a sån Paperino. An é brîṡa un ṡvarnécc'. A sån pròpri Paperino al żéi ed Qui, Quo, Qua, al nvåd ed Paperone. Tótt i scrîven al Maurizio Costanzo Show e a i ò dånca decîṡ ed fèrel anca mé.
An sò bän parché a al fâg. Mo i san parché i al fan tótt chi èter ch'i t sumêrgen ed lêtri? Inción al sa realmänt gnínt ed mé. La zänt la lêż i fumétt e dånca par quasst la s sént autorizè a crédder ed savair tótt ed Paperino. Nåsgnûr. Drî ali quénti, fòra däli stâtiche pâgini indóv a eṡést par al pûr dilèt ed grand e znén, a i ò una vétta segrêta, ch'an é brîṡa cla ed Paperinik. L'é una vétta ed mêrda. Fårsi l'é par quasst ch'a i ò decîṡ ed scrîvret, chèr Maurizio Costanzo Show.
Mo fårsi quèl as intuéss anc lżänd i fumétt ch'i én al mî mestîr. La mî proverbièl ṡfîga, äli angóssi ch'al żéi Paperone tótt i dé al m inflîż, äli umiliaziån paté a åpera di mî dispetåuṡ e sacänt nipotén. E dåp cla strånza ed Paperina ch'an m la dà brîṡa e ch'invêzi la s fa muntèr - a n sån sicûr - da chal trånfi imbezéll imbriantinè ed Gastone!
L'é Paperopoli ch'la pårta ṡfîga. Tótt al dnèr ch'ai é i s l'an cuchè al mî żéi e Rockerduck. Chèr Maurizio Costanzo Show, t è asolutamänt da invitèrum int la tå trasmisiån. Incû l'é possébbil, t sè? Anc s'a sån un fumétt o un cartån animè. Se Roger Rabbit al på interagîr con i èser umàn, alåra a pås anca mé. T farè un figurån, a invitèrum.
Vuèter an avî mâi vést Paperina nûda. Mé sé. Dal bûṡ dla saradûra. L'êra l'ónich sistêma. Anc Qui, Quo e Qua i l an vésta. Anc Pippo, par ṡbâli (cuión cme l'é al stêva in realtè zerchänd ed vàdder sé istàss nûd). Anc Archimede Pitagorico, con óna däli så danè invenziån par guardèr atravêrs i mûr. Câzz, i l an vésta nûda tótt fòra ch'vuèter, ch'a l avî vésta såul int i fumétt, interpretèr al rål ed verginèla vaniuṡéta. Be', an avî pêrs gnínt. Paperina nûda l'é pîṡ ed Jessica Rabbit vsté. E quasst l'é l'oltrâg̈ definitîv! A pås amétter ch'una strafîga cme Jessica Rabbit an m la dâga brîṡa, mo Paperina... câzz, tra l'èter nûda l'é praticamänt idêntica a mé istàss. S't i câv i vsté an é ch'i avanzen grandi diferänz. Ai é chal câzz ed fiòch ròs ch'äla la gh à apichè in tèsta dé e nòt ch'a s distingv. Mé al mî asórd bartén da marinèr ògni tant a m al câv, anc s'acsé a métt a nûd la calvézzia. Äla, al så fiòch ròs... mâi! E dåp la fa äli ûv. Crést, la n fa almänc óna al dé. A l avän tótt vésta dal bûṡ dla saradûra. A avrén duvó imaginèrsel, pâper cme a sän, ch'cla lé la fa un ûv dåp chl'èter. L'é una scêna schifåuṡa. A vrévv savair dåp indóv la s i imbòsca. Secånd mé äli finéssen tótti da Nonna Papera ch'la äli fa sparîr int äli så tôrt ch'dåp nuèter a s magnän. Che schîv. Brótti stòri ed canibalîṡum.
Câzz, a sån pròpri ṡfighè. Scûṡum s'a dâg sänper "câzz", mo int i fumétt an al pås fèr e a i ò da sfoghèrum. E dåp l'é ed môda. Câzz, dîr câzz an vål dîr un câzz mo tótt an fan èter che dîrel, e s'i al fan in televiṡiån i pâsen ancåura par persåni con äli bâl.
A t promett che s't am invît an parlarò brîṡa mèl int la tå trasmisiån. Opûr a al farò, s't srè però té a dmandèrmel. S't at vergåggn a dîrmel fâm di gèst. A capéss in prassia, mé, fòra di fumétt. Såver tótt äli cås acsé sänzi.
Scûṡum s'a parl acsé, in môd dṡvêrs ch'dänter ai fumétt indóv a lavår. La zänt la s aspèta sänper äli stàssi cås da mé, in ògni contèst. Inción al s interèsa ala persåna o al pâper ch'mé a sént d'èser. Tótt i vålen sänper vàddrum int al personâg̈ ch'i an imparè ch'mé a sån. Câzz, a fôrza ed vlairum tótt vàdder ṡfighè, a finéss par èserel dabån anc int la vétta privè. Rock Hudson l'êra un personâg̈ viríl, mo in realtè l'êra buléggio. (Int al dialèt ed Paperopoli buléggio al vål dîr cinêdo). Mé a sån un personâg̈ ṡfighè, mo in realtè a al sån ancåura ed pió.
