
 |
VA' PENSIERO
Caro Maurizio Costanzo Show,
t't'ìnd cont ch't si virtualmènt immortêl? A dëgh "virtualmènt" par n'fêla tròp fura dal bulacco. Mo tot quèl ch'e' suzèd in te u n'spariès brisa suzedènd, cumè ch'u j suzèd a i fenòmen clàssic. Ogni istânt dla tu manifestazion l'è cunservê fedelmènt cun la procedura màgica dla videoregistrazion, e u n'è brisa sutarê int e' pasê. Gnint u s'impedès ad pinsê che fra quèlch milèni agl'imàgin e i discùrs ch't si fat ad lòr i sia mustrê int un muséo eletrònic de' futur... (cs'e' vô dì un muséo eletrònic? quèl ch'a j ò scrèt l'è una banalitê imâna; l'eletrònica l'è d'adës incù cumè e' mutór a vapór u l'era int e' sècul pasê; fra mièra d'èn...) ...o piotòst, int un muséo mentêl, qualsiasi quël ch'e' pòsa èsar st'invenzion. Gnint u s'impedès difati d'imaginê che int un futur ch'u n's'sà quând tot quèl ch'l'è stê scrèt, cantê, sunê, fat in imàgin int e' pasê, e' pòsa èsar direttamènt a pôrta dla ment d'ognun sól cun l'esercìzi dla su intenzion. In êtri parôl, cun dal tècnich che par nó adës u n's'pò gnânca imaginê (cumè ch'u n's'pudèva ad sicur imaginê al tècnich informàtichi par la zènta de' Medioevo), una persòna la pudrà "vdé" direttamènt int e' su zarvèl qualsiasi film ch'e' sia mai stê girê, sintì qualsiasi canzon che chiunque l'àbia mai cantê, parfèna "campê", in manìr ch'a n'cnusèm incóra, fat suzèst di sècul prèma. Quèl ch'a so drì a dì u n'è bèle adës gnint ad tròp straurdinêri, quând i prugrès int e' svilùp dal tècnich ad realtê virtuêla i lâsa capì ch'la cminzarà un'êra d'esistènza ènca dl'intìr fitizia bèle par e' prinzipi de' sècul ch'e' vèn, cioè fra mènch d'un decèni. Sicòm che int la stôria umâna la realtê l'à sèmpar scavalchê la piò sfrenêda dal fantasì, u s'in pudrè tirê fura che qualsiasi ipòtesi che la ment umâna la pòsa imaginê par e' futur dla nòstra spècie, basta ch'la n'sia in contrast totêl cun al lèž dla natura piò evidènti, la sia destinêda no sól a avverês, mo a èsar parfèna scavalchêda da i fat vèr.
L'è quèst un pinsir dabòn intrigânt, caro Maurizio Costanzo Show. Sól int stu sècul dal fôl ad scritùr i s'entušiasma a scrìvar ad quèl che e' futur l'ufrirà a l'umanitê. I s'è sbajê, int i sècul e int i sècul pasê, tòti al persòn piò dòti, sénza mai prevèdar un futur sostanzialmènt divêrs da e' su presènt. I s'sbajarà alóra ènca tot i scritùr ad fantascènza d'adës, e ènca lòr, cumè chi ch'i è vnù prèma d'lòr, par difèt? Al su stôri bèle da par lòr mirabolânti e incredìbil, al sarà superêdi da una realtê incóra piò alucinânta? Se la lògica la n'è un'opinion, e' sarà acsè, ènca se la nòstra ment la s'opôn naturalmènt a st'ipòtesi, sénza acetê che da quèlch pêrt (int stu chês int e' "futur") u j pòsa èsar dagl'incògnit ch'la n'pòsa tnì sota e' su cuntròl.
T si alóra virtualmènt immortêl, caro Maurizio Costanzo Show. Quèl ch'u s'dis in te l'arimbumbarà dal vôlt, aquè e alà, int al ment d'individui ch'i à incóra da nàsar. Cumè ch'a nó u s'arìva agl'imàgin sfuchêdi e acelerêdi in biânch e nìgar di prèm film d'inizi sècul, pini ad protagonesta ch'i à smès d'èsar da un bël pô ad temp, e' farà un dè tenerëza o êtri sensazion a quelcadun e' fat ad guardês al sequènz bidimensionêli dal tu trasmision, scultê i persunàg ch'i à campê in te ch'i torna a campê quèli ch'al parirà al su cunversazion assùrdi e vèci.
