i son Paperino. A l'é nen un stranòm. I son pròpi Paperino ël barba ëd Qui, Quo, Qua, ël nvod ëd Paperone. Tùit a scrivo al Maurizio Costanzo Show e i l'hai donca decidù ëd felo ëdcò mi.
I sai nen bin përchè i lo faso. Ma a san përchè a lo fan tùit j'àutri ch'at somergio ëd lettere? Gnun a sa realment gnente ëd mi. La gent a les ij fumèt e donca për sòn as sent autorisà a chërde ëd savèj tut ëd Paperino. Nòssgnor. Daré a le quinte, fòra da le stàtiche pàgine anté i esisto për ël pur dilet ëd grand e cit, i l'hai na vita segreta, ch'a l'é nen cola ëd Paperinik. A l'é na vita ëd merda. Miraco a l'é për sòn ch'i l'hai decidù ëd scrivte, car Maurizio Costanzo Show.
Ma miraco quaicòs as intuiss ëdcò lesend ij fumèt ch'a son mè mesté. Mia proverbial sfiga, j'angustie ch'ël barba Paperone quotidianament am inflis, j'umiliassion patìe a òpera dij mè dëspetos e saccent nvodin. E peui cola stronza ëd Paperina ch'am la dà nen e ch'nopà as fa monté - i na son sigur - da col tronfi imbessìl imbrilantinà ëd Gastone!
A l'é Paperopoli ch'a pòrta sfiga. Tut ël dné ch'a-i é as lo son cucà mè barba e Rockerduck. Car Maurizio Costanzo Show, it deuve assolutament inviteme an toa trasmission. Ancheuj a l'é possìbil, it sas? Ëdcò s'i son un fumèt o un carton animà. Se Roger Rabbit a peul interagì con j'esse uman, antlora i peuss ëdcò mi. It faras un figuron, a inviteme.
Vojàutri i l'eve mai vist Paperina patanùa. Mi sì. Dal beucc ëd la sëradura. A l'era l'ùnich sistema. Ëdcò Qui, Quo e Qua a l'han vistla. Ëdcò Pippo, për eror (cojon com a l'é a stasìa an realtà sercand ëd vëdde chiel istess patanù). Ëdcò Archimede Pitagorico, con un-a ëd soe danà invension për vardé a travers ij mur. Bòja, a l'han vistla patanùa tùit fòra vojàutri, ch'i l'eve vistla mach ant ij fumèt, interpreté ël ròl ëd verginëtta vanitoseta. Beh, i l'eve perdù gnente. Paperina patanùa a l'é pes ëd Jessica Rabbit vestìa. E sòn a l'é l'oltragi definitiv! I peuss amëtte ch'na strafiga com Jessica Rabbit am la dà nen, ma Paperina... bòja, tra l'àutr patanùa a l'é pràtica idéntica a mi midem. S'it-je gave ij vestì a l'é nen ch'a avanso grande diferense. A-i é col bòja ëd fiòch ross ch'chila a l'ha piccà an tèsta dì e neuit ch'an distingue. Mi mè assurd berèt da marinar ëd tant an tant i lo gavo, ëdcò se parèj i buto a patanù le calvissie. Chila, sò fiòch ross... mai! E peui a fa j'euv. Crist, a na fa almanch un al dì. I l'oma tùit vistla dal beucc ëd la sëradura. I l'avrìo dovù imagineslo, pàiver com i soma, che cola lì a fa n'euv apress l'àutr. A l'é na sen-a schifosa. I vorìa savèj peui anté ch'as-je ambòsca. Sconda mi a finisso tute da Nonna Papera ch'a-je fa sparì ant soe tòrte ch'peui nojàutri i-s mangioma. Che schìfo. Brute stòrie ëd canibalism.
Bòja, i son pròpi sfigà. Scus-me s'i diso sempe "bòja", ma ant ij fumèt i peuss nen felo e i deuv sfoghéme. E peui a l'é ëd mòda. Bòja, dì bòja a veul dì nen un bòja ma tùit a fan d'àutr che dilo, e s'a lo fan an television a passo ancora për përson-e con le bale.
It promëtto che s'it m'invite i parlerai nen mal an toa trasmission. O pura i lo farai, s'it saras però ti a ciameme-lo. S'it të vergògne a dimlo fame dij gest. I capisso an pressa, mi, fòra dai fumèt. Dzurtut le ròbe parèj sempie.
Scus-me s'i parlo parèj, an mòd diferent che drinta ai fumèt anté i travajo. La gent as speta sempe le midem ròbe da mi, an minca contest. Gnun as anteressa a la përson-a o al pàiver ch'mi i sento d'esse. Tùit a veulo sempe vëddme ant ël përsonagi ch'a l'han amprendù ch'mi i son. Bòja, a fòrsa ëd vorèjme tùit vëdde sfigà, i finisso për esslo dabon ëdcò ant la vita privà. Rock Hudson a l'era un përsonagi viril, ma an realtà a l'era buliccio. (Ant ël dialèt ëd Paperopoli buliccio a veul dì circòt). Mi i son un përsonagi sfigà, ma an realtà i lo son ancora ëd pì.
Bòja, a deuv esse ver che chionque a l'é pròpi lòn ch'tùit a penso e a veulo ch'chiel o chila a sia. Ant mia vita privà le ròbe am van ancora pes che ant ij fumèt. I l'hai sempe vàire e vàire maladìe, con mijàra ëd sìntom tùit diferent, antramentre che ant ij fumèt quand i stago mal i l'hai sempliciament un termòmeter an boca. Për esempi i l'hai ël catar. Ma nen mach ant ij brònchi. Ëdcò ant j'euj e sota j'assèile. Tùit i l'eve vist, ant ij fumèt, ch'mi i l'hai nen dent. Beh, a l'é pròpi parèj. Ma ant ij fumèt i-m mangio dij supersandwich ch'a finisso pì nen... ma a l'é tuta finsion. An realtà, sensa dent i peuss nen mastié, e ant la vita real i m'aliment ëd brodin.
