
 |
FRASIS FATIS E CONCETS FATS
Cjâr Maurizio Costanzo Show,
si alût dispès a cualchidun che al fevele par "frasis fatis", dispès furnint cheste allusion di une acezion negative. Cualchidun si è divertît a fâ ironie su chest, metint dongje a regule di art dialics fats dome di frasis fatis. Ma no son dome lis frasis fatis.
A son, prime di dut, lis "peraulis fatis". Tipic di une frase fate al è che e torne simpri compagne o cun variazions minimis. Par esempli: I zovins di vuê no àn plui rispiet. Ben, pal stes motîf, dutis lis peraulis a son "fatis", parcè che a tornin simpri compagnis. Stant che al è cussì par dutis lis peraulis, no i badìn. Cualchi incunvignent al nas cuant che o volìn intindi alc che nissune peraule esistente e pues rapresentâ, par esempli une nestre cualchi invenzion - materiâl o concetuâl. No podint simplicementri "ripeti" la solite peraule che e ten dentri ce che o volìn dî, si cjatìn in dificoltât. E se o inventìn une peraule gnove al nas il probleme di jessi capîts, parcè che no si trate di une peraule "fate", e no vintle mai sintude nissun nol capìs il so significât.
A son duncje lis peraulis fatis, che cualchi volte a componin lis frasis fatis, e po...?
Po a son i "concets fats". Lôr a son plui dificii di identificâ, stant che a nassin dal insiemi di frasis no par fuarce "fatis", e ancje jessint in sostance simpri compagns, no àn une forme uniche e che si pues ricognossi. Tipic di un concet fat e je la evidence che nol è nassût tal pinsîr di cui che lu dîs, ma che al è dome rimbalzât di lui, vignint di fûr, come che evidentementri al sucêt za cu lis frasis fatis.
Al è teribil, anzit normâl, ma ducj o resonìn in grandissime prevalence par concets fats. Cuant che o disìn une opinion che o crodìn nestre, o ripetìn cuasi simpri ce che di tantissims altris al è za stât dit, dispès une vore miôr che di nô. Ma parcè fevelio di "nô"? Mi displâs par "vualtris", ma jo mi tiri fûr, no parcè che la prevalence dai miei pinsîrs no sedi fate di concets fats, (e jo o sai ben che lu è parcè che al è cussì par ogni jessi uman), ma parcè che une part dai concets che mi zirin te cogome no a son concets fats. E o fâs l'esempli di dute cheste riflession sui concets fats, che no ai let o sintût di nissune bande e o ai vût di pensâmale dute di bessôl.
Si è duncje braurôs des propriis opinions, ma lis opinions no son propriis, si difindin cun tignince lis propriis ideis che no son propriis... ma di dulà vegnino dutis chestis opinions e ideis che no son nestris ancje se nus semee che lu sedin e che nus fasin fevelâ par concets fats? Ben, nus vegnin des personis che o fevelìn cun lôr, naturalmentri (al è stât cussì di simpri), e... de television.
Scoltant dôs personis discuti o barufâ di politiche si sintarà, piorade te forme, dute chê schirie di concets fats che o tornarìn a cjatâ in cualsisei program politic televisîf. La diference tra une persone e chê altre si ridûs ae composizion diferente dal cocktail di concets fats che ognun al ospite te proprie ment.
Dut chest nol è particolarmentri negatîf. Al pues risultâ noiôs, ma al è un concet fat avonde stupit sostignî che al sedi negatîf. I concets fats a son in cert sens archetips, e come tâi par fuarce comuns a grandis cuantitâts di personis. Al è cussì che e funzione la comunicazion tra jessis umans. Se no comunicassin doprant in grandissime prevalence concets fats, la plui part des voltis no rivaressin par nuie a capîsi un cun chel altri.
Dut câs, ognun dai milions e milions di pas singui tal progrès culturâl che tai milenaris nus à puartâts a distinguisi simpri di plui di chei altris nemâi, al è stât fat in virtût de capacitât di dutis chês personis che no si son contentadis di resonâ par concets fats, e a àn par conseguence fat evolvi ancje cualchi concet origjinâl lôr. No jessi sodisfats di pensâ dome tai tiermins dai concets fats ancje se necessaris al è duncje il prin pas par contribuî ae evoluzion de specie umane.
Sdrumâ in mût sistematic ducj chei che si tirin fûr de usance confuartante di resonâ par concets fats, invezit, al vûl dî agjî in direzion contrarie ae evoluzion dal jessi uman.
I concets fats a son indispensabii, parcè che a permetin aes personis di comunicâ a un nivel di realtât acetabil (cualsisei robe che cheste frase scure e podedi significâ).
I concets origjinâi a coventin invezit dome al progrès de umanitât, duncje no a son indispensabii, ancje se a son une vore auspicabii.
O acenarai ae fin a ce che par me al è il zimbel dai concets: il concet fat mascarât di concet origjinâl. Ce patetisim che al suscite in me la ostentazion braurose e oscene di un concet presunt origjinâl, presunt "gnûf", presunt "autentichementri propri", presunt "inteligjent" o ancjemò piês "gjeniâl", in realtât evidentementri "fat", cioè preconfezionât, precuet e stracuet. Il concet fat nol è in se negatîf. Ma al devente ridicul e patetic cuant che al vante di jessi ce che nol è, cioè un concet gnûf e origjinâl. Il jessi uman al mostre lis sôs miseriis mancul dignitosis cuant che al presum di jessi o di fâ ce che nol è e nol fâs.
Ricjapitulant: La frase fate e je cence dubi la cuintessence di un concet fat, ma si puedin dî concets fats ancje cence doprâ lis frasis fatis. Ducj chei che si compiasin di no fevelâ par frasis fatis, che a analizin i lôr concets par verificâ se a son fats o mancul. Se us da fastidi analizâ i vuestris concets, cjapait di mire chei di chei altris. Cirît di capî trop di un concet al è il prodot de ment che lu à dit, e trop al è invezit la pure ripetizion di argoments za sintûts in dutis lis salsis, duncje ce che jo o clami un concet fat.
Par vuê al è dut. Scusaitmi se no mi soi tignût ai concets fats, e scusaitmi ancjemò di plui se invezit lu ai fat.
Roberto Quaglia
La opare "Cjâr Maurizio Costanzo Show...", dute o in part, e pues jessi leiude, discjamade sul computer, stampade e copiade cence limits, dome par ûs personâl. Ducj i tescj e lis ilustrazions a son proprietât di Roberto Quaglia e no puedin jessi doprâts dal dut o in part cence autorizazion. Il progjet grafic e lis componentis grafichis di chestis pagjinis a son proprietât riservade di Roberto Quaglia. La opare "Cjâr Maurizio Costanzo Show...", dute o in part, no pues jessi metude in vendite a nissun titul cence autorizazion prime.
© 1994-2000 Roberto Quaglia.
|