nun sperà 'e truvà raggionevolezza 'n ogne lettera mia. Chello ca elegantemente se fregia d''o tìtulo 'e "raggionèvole" è quase sempe 'a vile ripetizione 'e abbusate scheme. Nun ce sta maje curaggio dint'â esternazione 'e frase e cuncètte fatte, quale 'e argumiente raggionèvole quase sempe sò. ll'ùneco valore d''a raggionevolezza è 'a praticità. 'A raggionevolezza è pràteca pecché fondamentalmente cundivisa, almeno d''e essere umane penzante. 'E essere umane reagente, chille ca nun pènzano ma semplicemente reagìscono a ll'ambiente comme qualunque tropismo, nun ce 'nteressano e manco nuje 'nteressammo a lloro, tant'è overo ca certo nun stanno liggenno o percependo altrimenti ste parole, pecché lloro nun lèggono ato ca quacche tìtulo ccà e llà. Ce piace penzà a nuje comme a 'e umane penzante, e si nun è overo ca ce piace, è tuttavia overo ca chesto piace a me, e 'o dico senza timore. E tra 'e umane penzante ll'argumiento d''a raggionevolezza gode 'e quacche crèdeto 'e troppo. Nun equivocammo. A me piace 'a raggionevolezza. È ùtile. Ma 'a crìteco pecché è nuiosa, e suprattutto pecché ce 'nganna. È nuiosa pecché ripete â morte 'e dogme suoje, sustenute dâ natura raggionèvole propia.
'A raggionevolezza imporrìa, a chi vulesse scrìvere ato ca quacche crìpteca poesiola 'e mmerda, 'e srotolà sapientemente frase accuratamente calibrate dint'a 'e significate lampante e recòndete lloro, frase mesuratamente confruntate mentalmente, a ll'atto d''a scrittura o 'nu poco primma o 'nu poco doppo, cu 'a immàggine ca se tène d''a cultura collettiva d''o cuntesto umano 'e cui se è parte. 'A raggionevolezza suggerisce 'e penzà, quanno se scrive, a 'e letture a 'e quale ce se rivòlge, pe risurtà a lloro comprensìbbele, nonché piacèvole o spiacèvole a seconda d''e intenzione propie, tralascianno comme si nun fosse 'mpurtante 'o cuncètto d''a totale e còsmeca libbertà propia dint'ô scrìvere, 'mméce, assolutamente qualunque cosa a uno venesse 'mmente, cu totale disinteresse pe chi o pe che cosa 'nu juorno leggarrà ste frase oppure no.
'A raggionevolezza scunziglia chi scrive 'e scrìvere pe sé, a propio uso e cunzumo, 'n totale disprezzo 'e qualunque raggionèvole considerazione ncopp'â commerciabilità 'e chello ca sta scrivenno. Dint'ô mumento 'n cui se tène 'nu qualunque cunto 'e chi leggarrà chello ca se scrive, ecco ca se è commerciale. Se cerca 'e smercià 'o penziero propio a ate, poco 'mporta si sia 'n càmmio 'e denaro o 'e approvazione, doje diverse valute d''o medèsemo atteggiamento mercantile.
Tra ll'ato, scrivenno pe sé dint'ô assoluto disinteresse verzo chi avesse maje 'a lèggere tutto chesto, se danno duje possìbbele sviluppe d''a situazione p''o caso ca quaccheduno ca nun sia ll'autore se trova po' a lèggere "tutto chesto":
Dint'ô primmo caso ('o cchiù frequente), 'o scritto nun lle piace e allora fernisce oppure peggio pe isso.
Dint'ô secondo caso lle piace, e allora cuntinua a lèggere, cuntiento 'e scruccà accussì certe penziere ca ll'autore aveva scritto pe sé e certamente nun pe isso.
