


 |
ME, PAPERINO, PURTUÊL
Caro Maurizio Costanzo Show,a so Paperino. U n' è un sorannom. A so pröpi Paperino e' zì ad Qui, Quo, Qua, e' nvód ad Paperone. Tot i scriv a e' Maurizio Costanzo Show e a j ò dònca decis ad fêl ènca me.
A n' so ben parchè a e' fëz. Mo i sa parchè i e' fa tot j'êtar ch'i t'afòga ad lètar? Niseun e' sa dabón gnint ad me. La zénta la lèz i fumet e dònca par quest la s' sent in dirèt ad crèdar ad savé tot ad Paperino. Nossignori. Dri a al quinti, fôra dal pàgin fèrmi duv ch'a esést pr'e' pur divertiment ad grând e znin, a j ò una vita sacrêda, ch'la n' è quela ad Paperinik. L'è una vita ad mérda. Fôrsi l'è par quest ch'a j ò decis ad scrìvat, caro Maurizio Costanzo Show.
Mo fôrsi qualcvël u s' intuès ènca lèzend i fumet ch'i è e' mi mstîr. La mi sfiga da pruvèrbi, al pen che zio Paperone u m' dà tot i dè, al umiliaziòn patidi pr'òpra di mi nvudén dispetôs e saputél. E pu cla stronza ad Paperina ch'la n' me la dà e ch'la s' fa invezi muntê - a n' so sicur - da cl'imbezèl tronf e imbrilantinê ad Gastone!
L'è Paperopoli ch'la porta sfiga. Tot i quatrén ch'u i è i s' i è cuchê e' mi zì e Rockerduck. Caro Maurizio Costanzo Show, t'à da invitêm par fôrza int la tu trasmisiòn. Incù l'è pusébil, t sé? Ènca s'a so un fumet o un cartòn animê. Se Roger Rabbit e' pò interagì cun j'èsar umân, alóra a pos ènca me. T farè un figurón, a invitêm.
Vujêtar a n' avì mai vest Paperina nuda. Me sè. Dal bus dla seradura. L'era l'ùnic sistema. Ènca Qui, Quo e Qua i l'à vesta. Ènca Pippo, par sbali (cujòn cumè ch'l'è, in realtê l'era drì a zarchê ad vèdar lò stes nud). Ènca Archimede Pitagorico, cun una dal su danêdi invenziòn par guardê traméz a i mur. Caz, i l'à vesta nuda tot fôra che vujêtar, ch'a l'avì vesta sól int i fumet, a fê la pêrt dla vergnèla vanitusèta. Bè, a n' avì pers gnint. Paperina nuda l'è pez ad Jessica Rabbit vstida. E quest l'è l'ultràz definitìv! A pos amètar che una strafiga cumè Jessica Rabbit la n' me la dàga, mo Paperina... caz, tra l'êtar nuda la è praticament idèntica a me stes. S'a i cavì i vstì u n' è ch'u j vânza di grând difarenz. U i è cl caz ad fiöc ròs ch'la à tachê in tësta dè e nòt ch'u s' distingv. Me, e' mi asurd birèt da marinêr ogni tânt a m' e' cav, nench s'acsè a mett a nud la plêda. Lia, e' su fiöc ròs... mai! E pu la fa agl'öv. Crést, la n' fa almânch ón a e' dè. A l'avem vesta tot dal bus dla seradura. A avrèsum duvù imaginêl, pàpar cumè ch'a sem, che cla lè la fa un öv dop cl'êtar. L'è una scena schifôsa. A vrèb savé pu duv ch'la j imbosca. Second me i va a finì tot da Nonna Papera ch'la i fa sparì int al su turt che pu nò a s' magnem. Che schêiv. Bröti stôri ad canibalésum.
