sugnu Paperino. Nun è nu suprannomu. Sugnu propriu Paperino lu ziu di Qui, Quo, Qua, lu niputi di Paperone. Tutti scrìvinu ô Maurizio Costanzo Show e aju accussì dicisu di lu fari puru ju.
Nun sacciu beni pirchì lu fazzu. Ma sannu pirchì lu fànnu tutti li àutri ca ti summèrginu di lettiri? Nuddu sapi realmenti nenti di mia. La genti leggi li fumetti e accussì pi chistu si senti autorizzata a crèdiri di sapiri tuttu di Paperino. Nossignuri. Darreri ê quinti, fora dî stàtichi pàggini unni esistu pû puru dilettu di ranni e picciriddi, aju ’na vita sicreta, ca nun è chidda di Paperinik. È ’na vita di mmerda. Fòrsi è pi chistu ca aju dicisu di ti scriviri, caro Maurizio Costanzo Show.
Ma fòrsi quarchi cosa s’intuìsci puru liggennu li fumetti ca su’ lu miu misteri. La mia pruvirbiali scaddu, li angustii ca lu ziu Paperone tutti li jorna m’infliggi, li umiliazioni patuti pi òpira dî mei dispittusi e saccenti niputiddi. E po’ chidda strunza di Paperina ca nun mi la runa e ca ’mmeci si fa muntari - ni sugnu sicuru - di ddu tronfiu imbecilli ’mbrillantinatu di Gastone!
È Paperopoli ca porta scaddu. Tuttu lu denaru ca c’è si lu su’ cuccati lu ziu miu e Rockerduck. Caro Maurizio Costanzo Show, hai a assulutamenti a mi invitari ntâ tò trasmissioni. Oggi è possibbili, lu sai? Puru si sugnu nu fumettu o nu cartuni animatu. Si Roger Rabbit po’ interagiri cî essiri umani, allura pozzu puru ju. Farrai nu figuruni, a mi invitari.
Vuiautri nun avìti mai vistu a Paperina nuda. Ju sì. Dû purtusu dâ sirratura. Era l’únicu sistema. Puru Qui, Quo e Qua l’hannu vista. Puru Pippo, pi sbagghiu (cugghiuni comm’è stava ’n realtà circannu di vidiri a sé stissu nudu). Puru Archimede Pitagorico, cu una dî sò dannati ’mminzioni pi taliari attraversu li muri. Cazzu, l’hannu vista nuda tutti fora vuiautri, ca l’avìti vista sulu ntê fumetti, interpritari lu ruolu di virginedda vanitusedda. Embe’, nun avìti persu nenti. Paperina nuda è peggiu di Jessica Rabbit vistuta. E chistu è l’oltraggiu definitivu! Pozzu ammettiri ca ’na strafica comu Jessica Rabbit nun mi la runa, ma Paperina... cazzu, tra l’àutru nuda è pràticamenti idèntica a mia stissu. Si ci levi li vistiti nun è ca avànzanu granni diffirenzi. C’è ddu cazzu di ciocca russa ca idda ha appicciatu ’n testa jornu e notti ca ni distingui. Ju lu miu assurdu birrettu di marinaru ogni tantu mi lu levu, puru si accussì mettu ’nnudu li carvizzi. Idda, la sò ciocca russa... mai! Eppo’ fa li ova. Cristu, ni fa almenu una ô jornu. L’avemu tutti vista dû purtusu dâ sirratura. Avissimu avutu a ni lu immaginari, pàpiri comu semu, ca chidda ddà fa n’ovu doppu l’àutru. È ’na scena schifusa. Vurrìa sapiri po’ unni si l’imbosca. Secunnu mia finìscinu tutti di Nonna Papera ca li fa spariri ntê sò turti ca po’ nuiautri ni manciamu. Chi schifu. Brutti storii di cannibbalismu.
