Aju a circari di essiri banali, accidenti. Mi su’ capitati ’mmanu li brutti copii dî lettiri ca già t’aju scrittu e m’aju addunatu ca su’ daveru brutti, cioè mi su’ scappati mumenti di prufunnità involuntaria, a discapitu dâ banalità indispensabbili a fari di qualsiasi pruduttu nu pruduttu bonu. È n’argumentu abbastanza banali, chistu? Lu speru daveru. Tutti dìcinu ormai ca qualsiasi cosa è prima di tuttu nu pruduttu. Si lu dìcinu tutti, fòrsi è nu cuncettu banali, cioè propriu chiddu ca staju circannu di pruduciri. Si tuttu è nu pruduttu, o è nu bonu pruduttu bonu o è nu cattivu pruduttu cattivu. Beni, mi pari ca a banalità stamu jennu boni. Cu’ è ca decidi quannu ’na cosa è daveru banali? Sta frasi m’è vinuta abbastanza banali. Mi staju migghiurannu.
’Na cosa po’ essiri banali pi certi e banali pi àutri, cioè, vuliva diri, banali pi certi e nun banali pi àutri. E chi ni diciti di mèttiri certi frasi ’n corsivu, senza particulari mutivi? Nun è dicisamenti banali? Fòrsi è liggermenti uriginali. Ci voli stari attenti. L’uriginalità t’aspetta ô varcu darreri a l’angulu, e ti pigghia quannu menu ti lu aspetti. Ma ’na cosa po’ essiri pi nenti banali eppuru assai stúpida. È megghiu ’na bona banalità o ’na perentoria stupidità? ’Na cosa troppu stúpida finisci di essiri banali.
Accidenti! L’eccessu di banalità cunduci a tradimentu ô sò oppostu quannu menu ti lu aspetti. Ci voli decrementari la currittizza simàntica - ma che cavolo dico! - ci voli diminuìri la bontà grammaticali pi cumpinsari li rigúrgiti di banalità paradussanti.
Ci capisciu nu beddu nenti mancu ju, vi assicuru daveru. Chi figura ci fazzu, oggi, cu sti paroli ca nun mi piàcinu mancu nu piculiddu? Paru babbu, o paru ignuranti? Oppuru nun paru nu beddu nenti pirchì avìti già finutu di lèggiri? Ma chi dicu? Si hannu finutu di lèggiri nun si nn’addýnanu di tutti sti paroli ca puru cuntìnuanu a essirci supra lu fogghiu di carta a sò insaputa, accussì chi ci su’ a fari?
Ccà mi sa ca la banalità si nn’è juta a si fari frìiri. Ci voli nu beddu locu cumuni pi sarvari crapa e càvuli. Quarchi cosa dû tipu: "La cosa impurtanti è ca ci sia sulidarietà". Nenti mali, eh? Defatti lu denaru nun fa la filicità, pirchì la natura è matrigna e quannu menu ti lu aspetti li nura vèninu ô pèttini e ccà casca l’àsinu. Nun c’è propriu giustizia a stu munnu! È propriu veru ca nun c’è di si fidari. Cchiù canusciu li pirsuni e cchiù amu li animali.
Tuttu chistu è semplicimenti squàllidu, scarsamenti banali o antibanali, nu branu scrittu dû tipu "vurrìa ma nun pozzu", ’na masnada di frasi ammassati a casacciu.
Fòrsi arrinescemu almenu a addivintari nuiusi.
Ma pirchì avissimu a addivintari nuiusi? Vulevamu essiri banali pirchì chistu è chiddu ca piaci â genti. Ma li nuiusaggini nun piàcinu a nuddu. Ccà stamu propriu sbagghiannu tuttu. Si propriu ci voli essiri nuiusi, tantu vali diri puru quarchi cosa di scientificamenti interissanti.
Caro Maurizio Costanzo Show, aiutami tu...!
Ecco, ci semu! Superbanalità!
«Caro Maurizio Costanzo Show, aju pruvatu tutti li strati ma nun c’è statu nenti di fari. Tutti li porti mi si su’ ’nchiusi ’n facci. Sugnu propriu dispiratu/a. Nun sacciu cchiù chi fari. M’hannu cunsigghiatu di mi rivòrgiri a tia, e ora tu si’ la mia sula spiranza. La mia vita è addivintata n’’nfernu. Sacciu ca su’ assai li pirsuni ca ti scrìvinu cu prubblemi puru cchiù grossi dû miu, ma vogghiu m’illudiri ca vurrai mi dari ’na manu a superari stu miu mumentu difficili.
«Tuttu è accuminciatu quannu lu miu sistema nervusu nun ha cchiù rettu sutta lu piso dî mei terribbili prubblemi familiari, ca ti spargnu pirchì tantu su’ sempri li stissi disgrazii, ca succèdinu a accussì tanti pirsuni ca nàscinu sfurtunati comu a mia. Lu cedimentu nervusu di origgini familiari s’è prupagatu ê àutri sferi dâ mia vita, erudennula prugressivamenti fina a l’ossu.
«Ora mi sentu comu nudu/a davanti â vita, ca mi suverchia e mi ammacca sutta lu sò terribbili piso. Nun pozzu taliari ô futuru, e quannu pensu ô passatu mi vèninu li trimmura. Puru sfurzannumi ô màssimu, nun arrivu mai a pinsari ô prisenti pi cchiù di quarchi secunnu, pirchì ntô miu prisenti nun c’è nenti di nenti a parti chidda granni l’angoscia ca nun sacciu comu ti spiegari, ma mi levi puru lu ciatu.
«Caro Maurizio Costanzo Show, fammi vìniri ô tò show a suffriri ’n diretta, ju pensu ca l’esempiu dâ mia suffirenza putissi aiutari tanti pirsuni ca su’ ntâ mia ’nfelici situazioni, e fòrsi mi putissi aiutari a truvari puru ’na ànima bona ca mi vogghia aiutari... aju tantu bisognu di aiutu... spissu pensu a mia stissu/a comu a n’aciddicchiu ’nfeso caduto ’n terra dû nidu ntô fangu, e tutti mi carpìstanu senza s’addunari e nuddu mi arricògghi e mi rimetti ntô nidu...
«Aiuto!
Chi sensu havi aviri scrittu sta rrobba ccà? E pi cu’ sia l’àbbia liggiuta, chi sensu ha avutu l’aviri liggiuta? Ma quanti voti havi sensu aviri liggiutu quarchi cosa ca s’àbbia appena liggiutu? Ogni vota ca si leggi quarchi cosa avissi a po’ sùbbitu doppu fari ’na ràpida anàlisi pi capiri si ha avutu sensu aviri liggiutu chiddu ca si ha liggiutu. Si sparmiassiru giganteschi frammenti di vita sprecata!
Scusatimi pi sta ’mpruvisa parvenza di prufunnità involuntaria. Oggi, lu giuru, avrìa tantu vulutu essiri sulu banali. Ma nuddu è perfettu.

Roberto Quaglia