U j è quèl ad sovranaturêl int tot quèst. Gnint ch'e' suzèda in te u spariès. "Verba volant" u s'dšèva una vôlta. Par milèni, al parôl al n'à lasê tràz. Nè i gèst. Tot e' spariva suzedènd. D'adës in avânti, par quèl ch'u t'riguêrda, u n'sarà piò acsè. Ogni parulàza ad sgarbi l'è arstêda, ch'u s'pò ripruponla a l'infinì, da giudichê e ragiudichê fin a la fin di temp o dl'Òm o di suport duv' che te, Maurizio Costanzo Show, t si e t sarè registrê. Ogni manifestazion ad belëza, in te e int la tu trasmision, la n'è brisa stêda efìmera, l'esèst incóra, e la s'manifestarà quând ch'a l'ciamarèm int la manìra giosta. Par adës la manìra giosta l'è quèla ad rimandêla in onda, o rivdés una casèta registrêda. Un dè, cumè ch'a j avèm bèle dét, e' pudrà bastê sól la su intenzion. U s'andarà int i ricôrd audiovisìv coletìv cun di sfôrz mentêl cumpâgn a quì che nó nurmalmènt bèle tot i dè a druvèm par arcurdês quèl ch'a savèm. Par che temp, l'istruzion la sarà fôrsi dl'intìr stachêda da i lìbar, che int la fôrma d'incù i n'gn'sarà piò. (Prèma ad tot parchè u n'gn'sarà piò la chêrta. La chêrta la vèn difati fata da j èlbar e int e' cors de' sècul ch'e' vèn l'Umanitê la darà probabilmènt fònd a agl'ùltumi riserv ad fòresti ch'al resèst incóra incù e ogni tipo d'èlbar e' sparirà par sèmpar da la tèra e cun lò la chêrta. Par secònd la chêrta di lìbar ch'u j è adës la s'sarà decumpòsta da par lì, parchè acsè la fa la chêrta: l'aspèta un pô che quelcadun e' la lèža, pu, sénza dê fastidi, la s'decumpôn dop pôchi centinêra d'èn a e' masum, sparènd insèn a al parôl ch'a stêva int lì.) La cultura la cunsistarà int la capacitê ad truvê, int e' smišurê database ad tot e' scìbil digitalizê (o registrê in êtra manìra), infurmazion, imàgin e correlazion ad documènt. E' scìbil digitalizê (cumè ch'u m'pis adës ciamêl), e' sarà int un zért sèns un ambiènt mentêl, un ambiènt imèns e cumplichê. La difarènza tra l'ignurânt e la persòna ch'la sa e' sarà dêda da e' mèj o e' pèž imparê dal tècnich ch'al bšògna par districhês int lò. I piò inteligènt i imparerà dal tècnich piò cumplichêdi. La sarà, quèla ch'a sèm drì a fantastighê adës a la cunfuša, par fôrza un'esistènza tota mentêla. Quèst u n'sarà però par gnint una pérdita. Quèl ch'u s'suzedrà o u s'parirà d'suzèdas, u s'parirà a tot j efèt vèr e alóra d'fat e' sarà. Ènca al maladì e la môrt al sarà purtròp vëri ènca s'al n'e' sarà. Quèl che e' zarvèl l'è cunvèint fèrum ch'u j stia suzedènd, dabòn u j suzèd, cumprèša la môrt (dura lex, sed lex psicosomaticae). Mo i vantàg ad sta sucietê mentêla ch'la vnirà i sarà da tirê sò i ócc: l'èsar umân e' trascendrà par l'enèsima vôlta i su lìmit d'prèma, tnènd al su pasion, i su vizi d'animêl e al su tar genètichi inquadrêdi int un sistéma nôv sufisticadéssum che int la nòstra imaginazion adës e' pê a la cunfuša impusèbil e misterióš (cumè impusèbil e misterióš e' parirè e' nòstar sistéma ad vita d'adës a l'Òm Medievêl), mo che a j Òmn e al Dòn de' futur e' parirà sèmplizemènt - cumè ch'l'è sèmpar stê dop ogni scalèn ad svilùp - nurmêl, scuntê, e ènca nujós. Caro Maurizio Costanzo Show, la mi urazion d'incù d'nènz a te l'è finida. Ramèt i mi cuncèt a i pòsteri opùr nö e acsè sia.
Roberto Quaglia
L'òpera "Caro Maurizio Costanzo Show...", tota intìra o in pêrt, la pò ësar lèta, scarghêda int e' computer, stampêda e cupiêda sènza lèmit, sôl par ûs persunêl. Tot i tèst e al ilustraziôn i è pruprietà ad Roberto Quaglia e i n' pò ësar druvê tot intìr o in pêrt sènza autorizaziôn. E' prugèt gràfic e i cumpunént gràfic ad sti pàgin i è pruprietà riservêda ad Roberto Quaglia. L'òpera "Caro Maurizio Costanzo Show...", tota intìra o in pêrt, la n' pò ësar mesa in vèndita a niseun tìtul sènza autorizaziôn prèma.
© 1994-2000 Roberto Quaglia.
|