
 |
ZIRCA DLA BANALITÊ
Caro Maurizio Costanzo Show,
A dëv zarchê d'ësar banêl, azidenti. U m' è capitê in man al brot cöpi dal lètar ch'a t'ò za scrët e a m' so adê ch'al è pröpi brot, ciuè u m' è scap di mument ad prufundità ch'a n' vleva, a scapit dla banalitê ch'la s' vô par fê ad qualsiasi prudót un prudót bon. L'è un argument banêl a basta, quest? A l' sper pröpi. Tot i dis ormai che qualsiasi cösa l'è prèma ad tot un prudót. Se tot i e' dis, fôrsi l'è un cuncèt banêl, ciuè pröpi quel ch'a so drì a zarchê ad prudùr. Se tot l'è un prudót, o l'è un bon prudót bon o l'è un catìv prudót catìv. Bén, u m' pê che a banalitê a sem drì andê ben.
Chi ch'l'è che decid quând che una cösa l'è pröpi banêla? Sta frêş la m'è vnuda banêla a basta. A so drì a migliurê.
Una cösa la pò ësar banêla par zert e banêla par j'êtar, ciuè, a vleva dì, banêla par zert e nö banêla par j'êtar. E cs'a n' dgì ad mètar zerti frêş in cursìv, senza mutìv particulêr? U n' è dicisament banêl? Fôrsi l'è un pô uriginêl. Bsògna stê aténti. L'uriginalitê la t'aspèta a e' varch dri a l'ângul, e la t ciapa quând che manch t'a t l'aspèt. Mo una cösa la pò ësar par gnint banêla e pu stupida parsè. L'è mej una bôna banalitê o una stupiditê perentòria? Una cösa tròp stupida la smet d'ësar banêla.
Azidenti! L'ecès ad banalitê e' porta a tradiment a e' su cuntrêri quând che manch t'a t l'aspèt. Bsògna calê la curetëza semàntica - ma che cavolo dico! - bsògna calê la bontê gramatichêla par cumpensê i rigùrgit ad banalitê paradusânta.
A n' i capés un bël gnint gnânca me, a v' l'asicur pröpi. Che figura ch'a i fëz, incù, cun stal parôl ch'al n' m' pis gnânca un pô? A pêr scem, o a pêr ignurânt? Opùr a n' pêr un bël gnint parchè a avì za smes ad lèzar? Mo cs'a degh? S'i à smes ad lèzar i n' s' n'adà ad tot stal parôl ch'al cuntinua pu a ësar sóra e' fòi ad chêrta senza ch'i e' sapa, dònca cs'al i sta a fê?
Aquè u m' sa che la banalitê la s'n'è andêda a fês frézar. U i vô un bël lóg cumon par salvê chêvra e cavul. Qualcvël de' tip: "La cösa impurtânta l'è ch'u i sia sulidarietê". Gnint mêl, eh? Difati i quatrén i n' fa la felizitê, parchè la natura l'è matrégna e quând che manch t'a t l'aspèt i grop i vén a e' pètan e aquè e' casca l'asan. U n' gn'è pröpi giustizia a ste mond! L'è pröpi vèra ch'u n' s' pò fidês. Piò ch'a cnos al persôn e piò ch'a vój ben a al bìstii.
Tot quest l'è sèmpliz squàllid, pôc banêl o antibanêl, un pëz scrët de' tip "a vrèb mo a n' pos", una masnêda ad frêş amuciêdi a caşaz.
Fôrsi a arivem almânch a dvintê nujôs.
Mo parchè a avrèsum da dvintê nujôs? A vlèsum ësar banêl parchè quest l'è quel ch'e' pis a la zénta. Mo al nujusitê al n' pis a niseun. Aquè a sem drì a sbaglié pröpi tot. Se pröpi bsògna ësar nujôs, tânt e' vêl dì ènca qualcvël d'interesânt pr'la siénza.
Caro Maurizio Costanzo Show, ajutum te...!
Ecco, a i sem! Superbanalitê!
«Caro Maurizio Costanzo Show, a j ò pruvê tot al strê mo u n' gn'è stê gnint da fê. Tot al porti al m'è stêdi seredi in faza. A so pröpi disperê/a. A n' so piò cs'a fê. I m'à cunsiglié ad rivòlzum a te, e adës te t si la mi sola speranza. La mi vita l'è dvintêda un infèran. A so ch'al è una masa al persôn ch'al t scriv cun di problema ènca piò grând de' mi, mo a vój iludim che t vurè dêm una man a pasê ste mi mument difézil.
«Tot l'è cminzê quând che e' mi sistema nervôs u n' à piò tnù sota e' pës di mi terébil problema ad faméja, ch'a t'i sparmi parchè tânt i è sèmpar al stesi disgrazi, ch'al suzéd a acsè tânti persôn ch'al nas sfurtunêdi cumè me. E' cedimént di nèrv nasù in faméja u s'è slarghê a j'êtri sfér dla mi vita, magnàndla pian pian fin a l'òs.
«Adës a m' sent cumè nud/a dnânz a la vita, ch'la m' sovrasta e la m' schéza sota e' su terébil pës. A n' pos guardê a e' futur, e quând ch'a pens a e' pasê u m' vén i tremur. Ènca s'a m' sfórz a e' màsim, a n' arìv mai a pinsê a e' presént par piò ad qualch second, parchè int e' mi presént u n' gn'è gnint ad gnint a pêrt cla grânda l'angòscia ch'a n' so cum spieghêt, mo la m' tò ènca e' fiê.
«Caro Maurizio Costanzo Show, fam vnì a e' tu show a patì in dirèta, me a pens che l'esempi de' mi patimént e' pudrèb ajutê tânti persôn ch'al è int la mi brota situaziòn, e magari u m' pudrèb ajutê a truvê ènca un'ânma bôna ch'la m' vóia ajutê... a j ò tânt bsògn d'ajut... spes a pens a me stes/stessa cumè a un uslèt senza difésa caschê zò da e' nid int la paciùga, e tot i m' pésta senza adês e niseun u m' tò sò e u m' arpôrta int e' nid...
«Ajut!
Che sens l'à avé scrët sta roba aquè? E par chiunque ch'u l'àbia lèta, che sens l'à avù avéla lèta? Mo quânt vôlt l'à sens avé lèt qualcvël ch'u s' è apena lèt? Ogni vôlta ch'u s' lèz qualcvël bsugnarèb pu sóbit dop fê un'anàlisi d'corsa par capì s'l'à avù sens avé lèt quel ch'u s' è lèt. U s' sparmiarèb di pëz zigânt ad vita butêda vi!
Scusim par sta finta d'impruvis ad prufunditê ch'a n' vleva. Incù, a l' zur, a avrèb vlù tânt ësar sól banêl. Mo niseun l'è perfèt.
Roberto Quaglia
L'òpera "Caro Maurizio Costanzo Show...", tota intìra o in pêrt, la pò ësar lèta, scarghêda int e' computer, stampêda e cupiêda sènza lèmit, sôl par ûs persunêl. Tot i tèst e al ilustraziôn i è pruprietà ad Roberto Quaglia e i n' pò ësar druvê tot intìr o in pêrt sènza autorizaziôn. E' prugèt gràfic e i cumpunént gràfic ad sti pàgin i è pruprietà riservêda ad Roberto Quaglia. L'òpera "Caro Maurizio Costanzo Show...", tota intìra o in pêrt, la n' pò ësar mesa in vèndita a niseun tìtul sènza autorizaziôn prèma.
© 1994-2000 Roberto Quaglia.
|