
 |
SRAGIONARE È RAGIONEVULE
Caru Maurizio Costanzo Show,
un sperare de truvare ragionevolezza intra ogni littera mia. Chiru chi elegantemente si fregia du titulu de "ragionevule" è quasi sempre a vile ripetizione de schemi abusati. Un c'è mai curaggiu intra l'esternazione de frasi e cuncetti fatti, cumu l'argomenti ragionevuli quasi sempre su'. L'unicu valure da ragionevolezza è a praticità. A ragionevolezza è pratica pecchì fundamentalmente spartuta, armenu de l'esseri umani pensanti. L'esseri umani reagenti, chiri chi un pensanu ma semplicemente reagiscianu all'ambiente cumu qualunque tropismu, un n'interessanu e mancu nue interessamu a iddi, tantu è veru chi certu un stannu leggennu o percepennu diversamente chisti parole, pecchì iddi un leggianu atru chi quarche titulu ccà e llà. Ni piace pensare a nue cumu all'umani pensanti, e si un è veru chi ni piace, è però veru chi chistu piace a mia, e u dicu senza timuri. E tra l'umani pensanti l'argomentu da ragionevolezza gode de quarche creditu de troppu. Un equivocamu. A mia piace a ragionevolezza. È utile. Ma a criticu pecchì è noiosa, e suprattuttu pecchì ni 'mbroglia. È noiosa pecchì ripete alla morte i dogmi sui, sustenuti da natura sua ragionevule.
A ragionevolezza imponissa, a chine vulissa scrivere atru chi quarche poesiola criptica de merda, de srotolare sapientemente frasi accuratamente calibrate intra i significati loro lampanti e reconditi, frasi misuratamente cunfruntate mentalmente, all'attu da scrittura o pocu prima o pocu doppu, ccu l'immagine chi si tene da cultura collettiva du cuntestu umanu de cui si è parte. A ragionevolezza suggerisce de pensare, quannu si scrive, ai letturi a cui ci si rivolge, ppe risultare ad iddi comprensibili, e puru piacevuli o spiacevuli secunnu i intenzioni proprie, lassannu perdere cumu si un fussa 'mportante u cuncettu da libertà propria totale e cosmica intru u scrivere, 'nveci, assolutamente qualunque cosa a unu ci venissa 'n menta, ccu disinteresse totale ppe chine o ppe chi cosa nu jornu leggerà chisti frasi oppuru no.
A ragionevolezza sconsiglia a chine scrive de scrivere ppe se, a propriu usu e cunsumu, 'n dispregiu totale de qualunque ragionevule cunsiderazione supra a commerciabilità de chiru chi sta scrivennu. Intru u mumentu chi si tene qualunque cuntu de chine leggerà chiru chi si scrive, eccu chi si è commerciali. Si circa de smerciare u pinsieru propriu all'atri, pocu 'mporta si è 'n cangiu de sordi o de approvazione, dui valute diverse du stessu atteggiamentu mercantile.
Tra l'atru, scrivennu ppe se intru l'assolutu disinteresse versu chine avissa mai de leggere tuttu chistu, si dunanu dui sviluppi pussibili da situazione ppe u casu chi quarcunu chi un è l'auture si trova pue a leggere "tuttu chistu":
Intru u primu casu (u cchiù frequente), u scrittu un ci piace e allura smette oppuru peggiu ppe illu.
Intru u secunnu casu ci piace, e allura cuntinua a leggere, cuntentu de scroccare accussì certi pinsieri chi l'auture avìa scrittu ppe se e de sicuru no ppe illu.
Cumu si vida, un c'è nullu periculu. Chine si vò mintere a scrivere sulu ppe se ha però de evitare de si cuntare a balla de vulire scrivere sulu ppe se quannu segretamente 'nveci spera chi quarcunu pue legge chiru chi illu avissa scrittu sulu ppe se, e mustra magari puru de l'apprezzare. Intra chistu casu l'auture è n'insicuru oppuru nu vigliaccu, e probabilmente jirà 'ncontru a frustrazioni chi bruscianu.
