so Paperino. No est unu sobrannòmine. So pròpiu Paperino su tziu de Qui, Quo, Qua, su nebode de Paperone. Totus iscrient a su Maurizio Costanzo Show e apo gasi detzìdidu de lu fàghere fintzas deo.
No isco bene proite lu fatzo. Ma ischint proite lu faghent totu sos àteros chi ti summèrgent de lìteras? Nemos ischit realmente nudda de mie. Sa gente leget sos fumetos e gasi pro custu si sentit autorizada a crèdere de ischire totu de Paperino. Nossegnores. A segus de sas cuintas, fora de sas istàticas pàginas in ue esisto pro su puru diletu de mannos e minoreddos, tèngio una vida segreta, chi no est cussa de Paperinik. Est una vida de merda. Forsis est pro custu chi apo detzìdidu de ti iscrìere, caro Maurizio Costanzo Show.
Ma forsis carchi cosa s'intuit fintzas leghende sos fumetos chi sunt su mestieri meu. Sa proverbiale mala sorte mia, sas angùstias chi su tziu Paperone onni die m'infligit, sas umiliatziones pàdidas pro òpera de sos dispetosos e sabidos nebodigheddos mios. E poi cussa istrontza de Paperina chi no mi la dat e chi imbetzes si faghet muntare - nde so seguru - dae cussu tronfiu imbetzìlle imbrillantinadu de Gastone!
Est Paperopoli chi batit mala sorte. Totu su dinari chi b'at si l'ant cucadu su tziu meu e Rockerduck. Caro Maurizio Costanzo Show, m'as de assolutamente invitare in sa trasmissione tua. Oe est possìbile, l'ischis? Fintzas si so unu fumetu o unu cartone animadu. Si Roger Rabbit podet interagire cun sos èsseres umanos, tando potzo fintzas deo. As a fàghere unu figurone, a mi invitare.
Bois no ais mai bidu a Paperina nuda. Deo eja. Dae su stampu de sa serradura. Fiat s'ùnicu sistema. Fintzas Qui, Quo e Qua l'ant bida. Fintzas Pippo, pro isbàgliu (cuglione comente est fiat in realidade chirchende de bìdere a sese matessi nudu). Fintzas Archimede Pitagorico, cun una de sas dannadas imbentziones suas pro abbaidare a traessu de sas paretes. Cazzu, l'ant bida nuda totus francu bois, chi l'ais bida isceti in sos fumetos, interpretare su rolu de virgineddha vanitoseddha. Ebbè, no ais pèrdidu nudda. Paperina nuda est peus de Jessica Rabbit bestida. E custu est s'ultràgiu definitivu! Potzo ammìtere chi una strafica comente Jessica Rabbit no mi la dat, ma Paperina... cazzu, tra s'àteru nuda est praticamente idèntica a mie etotu. Si bi bogas sos bestidos no est chi avàntzant mannas diferèntzias. B'at cussu cazzu de fiocu ruju chi issa at appicadu in conca die e note chi nos distinghet. Deo su assurdu birreteddu de marineri meu onni tantu mi lu bogo, fintzas si gasi ponzo a nudu sas carvìtzias. Issa, su fiocu ruju suo... mai! E poi faghet sos ous. Cristu, nde faghet a su nessi unu a sa die. L'amus totus bida dae su stampu de sa serradura. Diamus àere dèpidu nos lu immaginare, pàperos comente semus, chi cussa inie faghet un'ou a pustis de s'àteru. Est una iscena schifosa. Dia chèrrere ischire poi in ue si los imbòscat. Segundu me acabant totus a Nonna Papera chi los faghet ispàrrere in sas tortas suas chi poi nois nos las mandigamus. Ite schifu. Brutas istòrias de cannibalismu.
Cazzu, so pròpiu isfortunadu. Iscùsami si naro semper "cazzu", ma in sos fumetos no lu potzo fàghere e depo mi disfogare. E poi est de moda. Cazzu, nàrrere cazzu no cheret nàrrere unu cazzu ma totus no faghent àteru che lu nàrrere, e si lu faghent in televisione colant galu pro persones cun sos ballos.
Ti promito chi si mi invitas no apo a faeddare male in sa trasmissione tua. Opuru lu apo a fàghere, si as a èssere però tue a mi lu pedire. Si ti birgòngias a mi lu nàrrere fàghemi sos gestos. Cumprendo a lestru, deo, fora de sos fumetos. Suba de totu sas cosas gasi sìmplitzes.
Iscùsami si faeddo gasi, in modu diversu che in sos fumetos in ue traballo. Sa gente s'aspetat semper sas matessi cosas dae mie, in onni cuntestu. Nemos si interessat a sa persone o a su pàparu chi deo sento de èssere. Totus cherent semper mi bìdere in su personàgiu chi ant imparadu chi deo so. Cazzu, a fùria de mi chèrrere totus bìdere isfortunadu, acabo pro l'èssere a beru fintzas in sa vida privada. Rock Hudson fiat unu personàgiu virile, ma in realidade fiat buliccio. (In su dialetu de Paperopoli buliccio cheret nàrrere ricchione). Deo so unu personàgiu isfortunadu, ma in realidade lu so galu de prus.