Caz, a so pröpi sfighê. Scusum s'a degh sèmpar "caz", mo int i fumet a n' e' pos fê e a dëv sfughêm. E pu l'è d'möda. Caz, dì caz u n' vô dì un caz mo tot i n' fa êtar che dìl, e s'i e' fa in televisiòn i pasa ancora par persôn cun al bal.
A t prumét che s't m'invét a n' parlarò mêl int la tu trasmisiòn. Opùr a e' farò, se però t sarè te a dmandêmal. S't'à vergogna a dìmal fam di gest. A capés d'corsa, me, fôra dai fumet. Pr'e' piò al cös acsè sèmplizi.
Scusum s'a parl acsè, in môd difarent da dêntar i fumet duv ch'a lavor. La zénta la s'aspèta sèmpar al stesi cös da me, in ogni cuntèst. Niseun u s' interesa a la persôna o a e' pàpar che me a sent d'ësar. Tot i vô sèmpar vèdum int e' persunàz ch'i à imparê ch'a so me. Caz, a fôrza ad vlém tot vèdar sfighê, a finés par ësal dabón ènca int la vita privêda. Rock Hudson l'era un persunàz virìl, mo in realtê l'era buliccio. (Int e' dialèt ad Paperopoli buliccio u vô dì busòn). Me a so un persunàz sfighê, mo in realtê a e' so ancora ad piò.
Caz, l'à da ësar vèra che chiunque l'è pröpi quel che tot i pensa e i vô ch'e' sia lò o lia. Int la mi vita privêda al cös al m' va ancora pez che int i fumet. A j ò sèmpar una masa ad malatì, cun di mièra ad sìntum tot difarent, intânt che int i fumet quând ch'a stëgh mêl a j ò sól un termòmetar in bóca. Par esempi a j ò e' catàr. Mo nö sól int i brònch. Ènca int j'òc e sota al lésni. Tot a avì vest, int i fumet, che me a n' j ò dent. Bè, l'è pröpi acsè. Mo int i fumet a m' magn di supersandwich ch'i n' finés mai... mo l'è tota finziòn. In realtê, senza dent a n' pos mastighê, e int la vita vera a m' nutres ad brudén.
Perdunum s'la mi lètra la pê un pô cunfusa. A so un pô imbariêg. Cs'a v'aspitìv da un marinêr? Avì nutê che int i fumet a camin sèmpar a pì nud? Bè, ènca int la vita vera. Mo int i fumet la strê la n' è pina ad cich e ad strónz ad cân cumè int la realtê duv che me ogni mument a i pést.
A cunfès ch'a m' masturb. A so dispost a dìl ènca in trasmisiòn, s'e' pò servì a fê crès l'audience. A j ò pruvê ènca a fêm dal cân, sia int la realtê che int i fumet. Naturalment a lavurêva in nìgar, par un zért Andrea Pazienza ch'u n' era un fumet imurtêl e difati l'è pu mört. Pu a j ò smes. Cs'e' serv fês dal cân quând che la realtê l'è za da par sé dl'tot fôra ad tësta? E' basta arvì j'òc e guardê. E vujêtar a savì che i mi òc i è bël grând. I m' i disegna grând e i è grând ènca in realtê. Quel ch'a n' vdì int i fumet i è tot cal caz ad muschìn ch'i m' i va a finì dêntar ogni zencv minut.
A savì, a j ò qualch idea sóra la sfiga ch'la m' perseguita int e' câmp sentimentêl: Cum caz ch'a fëz a basê qualcadona cun e' bèc ch'a m' ritróv? Se pu la persôna ch'a vój basê l'à e' bèc ènca lia (o ènca lò), la facènda la s' fa terébil incasinêda. Cum ch'i fa a basês cun dignitê e cun la luşuria regulamentêra un pàpar e una pàpra cun e' bèc fat cumè e' mi? Pinsì ben a e' mi bèc. A l'avì vest mièra ad vôlt int i mi fumet. Vest ad prufil, cumè che me a m' guêrd spes int e' spèc, l'è senza dubi un sémbul fàlic (Pico de Paperis e' sarèb d'acòrd cun me). E' mi bèc l'è fat par penetrê, a n' so sicur. N' pinsì ch'a sia un maniac sesuêl. L'è un ragiunament ad tip geomètric. E' mi bèc l'è un sòlid afusulê cun l'aerodinamicitê tìpica d'un strumént ch'e' penetra. N' rìdì ad me s'a n' arìv a sprìmum cun la precisiòn ch'la s' dvrèb. A so sól un marinêr sfighê. Mo cun un bèc ch'e' penetra. A n' arivarì a cunvìnzum de' cuntrêri. Bè, caz, ènca Paperina la l'à. Cum caz a farèb a basêla, nench s'la m' e' lasès fê?
