|
Torna a l'ìndice
Intervénto de Renato Penco (L.N.I.P.)
  "Scignôr Prezidénte, pöchi Assessoî prezénti, mancànsa do Sìndaco, me indûan a 'na liêve riflescion.
O problêma o l'é de seguo de grandìscimo interèsse e de grandìscima importànsa, o invèste milioìn de famìggie che son a-e préize con sto dràmma, flagèllo, ch'o l'é a dròga.
Mì créddo che pe quello ch'o ne riguârda dovémmo comensâ 'na sêria riflescion. Andàndo a ritrôzo inti anni, ascì a-e ùrtime guære ch'an evidençiòu da-o Vietnam, a-l'Afghanistan, a-a ex Iugoslavia, a-a Cecenia, comme l'adêuvio de-e dròghe o altère in manêa dannôza e incontrollàbile o conportaménto di òmmi.
Dîto questo vorriéiva passâ a quànto ho alegòu inta moçión, ispiràndome vâle a dî a-o cartéllo de Stoccolma, (fasso quarche passàggio perché me pâran significatîvi).
Se rendémmo cónto, che l'abûzo de-e dròghe illegâli o l'é atualménte 'n problêma mòlto sêrio in mòlte çittæ Europêe. 'Na recénte indàgine efettuâ da-o Parlaménto Europêo, a dimostra che ghe son milioìn de tossicòmani solaménte drénto a-a comunitæ Europêa.
E domànde de legalizâ e dròghe illegâli, doviéivan èse vìste in sciô sfóndo di problêmi atuâli ch'an portòu a 'n sentiménto d'inpoténsa. Pe mòlti l'ùnico mòddo d'affrontâ questo, o l'é çercâ de controllâ a situaçión atuâle.
A rispòsta comùnque a no l'é into rénde ciù accescìbili, meno câre e soçialménte accettàbili e dròghe nocîve. I vâri tentatîvi fæti an dimostròu che a soluçión giùsta a no l'é questa. Pensémmo che a legalizaçión da dròga a aumentiâ a lóngo tèrmine i nòstri problêmi, legalizàndola o significhiâ che e soçietæ e ascì a nòstra a s'é rassegnâ a accettâ l'abûzo de dròga. I votànti e i firmatâri de sta rizoluçión, vêuan dónca indicâ ciaraménte a seu posiçión, respinzéndo e propòste pe-a legalizaçión de-e dròghe leggie e o dîxe "niâtri çittæ Europêe contra a dròga dexiderémmo piggiâse cûa di nòstri abitànti, dexiderémmo creâ de-e çittæ che séggian segûe e otrettànto attraénti pe vìveghe e travagiâghe, émmo intraprézo sto travàggio contra a dròga perché ghe tegnémmo a-i individui a-e famìggie e a-e colettivitæ".
D'âtronde l'artìcolo 31 e 32 da Costituçión o l'é mòlto ciæo niâtri contestémmo sta Costituçión ma sti doî artìcoli créddo che séggian significatîvi.
L'artìcolo 31 o dîxe ch'o agevolla a formaçión de-e famìggie con agiùtti ascì econòmichi, no me pâ ch'o vegne fæto ancheu questo; l'artìcolo 32 o dîxe che o Stâto o tutélla e o presèrva a salûte de tùtti i çitadìn, no me pâ ch'otrettànto se fasse con incixivitæ.
Sta rizoluçión de Stoccolma a dîxe ascì, de rinforsâ o rêuo da famìggia pe-a lòtta contra a dròga, programmi de prevençión inte-e scheue, università e pòsti de travàggio, mètodi de sviluppo o cui rêuo o l'é quello de l'individuaçión immediâta a adottâ pöi mezûe costruttîve, riabilitâ quelli che son tossicòmani da diverso ténpo, ricèrche a sostégno e valutaçión.
Dîto questo, se quarchedun o se vêu suiçidâ con mèzi legâli ò illegâli niâtri no faiêmo comme l'ùrtimo di fræ Maccabei, ma se guardémmo ben da legalizâ quæsìasi tìpo de dròga.
A nòstra cultûa, a cultûa do pòpolo lìgure, do pòpolo lombàrdo, piemontéize, vèneto ecc.. son ben âtre, son e cultûe do travàggio, di sacrifìçi che i nòstri vêgi an fæto, niâtri comme grùppo Lega Nord inte st'âula se battémmo pe quelle situaçioìn a favô do travàggio.
Purtròppo o l'é 'n problêma gravìscimo, ch'o de seguo o crêa deprescion in milioìn de zoêni in tùtta Italia.
Dónca niâtri vorriéscimo 'n futûro mêgio pe niâtri e pe-i nòstri figgi e nevî, 'n futûro fæto de travàggio e no çèrto de fumerîe d'òppio ò d'inieçioìn periglôze".
Renato Penco
Torna a l'ìndice
Intervénto de Silvio Scaffardi (L.N.I.P.)
 "Prezidénte, colléghi, o problêma da tossicodipendénsa, da dròga ò comme o suggerìsce l'organizaçión mondiâle da sanitæ do consùmo de-e sostànse che génnan tossicomanîe, o l'é tra i ciù complèssi, qualùnque a segge l'angolaçión sótta cui se-o vêugge studiâ. Pe-i mêghi e i psicòloghi pe-i polìtichi e i sociòloghi, se tràtta de 'na de-e ciù grâvi questioìn che o mondo oçidentâle o se trêuva ancheu a fronteggiâ.
De frónte a 'n coscì grâve problêma irrisòlto, se son avèrti vâri con scenâri, con svariæ propòste pe-o superaménto do mæximo ascì contrastànti tra de lô, comme a liberaçión de l'adêuvio de-e dròghe, a coerçión segóndo e modalitæ do conteniménto temporàneo, do trattaménto obligatòrio e da puniçión do tossicodipendénte, e açioìn de contràsto.
A teorîa da liberalizaçión in vóga fìnn-a a-a metæ di anni ottànta, a se motivâva identificàndo a câuza da difuxón da dròga into profìtto e inta conseguénte trasformaçión do consumatô, in spacciatô.
Pe cui liberalizàndo o mercòu o profìtto o saiæ vegnûo meno. Ma a liberalizaçión se a inpedìsce o sfruttaménto econòmico do tossicodipendénte, a no abolìsce né a ridûe, o consùmo de dròga ch'o continuiæ legittimaménte a difóndise e a produe i nòti dànni individuâli e colettîvi.
Sta teorîa ancheu ritirâ in bàllo into nòstro paêize con 'n notévole ritàrdo, inti anni a l'à trovòu sénpre meno sostegnitoî, ascì a-a lûxe de-e esperiénse fæte pe-a progressîva préiza de coscénsa che no se poéiva bàttese contra o fenòmeno da tossicomanîa favoréndone a difuxón de stâto.
Ancheu ascì into nòstro Paêize o pâ ch'o segge vegnûo de mòda a coscì dîta strategîa de riduçión do dànno, dòppo a primma conferénsa nazionâle in sce stupefacénti e tossicodipendénsa svòltase a Palermo into zùgno do 1993.
Tâle strategîa a nòstro giudìçio, e no sólo nòstro, a prezénta aspètti çèrto positîvi e pénn-amente condivisìbili, ma mòlti âtri negatîvi e no condivisìbili, comme a legalizaçión de-e dròghe leggie ò a prescriçión controllâ d'eroìnn-a.
O l'é çèrto 'n dæto de fæto che tùtte e dròghe, ascì e coscì dîte dròghe leggie son sostànse psicòtrope che pe-i efètti piaxévoli che produxan, attîran o sogètto a 'n assunçión ripetitîva, primma liberaménte vosciûa e pöi coàtta, pe cui lê o dipénde da-a dròga.
A classificaçión de dròghe leggie comme i derivæ da cannabis ìndica, hascisc, marijuana e ascì l'LSD ch'an menô efètto lezîvo in sce l'organìsmo, a l'é 'n condiçionaménto menô ciù lénto, ma no vêu dî che no àggian efètti perceptìbili e no compòrtino turbaménti into sogètto.
Pe chi o assùmme pe exénpio marijuana vegnan descrîti efètti euforizànti, comme senso de leggeréssa do còrpo, eccitaçioìn, confuxón verbâle, sùbito dòppo l'assunçión se constata ànsia, poîa, agitaçión.
Pöco dòppo avéi assùnto a cannabis, o fumatô o l'é ciù animòu do sòlito o pârla a vôxe ârta e o l'à crîxi de rîzo sénsa motîvo, o segue pöi 'n perìodo de sonnolénsa e de semilëtargo in cui vegnan smaltîi i efètti.
Émmo vârie situaçioìn i éugi se arroscian, in quarche câxo se dilàtan e pupìlle o bàttito cardìaco o s'accélera e se denòta sécchéssa in bócca e inta gôa, se altèran i sensi, pe exénpio vista, udîo, odoròu, tàtto e gùsto divéntan ciù acûti, ciù fòrte a l'é a dóze ciù se intensìfican i efètti.
Poliêdrico o l'é l'attegiaménto do fumatô, un o se pêu sentî relassòu 'n âtro o divénta loquâce 'n tèrso dezorientòu 'n quàrto o pêu devegnî comme 'n zombi, ò comme se sêu dî "fæto ò sbalòu".
Dóxi fòrti poîan provocâ distorscioìn de l'imàgine, pèrdita d'identitæ, delîri e alluçinaçioìn. Pensæ quànto questo o pòsse èse periglôzo pe sè e pe-i âtri quàndo o sogètto o se trêuve a-a guîda de 'n'auto ò a manezâ macchinâri in sciô lêugo do travàggio.
No vêuggio dilungâme otre inta descriçión di dànni psìchichi e fìxichi che poîan derivâ da l'adêuvio de-e coscì dîte dròghe leggie in quànto tùtti poîan facilménte documentâse.
Pe tànto efètti ciù leggê, no vêu dî nisciùn efètto e dròga leggia a no significa dròga bónn-a e innòcua. D'âtronde o passàggio a-a dròga ciù pezànte o l'é in gran pàrte avegnûo a partî da quelle leggie.
A teorîa da liberalizaçión a l'é contrastàbile; a l'é da respìnze sa in sciô terén de-e previxoìn, sa in sce quello de l'opinión pùbrica, sa in sciô pian ètico. O tràffego e a disponibilitæ da sostànsa no son e câuze ùniche de l'intossicaçión e da tossicomanîa: gh'é 'na sinergîa tra offèrta e domànda; sénsa consumatoî no ghe saiéivan commèrcio e profìtto.
E esperiénse de liberalizaçión ciù ò meno totâle son stæte deludénti, sa in América, sa in Euröpa. Inti Paêixi donde a l'é stæta aplicâ a liberalizaçión, ascì in fórma de legalizaçión, o Stâto o s'é vegnûo a trovâ inte l'assùrda situaçión de chi o presêde a-o smèrcio e a-o consùmo e o dêve pöi sostegnî l'onô di efètti e da disintossicaçión; o dêve, vâle a dî, zugâ o rêuo de chi o difónde o mâ e pöi o dêve procurâ o rimédio.
Dixéiva pöco fa che a teorîa da liberalizaçión a no l'é accettàbile, soviatùtto in sciô pian ètico. Lê, in efètti, a no mîa a abolî o consùmo, ma a inpedî soltànto o sfruttaménto commerciâle do drogòu. A dròga a continuiæ a èse difûza e, stànti e câuze moltéplici che ne suscitan o bezéugno, a continuiæ a fâ dànni a bón mercòu, specialménte inte-e categorîe di figgeu e di adolescénti.
