. Dichiaraçión de vöto de Roberto Quaglia (Lista Pannella)

"Pe quello ch'o riguârda l'órdine do giórno poscémmo scorporâlo pe pàrti separæ, in quànto o no l'é che comùnque a segge 'na cösa fondamentâle. In sce quello ch'o riguârda a moçión, invéce, gh'é da tegnî cónto de quarche analixi: sémmo a 'na müggéta de méixi primma da fìn do mandâto, do cìclo amministratîvo, e dêvo rilevâ che gh'é vosciûo 'n anno da quàndo ho prezentòu sta moçión a primma vòtta. Ho prezentòu sta moçión a zenâ de l'anno passòu e pe sètte méixi no se l'é riuscîo a discûtine, manco 'na vòtta; dòppodiché aviéscimo dovûo fâ armeno 'na commiscion st'autùnno e no l'émmo fæta. Òua, o divénta dificile da-a nòstra posiçión créde che 'n ulteriô rinvîo o trovâ a poscibilitæ de fâ dabón sto tìpo d'aprofondiménto. Allóa imàgino che chi o propón sta soluçión o pòsse propónne ascì a dâta da commiscion e a dâta da succescîva discusción in Conseggio."

Roberto Quaglia

Torna a l'ìndice

Intervénto do Prezidénte Chiara Formentini (L.N.I.P.) e succescîvo scàngio de brêvi dichiaraçioìn.

"Allóa se pêu azonze 'n'inpegnatîva a-l'órdine do giórno fissàndo o ciù prèsto poscìbile 'na commiscion e dónca pöi o passàggio de l'argoménto ancón in Conseggio Comunâle."

Roberto Quaglia (Lista Pannella)

"Gh'é da védde fìn a che pùnto e paròlle che niâtri spendémmo vegnan tradûte in lézze. Ascì in sce l'órdine do giórno passòu gh'éa scrîto che o s'inpegnâva intra trêi méixi a fâ de-e cöse, cöse che pöi son stæte fæte, dónca òua vorriéiva savéi che tìpo de garanzîe pòsso avéi no dîgo tànto pe mì personalménte quànto pe-a çittæ."

Luca BORZANI (P.D.S.)

"Pe quànto riguârda o P.D.S. niâtri se pigémmo l'inpegno a fâ domànda formâle a-o Prezidénte da commiscion de convocâ in mòddo formâle, intra 'n méize. O Prezidénte da commiscion o l'é prezénte in âula e mì créddo che se pòsse piggiâ sto inpegno."

Roberto Quaglia (Lista Pannella)

"Dónca ho a formâle garanzîa che intra 'n méize o andiâ in commiscion e inte-e dôe settemànn-e succescîve de neuvo in Conseggio. Scì, inte sti tèrmini pòsso accettâ."

Luca BORZANI (P.D.S.)

"Allóa a modìfica a l'é a seguénte: "a convocâ intra 'n méize a competénte commiscion conseggiâle e 'na succescîva discusción in Conseggio Comunâle"."

Presidente Chiara Formentini (L.N.I.P.)

"Dónca a moçión no a votémmo e a-l'órdine do giórno o vegne azónto a frâze de cui chì d'âto."

Luca BORZANI (P.D.S.)

"Mì ho esprèsso 'na dichiaraçión de vöto nòstra dixéndo che pe quànto riguârda i ùrtimi doî commi de l'inpegnatîva votémmo contra ò sa "a concêde o patroçìnio do Comûne de Zêna" e "a colaborâ ascì fattivaménte"."

Presidente Chiara Formentini (L.N.I.P.)

"Allóa votémmo primma l'inpegnatîva relatîva a-o primmo e a-l'ùrtimo pùnto azónto, escludéndo i doî pùnti centrâli e restàndo tâli e premésse, secondariaménte votémmo a segónda pàrte. Primma votémmo l'órdine do giórno emendòu (interruçioìn) O rîtia a pàrte de Firenze? Allóa o vegne emendòu o segóndo pùnto e o tèrso. Dónca o resta o primmo pùnto e o segóndo azónto, vâle a dî quello neuvo. A moçión no se vòtta ciù."

Torna a l'ìndice

Dichiaraçión de vöto de Franco BAMPI (P. Nord)

