Depo chircare de èssere banale, atzidente. Mi sunt capitadas in manu sas brutas còpias de sas lìteras chi giai t'apo iscritu e m'apo acatadu chi sunt a beru brutas, est a nàrrere mi sunt iscapadas momentos de profundidade involontària, a discàpitu de sa banalidade indispensàbile a fàghere de cale si siat produtu unu produtu bonu. Est un'argumentu abbastantza banale, custu? Lu ispero a beru. Totus narant ormai chi cale si siat cosa est primu de totu unu produtu. Si lu narant totus, forsis est unu cuntzetu banale, est a nàrrere pròpiu su chi so chirchende de prodùere. Si totu est unu produtu, o est unu bonu produtu bonu o est unu malu produtu malu. Bene, mi paret chi a banalidade semus andende bene. Chie est chi detzidit cando una cosa est a beru banale? Custa frase m'est bènnida abbastantza banale. Mi so megliorende.
Una cosa podet èssere banale pro tzertunos e banale pro àteros, est a nàrrere, cheria nàrrere, banale pro tzertunos e no banale pro àteros. E ite nde narades de pònnere tzertas frases in corsivu, sena particulares motivos? No est decisamente banale? Forsis est leggermente originale. Bi cheret istare atentos. S'originalidade t'isetat a su varcu a segus de s'àngulu, e ti pigat cando prus pagu t'aspetas. Ma una cosa podet èssere pro nudda banale e tando meda istùpida. Est mègius una bona banalidade o una perentòria istupididade? Una cosa tropu istùpida acabat de èssere banale.
Atzidente! S'ecessu de banalidade cundughet a traimentu a su contràriu suo cando prus pagu t'aspetas. Bi cheret decrementare sa curretesa semàntica - ma ite corru naro! - bi cheret diminuire sa bonidade gramaticale pro cumpensare sos rigùrgitos de banalidade paradossante.
Bi cumprendo unu bellu nudda mancu deo, bos assicuro a beru. Ite figura bi fatzo, oe, cun custas paràulas chi no mi praghent mancu unu pagheddu? Paro tontu, o paro ignorante? Opuru no paro unu bellu nudda proite ais giai acabbadu de lèghere? Ma ite naro? Si ant acabbadu de lèghere no si nde acatant de totu custas paràulas chi fintzas sighint a istare subra su fògiu de paperi a s'insaputa issoro, gasi ite bi sunt a fàghere?
Inoghe mi paret chi sa banalidade si nde est andada a si fàghere frìghere. Bi cheret unu bonu logu comunu pro sarvare crapa e càule. Carchi cosa de su tipu: "Sa cosa importante est chi bi siat solidariedade". Nudda male, eh? Difatis su dinari no faghet sa felitzidade, proite sa natura est matriga e cando prus pagu t'aspetas sos nodos benint a su pètene e inoghe ruet s'àinu. No b'at pròpiu giustìtzia a custu mundu! Est pròpiu beru chi no b'at a si fidare. Prus connosco sas persones e prus amo sos animales.
Totu custu est simplemente iscuàllidu, iscarsamente banale o antibanale, unu branu iscritu de su tipu "diat chèrrere ma no potzo", una masnada de frases amassadas a casu.
Forsis resessimus a su nessi a diventare noiosos.
Ma proite diamus dèpere diventare noiosos? Cheriamus èssere banales proite custu est su chi praghet a sa gente. Ma sas noiosidades no praghent a nemos. Inoghe semus pròpiu isbaglièndende totu. Si pròpiu bi cheret èssere noiosos, tantu balet nàrrere fintzas carchi cosa de scientificamente interessante.
Caro Maurizio Costanzo Show, agiùami tue...!
Eccu, bi semus! Superbanalidade!
«Caro Maurizio Costanzo Show, apo proadu totu sas caminos ma no b'est istadu nudda de fàghere. Totu sas portas mi si sunt serradas in cara. So pròpiu disisperadu/a. No isco prus ite fàghere. M'ant cunsigiadu de mi rivòlghere a tie, e immoe tue ses sa sola isperàntzia mia. Sa vida mia est diventada un'inferru. Isco chi sunt medas sas persones chi ti iscrient cun problemas fintzas prus mannos de su meu, ma chèrgio m'illùdere chi as a chèrrere mi dare una manu a superare custu momentu difìtzile meu.
«Totu est incumintzadu cando su sistema nervosu meu no at prus retutu suta su pesu de sos terrìbiles problemas familiares mios, chi ti risparmio proite tantu sunt semper sas matessi disgràtzias, chi sutzedent a gasi medas persones chi nàschent isfortunadas comente a mie. Su tzedimentu nervosu de orìgine familiare si est propagadu a sas àteras isferas de sa vida mia, erodèndela progressivamente finas a s'ossu.
«Immoe mi sento comente nudu/a cara a sa vida, chi mi soverchiat e mi ammàccat suta su terrìbile pesu suo. No potzo abbaidare a su venidore, e cando penso a su passadu mi benint sos trèmulos. Fintzas isfortzèndemi a su màssimu, no resesso mai a pensare a su presente pro prus de carchi segundu, proite in su presente meu no b'at nudda de nudda a banda cussa manna angòssia chi no isco comente ti ispiegare, ma mi bogat fintzas s'alenu.
«Caro Maurizio Costanzo Show, fàghemi bènnere a su show tuo a sufrire in direta, deo penso chi s'esempru de sa suferèntzia mia diat pòdere agiuare medas persones chi sunt in sa infelitze situatzione mia, e forsis mi diat pòdere agiuare a agatare fintzas un'ànima bona chi mi cherzat agiuare... tèngio tantu bisòngiu de agiudu... ispissu penso a mie etotu comente a un'pugione fertu ruttu a bassu dae su nidu in su ludu, e totus mi carcant sena s'acatare e nemos mi reculit e mi torrat a pònnere in su nidu...
«Agiudu!
Ite sensu tenet àere iscritu custa roba inoghe? E pro chie si siat l'apat lèghida, ite sensu at tentu l'àere lèghida? Ma cantas bortas tenet sensu àere lèghidu carchi cosa chi si apat pròpiu lèghidu? Onni borta chi si leget carchi cosa diat dèpere posca luego a pustis fàghere una ràpida anàlisi pro cumprèndere si at tentu sensu àere lèghidu su chi si est lèghidu. Si risparmiarent gigantescos framentos de vida isperditziada!
Iscusàdemi pro custa improvisa parvèntzia de profundidade involontària. Oe, lu giuro, dia àere tantu chèrfidu èssere isceti banale. Ma nemos est perfetu.

Roberto Quaglia