O confrónto ch'o vegne fæto co-a liberalizaçión da véndita de l'àlcol in América, ch'a l'à sconfîto a-o prinçìpio do sêcolo o contrabàndo, o l'é 'n paragón ch'o no rêze perché o gràdo de dipendénsa e i efètti distruttîvi, in sciô pian do contròllo da personalitæ, son ben diversi. Comùnque no se pêu combàtte contra o mâ favoréndone a difuxón.
Pónto cruciâle de ste nòstre, sebbén modèste, consideraçioìn ètiche o l'é a illiceitæ da dròga a motîvo da seu gravìscima periglozitæ individuâle e soçiâle. Se questo o l'é vêo, comme suponémmo se pòsse desùmme da quànto dîto, ògni atto de legalizaçión e liberalizaçión approvòu o vêu dî approvâ e potençiâ l'illêcito".
Silvio Scaffardi
Torna a l'ìndice
Intervénto de Claudio BASSO (P.P.I.)
  "O téma ch'affrontémmo ancheu aviéscimo preferîo podéilo affrontâ inte 'n âtro contèsto ch'o agiuttésse mêgio a méttighe a fêugo e questioìn che son stæte propòste a tràverso a prezentaçión de-e moçioìn. Mì ho scernûo d'intervegnî in sce sto téma, tra i mòlti mòddi poscìbili, segóndo 'n tàggio ch'o pàrte da-e vicénde ch'an portòu in Parlaménto a-a prezentaçión de quarche propòsta de léze e da-e vicénde ch'an riguardòu a reiteraçión continua do D.L. riguardànte l'intervénto in sciâ dròga.
Pròpio sta annôza vicénda (o D.L., comme se sa, o data a seu primma versción da-o zenâ '93 e sémmo arivæ a vinti reiteraçioìn) a evidénçia che e questioìn che son inserîe inte sto decrêto son de particolâre gravitæ e importànsa. Otre che definî e modalitæ de finançiaménto a-i sogètti pùblichi e privæ ch'òperan in favô di tossicodipendénti (son çirca 200 miliàrdi a l'anno), o vegne indicòu ascì a finalitæ pe coscì dî umanìstica da perseguî a tràverso sti finançiaménti. Questo o fa scì che o fóndo nazionâle anti dròga o divénte o struménto concrêto e incizîvo a tràverso cui perseguî e polìtiche in sciâ dròga in Italia. O l'é 'n dibàttito ch'o l'é in córso da anni intórno sostançialménte a dôe oppòste filosofîe: liberâ da-a dròga ò liberalizâ e dròghe.
A primma conferénsa nazionâle in sciâ dròga, ch'a s'é tegnûa a Palermo into zùgno do '93, a varò a polìtica de riduçión do dànno, basàndose in sciô fæto che o tossicodipendénte o l'à conportaménti a ârto rìschio personâle e soçiâle, espòsto comm'o l'é a-o perìcolo de contrâ e difónde infeçioìn da H.I.V., epatìti. E prinçipâli câuze de sti rìschi son l'adêuvio promìscuo de siringhe e i rappòrti sessuâli no covèrti.
A riduçión do dànno a divénta allóa 'n mòddo d'intervegnî da-o pónto de vista epidemiològico e sanitârio co-a fornitûa de siringhe, de prezervatîvi e âtri presìdi sanitâri ch'agiùttan in sto senso. De frónte pöi a-o rìschio da mòrte pe overdose, se ricórre a farmaci sostitutîvi comme o metadón ò âtri.
No tùtti i tossicodipendénti an però vêugia d'andâ feua da sta situaçión de dipendénsa e allóa a riduçión do dànno a pêu generâ 'na tàçita inflaçión di rimédi adêuviæ, oppûre, segóndo 'na aberrànte formulaçión, èse consciderâ l'ùnica solidarietæ poscìbile pe consentî a sopravvivénsa da persónn-a tossicodipendénte. E coscì inveçe d'analizâ i efètti di farmaci sostitutîvi e trovâ vîe alternatîve, se mêuve, con 'na sospétta faziozitæ di mass-media, vèrso a legalizaçión de-e dròghe cosidîte "leggie".
O vêo rìschio o l'é dónca che a riduçión do dànno, inveçe de rapprezentâ 'na pàrte do tùtto residuâle de l'intervénto pùbrico e privòu in sciâ tossicodipendénsa, a divénte a polìtica da tossicodipendénsa. Questo o inneschiæ 'n meccanìsmo perverso ch'inveçe de portâ e persónne tossicodipendénti in sciâ strâda de 'n abandón da dròga, o-e sostegniæ inta seu dipendénsa sénsa che segge garantîo o resultòu de preservâli da l'A.I.D.S. e da l'overdose. In efètti segóndo e ciù modèrne scheue de psicologîa, sa quella analìtica che quella relazionâle, e de psichiatrîa, o rituâle do passàggio de siringa ò o rappòrto sessuâle no protètto o no l'é conpletaménte ascrivìbile a-a mancànsa de presìdi sanitâri, ma a quelle problemàtiche strutturâli da personalitæ che fan da sfóndo a-e persónne tossicodipendénti.
No gh'é dùbbio che e cosidîte strategîe de riduçión do dànno òccupan 'na pàrte rilevànte do dibàttito intórno a-a tossicodipendénsa, probabilménte perché dovémmo ancón fâse ciæéssa in sci-i contegnûi. Persìste, in efètti, 'na ambiguitæ in baze a-a quæ pe riduçión do dànno se pêu inténde 'na gàmma d'intervénti che van da-o camper ch'o s'introdûe inte-e zöne cosidîte a rìschio, perlopiù munîo de siringhe e de prezervatîvi da distribuî, a-a distribuçión controllâ de sostànse stupefacénti prêsso strutûe pùbriche, coscì comme o vegne previsto inta propòsta de léze elaborâ da-o CORA.
Quæ riduçión do dànno dónca? O discrìmine o no l'é indiferénte perché da 'n lâto se poîan prospettâ intervénti comùnque finalizæ a-o sostégno da persónn-a tossicodipendénte in vista da seu autodeterminaçión a andâ feua da sta situaçión de tossicodipendénsa. Questa a l'é, fìnn-a a pröva contrâia, l'ispiraçión de l'atuâle maggiorànsa de Govèrno. Lézo in efètti a-a têxi 78 do programma de l'Ulivo, che mì tra i âtri ho sottoscrîto: "Riduçión do dànno o significa sostegnî chi o vîve in condiçioìn de marginalitæ pe çercâ de no consolidâ quella condiçión ma, a-l'oppòsto, pe permettîne o superaménto". Da l'âtro lâto, invéce, se pêu inténde a riduçión do dànno segóndo 'n'âtra prospettîva, arvéndo a strâda vèrso 'na vixón antiproibiçionìsta e libertâia ch'a l'é o vêo approdo ùrtimo de sta concheçión, in baze a-a quæ a promoçión de polìtiche de riduçión do dànno a saiæ soltànto 'na tàppa vèrso l'obiettîvo da liberalizaçión de-e dròghe.
O l'é 'na questión delicâ, 'n pónto de parténsa de 'n dibàttito ch'o mêrita 'n approfondiménto sénsa pregiudìçi e sénsa retàggi ideològichi. Inte l'atuâle formulaçión do D.L. in baze a ste consideraçioìn se prevéde a finançiabilitæ ascì de progètti vòlti a attivâ servìçi sperimentâli de prevençión e de recùpero in sciô teritòrio che séggian finalizæ a-a riduçión do dànno con particolâre riferiménto a-i çéntri d'accogliénsa a bàssa sêuggia e a-e unitæ de strâda. Sti progètti de riduçión do dànno no poîan prevéde a somministraçión de-e sostànse stupefacénti né de farmaci sostitutîvi, a eccéçion do metadón.
Ma gh'é bezéugno d'introdûe sta previxón specìfica de riduçión do dànno? Se vêu marcâ 'na diferénsa tra progètti de riduçión do dànno e progètti de prevençión e recùpero? L'accatto de siringhe, prezervatîvi e âtri presìdi sanitâri (previsti da-i progètti de riduçión do dànno) co-i dénæ do fóndo nazionâle anti dròga o no dùplica ò o no sostituìsce âtre tipologîe d'intervénto ciù precizaménte sanitârio (vedi a normatîva in sce l'A.I.D.S.)? A conseguénsa a no l'é fórse quella de distôgge risórse da-o fóndo anti dròga da-e originâie autèntiche destinaçioìn, magâ co-a benediçión de-e câze farmacèutiche che spìnzan evidenteménte in sta direçión? Omettî a previxón esplìcita o consentiæ de fâ ricórso a-i intervénti de riduçión do dànno intendéndoli comme residuâli e no esaustîvi drénto a strategîe de prevençión e de recùpero.
No ghe son segnâli incoraggiànti in sce sta prospettîva. Tra i emendaménti prezentæ ghe n'é quarchedun dirètti a anpliâ e difónde o ricórso a-a riduçión do dànno fìnn-a a sopprìmme o divéto de somministraçión di stupefacénti e questa a me pâ 'n pö a ciâve de lettûa ch'a pêu portâ pöi a legittimâ, segóndo sta vixón, 'na propòsta de legalizaçión de-e dròghe.
Dixéiva che l'appuntaménto da segónda conferénsa nazionâle in sciâ dròga, prevìsta into pròscimo frevâ, a l'é 'n'ocaxón preçiôza, 'n appuntaménto ch'o doviâ segnâ 'n moménto autenticaménte avèrto de confrónto. O consùmo de l'hascisc e di seu derivæ o l'é 'na pàrte de quella cultûa do sbàllo che, otre a-l'hascisc, a conprénde periglozaménte ascì anfetamìnn-e, àcidi, extasy, àlcol. Pe tròppi zoêni, ògni giórno ciù numerôxi, e neuve dròghe son devegnûe o struménto quæxi normâle pe divertîse, pe èse brillànti, èse a-a mòda, pe evàdde da-o quotidiàn.
Se contrappónan i sostegnitoî do no co-i sostegnitoî do scì. Prövo a riassùmme sta divixón de-e fòrse in cànpo: chi o l'é contrâio a ògni fórma de legalizaçión o affèrma che se coménsa sénpre co-o fummo, pe passâ pöi a-e dròghe pezànti; o affèrma che legalizâ o saiæ 'n cediménto morâle do Stâto, 'na dichiaraçión de réiza ch'a provochiæ 'n ridimensionaménto ascì di intervénti de contròllo e de cûa. O consùmo de hascisc o aumentiæ a dismezûa perché a legalizaçión a vegniæ intéiza comme 'n'autorizaçión a adêuviâ a sostànsa e se arviæ a strâda, probabilménte, vèrso ulterioî conceçioìn inti confrónti d'âtre dròghe. Viceversa chi o l'é favorévole - l'émmo sentîo ascì pöco fa - o affèrma che o mercòu e o consùmo illegâle son za in pràtica legalizæ perché ògni giórno, ògni ôa chiunque o vêugge accatâle o trêuva ste sostànse. O dîxe che tra i zoêni o l'é difusìscimo, accescìbile a tùtti, ascì a-i minoî e o l'é spésso 'n miscùggio incontrollòu (quarchedun o pârla de schifézze). A legalizaçión a togliêva ârme a-a malavîta ch'a pròspera in sciô proibiçionìsmo e a separiæ i lêugi de véndita de l'hascisc da-o mercòu de-e dròghe pezànti che ancheu invéce coinçìdan e convîvan.
