Contribûti e donaçióin

QUANTO DENÆ SE PÒ MANDÂ A ROBERTO QUAGLIA?

O no gh'é 'na cìfra fissa. E o no gh'é 'n lìmite. Quarche persónn-a a manda sólo quarche Euro a Roberto Quaglia, 'na cìfra simbòlica. Ciù típicaménte, chi vö contribuî a-a vìtta de Roberto Quaglia o-o fa con armeno 10 Euro - o còsto de 'na pizza e 'na minérâle. Tànte persónn-e contribuíscian però ascì con cìfre ciù gròsse. O no l'é râro che o contribûto o riîve ascì a 100 Euro e ciù. Persónn-e de grànde valô an contribuío ascì con 1000 (mìlle) Euro. Chi l'à mólto o pò dâ mólto. Ascì déxemìlla Euro ò çentomìlla Euro saiéivan contribûti gradíi. Da-o milión de Euro in sù se otégne 'n speciâle certificòu d'autèntica benemerénsa.

PERCHÉ 'NA PERSÓNN-A A PÒ MANDÂ DI DENÆ A ROBERTO QUAGLIA?

Primma de tûtto perché Internet o-o permétte rendéndola 'n'operaçión curta e sénplice. Gh'é pöi díverse motivaçióin ch'induxan e persónn-e a mandâ di denæ a Roberto Quaglia. Quarchedun o manda di denæ a Roberto Quaglia sénpliceménte perché questo o ghe pâ 'na bònn-a idéa. Gh'é quarcòsa, in Roberto Quaglia, ch'o fa vegnî a lô vögia de fâ quarcòsa pe lê, ma, no savéndo esàttamente cöse, o-i induxe a mandâghe 'n pò de denæ, savéndo ch'o gradiâ.

Âtre persónn-e mandan di denæ a Roberto Quaglia perché o-o ritegnan 'n lô dirítto. O l'é 'n dirítto sacrosànto de ciascûnn-a persónn-a líbera de scéglie cöse fâ do própio denæ. Ste persónn-e o-o san, e apprezzândo e ativitæ de Roberto Quaglia vöan fèrmamente sostegnìle con 'n própio contribûto personâle. Preferìscian de gran lunga che 'n pò do lô denæ o vagghe a Roberto Quaglia anziché a-i sòliti paràssiti e avòltoi.

Gh'é persónn-e che mandan di denæ a Roberto Quaglia sénpliceménte perché questo o-i fa stâ mêgio. A lô no ghe interessa savéi perché ogni tànto regâlan di denæ a Roberto Quaglia. A lô ghe interessa sólo che questo o-i fa stâ ben. A primma vòtta de sòlito exítan, dæto che no an mâi fæto quarcòsa do génere, coscì, sénsa 'n motívo precízo. Pöi, quæxi sénsa pensâghe, schíscian in sciô bottón "Make a donation" e mandan o lô primmo denæ. No se ne péntan mâi. O l'é 'na cösa ch'o-i rénde ciù seréni. Ogni vòtta.

Quarchedun o manda di denæ a Roberto Quaglia perché o l'é 'n status symbol. No tûtti pòan francaménte vantâse d'avéi mandâ di denæ a Roberto Quaglia. Sólo chi o-o l'à davéi fæto o pò dî 'na cösa do génere sénsa risciâ 'n dì de pèrde a faccia. A ste persónn-e ghe piâxe podéi dî: Mì sòn stæto un di primmi a mandâ di denæ a Roberto Quaglia. Chi ghe pò dâ tòrto?

Âtre persónn-e preferìscian mandâ di denæ a Roberto Quaglia perché o-o disprêzan. Quarchedun ascì perché o-o òdian. Mandâ di denæ a Roberto Quaglia o l'é pe lô 'n mòddo de umiliâlo. Lô dimostran a lô superioritæ rispètto a Roberto Quaglia costrengéndolo a aettâ o lô denæ. O l'é 'na scélta ascì questa, che nisciun o l'à o dirítto de biaximâ.

Quarchedun o no l'à ben ciæo in mente perché mâi o dovéiva mandâ di denæ a Roberto Quaglia. Pe questo, primma de decíde, lô immâginan comme se sentiân dappöi avéilo fæto. O l'é 'na senséssión gradévole. Comme tûtti i piaxéi da vìtta, l'orígine da senséssión de piaxéi a l'é misterôza, ma questo a-a rénde sólo ciù attraénte. Imaginâse comme se sentiâ dappöi avéi mandâ o própio contribûto o l'é o mòddo mêgio pe savéi con certéssa se e quanto denæ se sénte de voléi mandâ a Roberto Quaglia.

*Mandâ di denæ a Roberto Quaglia o l'é un di poscìbili mòddi d'interagî con lê. A vìtta a l'é 'n fenòmeno biològico e spirituâle fæto de relaçióin e transaçióin d'energîa tra i indívidui. Quarche fórma de relaçión a l'é ciù complèssa e elegànte, âtre sòn ciù sénplici e contábili. L'amô o l'é sénsa dúbbio o contribûto ciù eclatànte che poscémmo ofrî a chi ne piâxe, ma no sénpre o riîva a destinaçión e o produve i sò effètti. O denæ o no saiâ pregno di mæximi "quanti" de pûro spírito, tuttavîa armeno sémmo segûi ch'o riîva a destinaçión (de pù adeuviândo Paypal) e o produve davéi i sò pur ûmili effètti. Provâ pe crédde.

Se voéi contatâ sto mutante
che co-o ténpo o càngia a seu fàccia,
saéi cómme fâ.

Se no o saéi, SCHISCIÆ CHÌ

Se no saéi cómme fâ, lasciæ pèrde

Ùrtima mòdifica, 23 d'ötobre do 2003

Tûtti i tèsti e e figûe contegûî in "Astounding Quagliaspace" se pòan léze, ammî, adorâ, scarigâ in sciô conputer, stanpâ e apíccâ inta seu càmbara, e copâ sénsa límiti, SOLO PE ÛZO PERSONÂLE. Tûtti i tèsti e e illustraçióin sòn proprietæ de Roberto Quaglia e no se pòan dêuviâ in tûtto ò in pârte sénsa autorizaçión. O progètto gràfico e e conponénti gràfiche de stè pàgine sòn proprietæ reservâ de Roberto Quaglia. Nigùnn-a de stè côse a se pò mette in véndita ò comerciâ a nínte títolo sénsa autorizaçión previa.