
 |
SRESONÂ AL È RESONEVUL
Cjâr Maurizio Costanzo Show,
no sta sperâ di cjatâ resonevulece in ogni mê letare. Ce che in mût elegant si fâs biel dal titul di "resonevul" e je cuasi simpri la ripetizion vîl di schemis doprâts fin masse. Nol è mai coragjo tal dî frasis e concets fats, come che a son cuasi simpri i argoments resonevui. L'unic valôr de resonevulece e je la praticitât. La resonevulece e je pratiche parcè che in font e je condividude, almancul dai jessis umans che a pensin. I jessis umans che a reagjissin, chei che no pensin ma simplicementri a reagjissin al ambient come cualsisei tropisim, no nus interessin e nancje nô no ur interessìn a lôr, tant al è vêr che di sigûr no stan leint o percepint in altre maniere chestis peraulis, parcè che lôr no lein altri che cualchi titul achì e là. Nus plâs pensâ a nô come ai umans che a pensin, e se nol è vêr che nus plâs, al è dut câs vêr che chest mi plâs a mi, e lu dîs cence pôris. E tra i umans che a pensin l'argoment de resonevulece al gjolt di cualchi credit di masse. No stin a malintindisi. A mi mi plâs la resonevulece. E je utile. Ma le critichi parcè che e je noiose, e soredut parcè che nus ingjane. E je noiose parcè che e ripet fin ae muart i siei dogmis, tignûts sù de sô nature resonevule.
La resonevulece e imponarès, a cui che al vès voie di scrivi alc altri che cualchi poesiute criptiche di merde, di disvuluçâ cun sapience frasis calibradis cun cure tai lôr significâts clârs e platâts, frasis confrontadis cun misure te ment, tal at dal scrivi o pôc prime o pôc dopo, cu la imagjin che si à de culture coletive dal contest uman che si è part. La resonevulece e sugjerìs di pensâ, cuant che si scrîf, ai letôrs che si rivolzisi, par risultâur comprensibii, e ancje plasevui o displasevui seont lis propriis intenzions, lassant di bande come se nol fos impuartant il concet de proprie libertât totâl e cosmiche tal scrivi, invezit, dal dut cualsisei robe che i vignìs tal cjâf, cun disinteres totâl par cui o par ce che une dì al learà chestis frasis o ben no.
La resonevulece e sconsee a cui che al scrîf di scrivi par se, a so ûs e consum, cun dispreç totâl di cualsisei considerazion resonevule su la comercializabilitât di ce che al sta scrivint. Tal moment che si ten un cualsisei cont di cui che al learà ce che si scrîf, ve che si è comerciâi. Si cîr di smerçâ il propri pinsîr a altris, pôc impuarte se al è in cambi di bêçs o di aprovazion, dôs valudis diferentis dal stes compuartament di marcjadant.
Tra l'altri, scrivint par se tal disinteres assolût viers di cui che al vès mai di lei dut chest, a son doi svilups pussibii de situazion pal câs che cualchidun che nol sedi l'autôr si cjati po a lei "dut chest":
Tal prin câs (il plui frecuent), il scrit no i plâs e alore al smet o ben piês par lui.
Tal secont câs i plâs, e alore al continue a lei, content di scrocâ cussì cualchi pinsîr che l'autôr al veve scrit par se e di sigûr no par lui.
Come che si viôt, nol è nissun pericul. Cui che si vûl meti a scrivi dome par se al à però di evitâ di contâsi la bale di volê scrivi dome par se cuant che di scuindon invezit al spere che cualchidun po al lei ce che lui al varès scrit dome par se, e al mostri magari ancje di preseâlu. In chest câs l'autôr al è un insigûr o ben un vîl, e probabilmentri al larà incuintri a frustrazions che a brusin.
E nol vâl nancje il fat di scrivi alc par se e po cirî di no fâlu lei a nissun. Parcè mai no varessial di fâlu lei a nissun? Se si à scrit alc dome par se di sigûr no si ten in nissun cont il judizi che altris a podedin o a vuelin dâ di chel scrit. Se no ur plâs a son afârs lôr. E se ur plâs ancje. Se si ten cont dal judizi di altris, no si à scrit par se. Si à scrit in mût resonevul e di marcjadant, cence intindi par "di marcjadant" nuie di negatîf.
Il fat che jo mi sedi fermât cussì a dilunc su chest argoment, lassant intindi tra lis riis che no stoi scrivint par altris che no sedin jo (di fat jo o soi za dutis lis personis che vuê mi bastin - doman o viodarìn), al somearès sugjerî che jo o vueli convinci cualchidun o in ogni câs menâlu, cun ducj chescj argoments, a capî la essence di ce che o stoi intindint dî. Se o ves volût dimostrâ che pardabon no mi 'nt impuarte nuie di cui che al sta leint chestis riis, o varès vût di jessi ancjemò plui caotic e incomprensibil e sconclusionât di trop che o soi stât in ogni câs compagn in part. O varès vût di scrivi... ben insome, fâ un grum di robis che cumò no mi vegnin tal cjâf e no ai nissune voie di sfuarçâmi parcè che di fat no mi 'nt impuarte nuie. Il fat che jo no vedi fat dut chest (cualsisei robe che chest "dut chest" al sedi o al podedi jessi), al dimostre duncje che in mût coerent jo no volevi par nuie dimostrâ che no mi 'nt impuarte nuie come che di fat no mi 'nt impuarte, e dimostrantlu par fuarce al distrûç e al anule tal stes timp il valôr di cheste dimostrazion, e distrusintle le torne a meti, cussì tornantle a distrugi e a meti par une cuantitât infinide di voltis, come che in ogni bon paradòs che si rispieti possibilmentri al sucêt o ben no.
Al è buf che par trop che si cerchi di abolî ogni resonevulece tal lâ indevant dai propris pinsîrs, la ment no sta mai al zûc e cualchi parvence di sens mieç complet si mostre compagn ae realtât. Insome, par novante personis che a judicaressin cun reson ce che o ai scrit fin cumò un vaniloqui intortiât di une fature nancje ecelse, o soi pront a scometi che une desene di mats o pôcs di mancul a insorzaressin cuintri di chest judizi, cun argomentazions che no m'interessin e duncje no int fevelarai achì. Duncje, se o fasês part dai novante, sêtmi grâts di vêus cumò dât il confuart de conferme che o sês perfetementri normâi, ben contignûts te maiorance che come che nus insegnin e à simpri reson. Se o fasês part dai dîs, sêtmi grâts pai motîfs che o savês perfetementri di bessôi, cence che us ai vedi di ripeti jo.
Ma o noti un ritorn preocupant di resonevulece tal gno sproloqui, e duncje le planti subit li prime che al sedi masse adore.
Roberto Quaglia
La opare "Cjâr Maurizio Costanzo Show...", dute o in part, e pues jessi leiude, discjamade sul computer, stampade e copiade cence limits, dome par ûs personâl. Ducj i tescj e lis ilustrazions a son proprietât di Roberto Quaglia e no puedin jessi doprâts dal dut o in part cence autorizazion. Il progjet grafic e lis componentis grafichis di chestis pagjinis a son proprietât riservade di Roberto Quaglia. La opare "Cjâr Maurizio Costanzo Show...", dute o in part, no pues jessi metude in vendite a nissun titul cence autorizazion prime.
© 1994-2000 Roberto Quaglia.
|