A chi zôva divîdise inte sta contrapposiçión? A discusción in sce-e raxoìn do scì e in sce quelle do no a l'é dissennâ se no se l'é d'accòrdo armeno in sce 'n primmo pónto: o consùmo de hascisc o fa mâ a-i adolescénti e a-i zoêni e favorîne l'adêuvio o l'é criminâle. E pöi 'n segóndo pónto: primma de pensâ a-a legalizaçión, bezéugna assùmmise, ciascùn segóndo a pròpia responsabilitæ, o grànde cómpito educatîvo de lottâ contra a cultûa do sbàllo. Ne parlâva Galli Della Loggia inte 'n editoriâle in sciô "Corriere della Sera" de quarche giórno fa, metténdo in evidénsa i lìmiti de l'atuâle moménto culturâle che stémmo vivéndo in Italia in particolâre, ma ciù in generâle into nòstro oçidénte, e in sciô fæto ch'o segge necessâio recuperâ 'n'ètica comûne pe dâ e fondaménta a-o nòstro vìve civîle.
Pe lòtta a sta cultûa do sbàllo no intendémmo i intervénti de polizìa ò quarche âtra esprescion do ciù bêcero proibiçionìsmo; i intervénti relatîvi a-l'órdine pùbrico çertaménte son necessâri e son za previsti da-e léze vigénti che eventualménte van miglioræ da sto pónto de vista, sciàccando ben donde se pêu andâ a corpî. Intendémmo ciuttòsto açioìn positîve in sciâ famìggia, inta scheua, in sciô teritòrio, a favô da créscita di nòstri zoêni. Chi ancheu osténta seguésse in sce sto pónto ò o l'é 'n sciòcco, ò o l'é 'n ingénuo, oppûre o l'é còmplice. Chi gh'é derê i frettolôxi fautoî da legalizaçión? Pròpio inte sti giórni émmo lezûo in sciâ stànpa e vicénde riguardànti Giorgio Soros, un di finançê d'assàrto da finànsa internaçionâle de cui se pârla spésso in sciâ stànpa comme de 'n personàggio ch'o incarna 'n çèrto mòddo d'inténde e transaçioìn finançiârie into nòstro mondo; o l'é o finançê a cui vegne attribuîa a speculaçión in sciâ lîa italiànn-a e in sce-e sterlìnn-e into '93, con 'n guägno estimòu de l'órdine de quarche mijæ de miliàrdi. Ebbén, sémmo che o l'é un di prinçipâli finançiatoî di referéndum che se son svòlti in Alabama e in California pe-a liberalizaçión, a véndita, o commèrcio de-e dròghe. Sémmo ch'o finànsa çéntri stûdi in Euröpa; precizaménte un inta çittæ de Zurigo a cui i antiproibiçionìsti italiàn fan riferiménto. O pâ che derê a sta iniziatîva ghe séggian obiettîvi no pròpiamente edificànti che mîan a creâ e condiçioìn pe 'n riciclàggio do dénâ ch'o provegne da ativitæ criminôze in manêa ciù pulîa, sciàccando che sto mercòu o l'é 'n mercòu in grandìscima espansción ch'o consénte ùtili spropoxitæ.
Allóa e domànde che ce dovémmo pónne son âtre. Ce dovémmo domandâ cöse o l'é ciù ùtile pe-i nòstri zoêni; cöse o l'é realisticaménte poscìbile e urgénte fâ inte ste condiçioìn. O Sìndaco (me dispiâxe ch'o no segge prezénte ancheu) piggiàndo o spùnto da 'na lettia apparsa in sciâ stànpa çitadìnn-a in relaçión a-a catêna de mòrti pe overdose inta nòstra çittæ, o l'à anpliòu o seu ragionaménto in sciô téma ciù vàsto do dizàxo zovenîle. No ghe son rispòste çèrte, no zôva divîdise e contrappónnise: bezéugna dialogâ de ciù, con grànde attençión e grànde competénsa, andàndo a domandâ a-i operatoî de-e comunitæ, a-i operatoî di servìçi pùblichi, quæ o l'é l'inpàtto ch'an de frónte a sti problêmi e se o l'é coscì vêo che a strâda da legalizaçión ò quella da sperimentaçión de somministraçión controllâ, in sce cui exìste oramâi 'na abondànte letteratûa in sce esperiménti che son stæti fæti a l'estêro con resultæ no pròpiamente positîvi, a l'é veramente a strâda ch'a respónde a sta exigénsa.
Vorriéiva serrâ in sce 'n pónto: quàndo se pârla de sti têmi e se allârga o discórso a-o problêma ciù ànpio do dizàxo zovenîle, a l'é striscénte 'na mentalitæ de sto nòstro ténpo ch'a consìdera o dizàxo in generâle, e o dizàxo zovenîle in particolâre, comme inevitàbile e pertànto se tràtta de trovâ e fórme pe legittimâlo, pe réndilo trasparénte, pe rénde ciæo de frónte a tùtti che gh'é 'na fétta de popolaçión che pe determinæ condiçioìn, pe determinæ situaçioìn, a l'é destinâ a-a derîva; e dónca pe sti chì se propónan di ghètti; e dónca pe sti chì se propónan di recìnti drénto cui confinâ, ascì con 'na maggiô seguéssa da pàrte de chi o se ritegne inte 'na situaçión no a rìschio, quelli che pöi son i sbandæ, i dispiæ, quelli che pöi divéntan i relìtti de sta soçietæ.
Mì créddo che o cómpito da polìtica ancheu o segge quello de fâse cârego de ste situaçioìn. Se dîxe ch'o l'é cómpito da polìtica pónnise o problêma de comme se vîve e no pónnise o problêma do perché se vîve, ma ancheu a polìtica a l'é in crîxi perché o comme se vîve o dipénde da-o perché se vîve. Sta cultûa ch'a l'é definîa da-i sociòloghi "a cultûa do sbàllo" a l'é in pénn-a sintonîa con sta incapaçitæ d'educâ a-o sacrifìçio ch'o l'é pöi l'incapaçitæ d'assùmmise de-e responsabilitæ, l'incapaçitæ de devegnî protagonìsti.
Créddo che ancheu cómpito da polìtica, in sto senso, o proségue de sto dibàttito che m'auguro ascì no confinòu a-e votaçioìn de sta seia, ma in gràdo d'arvî 'n confrónto ciù ànpio in sci-i têmi de-e polìtiche zovenîli de sta çittæ, in sciô fæto che sta Amministraçión e sto Conseggio se dêvan pónne o problêma, ascì in relaçión a-a discusción do neuvo pian regolatô, d'andâ a individuâ ascì i spàçi e e strutûe drénto cui offrî a-i zoêni ocaxoìn de vìtta, ocaxoìn de divertiménto, ocaxoìn pe inpiegâ o seu ténpo lìbero, sta polìtica - dixéiva - a dêve ritornâ in sto senso protagonìsta do Conseggio comunâle e de sta çittæ".
Claudio Basso
Torna a l'ìndice
Intervénto de Umberto Testori (A.N.)
  "Scignôr Prezidénte, assessô Rossetti, comme i colléghi che m'an precedûo, me dispiâxe ch'o no segge prezénte o Sìndaco perché pròpio a lê, segóndo mì, ghe spettâva l'ùrtima paròlla in sce sto dibàttito. Me dispiâxe ascì che o dibàttito o segge stæto quæxi raffazzonòu perché 'n problêma de tànto interèsse comme questo o l'aviæ dovûo avéi ciù ténpo e soviatùtto ciù poscibilitæ da pàrte de tùtti i rapprezentànti do Conseggio comunâle pe podéi intervegnî.
Ve diò che di colléghi che m'an precedûo ho seguîo in particolâre o collega Quaglia perché esséndo da l'âtra pàrte, no dixémmo da barricâta, ma de-e têxi, o l'é quello ch'o m'interessâva maggiorménte pe védde quæ poscibilitæ o l'avéiva de convinçiménto inti confrónti di âtri colléghi e in particolâre mæ personâle. Ho seguîo comùnque ascì i intervénti di âtri e ve diò che inte 'n câxo do génere mì ritégno che no tànto ghe dêbbe èse 'na anteposiçión de grùppi polìtichi ò de mentalitæ polìtiche, ma d'òmmi cosciénti a savéi che stémmo attraversàndo 'n perìodo néigro da nòstra stòria nazionâle e çitadìnn-a e soviatùtto che stémmo affrontàndo 'n problêma di ciù dificili no tànto da discûte quànto da rezòlve.
O collega Quaglia, che mì çercâva d'ascoltâ into mòddo mêgio pe çercâ de védde se o me poéiva convìnce armeno in pàrte (e ve diò che in pàrte o gh'é quæxi riuscîo), quàndo o me pârla de malaféde ò inconpeténsa, in sce questo, comme o diæ o Prezidénte da nòstra Repùbrica, mì no ghe stâgo perché ritégno in malaféde de no èselo into mòddo ciù assolûto e quànto a-l'inconpeténsa, esséndo 'n farmaçìsta ch'o purtròppo o travàggia inte 'na çèrta zöna, de no avéine afæto; magâ ne avésse! Quàndo o conseggié Quaglia o me pârla de dròga leggia e de dròga pezànte, mì son perfettaménte d'accòrdo con lê che son dôe cöse nettaménte diverse: de ûnn-a se môe quæxi sùbito e de l'âtra, gràçie a Dîo, ghe vêu 'n pö ciù de ténpo. Che ghe segge 'n commèrcio (parlémmo d'eroìnn-a in particolâre) lìbero, in sce questo no son d'accòrdo. Lìbero in pràtica, questo fórse scì, però in teorîa nò perché ghe son ancón de-e léze che doviéivan èse severìscime che purtròppo vegnan tutelæ fìnn-a a 'n çèrto pónto. Che o segge flòrido in sce questo sémmo perfettaménte d'accòrdo. Mì pénso che nisciùn, da-i ciù ârti industriâli a-i operâi do ciù ìnfimo órdine, àggian de-e competénse econòmiche tâli.
Quàndo pöi me se pârla de legalizaçión ò de liberalizaçión, mì no arîvo mòlto a capî a gròssa diferénsa ch'a exìste; liberâ fórse vêu dî dâ "a go-go" e legalizâ invéce dâne 'n pochìn ma no tùtta? Çèrto, in sce questo gh'é 'na çèrta diferénsa, ma no gh'é diferénsa però perché a legalizaçión a dîxe a-i zoêni: "Ammîa che ti pêu fâlo perché o l'é legâle", coscì comme purtròppo niâtri da zoêni sémmo intræ a accatâ o primmo pacchétto de sigarétte e pöi sémmo andæti avànti. A speculaçión purtròppo - o-o sémmo - a l'é enòrme e in sce questo, câo Quaglia e câi colléghi do Conseggio comunâle de Zêna mì ho i mæ fòrti dùbbi che se pòsse fâ quarcösa perché a speculaçión a l'é talménte a ârto livèllo ch'a accatiâ tùtti, a faiâ de tùtto inte 'n mòddo ò inte l'âtro pe çercâ de tôe i bóin propòxiti sa di proibiçionìsti che di antiproibiçionìsti.