Përdon-me se mia lettera a smija un pòch confusa. I son lesirament ambriach. Còs iv spetave da un marinar? Avèj notà ch'ant ij fumèt i camin-o sempe dëscàuss? Beh, ëdcò ant la vita real. Ma ant ij fumèt la stra a l'é nen costelà ëd cicche e stronz ëd can com ant la realtà anté mi minca moment i-j caussisso.
I confesso ch'i-m masturbo. I son dispòst a dilo ëdcò an trasmission, s'a peul serve a aumenté l'audience. I l'hai provà ëdcò a feme dle canne, sia ant la realtà che ant ij fumèt. Naturalment i stasìa travajand an nèir, për un cèrt Andrea Pazienza ch'a l'era nen un fumèt immortal e an efet a l'é peui mòrt. Peui i l'hai chità. Còs a serv fesse dle canne quand la realtà a l'é già ëd për sé completament fòra ëd tèsta? A basta duverté j'euj e vardé. E vojàutri i seve ch'ij mè euj a son bin gròss. A m-je disègno gròss e a lo son ëdcò an realtà. Lòn ch'i vëdde nen ant ij fumèt a son tùit coj bòja ëd mostcin ch'am-i finisso drinta minca sinch minute.
I seve, i l'hai quàiche idèja riguard la sfiga ch'am përsegita an camp sentimental: Com bòja i faso a basé quaidun-a con ël bèch ch'i-m ritreuvo? Se peui la përson-a ch'i veuj basé a l'ha ël bèch ëdcò chila (o ëdcò chiel), la facenda as fa terìbilment ambrojà. Com a fan a basesse dignitosament e con la regolamentar lussuria un pàiver e na pàivra col bèch fàit com ël mè? Pensé bin a mè bèch. I l'eve vistlo mijàra ëd vire ant ij mè fumèt. Vist ëd profil, com mi i-m vardo dëspess a lë specc, a l'é sensa dùbit un sìmbol fàllich (Pico de Paperis a sarìa d'acòrdi con mi). Mè bèch a l'é fàit për penetré, i na son sigur. Pense nen ch'i sia un maniach sessual. A l'é un rasonament ëd tipo geométrich. Mè bèch a l'é un sòlid afusolà con la tìpica aerodinamicità d'un strument penetrant. Rijé nen ëd mi s'i riesso nen a esprimme con la dovùa precision. I son mach un marinar sfigà. Ma con un bèch penetrant. I riessreve nen a convinceme dël contrari. Ebin, bòja, ëdcò Paperina a la l'ha. Com bòja i farìa a basela, ëdcò s'chila a m'lo lassèissa fé?
Car Maurizio Costanzo Show, i veuj nen delude gnun dij fans dël përsonagi ch'i interpreto an sël cit-cit schermo dël giornalin ëd fumèt ch'a anflassion-a le edìcole. Ma ormai i son adult da na fòlairà ëd temp e i rivéndico ël drit ëd vnì ëdcò mi na vira da ti për fé savèj ëdcò mi a tùit ij bòja mè. Mè pare Disney a l'é mòrt na mucia ëd temp fa. A m'ha lassà an ardità un contrat a vita con l'asienda ch'a pòrta sò nòm. I lo l'hai ant ël cul. Scus-me s'i parlo parèj, ma ficheve bin an tèsta ch'i son un marinar, un marinar sfigà, e ëdcò frustrà an sò ròl ëd marinar përchè i l'hai mai trovà n'imbarch ch'a fussa un. Ël pòrt ëd Paperopoli a l'é an man ai comunista, ch'a l'han falo falì. Disney a l'era un sàdich. A mi tute le disgrassie, al barba Paperone tùit ij dné, e ai comunista ël pòrt ëd Paperopoli. Disney a l'era un sàdich.
I l'hai tre nvodin ch'am rompo sempe ij cojon col manual dle giovo marmòte. I l'hai tùit ij svantagi d'avèj tre fieuj sensa gnanca avèj avù ël vantagi d'essme fàit na ciavà ch'a fussa un-a. Disney a l'era un sàdich.
I l'hai n'autò ëd merda monopòst a metà, che për porteme an gir ël nvodam i-j deuv buté ant ël portabagagi. Gnun dj'esseneggiator dij mè fumèt av l'ha mai dit la marca. Beh, i-i chërdo, as vergognavo. A l'era ël prototipo scartà dla Trabant, l'autò-scàtola-d'ancioe ch'adess a campo via ëdcò ant l'ex Germania dl'Est.
Beh, nsomma, Maurizio Costanzo Show, invit-me un pòch da ti ch'it na conto doe an sël barba Paperone. It chërde ch'a-s sia tnù fòra da Tangentopoli? Bòja, tra chiel e Rockerduck...
A m'é scadùa la ricreassion. I peuss pì nen scrivte. Quand i travajo i peuss pì nen emëtte paròle ch'a sio nen contnùe ant la nìvola aparenta ëd quaich fumèt.
Càspita, i son pì nen gnanca sigur d'esse dabon Paperino. Ëdcò travestì parèj i sento sempe na gran spussa ëd Roberto Quaglia.

Roberto Quaglia