Câzz, al à da èser vaira che chiónqued l'é pròpri quall ch'tótt i pénsen e i vålen ch'ló o äla al séppa. Int la mî vétta privè äli cås äli m van ancåura pîṡ ch'int i fumétt. A i ò sänper tantéssimi malatî, con miglièra ed séntom tótt dṡvêrs, mäntr int i fumétt quand a stâg mèl a i ò sänplizemänt un termåmeter in båca. Par eṡénpi a i ò al catâr. Mo brîṡa såul int i brånch. Anc int i ûć e sätta äli aṡèl. Tótt a avî vést, int i fumétt, ch'mé an ò brîṡa dént. Be', l'é pròpri acsé. Mo int i fumétt a m magn di supersandwich ch'an finéssen pió... mo l'é tótta finziån. In realtè, sänza dént an pås masteghèr, e int la vétta reèl a m aliment ed brudén.
Perdånum se la mî lêtra la pèr un påch confûṡa. A sån leggermänt imbariègh. Csa v aspetèv da un marinèr? Avair notè che int i fumétt a caména sänper ṡchèlz? Be', anc int la vétta reèl. Mo int i fumétt la strè an é brîṡa costelè ed zécch e strón ed can cme int la realtè indóv mé ògni mumänt a i calpèst.
A confès ch'a m masturbeṡ. A sån dispåst a dîrel anc in trasmisiån, s'al på servîr a aumentèr l'audience. A i ò pruvè anc a fèrum däli cân, sî int la realtè che int i fumétt. Naturalmänt a stêva lavuränd in naigher, par un zêrt Andrea Pazienza ch'an êra brîṡa un fumétt immortèl e difâti l'é dåp môrt. Dåp a i ò lasè lé. Csa serv fèrs däli cân quand la realtè l'é bèle ed par sé completamänt fòra ed tèsta? Al bâsta arîr i ûć e guardèr. E vuèter a savî ch'i mî ûć i én bän grand. I m i diṡêggnen grand e i al én anc in realtè. Quall ch'an vdî brîṡa int i fumétt i én tótt chi câzz ed muscarén ch'i m i finéssen dänter ògni zénch minûd.
A savî, a i ò quèlch idê a rigôrd dla ṡfîga ch'la m perségua in câmp sentimentèl: Cme câzz fâg a baṡèr quelcdóna col bèch ch'a m artråv? Se dåp la persåna ch'a vói baṡèr la gh à al bèch anca äla (o anca ló), la fazända la s fa teribilmänt incaṡinè. Cme i fan a baṡères dignitosamänt e con la regolamentèra lusûria un pâper e una pâpera col bèch fât cme al mî? Pensè bän al mî bèch. A l avî vést miglièra ed vôlt int i mî fumétt. VéȘt ed profîl, cme mé a m guèrd spass al spêć, l'é indóbbiamänt un sémbol fâlich (Pico de Paperis al srévv d'acôrd con mé). Al mî bèch l'é fât par penetrèr, a n sån sicûr. An pensè brîṡa ch'a séppa un maniâch sesuèl. L'é un ragionamänt ed tîp geomêtrich. Al mî bèch l'é un sålid afuṡolè con la típica aerodinamicitè d'un strumänt penetrànt. An ridî brîṡa ed mé s'an rîṡ brîṡa a eṡprémmerum con la duvó preciṡiån. A sån såul un marinèr ṡfighè. Mo con un bèch penetrànt. An riuscirî brîṡa a convénzerum dal contrèri. Ebén, câzz, anc Paperina la l gh à. Cme câzz a farévv a baṡèrla, anc s'äla la m al laséss fèr?
Chèr Maurizio Costanzo Show, an vói deludere inción di fans dal personâg̈ ch'a interprêt in vatta al piziné ṡberlûṡ dal giornalén ed fumétt ch'al inflaziåna äli edîchol. Mo uramâi a sån adólt da un caṡén ed tänp e a rivéndich al dirétt ed gnîr anca mé una vôlta da té par fèr savair anca mé a tótt i câzz mî. Mî pèder Disney l'é môrt un mócc' ed tänp fa. Al m à lasè in ereditè un contrât a vétta con l'aziända ch'la pårta al så nómm. A i l ò int al cûl. Scûṡum s'a parl acsé, mo fichèv bän in tèsta ch'a sån un marinèr, un marinèr ṡfighè, e anc frustrè int al så rål ed marinèr parché an ò mâi truvè un imbèrch ch'al fóss ón. Al pôrt ed Paperopoli l'é in man ai comunésta, ch'i l an fât falîr. Disney l'êra un sâdich. A mé tótti äli diṡgrâzi, al żéi Paperone tótt i såld, e ai comunésta al pôrt ed Paperopoli. Disney l'êra un sâdich.
A i ò trî nipotén ch'i m rómpen sänper i cuión col manuèl däli żåvni marmòti. A i ò tótt i ṡvantâg̈ d'avair trî fiû sänza gnanc avair avó al vantâg̈ d'èsrum fât una ciavè ch'la fóss óna. Disney l'êra un sâdich.
A i ò una mâchina ed mêrda monopåst a metè, che par purtèrum in gîr al nipotâm a i ò da métterli int al bagaièr. Inción di seneggiatûr di mî fumétt av à mâi détt la mèrca. Be', ai crädd, i s vergognèven. L'êra al prototîp scartè dla Trabant, l'auto-scatolén'na-d'anciåv ch'adès i bótten vî anc int l'ex Germania dl'Est.
Be', insåmma, Maurizio Costanzo Show, invîtum un påch da té ch'a t in cånt då in vatta al żéi Paperone. T crédd ch'al s séppa tgnó fòra da Tangentopoli? Câzz, tra ló e Rockerduck...
M'é scadó la ricreaziån. An pås pió scrîvret. Quand a lavår an pås pió emétter parål ch'an séppen cuntgnó int la nuvlén'na aparänt ed quèlch fumétt.
Crébbi, an sån pió gnanc sicûr d'èser dabån Paperino. Anc travesté acsé a sént sänper una gran spózza ed Roberto Quaglia.

Roberto Quaglia