'N'âtra cösa che ritégno essençiâle a l'é quella de-e dròghe pezànti e de-e dròghe leggie. Òua, se o l'é risapûo che da-a pezànte ben dificilménte se tórna a-a leggia, invéce me pâ ch'o segge assodòu scientificaménte che da-a leggia se arîva a-a pezànte. Segóndo mì o problêma o l'é quello de l'educaçión che no sólo e famìggie, ma tùtti i énti morâli ò no morâli de l'opinión pùbrica dêvan adottâ. O l'é inùtile andâ avànti sénsa educâ i zoêni che çèrte cöse, legâli ò no legâli, abilitæ ò no abilitæ, fan mâ e son dannôze. D'âtra pàrte za l'educaçión a l'inpàran in televixón: quàndo i nòstri figgi, ascì zovenìscimi, vegnan con de-e paròllasse e ti çèrchi de dâghe doî scopelòtti pe dîghe "ste fraxi no se dîxan", te respóndan: "Ma se e an dîte in televixón!" e questo o sémmo èse vêo pe cui, segóndo o nòstro pónto de vista, l'educaçión soviatùtto a l'é quella ch'a dêve servî pe métte in tèsta a-i nòstri zoêni, che gràçie a Dîo no son stùpidi, che çèrte cöse no se fan no perché son proibîe, ma perché fan mâ a-a salûte.
Dixéiva 'n collega che m'à precedûo che inta Costituçión gh'é l'artìcolo ch'o pârla da salûte. Òua, no me pâ tànto lògico, se niâtri no tutelémmo 'na çèrta pàrte di nòstri zoêni, fâ 'n quarcösa pe tutelâ a salûte di çitadìn. Bezéugna fâ 'n quarcösa in mòddo tâle che se pòsse partî primma de tùtto da-a riabilitaçión; vâle a dî o nòstro problêma o no l'é tànto quello de çercâ de legalizâ quelli che vêuan intrâ inte sto tùnnel treméndo, quànto quello de fâ quarcösa pe çercâ de portâ feua quelli che purtròppo, spésso e voentê no pe cólpa lô, son intræ inte sto tùnnel, pe portâ feua lô e e seu famìggie da sto dràmma enòrme, pe permétte che ghe segge 'n domàn 'n quarcösa ch'o pòsse dî a-i nòstri zoêni: "Avéi âtre cöse da dî, âtre cöse da fâ". Comme o l'à dîto mòlto ben o collega Basso, i zoêni probabilménte van into tùnnel da dròga perché no trêuvan âtro, perché o Stâto o no sa dâghe âtro, perché o no l'é capâce a dâ 'n quarcösa perché sti zoêni trêuvan di âtri sbócchi, de-e âtre poscibilitæ e questo o l'é vêo; però o discórso o l'andiæ mòlto ma mòlto lontàn perché o no dipénde ciù da niâtri sìngoli, o no dipénde ciù da-o Conseggio comunâle de Zêna, o dipénde da-o Stâto ò chi pe esso.
Pe terminâ, mì ritégno che no ghe segge 'na situaçión particolâre pe sarvâ l'intêga cösa legalizàndo ò liberalizàndo e dròghe leggie, ascì perché pöi da-e dròghe leggie bezognaiæ passâ a-e pezànti e a sto pónto a saiæ 'na tragêdia conpléta".
Umberto Testori
Torna a l'ìndice
Intervénto de Maria Grazia Gaggero (Verdi)
  "Asciö mì aviéiva graîo podéi fâ sta discusción in prezénsa do Sìndaco, assénte pe malatîa, ascì perché sto dibàttito o l'avegne dòppo che lê o l'à fæto 'n intervénto mòlto bello e autorévole in Conseggio comunâle. Tornàndo a-a discusción, me pariæ oportûno valutâ o contèsto in cui questa a se svòlze. O numero de mòrti pe overdose o l'é in aumento, con 'n rappòrto de un a trêi tra i deçèssi pe dròga e quelli pe A.I.D.S.. O l'é 'n dæto de fæto o falliménto da polìtica da represción, me pâ che questa a segge 'na préiza d'atto doverôza da pàrte de tùtta a soçietæ. A véndita clandestìnn-a de-e cosidîte "dròghe leggie" a pón de fæto i zoêni in nétto contàtto co-o mondo do spàccio; ànzi, spésse vòtte de fæto a-i rénde spacciatoî lô mæximi. Sta fâze, segóndo l'idêa d'autorévoli espèrti, a l'é l'ùnico pónto de rìschio che se gh'à pe-o passàggio da-e dròghe leggie a quelle pezànti, in efètti i zoêni, de fæto, inpàran a avixinâse a-o mondo do spàccio pròpio a tràverso a véndita da canàpa indiànn-a e de l'hascisc.
Gh'é da denonçâ ascì 'n aumento inta circolaçión de sostànse chìmiche mòlto ciù periglôze rispètto a-e âtre dròghe. Recenteménte gh'é stæta 'na lettia mòlto bella, apparsa in sciâ stànpa, o cui autô o l'é Don Gallo, in cui se dîxe che i zoêni son di consumatoî particolâri che subìscian e consùman e mòde; me pâ che questo o segge 'n dæto de fæto ch'o ne dêve fâ riflètte e o ne dêve portâ a individuâ dôe strategîe da perseguî parallelaménte e no in contrapposiçión: riconósce a fondatéssa de 'na strategîa da riduçión do dànno e a legalizaçión de-e dròghe leggie a-o scòpo de separâ o circùito do mercòu illegâle de-e dròghe pezànti da quello de-e sostànse che son stæte definîe "no dròghe".
Legalizaçión a no significa liberalizaçión, ma commèrcio sótta contròllo de-e dròghe leggie, tànt'é vêo che e propòste de léze che zàçian in Parlaménto identìfican l'etæ mìnima a-a quæ poîan èse vendûe e dròghe leggie: no poriéivan èse vendûe a figgeu d'etæ inferiô a-i sêxe anni e stabilìscian e sançioìn pe quelli che contravégnan a ste disposiçioìn.
Bezognaiæ superâ a cultûa de l'intolerànsa, ammiâ o tossicodipendénte comme quello ch'o l'à bezéugno d'agiùtto e no comme 'n delinquénte e individuâ tùtte e strâde poscìbili pe rénde a qualitæ da vìtta di tossicodipendénti o ciù accettàbile e o ciù vivìbile poscìbile e agiuttâli, se o dexìderan, a andâ feua da-a spirâle da dròga. Bezéugna smitizâ o vergognôzo concètto, esprèsso ascì pöco fa inte st'âula, che chi o se bûza o no l'à vêugia de travagiâ, comme se o mondo do travàggio o foîse 'n miràggio solaménte pe-i cosidîti normâli.
Sto dibàttito o l'à lêugo mentre i amministratoî de-e gràndi çittæ italiànn-e se interrôgan in sciô superaménto de-e polìtiche proibiçionìste. O téma da legalizaçión di derivæ da canàpa indiànn-a o l'é stæto ogètto de discusción drénto a-a sèsta conferénsa internaçionâle in sciâ riduçión do dànno ch'a s'é svòlta a Firenze da-o 26 a-o 30 de màrso '95. 'Na riflescion anàloga a l'é stæta a-l'exàmine de l'assemblêa nazionâle do forum dròghe, in sciâ baze ascì de-e iniziatîve assùnte inte sti anni in órdine a-e polìtiche de riduçión do dànno.
No pöchi pàssi in avànti son stæti fæti a tràverso o dibàttito inta soçietæ italiànn-a e inti ordinaménti de l'opinión pùbrica into córso di anni '90. Co-o successo, into '93, do referéndum abrogatîvo de-e nòrme penâli da léze 162, a battàggia antipunizionìsta a l'à otegnûo, a-o stâto, o seu resultòu ciù elevòu, sénsa tuttavîa che o Parlaménto o l'agge sapûo esprìmme soluçioìn legislatîve adeguæ a quello vöto. O resultòu do referéndum, ch'o l'à parzialménte modificòu a léze 162 in materia de dròghe, o l'à dimostròu che a scèrnia repressîva ispiratrîce de quello tèsto a l'é stæta largaménte boccâ da-i çitadìn do nòstro Paêize. L'inpostaçión proibiçionìsta e punizionìsta a dêve lasciâ o cànpo a 'na vixón ciù pragmàtica di problêmi colegæ a-o consùmo di stupefacénti.
A mæxima conferénsa nazionâle in sce-e dròghe svòltase a Palermo into zùgno do '93 a l'à lançòu di segnâli precîxi de ridimensionaménto de lo scóntro ideològico in sciâ questión, privilegiàndo 'n apròccio de riduçión do dànno. O dibàttito culturâle, into nòstro Paêize e in tùtto o mondo, o l'à vìsto za da quarche anno affacciâse sénpre ciù marcataménte e ipòtexi de riduçión do dànno in materia de dròghe e de A.I.D.S. comme strategîa ùtile. Sti problêmi son gestìbili e governàbili a tràverso l'intervénto da man pùbrica; in efètti o l'é doverôzo pónnise o problêma da salûte di çitadìn consumatoî de stupefacénti a tràverso strategîe preventîve e riduttîve do dànno che sto consùmo o compòrta.
E propòste de léze che son stæte prezentæ inte sti anni da-i parlamentâri che fan pàrte do forum dròghe, affrontan çìnque questioìn: o superaménto do regìme sançionatòrio inti confrónti do consùmo de dròghe, a prevençión do dizàxo pe-i sogètti maggiorménte espòsti a-o consùmo de dròghe, a sperimentaçión limitâ e controllâ da somministraçión de-e sostànse stupefacénti, a rifórma de-e strutûe operànti in materia de tossicodipendénsa. 'Na quìnta prioritæ individuâ da-o forum a l'é quella ch'a prevéde a legalizaçión de-e dròghe leggie a-o scòpo de separâ o circùito do mercòu de-e dròghe pezànti da quello de-e sostànse che son definîe "no dròghe".
Sto progètto o se mêuve drénto a 'n quàdro ciù generâle vòlto a 'na maggiô regolamentaçión da commercializaçión de-e sostànse alcòliche e di psicofarmaci pe prevegnî i abûzi do consùmo e dâ 'na limitaçión precîza a-o mercòu clandestìn. In efètti, comme dixéiva primma, e polìtiche de limitaçión do dànno no dêvan limitâse a intervegnî in sci-i efètti do consùmo de-e dròghe pezànti, ma contribuî ascì a spëzâ pròpio quello circùito, quella catêna ch'a lîga l'utilizo de-e cosidîte dròghe leggie a-o mondo do spàccio clandestìn e dónca di spacciatoî".
Maria Grazia Gaggero
Torna a l'ìndice
Intervénto de Enrico Serra (Gr. San Giorgio)
 "Émmo dibattûo diverse vòtte, ascì inte st'âula, o problêma da dròga in rappòrto a domànde d'órdini do giórno, in rappòrto ascì a atti de criminalitæ, in rappòrto a tànti prinçìpi. Comme mêgo no faiéiva mòlta fadîga a fâ chì 'n'espoxiçión de tìpo epidemiològico, clìnico ò tossicològico perché a documentaçión a l'é vastìscima e a saiæ motîvo za sufiçénte pe condiçionâ o pensiero, ànzi pe informâ i colléghi de quànto o segge periglôzo l'adêuvio apónto de-e dròghe. E pénso che sti chì saiéivan i argoménti da portâ soviatùtto a livèllo de prevençión inte-e scheue e inte l'informaçión, che son l'ùnico struménto.