Cazzu, sugnu propriu scarugnatu. Scúsami si dicu sempri "cazzu", ma ntê fumetti nun lu pozzu fari e aju a mi sfucari. E po’ è di moda. Cazzu, diri cazzu nun voli diri nu cazzu ma tutti nun fànnu àutru ca lu diri, e si lu fànnu ’n tilivisioni pàssanu ancora pi pirsuni cî palli.
Ti prumettu ca si mi inviti nun parrirò mali ntâ tò trasmissioni. Oppuru lu farò, si sarrai però tu a mi lu chidiri. Si ti vrigogni a mi lu diri fammi gesti. Capisciu ’mpressa, ju, fora dî fumetti. Suprattuttu li cosi accussì sèmplici.
Scúsami si parru accussì, ’n modu diversu ca dintra ê fumetti unni travagghiu. La genti s’aspetta sempri li stissi cosi di mia, ’n ogni cuntestu. Nuddu s’interessa â pirsuna o ô pàpiru ca ju sentu di essiri. Tutti vògghinu sempri mi vidiri ntô pirsunaggiu ca hannu ’mparatu ca ju sugnu. Cazzu, a furia di mi vuliri tutti vidiri scarugnatu, finìsciu pi lu essiri daveru puru ntâ vita privata. Rock Hudson era nu pirsunaggiu virili, ma ’n realtà era buliccio. (Ntô dialettu di Paperopoli buliccio voli diri ricchiuni). Ju sugnu nu pirsunaggiu scarugnatu, ma ’n realtà lu sugnu ancora di cchiù.
Cazzu, havi a essiri veru ca cu’ sia è propriu chiddu ca tutti pènsanu e vògghinu ca iddu o idda sia. Ntâ mia vita privata li cosi mi vànnu ancora peggiu ca ntê fumetti. Aju sempri assai malatii, cu migghiara di sìtumi tutti diversi, mentri ntê fumetti quannu staju mali aju semplicimenti nu termòmitru ’mmucca. Pi esempiu aju lu catarru. Ma nun sulu ntê bronchi. Puru ntê occhi e sutta li scelli. Tutti avìti vistu, ntê fumetti, ca ju nun aju denti. Embe’, è propriu accussì. Ma ntê fumetti mi manciu supersandwich ca nun finìscinu cchiù... ma è tutta finzioni. ’N realtà, senza denti nun pozzu masticari, e ntâ vita reali mi alimentu di brudicieddi.
Perdúnami si la mia lettera pari nu pocu cunfusa. Sugnu liggermenti ’mbriacu. Chi v’aspittavavu di nu marinaru? Aviri nutatu ca ntê fumetti caminu sempri scausu? Embe’, puru ntâ vita reali. Ma ntê fumetti la strata nun è custillata di cicchi e strunzi di cani comu ntâ realtà unni ju ogni mumentu li carpistu.
Cunfessu ca mi masturbu. Sugnu dispostu a lu diri puru ’n trasmissioni, si po’ serviri a aumintari l’audience. Aju pruvatu puru a mi fari canni, sia ntâ realtà ca ntê fumetti. Naturalmenti stava travagghiannu ’n niru, pi nu certu Andrea Pazienza ca nun era nu fumettu immurtali e defatti è po’ mortu. Po’ aju finutu. Chi servi si fari canni quannu la realtà è già di pi sé cumplitamenti fora di testa? Abbasta rapiri li occhi e taliari. E vuiautri sapiti ca li mei occhi su’ ben granni. Mi li disègnanu granni e lu su’ puru ’n realtà. Chiddu ca nun vidìti ntê fumetti su’ tutti ddi cazzu di muscidduzzi ca mi ci finìscinu dintra ogni cincu minuti.