Cazzu, depet èssere beru chi chie si siat est pròpiu su chi totus pensant e cherent chi issu o issa siat. In sa vida privada mia sas cosas mi andant galu peus che in sos fumetos. Tèngio semper medas maladias, cun migiaras de sìntomos totu diversos, mentras in sos fumetos cando isto male tèngio simplemente unu termòmetru in buca. Pro esempru tèngio su catarru. Ma no isceti in sos bronchios. Fintzas in sos ogros e suta sas àscias. Totus ais bidu, in sos fumetos, chi deo no tèngio dentes. Ebbè, est pròpiu gasi. Ma in sos fumetos mi mandigo sos supersandwich chi no acabant prus... ma est tota fintzione. In realidade, sena dentes no potzo masticare, e in sa vida reale mi alimento de brodigheddos.
Perdòname si sa lìtera mia paret unu pagu cunfusa. So leggermente imbriagu. Ite bos aspetàbedis dae unu marineri? Ais notadu chi in sos fumetos camino semper iscurtzu? Ebbè, fintzas in sa vida reale. Ma in sos fumetos sa carrela no est costellada de cicas e istrontzos de cane comente in sa realidade in ue deo onni momentu los carco.
Cunfesso chi mi masturbo. So dispostu a lu nàrrere fintzas in trasmissione, si podet serbire a aumentare s'audience. Apo proadu fintzas a mi fàghere sos ispinellos, siat in sa realidade siat in sos fumetos. Naturalmente fia traballende in nieddu, pro unu tzertu Andrea Pazienza chi no fiat unu fumetu immortale e difatis est poi mortu. Poi apo acabbadu. Ite servit si fàghere sos ispinellos cando sa realidade est giai de pro sese completamente fora de conca? Bastat abèrrere sos ogros e abbaidare. E bois ischides chi sos ogros mios sunt bene mannos. Mi los disignant mannos e lu sunt fintzas in realidade. Su chi no bidides in sos fumetos sunt totu cussos cazzu de muscas chi mi bi acabant intro onni chimbe minutos.
Ischides, tèngio carchi idea subra sa mala sorte chi mi persighit in campu sentimentale: Comente cazzu fatzo a basare a calicuna cun su bicu chi mi agato? Si poi sa persone chi chèrgio basare tenet su bicu fintzas issa (o fintzas issu), sa chistione si faghet terribilmente incasinada. Comente faghent a si basare dignitosamente e cun sa regolamentare lussùria unu pàparu e una pàpera cun su bicu fatu comente su meu? Pensade bene a su bicu meu. L'ais bidu migiaras de bortas in sos fumetos mios. Bidu de profilu, comente deo mi abbàido ispissu a s'ispigru, est sena duda unu sìmbulu fàllicu (Pico de Paperis diat èssere de acordu cun megus). Su bicu meu est fatu pro penetrare, nde so seguru. No pensedas chi siat unu manìacu sessuale. Est unu rasonamentu de tipu geomètricu. Su bicu meu est unu sòlidu afusoladu cun sa tìpica aerodinamicidade de unu strumentu penetrante. No ridedas de mie si no resesso a m'esprìmere cun sa dèpida pretzisione. So isceti unu marineri isfortunadu. Ma cun unu bicu penetrante. No ais a resessire a mi cumbìnchere de su contràriu. Ebbè, cazzu, fintzas Paperina bi l'at. Comente cazzu dia fàghere a la basare, fintzas si issa mi lu lassaret fàghere?
Caro Maurizio Costanzo Show, no chèrgio delùdere a nemos de sos fans de su personàgiu chi interpreto subra su piticìssimu ischermu de su giornaleddu de fumetos chi inflatzionat sas edìcolas. Ma ormai so mannu dae unu casinu de tempus e revìndico su deretu de bènnere fintzas deo una borta a tie pro fàghere ischire fintzas deo a totus sos cazzos mios. Babbu meu Disney est mortu unu sacu de tempus a como. M'at lassadu in eredidade unu cuntratu a vida cun s'aziendha chi portat su nòmine suo. Bi l'apo in su culu. Iscùsami si faeddo gasi, ma ficàdebos bene in conca chi so unu marineri, unu marineri isfortunadu, e fintzas frustradu in su rolu suo de marineri proite no apo mai agatadu un'imbarcu chi esseret unu. Su portu de Paperopoli est in manu a sos comunistas, chi l'ant fatu falliri. Disney fiat unu sàdicu. A mie totu sas disgràtzias, a su tziu Paperone totu sos dinaris, e a sos comunistas su portu de Paperopoli. Disney fiat unu sàdicu.
Tèngio tres nebodigheddos chi mi segant semper sos cugliones cun su manuale de sas giovani marmotte. Tèngio totu sos isvantàgios de àere tres fìgios sena mancu àere tentu su vantàgiu de mi èssere fatu una futida chi esseret una. Disney fiat unu sàdicu.
Tèngio una màchina de merda monopostu a mesu, chi pro mi portare in giru su nebodàmine los depo pònnere in su bagàgliu. Peruna de sas isceneggiaduras de sos fumetos mios bos at mai naradu sa marca. Ebbè, bi creo, si birgongiaiant. Fiat su prototipu iscartadu de sa Trabant, s'auto-iscàtuledda-de-alitzas chi immoe betant fintzas in sa ex Germània de s'Est.
Ebbè, insomma, Maurizio Costanzo Show, invìtami unu pagu a tie chi ti nde conto duos subra su tziu Paperone. Creas chi si siat mantesu fora de Tangentopoli? Cazzu, tra issu e Rockerduck...
M'est iscàdida sa ricreatzione. No ti potzo prus iscrìere. Cando traballo no potzo prus emìtere paràulas chi no siant cuntènnidas in sa nueledda aparente de carchi fumetu.
Cribbiu, no so prus mancu seguru de èssere a beru Paperino. Fintzas trabestidu gasi sento semper unu mannu fragu de Roberto Quaglia.

Roberto Quaglia