"Votiò a favô de st'órdine do giórno coscì comme o l'é resultòu da-a discusción e 'n pö preoccupòu, perché aviéiva preferîo votâ a favô da moçión. A rèplica de l'Assessô Cassol, segóndo mì, a l'é stæta 'na dimostraçión che no gh'é quell'intençión d'adêuviâ Internet comme 'n struménto de travàggio do Comûne. Se dovémmo trasferî dæti da 'n scîto "mainframe" do Comûne a-o calcolatô (che pöi o l'é misso in réte) sta operaçión a l'é 'n'operaçión ch'a no pêu fonçionâ e a l'é 'n'operaçión ch'a còsta.
Fémmo 'n exénpio pe quànto riguârda i verbâli. Se i verbâli do Conseggio Comunâle son into scîto accescìbile Internet, basta rendili accescìbili into moménto in cui son approvæ da-o Conseggio e o l'é finîo o problêma; no se pón allóa o problêma se dêvan stâ ò meno, perché da quarche pàrte dêvan stâ e dónca stàn inte 'n scîto accescìbile e vixìbile. Se invéce niâtri se ponémmo o problêma se ghe va misso 'na cösa ò meno (e mì capìscio questo da-a rèplica de l'assessô) vêu dî che ghe saiâ 'n trasferiménto de dæti. E se gh'é 'n trasferiménto de dæti créddo ch'o segge onerôzo e créddo che a-a fìn o divénte ineficénte, perché allóa o scîto o no vegne ciù agiornòu.
Pe questo aviéiva vosciûo votâ voentêa a moçión, eventualménte rendéndola blànda. A mì me saiæ piaxûo 'na modìfica in cui se dixésse "inpegna a discûte succescivaménte in commiscion in sci-i seguénti têmi" perché o l'é importànte. Invéce ho l'imprescion che se niâtri andémmo senplicemente a discûte, se niâtri faiêmo 'n regolaménto in sce Internet credéime, Internet Zêna SpA a l'é 'na propòsta ciù snélla, mòlto ciù snélla, ne son convìnto. Se regolamentémmo ascì tùtte e cöse, pöi vediêmo se Quaglia o pêu métte ascì a seu fòto perché poriêmo ascì dâ di giudìçi estètichi in sce-e fòto di conseggié da métte. Mì son altaménte preoccupòu, però me pâ che a rèplica ... (interruçioìn).... va ben, mì son fotogènico, scuzæ in sce questo no ghe son dùbbi, son fotogènico, e poriéiva contribuî a abbellî ... (interruçioìn).... ògni tànto... ecco a viâtri Bampi... t'ò sæ comme quello fumétto ... (interruçioìn).... Nò, mì no son dotòu d'umorìsmo, no rubâ e frâze a Guglielmino; mì però ritégno d'avéi dedûto da-a rèplica de l'Assessô Cassol a titubànsa a adêuviâ Internet comme struménto de travàggio do Comûne, e créddo che se no se arîva a questo, comme ho dîto into mæ intervénto, o scîto o doviâ èse agiornòu e dónca de fæto, dòppo 'n pö, o perdiâ l'interèsse.
Ecco, mì créddo questo. Me dispiâxe no podéi votâ a moçión, votiò a favô de l'órdine do giórno".

Franco Bampi

Torna a l'ìndice

Ùrtima Dichiaraçión de vöto de Roberto Quaglia (Lista Pannella)

"Ghe tégno a dichiarâ che a mæ decixón de no procêde adesso co-a votaçión da moçión a l'é ispirâ unicaménte a-i critêri, a-i valoî do superiô interèsse da çittæ, perché da 'n pùnto de vista polìtico no fâ votâ 'na moçión de sto génere o l'é 'n errô gravìscimo. O fæto o l'é che chi o l'avésse votòu contra sta moçión, o se saiæ assùnto 'na responsabilitæ ch'o no se saiæ scrollòu de dòsso velocemente.
Inte l'interèsse superiô da çittæ, perché mì créddo che questo o segge importànte, fondamentâle e inprescindìbile, accètto che primma se ne pârle in Commiscion, òua ch'émmo stabilîo ben i ténpi, in manêa che tùtti sàccian mêgio de quello che stémmo parlàndo, e pöi pe-a tèrsa e sta vòtta definitîva vòtta, intra 'n méize e mêzo da adesso, ridiscutiêmo in Conseggio, occupiêmo d'âtro ténpo in sce sto argoménto: l'éi vosciûo viâtri, no mì; vorriâ dî che ghe saiâ ciù informaçión, ma allóa pöi se votiâ e a quello pùnto ògnidun o s'assumiâ e seu responsabilitæ".

Torna a l'ìndice

Dichiaraçión do Prezidénte Chiara Formentini (L.N.I.P.)

"Dàggo lettûa de l'órdine do giórno prezentòu into córso do dibàttito in sciâ moçión in sce Internet:

Torna a l'ìndice

Órdine do giórno Lista Pannella (stezûa definitîva)

CONSCIDERÒU CHE

PÀGINA PRINÇIPÂ | ÌNDICE | BIOGRAFÎA | I MÊ SCRÎTI | FANTASCIÉNSA | FIGÛE | | RASSEGNA DE STAMPA | LIBRARÎA | POSTER | POLÌTICA | SÀTIRA | GUSTI | AMIXI | UMANITÆ VÀRIA | CONTRIBUISCI A-A VÌTA DE ROBERTO | CONTÀTTI | LIGÀMMI |

Se voéi contatâ sto mutante
che co-o ténpo o càngia a seu fàccia,
saéi cómme fâ.

Se no o saéi, SCHISCIÆ CHÌ

Se pròpio no ghe riuscî, anæ a fâve benedî

Ùrtima mòdifica, 23 d'ötobre do 2003

© 1995-2006 by Roberto Quaglia