Comme se vede, nun ce sta nisciun perìculo. Chi se vo' mèttere a scrìvere sulamente pe sé add'à però evità 'e se cuntà 'a balla 'e vulé scrìvere sulamente pe sé quanno segretamente 'mméce spera ca quaccheduno po' legge chello ca isso avarrìa scritto sulamente pe sé, e mostra fórzo pure 'e ll'apprezzà. 'N stu caso ll'autore è 'n insicuro oppure 'nu vile, e probabilmente jarrà 'ncontro a brucante frustrazione.
E nun vale manco 'o fatto 'e scrìvere quaccosa pe sé e po' cercà 'e nun 'o fa lèggere a nisciuno. Pecché maje nun avarrìa 'a se fa lèggere a nisciuno? Si se è scritto quaccosa sulamente pe sé 'e sicuro nun se tène 'n nisciun cunto 'o giudizio ca ate pòzzano o vògliano esprìmere 'e stu scritto. Si nun lle piace sò affare lloro. E si lle piace pure. Si se tène 'n cunto 'o giudizio 'e ll'ate, nun se è scritto pe sé. Se è scritto 'n muodo raggionèvole e mercantile, senza pe "mercantile" intènnere quaccosa 'e negativo.
'O fatto ca io me sia suffermato accussì a luongo ncopp'a stu argumiento, alludenno tra 'e righe ca nun sto scrivenno pe ate ca nun sìano me (defatte io songo già tutte 'e perzone ca oje me bàstano - dimane vedarrammo), pararrìa suggerì ca io voglia cunvìncere quaccheduno o comunque 'o cundurre, cu tutte sti argumiente, a capì 'a essenza 'e chello ca sto intennenno dìcere. Si avesse vuluto dimostrà ca overamente nun me ne frega niente 'e chi sta liggenno ste righe, avarrìa avuto 'a essere ancora cchiù caòteco e incomprensìbbile e sconclusionato 'e chello ca io sia comunque ugualmente 'n parte stato. Avarrìa avuto 'a scrìvere... embè 'nzomma, fa 'nu sacco 'e cose ca mò nun me vènono 'mmente e nun tengo nisciuna voglia 'e me sfurzà pecché effettivamente nun me ne frega niente. 'O fatto ca io nun àbbia fatto tutto chesto (qualunque cosa stu "tutto chesto" sia o pòzza essere), dimostra accussì ca coerentemente io nun vulesse pe niente dimostrà ca nun me ne frega niente comme effettivamente nun me ne frega, e dimostrànnolo inevitabilmente destrugge e annulla a 'o stesso tiempo 'o valore 'e sta dimostrazione, e destruggènnola 'a ripristina, accussì ridestruggènnola e ripristinànnola pe 'na quantità infinita 'e vvote, comme 'n ogne bbuono paradosso ca se rispetta possibbilmente avvène oppure no.
È buffo ca pe quanto se cerca 'e abolì ogne raggionevolezza dint'ô procèdere d''e penziere propie, 'a mente nun sta maje ô juoco e quacche parvenza 'e senzo larvatamente cumpiuto se affaccia ugualmente â realtà. 'Nzomma, pe novanta perzone ca giustamente giudicarrìano chello ca 'a me fino a mò vergato contorto vaniloquio 'e manco eccelsa fattura, songo pronto a ce scummèttere ca 'na decina 'e pazze o poche 'e meno insorgarrìano cuntra stu giudizio, cu argumentazione ca nun me 'nteressano e accussì nun ne parlarraggio ccà. Accussì, si facite parte d''e novanta, sìate a me grate 'e ve avé mò reso 'o conforto d''a conferma ca site perfettamente normale, solidamente cuntenute dint'â maggioranza ca comme ce 'mpàrano tène sempe raggione. Si facite parte d''e diece, sìate a me grate p''e mutive ca perfettamente sapite d'a sule, senza ca ve 'e àbbia 'a ripètere io.
Ma noto 'nu preoccupante ritorno 'e raggionevolezza dint'ô sproloquio mio, e accussì 'a pianto sùbbeto llà primma ca sia troppo priesto.

Roberto Quaglia