it të rende cont ch'it ses virtualment immortal? I diso "virtualment" për nen felo tròp fòra dël sac. Ma tut lòn ch'an ti a càpita a scompar nen capitand, com a càpita ai fenòmen clàssich. Minca istant ëd toa manifestassion a l'é fedelment conservà con la procedura màgica dla videoregistrassion, e a l'é nen sotrà ant ël passà. Gnente an vieta ëd pensé che tra quàiche milenni j'imàgin e discors ëd cui it consiste a sio esibì an un musé eletrònich dël futur... (còsa a veul dì un musé eletrònich? lòn ch'i l'hai scrit a l'é na banalità imensa; l'eletrònica a l'é atual ancheuj com ël motor a vapor a lo l'era ant ël sécol passà; tra mijàra d'agn...) ...o pitòst, an un musé mental, qualsëssìa còsa st'invension a podrà esse. Gnente an vieta an efet d'imaginé ch'an un imprecisà futur tut lòn ch'ant ël passà a fu scrit, cantà, sonà, rendù an imàgin, a peula esse diretament acessìbil a la ment ëd minca un midiant ël sol esercissi ëd soa intension. An d'àutre paròle, midiant técniche për nojàutri atualment inimaginàbij (com inimaginàbij sértament a furo le técniche informàtiche ai abitant dël medio evo), na përson-a a podrà "vëdde" diretament an sò servel qualsëssìa film a sia mai ëstàit girà, sente qualsëssìa canson chionque a l'abia mai cantà, adritura "vive", an modalità a nojàutri ancora ignòte, avveniment avnù sécoj prima. Lòn ch'i son drè a dì a l'é già nen adess gnente ëd tròp straordinari, quand ij progress ant lë svilup dle técniche ëd realtà virtual a lasso presagì l'inaugurassion d'n'era d'esistensa ëdcò antregament fitìssia già për l'ancamin dël pròssim sécol, visadì tra men d'un desenni. Dàit che ant la stòria uman-a la realtà a l'ha sempe scavalcà la pì sfrenà dle fantasìe, as na podrìa argui che qualsëssìa ipòtesi la ment uman-a a peula imaginé për ël futur ëd nòstra specie, purché nen an total contrast con le pì evidente dle lege ëd natura, a sia destinà nen mach a averesse, ma a esse adritura scavalcà dai event reaj.
A l'é sòn un pensé dabon intrigant, car Maurizio Costanzo Show. Mach an cost sécol bande ëd scritor as entusiasmo a scrive ëd lòn ch'ël futur a ofrirà a l'umanità. A falèisso, ant ij sécoj e ant ij sécoj passà, tute le përson-e pì dòte, mai prevedend un futur sostansialment diferent da sò present. A falran antlora ëdcò tùit ij scritor ëd fantasiensa contemporani, e ëdcò lor, com ij sò predecessor, për difet? Soe già ëd për sé mirabolante e incredìbij stòrie, a saran superà da na realtà ancora pì alucinanta? Se la lògica a l'é nen n'opinion, a sarà parèj, combin che nòstra ment as opon-a naturalment a st'ipòtesi, nen acetand che da quàiche part (an cost cas ant ël "futur") a-i peulo esse incògnite che chila a peula nen avèj sota sò control.
It ses donca virtualment immortal, car Maurizio Costanzo Show. Lòn ch'an ti a ven dit a rëssonerà dle vire, sà e là, ant le ment d'individ ch'a l'han ancora da nasse. Com a nojàutri a rivo le sfocà e acelerà imàgin an bianch e nèir dij prim film d'ancamin sécol, ìrte ëd protagonista ch'da longh temp a l'han chità d'esse, a farà un dì tenerëssa o d'àutre sensassion a quaidun ël fàit ëd vardesse le bidimensionaj sequense ëd toe trasmission, scoté ij përsonagi ch'a l'han vivù an ti rivive cole ch'a comparieran com soe assurde e superà conversassion.