E un vale mancu u fattu de scrivere quarche cosa ppe se e pue circare de un u fare leggere a nullu. Pecchì mai un s'avissa de fare leggere a nullu? Si s'è scrittu quarche cosa sulu ppe se de sicuru un si tene 'n nullu cuntu u giudiziu chi atri pònnu o vuonnu esprimere de chistu scrittu. Si un ci piace su' fatti loro. E si ci piace puru. Si si tene 'n cuntu u giudiziu de l'atri, un s'è scrittu ppe se. S'è scrittu 'n modu ragionevule e mercantile, senza ppe "mercantile" intennere nente de negativu.
U fattu chi iu mi sugnu fermatu accussì a longu supra chistu argomentu, alludennu tra i righe chi un sto scrivennu ppe atri chi un su' iu ('n effetti iu sugnu già tutti i persune chi oje mi bastanu - dumane viderimu), parissa suggerire chi iu vuogliu cunvincere quarcunu o comunque u purtare, ccu tutti chisti argomenti, a capire l'essenza de chiru chi sto vulennu dicere. Si avissa vulutu dimustrare chi veramente un me ne frega nente de chine sta leggennu chisti righe, avissa avutu de essere ancora cchiù caoticu e incomprensibile e sconclusionatu de quantu iu sugnu comunque statu u stessu 'n parte. Avissa avutu de scrivere... beh insomma, fare nu saccu de cose chi mo un mi venanu 'n menta e un tegnu nulla gulìa de mi sforzare pecchì effettivamente un me ne frega nente. U fattu chi iu un aju fattu tuttu chistu (qualunque cosa chistu "tuttu chistu" è o pò essere), dimustra allura chi coerentemente iu un vulìa ppe nente dimustrare chi un me ne frega nente cumu effettivamente un me ne frega, e dimustrannulu inevitabilmente distrugge e annulla allu stessu tiempu u valure de chista dimostrazione, e distruggennula a ripristina, accussì ridistruggennula e ripristinannula ppe na quantità infinita de voti, cumu intra ogni bonu paradossu chi si rispetta possibilmente succede oppuru no.
È buffu chi ppe quantu si circa de abolire ogni ragionevolezza intru u procedere de i pinsieri propri, a menta un sta mai allu jocu e quarche parvenza de sensu larvatamente cumpiutu s'affaccia u stessu alla realtà. Insomma, ppe novanta persune chi giustamente giudicassaru chiru chi aju scrittu finu a mo nu vaniloquiu stortu de fattura mancu eccelsa, sugnu prontu a scommettere chi na decina de pacci o pochi de menu insorgissaru contra chistu giudiziu, ccu argomentazioni chi un m'interessanu e allura un ni parlerò ccà. Allura, si faciti parte de i novanta, siti grati a mia de v'avìre mo datu u cunfortu da cunferma chi siti perfettamente normali, solidamente cuntenuti intra a maggioranza chi cumu ni 'mparanu tene sempre ragione. Si faciti parte de i dece, siti grati a mia ppe i motivi chi perfettamente sapiti de suli, senza chi vu aju de ripetere iu.
Ma notu nu ritornu preoccupante de ragionevolezza intru u sproloquiu mie, e allura a chiantu subitu llà prima chi è troppu prestu.
Roberto Quaglia
L'opera "Caro Maurizio Costanzo Show...", tutta o 'n parte, pò essere letta, scaricata supra u computer, stampata e copiata senza limiti, sulu ppe usu personale. Tutti i testi e i illustrazioni su' proprietà de Roberto Quaglia e un pònnu essere usati sani o 'n parte senza permissu. U progettu graficu e i componenti grafiche de chisti pàgine su' proprietà riservata de Roberto Quaglia. L'opera "Caro Maurizio Costanzo Show...", tutta o 'n parte, un pò essere misa 'n vinnita a nullu titulu senza permissu prima.
© 1994-2000 Roberto Quaglia.
|