
 |
COMPRAIT IL GNO LIBRI ROMEN
Cjâr Maurizio Costanzo Show,
Ti mandi vuê la mê cussì clamade ultime fadie (in realtât e je dut altri che ultime, sot ducj i ponts di viste: dal gno pont di viste, difat, la mê ultime fadie e je in chest moment il gjest di scrivîti cheste letare). Ti mandi il gno ultin libri romen, che mi plasarès vignî a fâ cognossi te tô trasmission, o miôr, te trasmission che tu sês. Come che tu podarâs viodi, il gno ultin libri romen al è romen in dut e par dut. Soredut lis peraulis che al è plen a son rigorosementri romenis. Ancje lis frasis, cussì che leint lis peraulis dutis in file a àn ancje un otim sens complet dut romen. Ancje il romanç al è romen. Lis frasis romenis, difat, a son metudis in ordin intune secuence speciâl seont codiçs internazionâi cjolts di ducj i paîs ocidentâi o un pôc orientâi, e cussì leintlis seont cheste secuence standard si rive al romanç che lis frasis a formin. Romanç dut romen, pròpit. Po e je la cjarte, romene ancje jê e si viôt, tipichementri cuvierte di ingjustri tipichementri romen ancje lui.
Cjâr Maurizio Costanzo Show, ti mandi duncje il gno ultin libri romen, che al va cence dubi fat cognossi te trasmission che tu sês. Il fat che al sedi un libri romen, in aparence un svantaç, in Italie, al risulte invezit, a une analisi un fregul plui atente, un grandissim vantaç. Tant par scomençâ al è esotic e origjinâl. Cuâl talian aial za te sô librarie un libri cussì intensementri romen, cun peraulis, frasis, romanç, cjarte e ingjustri romens? Al è duncje il gno libri romen une novitât assolude tal nestri paîs, che e pues duncje vê un sucès grandissim. Il gno libri romen al à po un secont vantaç: al è stât scrit di un talian, cioè di me. I talians a tindin a preseâ chei altris talians, parcè che ur visin che a son talians ancje lôr, e chest, dal pont di viste di un talian normâl, al semee une fortune e un vantaç. Insome, il gno libri romen al tirarà i talians ancje cuntun pôc di nazionalisim san parcè che, ancje se al è romen, il merit di jessi stât scrit al è dut di un talian come lôr.
Po al è il discors dal presit, che al è romen ancje lui. Chest gno libri romen al coste dome 2800 liris. Ancje se dentri a son ben 100.000 peraulis romenis, il so cost, stant che al è romen, si pues tignîlu al presit di doi cafès, 2800 liris. Cui mai no si comprarèssial un mitic libri romen al presit di un cafè talian?
Ma il vantaç principâl dal gno libri romen al è che, stant che al è dut scrit par romen, il comprador talian nol à la plui piçule pussibilitât di leilu. Chest al è ce che al fasarà dal gno libri romen il sucès editoriâl dal an. No si comprin difat i libris par leiju, come che il famôs "Pendolo di Foucault" di Umberto Eco al dimostre (nissun di chei che lu comprarin o lu riceverin in regâl no lu lè mai). Il gno libri romen, dant pal so presit misar di 2800 liris la garanzie di no podê jessi let, al da al comprador la garanzie totâl di no patî tal avignî nissun sens di colpe par no vê let il libri. Capissistu la convenience, Cjâr Maurizio Costanzo Show? Comprâ un libri di Umberto Eco par no leilu al coste plui di 30.000 liris e al è l'efiet colaterâl dal sens di colpe plui o mancul vaghe pal fat che no si lu lei. Il gno libri romen al da il stes servizi a 2800 liris, metint tal presit un esotisim che no si pues dineâ e une azion di protezion cuintri il consum dai sens di colpe.
E po al è il vantaç di fâ biele figure cun eventuâi ospits romens. A ducj, prime o dopo te vite, i capite di vê ospits in cjase. In cheste epoche di grandis migrazions si intope simpri plui dispès in cualchi forest. La plui part des voltis si trate di un turist todesc o marochin o senegalês. Se a un ospit todesc i ufrîs une bire todescje, i fasarês di sigûr plasê ma no lu fasarês maraveâ; o vivìn difat tal marcjât comun. Se al ospit senegalês i mostrais braurôs il vuestri elefantut di len neri senegalês no no i fasarês di sigûr nissun plasê (se no vessis za vût l'elefantut us al varès vendût lui) e nancje no lu fasarês maraveâ; cuasi ducj i talians a àn oramai in cjase un elefantut senegalês. Ma se us capitàs di vê un ospit romen, ve che il vuestri investiment di 2800 liris intun colp us fasarès vuadagnâ il prestigji in plui de persone cosmopolite e colte a nivel internazionâl. Po tra l'altri il romanç che al è tal libri al è une vore biel e il vuestri ospit romen us al confermarès, pe vuestre sodisfazion ulteriôr di vêlu a so timp comprât.
Capissistu, duncje, Cjâr Maurizio Costanzo Show, parcè che al è cussì impuartant che tu ti dedis da fâ par fâ cognossi il gno libri romen?
Il so valôr za notevul al è ae fin rindût sublim di un paradòs aparent: il gno libri romen al esist par romen, ma no par talian, ancje se lu ai scrit regolarmentri par talian. Chest fat al rint l'ogjet che ti ai cumò mandât plen di significâts ulteriôrs che a mi mi scjampin, ma che no ti scjamparan a ti, e che in plui a puartin cuesits emblematics o altre marcjanzie compagne di utilitât publiche. Il paradòs al è naturalmentri dome aparent, parcè che ancje se dal gno libri romen nol esist il clon talian corispondent, al esist però il manoscrit. La nature dome aparente dal paradòs e je di chê altre bande ripaiade de esistence, daûr dal esempli dal gno libri romen che ti ai mandât, di un fenomen che mi rivuarde une vore plui larc e clamorôs di chest câs singul. Nissune des mês oparis plui grandis no je difat publicade in Italie, ma cuasi dutis, tra pôc, lu saran a l'ester. Altris otims libris che no si puedin lei, duncje, pai compradôrs talians di libris, che tirant dongje tai lôr salots lis mês oparis in esili a podaran dâsi une spruçade di culture internazionaliste, pe gjonde dai lôr eventuâi ospits forescj, e il rispiet e la invidie di chei talians. .
Roberto Quaglia
La opare "Cjâr Maurizio Costanzo Show...", dute o in part, e pues jessi leiude, discjamade sul computer, stampade e copiade cence limits, dome par ûs personâl. Ducj i tescj e lis ilustrazions a son proprietât di Roberto Quaglia e no puedin jessi doprâts dal dut o in part cence autorizazion. Il progjet grafic e lis componentis grafichis di chestis pagjinis a son proprietât riservade di Roberto Quaglia. La opare "Cjâr Maurizio Costanzo Show...", dute o in part, no pues jessi metude in vendite a nissun titul cence autorizazion prime.
© 1994-2000 Roberto Quaglia.
|