Sapiti, aju quarchi idea supra la scaddu ca mi pirsèguita ’n campu sintimintali: Comu cazzu fazzu a vasari a quarcuna cû pizzu ca mi ritrovu? Si po’ la pirsuna ca vogghiu vasari havi lu pizzu puru idda (o puru iddu), la faccenna si fa terribbilmenti ’ncasinata. Comu fànnu a si vasari dignitusamenti e câ rigulamintari lussuria nu pàpiru e ’na pàpara cû pizzu fattu comu lu miu? Pinsati beni ô miu pizzu. L’avìti vistu migghiara di voti ntê mei fumetti. Vistu di prufilu, comu ju mi taliu spissu â specchia, è senza dubbiu nu sìmbulu fàllicu (Pico de Paperis sarrìa d’accordu cu mia). Lu miu pizzu è fattu pi pinitrari, ni sugnu sicuru. Nun pinsati ca sia nu manìacu sessuali. È nu ragiunamentu di tipu geumètricu. Lu miu pizzu è nu sòlidu affusolatu câ tìpica aerodinamicità di nu strumentu pinitranti. Nun ridìti di mia si nun arrivu a m’esprimiri câ duvuta pricisioni. Sugnu sulu nu marinaru scarugnatu. Ma cu nu pizzu pinitranti. Nun arrinisciriti a mi cunvinciri dû cuntrariu. Embe’, cazzu, puru Paperina ci l’havi. Comu cazzu farrìa a la vasari, puru si idda mi lu lassassi fari?
Caro Maurizio Costanzo Show, nun vogghiu dilludiri a nuddu dî fans dû pirsunaggiu ca interpretu supra lu picculissimu schermu dû giurnalettu di fumetti ca ’nflaziona li edìculi. Ma ormai sugnu ranni di nu casinu di tempu e rivinnicu lu dirittu di vìniri puru ju ’na vota di tia pi fari sapiri puru ju a tutti li cazzi mei. Mè patri Disney è mortu nu saccu di tempu fa. M’ha lassatu ’n irdità nu cuntrattu a vita câ azienda ca porta lu sò nomu. Ci l’aju ntô culu. Scúsami si parru accussì, ma ficcàtivi beni ’n testa ca sugnu nu marinaru, nu marinaru scarugnatu, e puru frustratu ntô sò ruolu di marinaru pirchì nun aju mai truvatu n’imbarcu ca fussi unu. Lu portu di Paperopoli è ’mmanu ê cumunisti, ca l’hannu fattu falliri. Disney era nu sàdicu. A mia tutti li disgrazii, ô ziu Paperone tutti li sordi, e ê cumunisti lu portu di Paperopoli. Disney era nu sàdicu.
Aju tri niputiddi ca mi ròmpinu sempri li cugghiuna cû manuali dî giovani marmotte. Aju tutti li svantaggi di aviri tri figghi senza mancu aviri avutu lu vantaggiu di mi essiri fattu ’na scupata ca fussi una. Disney era nu sàdicu.
Aju ’na màchina di mmerda monopostu a metà, ca pi mi purtari ’n giru lu niputami l’aju a mèttiri ntô bagagliaiu. Nuddu dî scinaggiaturi dî mei fumetti v’ha mai dittu la marca. Embe’, ci cridu, si vrigugnàvanu. Era lu protòtipu scartatu dâ Trabant, l’auto-scatuledda-di-alici ca ora jèttanu via puru ntâ ex Germania di l’Est.
Embe’, ’nzumma, Maurizio Costanzo Show, invitami nu pocu di tia ca ti ni cuntu dui supra lu ziu Paperone. Cridi ca si sia tinutu fora di Tangentopoli? Cazzu, tra iddu e Rockerduck...
M’è scaduta la ricriazioni. Nun ti pozzu cchiù scriviri. Quannu travagghiu nun pozzu cchiù mèttiri fora paroli ca nun sianu cuntinuti ntâ nuvuledda apparenti di quarchi fumettu.
Cribbiu, nun sugnu cchiù mancu sicuru di essiri daveru Paperino. Puru travistutu accussì sentu sempri ’na gran puzza di Roberto Quaglia.

Roberto Quaglia