Caro Maurizio Costanzo Show, a n' vój delùdar niseun di fans de' persunàz ch'a fëz sóra e' piò znin schérum de' giurnalén ad fumet ch'l'invadés agli edìcul. Mo ormai a so grând da un casén ad temp e a rivendich e' dirèt ad vnì ènca me una vôlta da te par fê savé ènca me a tot i caz mi. E' mi bab Disney l'è mört un sach ad temp fa. U m'à lasê in eredità un cuntrat a vita cun l'azienda ch'la porta e' su nom. A l'ò int e' cul. Scusum s'a parl acsè, mo fichìv ben in tësta ch'a so un marinêr, un marinêr sfighê, e ènca frustrê int e' su rôl ad marinêr parchè a n' j ò mai truvê un imbarch ch'e' fos ón. E' pôrt ad Paperopoli l'è in man a i cumunesta, ch'i l'à fat falì. Disney l'era un sàdic. A me tot al disgrazi, a zio Paperone tot i quatrén, e a i cumunesta e' pôrt ad Paperopoli. Disney l'era un sàdic.
A j ò trì nvudén ch'i m' romp sèmpar i cujòn cun e' manuêl dal giovani marmotte. A j ò tot i svantàz d'avé trì fiùl senza gnânca avé avù e' vantaz d'avém fat una ciavêda ch'la fos óna. Disney l'era un sàdic.
A j ò una machina ad mérda monopòst a metê, che par purtêm in zir la nvudanàja a j ò da mètar int e' bagaliêr. Niseun di sceneggiadur di mi fumet u v'à mai dët la mêrca. Bè, a i crèd, i s' vargugnéva. L'era e' prototipo scartê dla Trabant, la machina-scatlèta-d'anciôv ch'i bóta vì adës ènca int l'ex Germania de' Est.
Bè, insòma, Maurizio Costanzo Show, invitum un pô da te ch'a t n' cont dò sóra zio Paperone. T crid ch'u s' sia tnù fôra da Tangentopoli? Caz, tra lò e Rockerduck...
U m'è scadù la ricreaziòn. A n' t pos piò scrìvar. Quând ch'a lavor a n' pos piò tirê fôra parôl ch'al n' sia dêntar la nuvlèta aparénta ad qualch fumet.
Cribbio, a n' so piò gnânca sicur d'ësar dabón Paperino. Ènca travstì acsè a sent sèmpar una gran spózza ad Roberto Quaglia.
Roberto Quaglia
L'òpera "Caro Maurizio Costanzo Show...", tota intìra o in pêrt, la pò ësar lèta, scarghêda int e' computer, stampêda e cupiêda sènza lèmit, sôl par ûs persunêl. Tot i tèst e al ilustraziôn i è pruprietà ad Roberto Quaglia e i n' pò ësar druvê tot intìr o in pêrt sènza autorizaziôn. E' prugèt gràfic e i cumpunént gràfic ad sti pàgin i è pruprietà riservêda ad Roberto Quaglia. L'òpera "Caro Maurizio Costanzo Show...", tota intìra o in pêrt, la n' pò ësar mesa in vèndita a niseun tìtul sènza autorizaziôn prèma.
© 1994-2000 Roberto Quaglia.
|