A-i é quaicòs ëd soranatural an tut sòn. Gnente ch'an ti a càpita a scompar. "Verba volant" as disìa na vira. Për milenni, le paròle a l'han nen lassà trasse. Né ij gest. Tut a scomparìa capitand. D'adess an peui, për lòn ch'at riguarda, a sarà pì nen parèj. Minca parolassa ëd sgarbi a l'é restà, riproponìbil a l'infinì, giudicàbil e rigiudicàbil fin-a a la fin dij temp o ëd l'Òm o dij supòrt anté ti, Maurizio Costanzo Show, it ses e it saras registrà. Minca manifestassion ëd blëssa, an ti e an toa trasmission, a l'é nen ëstàita efìmera, a esist ancora, e as manifesterà quand i la ciamroma ant ël mòd oportun. Për ël moment ël mòd oportun a l'é col ëd rimandela an onda, o rivëddse na cassëtta registrà. Un dì, com già dit, a podrà basté soa sola intension. As acedrà ai ricòrd audiovisiv coletiv con sfòrs mentaj afin a coj ch'nojàutri normalment già tùit ij dì i dovroma për ricordé lòn ch'i savoma. Për col temp, l'istrussion a sarà miraco completament avulsa dai liber, che ant la forma d'ancheuj comsëssia a esistran pì nen. (Prima ëd tut përchè a esistrà pì nen la carta. La carta a ven an efet fàita da j'erbo e ant ël cors dël pròssim sécol l'Umanità a darà probabilment font a le ùltime riserve ëd foreste ch'ancheuj ancora a resisto e minca tipo d'erbo a scomparirà për sempe da la tèra e con chiel la carta. An second leugh la carta dij liber atualment esistent as sarà spontaneament decomponùa, dàit che parèj a fa la carta: a speta për un pòch che quaidun a la lesa, peui discretament as decompon dòp pòche sentin-e d'agn al màssim, scomparend ansema a le paròle soe inqualin-e.) La coltura a consistrà ant la capacità ëd trové, ant lë smzurà database ëd tut lë scìbil digitalisà (o altrimenti registrà), informassion, imàgin e corelassion ëd document. Lë scìbil digitalisà (com a mi adess am pias ciamelo), a sarà an un cèrt sens n'ambient mental, n'ambient imens e complèss. La diferensa tra l'ignorant e la përson-a còlta a sarà dàita da la mej o pes aquisission dle técniche necessarie a districhesse an chiel. Ij pì inteligent a amprendran técniche pì complesse. A sarà, cola ëd cui adess confusament i soma fantasticand, inevitabilment n'esistensa prètament mental. Sòn a sarà comsëssia për gnente na perdita. Lòn ch'an capiterà o ch'an smijerà capiten-e, an smijerà a tùit j'efet real e donca ëd fàit a lo sarà. Ëdcò maladìe e mòrt a saran maopurtròp reaj pur essend-lo nen. Lòn ch'ël servel a l'é fërmament convint ch'a-j staga capitand, efetivament a-j càpita, comprèisa la mòrt (dura lex, sed lex psicosomaticae). Ma ij vantagi ëd sta società mental ventura a saran eclatant: l'esse uman a trassendrà për l'enésima vira ij sò lìmit ëdnans, mantnend soe passion, ij sò vissi animaj e tare genétiche inquadrà an un neuv sofisticatìssim sistema che ant nòstra imaginassion adess confusament a compar com impossìbil e misterios (com impossìbil e misterios a comparirìa nòst atual sistema ëd vita a l'Òm Medieval), ma ch'a j'Òm e Fomne dël futur a comparirà sempliciament - com sempe a l'é stàit dòp minca scalin ëd svilup - normal, scontà, e ëdcò noios. Car Maurizio Costanzo Show, mia orassion d'ancheuj al cospet tò a l'é finìa. Riböta ij mè concet ai posteri o pura nò e parèj a sia.

Roberto Quaglia