Ma vorriéiva fâ 'n'âtra consideraçión, 'na consideraçión ch'a poriæ semegiâ mòlto semplicìstica, ma a poriæ ascì èse 'n appòrto in ciù a-e relaçioìn ch'an za fæto i mæ colléghi che son abbastànsa esaustîve. A-o collega do grùppo Lista Pannella voéiva ascì regordâ che fórse o no l'éa stæto mòlto corrètto çitâ o nómme de 'n farmaco, fórse o saiæ stæto mêgio çitâ magâ senplicemente l'esprescion "psicofarmaci" ò 'na fòrmula chìmica, no 'n nómme commerciâle (sperémmo o no rìçeve quarche querela); comùnque capìscio a seu bónn-a féde, ascì se ritégno ch'o l'agge sbagliòu. Coscì comme o no pêu confónde "penalizâ a mòrte" con legalizâ ògni struménto de suicìdio, specialménte quàndo sto struménto o l'é gratificànte pe l'individuo, dónca son doî problêmi ben diversi.
Ma da 'na consideraçión coscì de polìtica sénplice, ma fórse facilménte conprensìbile, vorriéiva passâ a 'na riflescion 'n pö diversa: o fenòmeno da dròga o no l'é casuâle. Che tìpo de soçietæ émmo creòu? O fenòmeno da dròga o no nasce comme 'n evénto izolòu ò comme 'n "albo lapillo" (ànzi, fórse "niger lapillo"), ma o dêve èse inserîo into contèsto di costùmmi, da cultûa, de 'n moménto stòrico da soçietæ. Fasso 'n exénpio de cui ho parlòu 'n pö inte-e scheue e fórse o l'é pe questo ch'o pêu semegiâ 'n pö riduttîva sta faccénda: inta stòria o problêma de chi o detegne o poéi polìtico, econòmico, militâre, o l'é sénpre stæto quello de perseguî o fìn de controllâ i çitadìn, i sùdditi, e màsse e de sfruttâle. 'N ténpo de l'òmmo se utilizâva quæxi esclusivaménte a fòrsa muscolâre, a fòrsa travàggio e se aplicâvan mèzi coercitîvi comme e catêne, i pòsti coàtti de travàggio e coscì vìa. ancheu, co-a difuxón da cultûa, co-a scheua de l'òbligo, e màcchine che sostituìscian a fòrsa de l'òmmo, no l'é fórse che se stàgo sviluppàndo 'n diverso mèzo de condiçionaménto de l'òmmo, inveçe che in sci-i mùscoli in sciô çervéllo? Allóa chi o vêu o poéi o aplica e catêne, i vìncoli a-a mente de l'òmmo.
In efètti, inte 'n excursus coscì mòlto sénplice, elementâre, s'é comensòu co-a manipolaçión de l'informaçión, a difuxón de l'informaçión manipolâ, pe exénpio co-a publiçitæ gratificànte ch'a luxinga e a crêa fâsci bezéugni, l'edonìsmo, o consumìsmo, che crêan a seu vòtta neuve insoddisfaçioìn, neuve infeliçitæ, se no se razónze quello status symbol ò o possèsso de quelli ogètti coscì ben illustræ. A mæxima tècnica, i mæximi mèzi d'informaçión de màssa pràtican o condiçionaménto polìtico, ideològico, se crêan situaçioìn, de fæto, de fâsa democraçîa ò de democraçîa limitâ.
Ancheu inte st'âula, dónca, ce occupémmo de 'n livèllo ciù avansòu de condiçionaménto rispètto a tùtti quelli ch'émmo espòsto coscì breveménte, do struménto ciù poténte e periglôzo ch'o crêa quæxi sénpre irreversibilitæ a-e menomaçioìn ch'o produxe; ce occupémmo de 'n'ârma chìmica miçidiâle ch'a l'à 'n'açión dirètta, voluntâia, d'autolesionìsmo. E dròghe lìbere, leggie ò pezànti che séggian, crêan 'na soçietæ de "zombies" che definitivaménte ò quæxi irreversibilménte pèrdan o dirìtto a-o ben ciù preçiôzo che l'òmmo o l'à inte 'na soçietæ veramente avèrta e lìbera pe chi o l'é capâce, àbile e o consèrva a luçiditæ da raxón crìtica, a capaçitæ de 'n inténde e de 'n voéi e no sogètta invéce a-a dipendénsa chìmica, a-l'obnubilaçión pe 'na no realtæ onìrica ò indótta.
L'òmmo co-a liberaçión de-e dròghe e a difuxón inevitàbile de queste, maggiô de quella d'ancheu, o perdiæ o dirìtto a-o lìbero arbìtrio, a-o pensiero e a-l'ètica individuâle; se favoriæ chi o vêu controllâ a soçietæ e l'òmmo a creâ neuvi sciâvi e pe sénpre. Bezéugna intensificâ a prevençión; vivémmo inte 'n perìodo de difuxón da cultûa, da scheua de l'òbligo e a livèllo apónto de-e scheue, de-e famìggie, bezéugna fâ capî a realtæ do rìschio che sta soçietæ a pón.
A préiza de coscénsa do rìschio a l'é a cösa ciù importànte. Bezéugna aplicâ pénne esenplâri a chi o sfrùtta a dròga e intensificâ e esténde soviatùtto l'açión de-e comunitæ, ascì se mànca ancón 'na relaçión scientìfica, 'n progètto de stûdi pe valutaçioìn con caràttere veramente scientìfico di resultæ, de-e metodologîe e soviatùtto di protocòlli terapèutichi d'agî e quàndo dîgo terapèutichi no inténdo farmacològichi, ma inténdo sta paròlla into ciù ànpio senso, logicaménte ascì psicològico e de condiçionaménto. Ma sémmo che a scénsa a no invèste sólo a matemàtica, a fìxica e a chìmica; a scénsa a invèste ascì e problemàtiche do soçiâle, dónca o soçiâle o l'é ascì 'na scénsa, de conseguénsa intendéiva parlâ de protocòlli che dêvan investî tùtti i aspètti da soçietæ, perché, ovviaménte no se pârla de 'na terapîa d'òrgano.
L'òrgano superiô ch'o l'é o çervéllo o invèste a gàmma de tùtte e ativitæ umàne, dónca o problêma o va affrontòu a 360 grâdi in sce tùtto quello ch'o rapprezénta a profescionalitæ de l'òmmo ascì inte l'àmbito da seu soçietæ. Sólo con sto mèzo se poriâ veramente rezòlve sto problêma, che çertaménte o no nasce pe câxo ma o l'é indótto da chi o vêu detegnî o poéi sa econòmico che polìtico"."
Enrico Serra
Torna a l'ìndice
Intervénto de Mario Tullo (P.D.S.)
  "Scignôr Prezidénte, conseggê, niâtri affrontémmo sto téma prezentòu da quarche moçión, de cui a primma a l'é do Grùppo Antiproibiçionìsta, çercàndo de limitâ o mæ intervénto a ste consideraçioìn, sénsa fâ 'na discusción generâle in sciâ questión da tossicodipendénsa ch'a ne doviæ védde coinvòlti inte 'na discusción ciù ànpia.
Niâtri affrontémmo sto téma con 'n grànde rispètto pe quello ch'o l'é 'n dràmma de sta soçietæ modèrna, 'n dràmma primma de tùtto pe-i tossicodipendénti e pe-e seu famìggie, 'n dràmma ch'ancón recenteménte o l'à vìsto inta nòstra çittæ 'n aumento de-e vìttime de l'eroìnn-a, 'n dràmma ch'o l'à di aspètti de caràttere sanitârio, 'n dràmma ch'o l'à 'na dimensción soçiâle.
Exìste inôtre 'n problêma da polìtica, vâle a dî comme i partîi se confróntan in sce sto téma. Ancheu o pâ d'èse de mòda 'na sòrta de dibàttito tra e posiçioìn proibiçionìste e quelle antiproibiçionìste. Ebbén, se sto dibàttito o l'é viçiòu da 'na pàrte e da l'âtra da argomentaçioìn de caràttere ideològico, o no me appasciónn-a, o no appasciónn-a o P.D.S. e o no appasciónn-a quelle fòrse polìtiche che vêuan affrontâ seriaménte o problêma da tossicodipendénsa e de l'adêuvio da dròga.
Ritégno - e inte st'âula émmo dæto 'na pèscima imàgine a-e persónne che son vegnûe chì a ascoltâ - che no s'affronta a questión da tossicodipendénsa e da dròga in sciâ baze de chi o ùrla ciù fòrte. Purtròppo e ùrla, e nòstre ùrla, no fèrman a dròga e no fèrman a domànda de dròga. E sta gâra a chi o ùrla ciù fòrte contra a dròga a no ne appasciónn-a.
Imàgino che contra a dròga ghe sémmo tùtti, in efètti vorriéiva trovâ 'na persónn-a ch'a affèrma d'èse a favô. O problêma, ancheu, o no l'é chi o ùrla ciù fòrte contra a dròga ò e dròghe, ma o l'é quello de métte seriaménte in discusción tra niâtri quelle che doviéivan èse e strategîe e i struménti mêgio e ciù eficâci pe contrastâ a dròga.
O problêma o no l'é abbasciâ a guârdia da-o pónto de vista culturâle, o problêma o l'é capî che a ancheu e polìtiche, e léze che se son aplicæ into nòstro Paêize no an portòu a-i resultæ che auspicâvimo. Gh'é stæta 'na primma léze significatîva, a n. 685, ch'a l'é restâ in gran pàrte inaplicâ into nòstro Paêize, ma a 'n çèrto pónto s'é çercòu de sterzâ, de ténde a punî o reâto de consùmo de dròga pe tentâ de frenâ sto fenòmeno. E purtròppo mì éa tra quelli che se son battûi contra sta léze, in efètti aviéiva vosciûo ch'avéssan raxón i âtri e che magicaménte no ghe foîssan ciù stæti mòrti pe eroìnn-a e ghe foîssan meno figgeu ch'incomensàssan a drogâse sa co-e dròghe leggie che con quelle pezànti.
No gh'é stæto, invéce, 'n câo, ànzi quarche studiôzo o ne dîxe che gh'é stæto ascì 'n aumento, ma mì no vêuggio manco in sto câxo strumentalizâ i dæti e i numeri. Me regòrdo che Bettino Craxi, quàndo o l'éa Prezidénte do Conseggio, inte 'n messàggio augurâle de fìn anno o çitò sto eleménto di menoî mòrti pe dròga comme 'n eleménto positîvo de quello Govèrno. Magâ o foîse stæto coscì! O saiæ ûnn-a de-e pöche cöse ch'aviéiva condivîzo de Craxi. O problêma o l'é che sto fenòmeno o no se pêu mezuâ sólo in sce-e mòrti e in sciô numero de-e vìttime, ma in sce-e potençiâli vìttime e i potençiâli consumatoî de dròghe, sa leggie che pezànti.
