Ti spidisciu oggi la mia accussì ditta última fatica (’n realtà è tutt’àutru ca última, sutta tutti li punti di vista: dû miu puntu di vista, defatti, la mia última fatica è ’n stu istanti lu gestu di ti scriviri sta lettera). Ti spidisciu lu miu últimu libbru rumenu, ca mi piacissi a vìniri a fari canusciri ntâ tò trasmissioni, o megghiu, ntâ trasmissioni ca tu si’. Comu putrai vidiri, lu miu últimu libbru rumenu è rumenu ’n tuttu e pi tuttu. Suprattuttu li paroli di cui è tuttu chinu su’ rigurusamenti rumeni. Li frasi puru, accussì ca liggennu li paroli tutti di fila hannu puru n’ottimu sensu cumpiutu tuttu rumenu. Puru lu rumanzu è rumenu. Li frasi rumeni, defatti, su’ urdinati ’n ’na spiciali sequenza secunnu còdici internaziunali aduttati di tutti li paisi uccidintali o liggermenti urientali, pi cui liggennuli secunnu sta sequenza standard s’accedi ô rumanzu ca li frasi custituìscinu. Rumanzu tuttu rumenu, appuntu. Po’ c’è la carta, rumena puru idda e si vidi, tìpicamenti ricuperta di ’nchiostru tìpicamenti rumenu puru iddu.
Caro Maurizio Costanzo Show, ti spidisciu accussì lu miu últimu libbru rumenu, ca va senza dubbiu fattu canusciri ntâ trasmissioni ca tu si’. Lu fattu ca sia nu libbru rumenu, apparentimenti nu svantaggiu, ’n Italia, si revela ’mmeci, a ’na anàlisi appena cchiù attenta, nu grannissimu vantaggiu. Tantu pi accuminzari è esòticu e uriginali. Quali italianu già possèdi ntâ sò librerìa nu libbru accussì ’ntinsamenti rumenu, cu paroli, frasi, rumanzu, carta e ’nchiostru rumeni? È accussì lu miu libbru rumenu ’na novità assoluta ntô nostru paisi, suscettibbili accussì di ’ncuntrari nu grannissimu successu. Lu miu libbru rumenu havi po’ nu secunnu vantaggiu: è statu scrittu di n’italianu, cioè di mia. Li taliani tèninu a apprizzari li àutri taliani, pirchì ci arricòrdanu ca su’ taliani puru iddi, chistu, dû puntu di vista di nu nurmali italianu, appari comu ’na furtuna e nu vantaggiu. ’Nzumma, lu miu libbru rumenu adiscirà li taliani puru cu nu pocu di sanu naziunalismu pirchì, nonostanti sia rumenu, lu mèritu di essiri statu scrittu è tuttu di n’italianu comu a iddi.
Po’ c’è lu discursu prezzu, ca è rumenu puru iddu. Stu miu libbru rumenu costa sulu 2800 liri. Puru essennuci dintra bonu 100.000 paroli rumeni, lu sò custu, essennu rumenu, po’ vìniri cuntinutu ô prezzu di dui caffè, 2800 liri. Cu’ mai nun s’accattassi nu mìticu libbru rumenu ô prezzu di nu caffè italianu?
Ma lu vantaggiu principali dû miu libbru rumenu è ca, essennu tuttu scrittu ’n rumenu, lu cumpraturi italianu nun havi la mìnima possibbilità di lu lèggiri. Chistu è chiddu ca farà dû miu libbru rumenu lu successu editoriali di l’annu. Nun s’accàttanu defatti li libbra pi li lèggiri, comu lu famusu "Pendolo di Foucault" di Umberto Eco mostra (nuddu di chiddi ca l’accattàru o ricivìru ’n rialu mai lu liggiu). Lu miu libbru rumenu, furnennu ô sò mìsiru prezzu di 2800 liri la garanzìa di nun putiri vìniri liggiutu, offri ô cumpraturi la garanzìa tutali di nun suffriri ’n futuru di nuddu sensu di curpa pi nun aviri liggiutu lu libbru. Capisci la cunvinienza, caro Maurizio Costanzo Show? Accattari nu libbru di Umberto Eco pi nun lu lèggiri costa cchiù di 30.000 liri e c’è l’effettu cullaterali dû cchiù o menu vagu sensu di curpa pû fattu ca nun si leggi. Lu miu libbru rumenu offri lu stissu serviziu a 2800 liri, includennu ntô prezzu nu innegabbili esotismu e ’na azioni prutittiva contra lu lugòriu dî sensi di curpa.
Eppo’ c’è lu vantaggiu di fari bedda figura cu eventuali ospiti rumeni. A tutti, prima o po’ ntâ vita, capita di aviri ospiti ’n casa. ’N sta èpuca di gran migrazioni ci s’imbatti sempri cchiù spissu ’n quarchi furisteri. La cchiù parti dî voti si tratta di nu turista tidiscu o maruchinu o sinigalisi. Si a n’ospiti tidiscu uffriti ’na birra tidisca, ci faràiti certu piaciri ma nun lu stupiràiti; vivemu defatti ntô mercatu cumuni. Si a l’ospiti siniyalisi mustrati urgugghiusi lu vostru ilifantinu di lignu niru siniyalisi non ci faràiti certu nuddu piaciri (si nun avìssivu già avutu lu ilifantinu vi l’avissi vinnutu iddu) e mancu lu stupiràiti; quasi tutti li taliani hannu ormai ’n casa nu ilifantinu siniyalisi. Ma si vi capitassi di aviri n’ospiti rumenu, ecco ca lu vostru investimentu di 2800 liri improvvisamenti vi fruttassi l’addiziunali prestigiu dâ pirsuna cosmupòlita e colta a livellu internaziunali. Po’ tra l’àutru lu rumanzu cuntinutu ntô libbru è assai beddu e lu vostru ospiti rumenu vi lu cunfirmassi, pâ vostra cchiù granni suddisfazioni di l’aviri a sò tempu accattatu.
Capisci, accussì, caro Maurizio Costanzo Show, pirchì è accussì impurtanti ca tu t’adopiri di fari canusciri lu miu libbru rumenu?
La sò già notèvoli prigivulizza è ’nfini resa sublimi di n’apparenti paradossu: lu miu libbru rumenu esisti ’n rumenu, ma nun ’n italianu, puru avennulu ju rigularmenti scrittu ’n italianu. Stu fattu rendi lu oggettu ca t’aju ora ’nviatu chinu di significati ulteriuri ca a mia sfùjinu, ma ca accussì nun farannu a tia, forieru puru di quisiti emblimàtici o àutra simìli mercanzìa di pùbblica utilità. Lu paradossu è ovviamenti sulu apparenti, pirchì puru nun esistennu dû miu libbru rumenu lu currispunnenti clone italianu, ni esisti tuttavia lu manuscrittu. La natura puramenti apparenti dû paradossu è d’àutru cantu risarcita dâ esistenza, darreri ô esempiu dû miu libbru rumenu ca t’aju ’nviatu, di nu fenòminu ca mi riguarda assai cchiù vastu e clamurusu di stu sìngulu casu. Nudda di li mei òpiri magghiuri è defatti edita ’n Italia, ma quasi tutti, fra pocu, lu sarannu a l’esteru. Àutri ottimi libbra illeggibbili, accussì, pî cumpraturi taliani di libbra, ca cullizziunannu ntê sò salotti li mei òpiri ’n esiliu putrannu si dari ’na spruzzata di cultura internaziunalista, pâ gioia dî sò eventuali ospiti furisteri, e lu rispettu e l’invidia di chiddi taliani. .

Roberto Quaglia