Òua, mì créddo che o nòstro problêma o segge quello d'urlâ meno e çercâ soviatùtto de fâ quarcösa. Ebbén, vìsto che primma ghe son stæte de-e persónne che son vegnûe chì pe çercâ de spiegâ e seu raxoìn, vêuggio spiegâ cöse fémmo niâtri, ògni tànto, quàndo discutémmo de dròga? Niâtri inte st'âula votémmo, pe exénpio, di documénti pe arvî i SERT vâle a dî i servìçi che, comme prevédan e léze, dêvan agiuttâ i tossicodipendénti. Âtri Grùppi vòtan contra sti servìçi. In efètti no van ben perché son vixìn a-e scheue e perché poîan dâ fastìdio a-i commerciànti. Ste persónne che dîxan coscì son e mæxime che ancheu, magâ, ve an dæto raxón.
Niâtri votémmo, asciö, e delìbere ch'asségnan i fóndi a-e comunitæ pe-i tossicodipendénti e pe-o seu recùpero, mentre quelle persónne che ve an dæto raxón spésso vòtan contra. Dónca o problêma o l'é quello de védde cöse se pêu fâ inta realtæ atuâle. Niâtri émmo 'n gran numero de tossicodipendénti inta nòstra çittæ e into nòstro Paêize, consumatoî de dròghe pezànti quæ l'eroìnn-a e a cocaìnn-a; émmo 'n gran numero de zoêni ch'an contàtti co-e dròghe leggie. Ascì chì e stìme pàrlan de otre o 70% d'adolescénti ch'an comùnque armeno 'na vòtta provòu a fumâ hascisc e a consumâ dròghe leggie.
Ghe son pöi âtri tìpi de dròghe de cui no s'é parlòu, ò sa e dròghe pòvie. Ghe son zoêni, inte nòstre periferîe, che sniffan cólle, benzìnn-a, insómma e porcherîe ciù incredìbili ch'o l'é dificile proibî. O l'é 'n bello problêma dî che no vendémmo ciù benzìnn-a perché ascì co-a benzìnn-a se poîan provâ emoçioìn fòrti! Ghe son pöi e neuve dròghe comme l'extasy ch'a stâ sostituéndo o mercòu de l'eroìnn-a; oramâi l'eroìnn-a a l'é 'n eleménto residuâle soviatùtto pe-i ciù vêgi consumatoî de dròghe e questo ascì perché i zoêni son intimorîi da-o perìcolo de l'A.I.D.S.. No l'é vêo che no fa poîa l'A.I.D.S., magâ a siringa a te fa poîa, però a necessitæ e a vêugia d'andâ feua de tèsta gh'é e allóa se ricórre a-l'extasy, che tra l'âtro a no l'é 'na dròga leggia ma pezantìscima e son dramàtichi i efètti che questa a provoca a-o çervéllo de 'na persónn-a. Tra l'âtro bezéugna evidençiâ e dificoltæ di operatoî a affrontâ ste neuve dròghe.
Òua, o problêma che niâtri ce ponémmo e ve ponémmo o l'é o seguénte: rispètto, pe exénpio, a-e dròghe leggie o arréca ciù dànno 'n spinéllo ò lasciâ 'n adolescénte a contàtto con 'n spacciatô? Perché a ancheu l'ùnico pòsto donde 'n adolescénte o pêu andâ a accatâ a dròga o l'é 'n spacciatô de dròga e sto spacciatô ancheu o te vénde l'hascisc, domàn o te pêu vénde l'extasy e doppodomàn a cocaìnn-a ò l'eroìnn-a: o l'é sólo lê o fornitô.
Ebbén, niâtri no vogémmo che ghe segge into nòstro Paêize nisciùn cediménto culturâle e créddo che da sto pónto de vista o dêve èse inesoràbile o mònito a 'na giùsta e consapévole educaçión a-a salûte da pàrte di ciù zoêni in tùtte e seu sfêre e vâle a dî contra e dròghe e contra quelle za normalizæ quæ o tabàcco e l'àlcol. E vorriéiva andâ otre, perché de vòtte e ànsie che niâtri émmo son ascì ànsie de genitoî rispètto a-a preoccupaçión pe-i pròpi figgi. Testori o parlâva primma da TV; ebbén, ascì sta-ùrtima a pêu devegnî 'n struménto periglôzo pe-i ciù zoêni.
Çîto 'n exénpio banalìscimo ch'o riguârda mæ figgio, 'n figgeu de trêi anni, che da 'n pâ de giórni o me tormenta dixéndo ch'o vêu fâ comme Gargoy, personàggio di fumétti ch'o vôla, e a Carlevâ o voliâ comme lê. Mì francaménte me preòccupo perché ho lezûo che da quarche pàrte quarche figgeu o s'é bûttòu zu da quarche fenèstra, però no pénso che poriò proibîghe a televixón ò poriò fâ 'na battàggia contra de lê. O mæ problêma o l'é quello de fâ capî a mæ figgio che se o se bûtta zu da-a scâ de câza o se fa mâ.
Òua, tùtto questo rispètto a-e dròghe leggie e a quelle pezànti vâle a dî a tùtte quelle condiçioìn che pòrtan l'òmmo a-o seu anientaménto e a-a rinùnçia da seu autodeterminaçión o vediâ o nòstro partîo sénpre in primma lìnia, sénsa cediménto culturâle nisciùn. O nòstro problêma o l'é no serrâ i éugi davànti a-a realtæ. Niâtri no poscémmo no partî da-a realtæ ch'a l'é quella de 'na generaçión ch'a ricèrca ascì inta dròga quello ch'a no riêsce a trovâ inta quotidianitæ, a ricèrca da sensaçión fòrte, o fæto che o sàbo seia bezéugna fâ o pìn pe tùtta a settemànn-a.
Che segge questa 'na estremizaçión da pròpia existénsa in discotêca sénsa magâ ricórre a-e dròghe ò segge, apónto, a ricèrca ascì de dròghe che no son quelle solitaménte classificæ da-a nòstra mêxina ò l'andâ a-o stâdio inte 'na determinâ manêa? Se tràtta de 'n bezéugno generazionâle ch'o revéla 'na generaçión fràgile ch'a vîve in manêa problemàtica. No dovémmo mâi dimentegâ mâi sta condiçión de baze.
Spésso i SERT ne fan discûte e ne fan inrabî, ma no discutémmo mâi di 5.000 zoêni che into nòstro paêize téntan o suicìdio ògni anno. Sti chì no se drògan, ma decîdan a 'n çèrto pónto ch'o l'é ôa de staccâ a spìnn-a e çèrcan de "levâ o disturbo". Me regòrdo che, çirca 'n pâ d'anni fa, inta nòstra çittæ s'éa suicidòu 'n figgeu e a motivaçión a l'éa a desperaçión pe avéi avûo 'n brùtto vöto a scheua; l'insegnànte coinvòlta a l'avéiva dîto ch'o de seguo o no s'éa amassòu pe-o brùtto vöto, ma questo o l'éa stæta sólo a góssa ch'a l'avéiva fæto trabuccâ o vâzo.
Ecco, niâtri dovémmo savéi ch'émmo tànti vâzi che son a-i lìmiti. Questo o l'é 'n dæto che dovémmo avéi prezénte quàndo parlémmo di zoêni, e no sólo pe quànto riguârda a dròga, in efètti ghe son âtre fórme de devianse che doviéivan védone appasciónaménte insémme e no védone urlâ in nómme e in diféiza, magâ, de quarchedun ch'o l'é prezénte e purtròppo o vîve a questión dramaticaménte in sciâ pròpia pélle.
Exìste, dónca, 'na generaçión ch'a l'é esclûza in quarche manêa da sta soçietæ e dovémmo fâ de tùtto pe riportâla appin a-o seu intèrno. E allóa vedémmo quello che se pêu fâ. Niâtri émmo prezentòu 'n órdine do giórno e 'na sêria d'emendaménti a-a moçión di antiproibiçionìsti, ma quello che vogémmo co-o nòstro órdine do giórno o l'é primma de tùtto repartî da quello che za ancheu se pêu e se dêve fâ pe léze ò sa potençiâ tùtte quelle normatîve previste da-o nòstro Parlaménto pe quànto riguârda, pe exénpio, i SERT.
Inôtre vogémmo 'na fòrte polìtica de riduçión do dànno e tra l'âtro o Comûne o l'é forteménte inpegnòu in sto senso e feliceménte l'Amministraçión locâle a s'é schierâ a fiànco da U.S.L. pe rezòlve ascì quarche problêma logìstico comme l'apertûa di SERT e do çéntro de distribuçión do metadón, ch'o l'à finalménte smésso d'èse inte quello pòsto angùsto ch'o l'éa a sâla d'attéiza do pronto soccórso de Sanpedænn-a. Inôtre o sostegne con energîa o progètto "Fenice" in sce 'na fòrte polìtica de riduçión do dànno e dónca credémmo ch'o segge necessâio andâ otre e ch'o segge oportûno che o Parlaménto o discûte seriaménte de tùtte e propòste de léze che son stæte avansæ, tra cui ghe n'é quella de fâ andâ feua comùnque da-o circùito penâle i consumatoî de dròghe leggie.
Ancheu o no l'é coscì e se rìschia ascì pe l'hascisc d'andâ in galêa e créddo che in lêugi scìmili no ghe segge mòlto da inparâ, in efètti, consideræ a situaçión atuâle de-e galêe in Italia, se pêu dî che no se ne sciòrte çèrto migloræ. Credémmo, inôtre, seriaménte ch'a vagghe affrontâ a poscibilitæ, no sólo inta nòstra çittæ ma in ciù çittæ e poscibilménte in tùtto o Stâto, de somministrâ a 'n çèrto numero de paçénti ò sa a 'n numero ristrétto de paçénti, in manêa sperimentâle, ascì l'eroìnn-a ò âtri oppiàcei. Questo no comme ùrtima spiâgia, pe 'n cediménto a 'n adêuvio difûzo de dròga, ma comme rispòsta tècnica a 'n problêma ch'émmo.
Bezéugna anpliâ e poscibilitæ existénti de cûa e de trattaménto a-o metadón che dan 'n çèrto tìpo de resultæ e bezéugna piggiâ atto fìn in fóndo che gh'é a poscibilitæ d'andâ otre e dónca con tùtti i tècnichi e i scenziâti disponìbili trovâ e fórme perché o segge poscìbile ascì 'na somministraçión controllâ de l'eroìnn-a. Questo pe dâ dignitæ ascì a chi o convîve con sto dràmma e pe dâ 'n eleménto de seguéssa a tùtti.
Mì créddo che l'A.I.D.S. o l'agge forteménte cangiòu l'apròccio con sta temàtica, generàndo 'na sòrta de poîa pe-o difóndise de sto virus ch'o no l'é legòu sólo a quarche categorîa de persónne, in quànto tùtti niâtri ce augurémmo che i nòstri figgi no àggian mâi a che fâ con l'eroìnn-a ma sperémmo asciö ch'àggian ascì 'na normâle vìtta sessuâle. Dónca sémmo benìscimo che ghe poîan èse di rìschi in sto senso e allóa convîve con fòrmule neuve o rapprezénta ascì 'n'ocaxón pe dâ dignitæ a 'na persónn-a ch'a no riêsce a andâ feua da quello dràmma e pe dâ rassicuraçión e seguéssa a tùtti quànti perché, apónto, nisciùn o l'é immùne no sólo da-a dròga ma ascì da quello che a dròga a pêu compoîtâ.
Mì créddo - e conclûddo - che i partîi doviéivan avéi a capaçitæ d'ascoltâ chi da ténpo o l'é inpegnòu seriaménte in sce sto terén e vâle a dî sa i operatoî pùblichi che quelli privæ. Fondamentâle o l'é stæto ascì o rêuo ch'an avûo e associaçioìn de-e famìggie inta nòstra çittæ pe trovâ convergénse inte l'affrontâ sto téma e émmo rispètto ascì pe lê, ma niâtri credémmo, apónto, sénsa nisciùnn-a derîva antiproibiçionìsta da-o pónto de vista ideològico-culturâle, che provâ e sperimentâ strâde neuve o segge giùsto e ascì necessâio"."
Mario Tullo
Torna a l'ìndice
Intervénto de Franco BAMPI (Polo Nord)
  "Premétto che o partîo a cui appartegno, Forza Italia, in sciô téma da legalizaçión da dròga o lascia libertæ de coscénsa e dónca parliò a tìtolo personâle, fasendo quarche consideraçión personâle in sce sto problêma ch'o l'é mòlto complicòu. In efètti ritégno che ghe séggian raxoìn da tùtte dôe e pàrti e e raxoìn da tùtte dôe e pàrti se poîan ascì riassùmme e védde. Ebbén, a raxón ch'a spìnze i antiproibiçionìsti a fâ a seu propòsta a l'é quella de scoraggî sótta o profî econòmico quelli che da dròga fan mercòu e dónca, into tentatîvo de levâ sto incentîvo econòmico, quella de scoraggî o spàccio e evitâ che chi o necessìta de dròga o dêbbe ricórre a atti de microcriminalitæ e criminalitæ pe procurâse o dénâ necessâio pe-o pròpio adêuvio e consùmo de ste sostànse.
In sto senso véddo l'aspètto positîvo da tutéla de quelli che son pöi i destinatâri de sti atti de microcriminalitæ che solitaménte costituìscian a pàrte débole da soçietæ ò sa i vêgi, e dònne e coscì vìa. Dónca in sto senso créddo ch'àggian raxón i antiproibiçionìsti quàndo dîxan ch'o bezéugna tutelâ ascì sta pàrte da soçietæ. Diversa a l'é a posiçión de chi o l'é proibiçionìsta, perché questo o véde comùnque a tutéla de chi o no l'à ancón avûo accèsso a-o mercòu da dròga e o pêu èse scoraggiòu da-o fæto che sto mercòu o l'à 'n còsto e che, 'na vòtta intræ inte sto mercòu, o còsto e a necessitæ d'avéi de continovo dénâ pe foraggiâse e pe podéi dónca acquixî a dròga o pòsse èse 'n disincentîvo a comensâ.
Ancheu, effettivaménte, comensâ o rapprezénta 'n âtro problêma complicòu perché mentre a-i inìçi do fenòmeno se poéiva pensâ che ghe foîse ignorànsa in mérito créddo che d'ignorànsa no ghe ne segge ciù, in efètti son nòti oramâi sa i dànni che poîan provocâ e sostànse stupefacénti, sa o fæto che incomensâ a assùmme ste sostànse, ascì se queste son classificæ comme dròghe leggie, pöi o indûe pe vâri motîvi a assùmme ascì dròghe pezànti. Dónca chi o invòca o proibiçionìsmo o véde 'na fórma de tutéla de quella pàrte ch'egualménte débole a l'é perché a pêu èse a pàrte di zoêni che poriéivan avéi, dónca, maggiô dificoltæ a accêde a ste sostànse e pertànto 'na maggiô tutéla.
Dévo dî, in veitæ, ch'o l'é dificile inte sti doî aspètti dâ tòrto a-i un e a-i âtri, perché paradossalménte sémmo pròpio inte 'na situaçión conflittuâle in cui exìstan dôe diverse opinioìn egualménte vâlide, egualménte interessànti e egualménte richiedénti 'na tutéla a livèllo soçiâle de quarche pàrte da nòstra soçietæ.
Mì ritégno che, in realtæ, o segge pöco importànte, se no pròpio pe 'na valénsa polìtica e dónca pe interèssi polìtichi che poîan avéi e vârie pàrti, pónnise o problêma se a Zêna ghe dêve èse proibiçionìsmo ò antiproibiçionìsmo. Purtròppo créddo che o problêma o vagghe affrontòu a livèllo globâle. O vêo problêma che ce trovémmo de frónte o l'é o problêma de paêixi consumatoî che se trêuvan in contràsto con paêixi produttoî.
Ghe son paêixi che bâzan forteménte a seu economîa in sciâ produçión de dròga, ascì se no consùman perché in generâle ghe son fòrti divéti a-o consùmo. O problêma o l'é se i paêixi consumatoî son in gràdo d'assùmme 'na posiçión inti confrónti di paêixi produttoî. Mì créddo ch'o l'andiæ ben qualùnque posiçión purché a foîse assùnta da tùtti; o va ben 'na posiçión proibiçionìsta, allóa a posiçión proibiçionìsta a dêve arivâ a-o pónto de distrùe - perché se sa donde son colocæ - i cànpi de produçión de dròga. Inôtre, da-o moménto ch'émmo za sperimentòu che posiçioìn antiproibiçionìste limitæ an fallîo, o l'é oportûno evitâ a creaçión de zöne in cui o l'é consentîo o consùmo da dròga.
Dónca o vêo problêma o l'é questo, però, pe contra, niâtri ce scontrémmo con 'n'âtra lobbi fortìscima e emergénte ch'a l'é quella ch'a fa câpo a-i SERT a tràverso a distribuçión do metadón. Mì vorriéiva savéi quæ o segge o gîo d'affâri ch'o stâ derê a-o metadón. Personalménte no-o conóscio, ma son convìnto che quella da distribuçión do metadón a segge 'na tèrsa posiçión e ho ascì sentîo che perfìn o metadón o pêu creâ - no sò se in manêa temporànea ò permanénte - dànni.
Ghe son quarche farmacòlogo de rilêvo, ascì a Zêna, che sostégnan che o metadón o no va distribuîo in quànto o l'é dannôzo. O l'é ascì vêo che i SERT son neuve strutûe che se azónzan e inte 'n moménto de crîxi ocupaçionâle qualùnque neuva strutûa a pêu avéi 'na seu significatividæ. Niâtri andémmo a toccâ 'n problêma estremaménte complicòu donde i interèssi son rilevantìscimi e difûzi. Mì m'auguro che no sólo a çittæ de Zêna, a çittæ de Torino ò quella de Stoccolma ma tùtti i paêixi consumatoî séggian capâci de piggiâ 'na posiçión unitâia definitîva. A sto pónto créddo che ûnn-a de-e dôe soluçioìn a poriæ avéi l'èxito de sconfìgge definitivaménte o mercòu da dròga, perché questo o l'é o vêo problêma.
Vorriéiva fâ ancón 'na nòta in sciâ questión do proibiçionìsmo, perché se un o foîse dabón rigorozaménte proibiçionìsta - e chì no me pâ d'avéi sentîo posiçioìn in sto senso - o doviæ ascì reclamâ a responsabilitæ penâle do consumatô, dòppodiché a pénn-a a pêu èse 'na contravençión e dónca co-e depenalizaçioìn 'n'amménda pecuniâia. Dónca émmo effettivaménte posiçioìn estremaménte diversificæ, ciascùnn-a de-e quæ a tòcca inta seu pàrte 'n pónto de tutéla de pàrti débole da soçietæ e créddo che comùnque séggian no risolvénti. Pertànto m'asteniò in sce-e moçioìn, lasciàndo piggiâ a chi o l'à ciù seguésse de mì de-e posiçioìn inte sto Conseggio Comunâle"."
Franco Bampi
Torna a l'ìndice
Intervénto de Lucia Deleo (P.D.R.C.)
  "Sémmo de neuvo, a distànsa de çirca doî anni, a discûte in sce temàtiche legæ a-a tossicodipendénsa co-a prezentaçión de moçioìn. Pe fortùnn-a o clìma o s'é carmòu perché coscì comm'o l'éa partîo o no l'éa poscìbile discûte serenaménte. Ebbén, çirca 'n mêze fa, dòppo 'n lóngo scilénçio in sciô argoménto, improvvizaménte o Sìndaco o l'é ritornòu a parlâne. Quello giórno nisciùn de niâtri conseggê o piggiò a paròlla e questo çertaménte no perché nisciùn de niâtri o l'avéiva ninte da dî ò perché de questo no se vêugge parlâ, in efètti comme Grùppo émmo sénpre affrontòu e continoiêmo a fâlo e mille questioìn soçiâli che se prezéntan into quotidiàn, questioìn che pòrtan in generâle pöchi vöti, tànt'é vêo che i figgeu no vòtan e spésso manco quelli che vîvan in situaçioìn de dizàxo. Ma, ahimè, o-o regòrdo sénpre, a vìtta da maggiô pàrte de-e persónne a l'é costituîa essençialménte da sti atti e da sti problêmi.
Ascì ancheu, ùrtimo giórno de sedûta conseggiâle primma de Denâ, affrontémmo 'na questión comme s'é vìsto no fàcile, 'na questión spinôza, che, però, comme giustaménte ôsèrvan i colléghi Popolari, a no pêu èse confinâ sólo inte 'n'òttica sanitâia. Ma o l'é ascì vêo ch'o bezéugna domandâse òua, primma ch'o segge tròppo tàrdi, se e polìtiche fìnn-a a ancheu seguîe inte l'affrontâ sta questión àggian sortîo efètti positîvi.
'N dæto che ho consultòu inte sti giórni (sta-mattìn gh'é stæto 'n seminâio in sciô dizàxo zovenîle) o me fâva riflètte: prêsso i minoî o 60% de condànne o l'é inerénte pròpio a reâti pe dròga, mentre tùtti i âtri reâti, in génere, no dan lêugo a procêde. Purtròppo, pe motîvi de travàggio, sta-mattìn no ho posciûo èse prezénte a sto seminâio e dónca no ho posciûo capî se in sce sta cösa se s'é sofermæ.
Dónca quello ch'andémmo a indagâ sta-seia o l'aviæ posciûo probabilménte èse za discùsso quàndo o-o propôze a primma vòtta l'allóa conseggié Pezzuto. Òua, no saiêmo çèrto niâtri a piggiâ e seu diféize, in quànto mòlto ne divideîva e ancón ne divîde da-a seu concheçión da polìtica, da vìtta, do travàggio e da dimensción soçiâle, ma créddo che, se se foîssan accettæ allóa e seu propòste, che in fóndo richiedéivan 'n approfondiménto colettîvo ch'o andésse otre a-o nòstro Comûne pe verificâ a poscibilitæ de tentâ strâde diverse da quelle esclusivaménte repressîve, inte sto moménto aviéscimo za conpîo pàssi avànti armeno inta direçión de l'indàgine e aviéscimo comensòu a pónne e bâze pe programmâ neuve modalitæ d'intervénto co-a çittæ, vâle a dî con chi da mòlto ténpo o s'òccupa de tossicodipendénse sa inte l'associaçionìsmo e into privòu soçiâle, sa into servìçio pùbrico, sa con tùtti quelli che subìscian dirèttamente ò indirèttamente o problêma, vâle a dî con quella soçietæ civîle da-a quæ spésso ce inpémmo a bócca ma che, invéce, a stâ velocemente scivolàndo inta barbarîe e inta guæra intestìnn-a.
Pe educaçión no son 'na nonviolénta, né tra quelli che no adêuviéivan mâi l'ârma da represción, ascì se no me piâxe, ma a l'é a raxón a fâme dî che fìnn-a a òua a represción into cànpo de-e tossicodipendénse a l'à sólo aggravòu o problêma e fórse a l'à rézo ciù affascinànte l'adêuvio de quarche mètodo d'alteraçión de-e coscénse, in particolâre a-i éugi de-e persónne zoêne.
Ho volutaménte adêuviòu o tèrmine de mètodo pe alterâ a coscénsa perché de questo se tràtta. E conseguénse fìxiche di diversi mètodi e e seu diferénse son stæte ampiaménte sottolineæ ascì da-i âtri grùppi e pénso che séggian oramâi nòte a tùtti. Niâtri émmo, invéce, doî órdini de problêmi da affrontâ. Un, ch'o l'é quello in sce cui se s'é maggiorménte sofermæ, o l'é modificâ a situaçión atuâle evitàndo ch'a degenère, dónca adottâ polìtiche de riduçión do dànno che, però, no significan sanitarizâ o problêma ma métte in cànpo ipòtexi complèsse d'intervénto in sce settoî diversi, conpréizo quello sanitârio e quello legislatîvo, pe chi òua o vîve immèrso into problêma, sénsa con questo rinunçiâ a-a poscibilitæ de recùpero. O conseggié Basso o regordâva a têxi n. 78 de l'Ulivo. Mì regòrdo che l'art. 3 da Costituçión o pârla de rimoçión de-e câuze do dizàxo e dónca o va ben a-o de là.
L'âtro pónto, però, o l'é quello d'evitâ ovviaménte che a situaçión atuâle a s'ingigantìsce ulteriorménte into futûro e pertànto quello d'attuâ vêe polìtiche preventîve. Ma l'ûnn-a e l'âtra questión se intersêcan tra de lô. Fìntànto che a nòstra soçietæ a continoiâ a richiêde a ògni individuo de respónde a determinæ cliché, pénn-a a seu méssa a-o bàndo, i mètodi d'alteraçión de-e coscénse, se ciàmman àlcol, tabàcco e càffè, pe çitâ quelli riconosciûi inta nòstra cultûa, ò cannabis e derivæ oppûre oppiàcei, oppûre ciù sùbdolaménte psicofarmaci che a publiçitæ televixîva e perfìn radiofònica a ne stìmola a adêuviâ pe dâ o mêgio de niâtri, saiàn sénpre ricercæ.
Ma o problêma o no l'é sólo èse cosciénti che se stâ utilizàndo 'n alteratô da coscénsa, ch'o saiæ za 'n pàsso avànti perché quello succescîvo o l'é domandâse o perché e quello colettîvo o l'é védde insémme che fâ pe evitâ a poîa d'ammiâ in fàccia a realtæ rendéndola mêgio. Sémmo che intervénti in sta direçión ghe ne saiéivan da fâ a iòza. O Sìndaco o çitâva pe-a nòstra çittæ, ch'a gôde, comme regordâvan tùtti, de 'n ben trìsto primâto, a necessitæ de comensâ a rezòlve o problêma ocupaçionâle, ma azonziéiva ascì quello aggregatîvo vâle a dî a carénsa de spàçi soçiâli, a incapaçitæ de trovâ percórsi comùni, de progettâ assémme, d'imaginâ a soçietæ soçiâle e, dòppo anni de continovo depauperaménto ascì culturâle de quartê ch'éran za pòvii, l'inconscisténsa a-i éugi de 'na çittæ sénpre ciù vêgia de-e exigénse di pöchi zoêni restæ, a seu imposcibilitæ d'existî, a dificoltæ ch'a incóntra a formaçión de 'na çittæ di figgeu, nonostànte a nòstra adexón a-a càrta de-e çittæ educatîve.
Purtròppo da sto pàsso colettîvo sémmo distànti, perché, invéce, inte sti anni i sólchi, e divixoìn e e guære tra pòvii son aumentæ, ma o problêma o l'é ascì quello ch'o bezéugna fâ i cónti con 'n mercòu ch'o l'à in sciô proibiçionìsmo costruîo 'n impêro e che da l'attuaçión de polìtiche no repressîve o ricaviæ sólo 'n dànno. Sò che mòlte comunitæ terapèutiche - ma comùnque ascì i grùppi conseggiâli an dimostròu in Conseggio che ghe son gròsse diferénse - an préizo posiçión contra a legalizaçión de-e dròghe leggie e l'adêuvio terapèutico d'oppiàcei.
Inta moçión di Popolari ma ascì in quella da Lista Pannella se propónan ipòtexi de percórso che no pòrtan immediataménte a assùmme provvediménti che divéntan sùbito operatîvi, ancheu comme doî anni fa. Condividémmo e propòste avansæ da-a Lista Pannella, coscì comme condivîzo a seu ténpo, l'ùnica vòtta che me trovâi d'accòrdo co-o conseggié Pezzuto, a moçión da lê prezentâ, ascì se condivîddo a necessitæ de no banalizâ, né senplificâ aprioristicaménte o problêma comme propónan i Popolari. Pûre créddo che, açòcché i messàggi in riferiménto a-e dròghe leggie no séggian - comme o ne regordâva o conseggié Basso - 'n incentîvo a-a "cultûa do sbàllo" tra i zoêni, o bezéugne primma de tùtto ciairî che i mètodi endògeni pe alterâ e coscénse son mòlti, che son mòlti quelli che tùtti niâtri quotidianaménte adêuviémmo e che maturitæ a significa ascì savéi e podéi scêgge se vogémmo alterâ a coscénsa, comme e perché.
Diversaménte ingigantî e conseguénse indótte da 'n mètodo ciuttòsto de 'n âtro - perché, pe exénpio, l'àlcol o l'é inta nòstra cultûa e a cannabis nò - o poriæ ascì indûe 'na persónn-a zoêne a attribuî a quella sostànsa rêui e proprietæ che in realtæ a no posséde. A dipendénsa psicològica da persónne ò sostànse no necessariaménte nocîve a se sviluppa facilménte soviatùtto in persónne zoêne e inte 'na çittæ comme a nòstra ch'a no ghe offre mòlte poscibilitæ de sperimentâ e de provâ a costruî o futûro.
Fórse, ancheu, o Conseggio Comunâle o se trêuva in condiçioìn diverse da doî anni fa. A 'n anno da-e eleçioìn, però, approvâ a moçión Quaglia o no procuriæ e o no procuriâ probabilménte gràndi problêmi a sta maggiorànsa. No sò se de chì a meno de 'n anno saiêmo riuscîi armeno a comensâ o percórso. Rèsta l'amaréssa de piggiâ posiçión sólo a-a fìn do çìclo amministratîvo, mentre a l'é passâ sénsa cólpo ferî a destrutturaçión de servìçi ch'éran za operànti inte sto cànpo. Me referìscio, pe quànto riguârda o Comûne a-l'U.T.T., ch'o l'é restòu comme progettaçión ma sénsa ciù i mæximi pùnti de riferiménto ufiçiâli. Me referìscio a-o fæto d'avéi accettòu sénsa fâ mòlta resisténsa che i SERT foîssan ridûti a çìnque ciuttòsto che a nêuve comme éran in orìgine i servìçi de salûte mentâle insémme a-i SERT.
Giustaménte, ancheu, o P.D.S. o denóncia a situaçión in cui se trêuvan i SERT e niâtri condividémmo sta denóncia. E ànzi se s'é utilizòu a protèsta anti-SERT, coscì comme a protèsta anti-nòmadi, comme scûza pe no parlâne ciù, con 'na çittæ devegnûa intolerànte perché a riduçión de-e risórse e de l'attençión a s'é concentrâ là donde risórse e attençión éran za scàrse. Gridâ pöi a-a prevaricaçión do servìçio pùbrico in sciô privòu soçiâle e tèrso settô o divénta stêrile, se se pénsa che o rêuo de coordinaménto pe 'na programmaçión comûne, che m'auguro comme se augùran i Popolari, o doviæ èse svòlto pròpio da quelli servìçi a-i quæ no son stæti modificæ i connotâti ma che son addiritûa scompàrsi con sénplice atto dirigençiâle. Questo o no significa che tâli atti séggian illegìttimi, ma, vìsto che perfìn l'A.M.G.A. e a Società Autostrade se scûzan co-i çitadìn e i avîzan de 'n poscìbile pezoraménto do servìçio pe travàggi in córso, ascì l'Amministraçión Comunâle a l'aviæ dovûo armeno fâ o mæximo.
Se attivâ o percórso de distrettualizaçión di servìçi soçiâli, che preferiéiva sòcio-sanitâri, no sólo o l'é dovûo pe léze ma o l'é ascì auspicàbile, o saiæ stæto necessâio 'n reâle coinvolgiménto da çittæ a partî da-e assemblêe elettîve e 'n'attençión diversa a-o govèrno da fâze de transiçión. Invéce o coinvolgiménto do Conseggio Comunâle, richièsto da 'n órdine do giórno into zenâ de st'anno, o l'é stæto mòlto sofèrto. Regòrdo che e commiscioìn conseggiâli d'audiçión se son svòlte tra fìn màzzo e inìçio zùgno, con modalitæ ch'an inpedîo che a çittæ a poésse domandâne cöse stâva sucedéndo e a poésse incìde in sciô procèsso.
Se a questo azonzémmo che o Comûne o distrettualìzza tipologîe d'intervénto che a U.S.L. a no l'é intençionâ a distrettualizâ comme, apónto, o SERT, o quàdro o divénta ancón ciù complèsso e schizofrènico. Mì mæxima, a-l'inìçio de st'anno, augurâva a-l'Assessô Rossetti e m'augurâva 'na capaçitæ de gestión e organizaçión da pàrte de l'Amministraçión Comunâle pròpio inta fâze de transiçión. Ebbén, no me pâ de podéi dî che questo o segge avegnûo, né che a çittæ a ne segge stæta adeguataménte informâ; fórse sémmo ancón in ténpo pe l'ûnn-a e l'âtra cösa, ma e rispòste che ricêvo costanteménte da-i ufìçi de l'assessoròu me cónfèrman che a distrettualizaçión di servìçi soçiâli a procêde, indipendenteménte da-a programmaçión de-e assemblêe elettîve e do seu rêuo d'indirìsso e de contròllo. Ma, mentre sta çittæ a se stùa ògni giórno ch'o pàssa, m'ostìno a créde che a sperànsa a segge l'ùrtima a moî"."
Lucia Deleo |
Introduçión a-o argoménto do Prezidénte do Conseggio Chiara Formentini (L.N.I.P.) 
Ill.mo Sìndaco
Aviéscimo vosciûo che o Sìndaco o foîse prezénte a sta discusción coscì importànte pe-a çittæ, consideròu che Zêna a l'à o problêma ciù grâve, in Italia, in sce sto argoménto, tuttavîa pròpio pe-a gravitæ do problêma sémmo costréiti a insìste in sciô fæto ch'o vegne discùsso adesso, vìsto che d'âtronde in tùtta Italia, inte sto moménto, stàn vegnéndo discùsse ste temàtiche da anàloghi comûni.
