i invito chionque a staga lesend ste righe, ch'a sia chiel o chila mas-cc o fumela o tùit doi o gnun dij doi, a nen pensé al sèss ëd chi ch'a l'ha scrit lòn ch'ti't ses lesend. Chi ch'a scriv, për ti ancheuj a l'ha nen sèss, ansi, chi ch'a scriv ancheuj a esist nen, për ti. A-i son mach ste paròle e ti it-je lese.
Gnun donca a l'ha scrit ste paròle. Ste paròle a rispécio un pont ëd vista asétich, lontan, asessuà, com col d'un estraterèstr ideal. Ecco, s'it veule pròpi imaginé quaidun ch'a sia ël responsàbil ëd lòn ch'ti't lese, considerme tò òspite estraterèstr.
I son donca virtualment un estraterèstr, gentilment ospità da toa ment e ij sò dintorn, visadì la società ëd cui it ses part. I conòsso nen ij vòstri concet ëd Bin e ëd Mal, dàit ch'i l'hai nen ij vòstri precossèt, e donca për evité ëd fé l'un o l'àutr i faso gnente, ma naturalment i parlo, e i descrivo lòn ch'i vëddo. I spero ëd nen fé dël Mal o dël Bin sempliciament parland, ma an fin dij cont a l'é l'ùnica licensa ch'i-m pijo.
Dal pont ëd vista estraterèstr, le consuetùdin sessuaj d'na società ch'as conòss nen a son un dj'argoment ëd pì efficace trastull. I parlerai antlora ëd lòn ch'ëd pì bufo i l'hai osservà an taj vòstre abitùdin.
Për còsmica decensa i intro nen ant ël particolar dij vòstri fìsich incastr amoros. I-m asten pura dal tòtament ripete tut quant a vojàutri perfetament nòto, për nen anojeve. An efet iv parlerai ëd lòn ch'i l'hai osservà dij vòstri comportament sessuaj nen quand a-i é un rapòrt sessual conclamà, ma quand a-i é nen.
Lòn ch'an mòd particolar a l'ha an efet tirà mia atension a l'é vòstra curiosa modalità ëd relassioneve tra un sèss e l'àutr pròpi quand a-i é total assensa ëd rapòrt sessual conclamà.
Evidentement a-i é gnente da dì ëd quand ij mas-cc e le fumele a son completament separà j'un dai j'àutri, fìsicament e sensorialment, dàit ch'antlora gnente tra mas-cc e fumele a càpita.
Ma pen-a ch'as ritreuvo a condivide ij midem spassi, ecco che la situassion a càmbia. Ëdcò s'as conòsso nen, mas-cc uman e fumele uman-e a l'han un recìproch comportament sessual. A fan visadì dle ròbe ch'a càuso efet ëd natura sessual an sù coj dël sèss opòst.
Taj efet a peulo naturalment esse piasèivoj o dëspiasèivoj, e a son an efet sempe o l'un o l'àutr o tùit doi.
Particolarment bufo, dal mè pont ëd vista estraterèstr, a son j'efet negativ. A l'é an efet la soferensa la facenda pì intrigant për chi ch'a la subiss nen, e a ven ëdcò la pì bufa quand ant le càuse ch'a la determin-a as cheuj l'element assurd e donca la natura grotesca. Dal mè pont ëd vista estraterèstr, cheuje ste ròbe a l'é un gieugh da fiòt estraterèstr.
Com a l'é ch'as registra un efet negativ? Beh, i podrìo dì ch'a-i é un efet negativ quand un mas-cc o na fumela, a càusa dla davzin-a presensa ëd quaidun dël sèss opòst, a preuva un sens ëd malèsser emossional. An quàich cas, i l'hai notà, a smija dabon che mas-cc e fumele ch'as conòsso nen a faso a gara për infligse a vicenda taj malèsser emossionaj.
Ël malèsser emossional pì frequentement provà dal mas-cc, trovand-se ant ij pressi ëd fumela, a l'é causà da la sempia osservassion dla fumela, spece s'ëd chila a son visìbij o evidensià ij genitaj, o taj zòne dël còrp ch'a fongo da arciam sessual. A l'é curios com a basta parèj pòch për causé malèsser emossional ant la magior part dij mas-cc. Evidentement, ël mas-cc a l'é vàire sensìbil riguard cèrti sò istint, e quand a subiss un arciam sessual a sofre s'a-j é nen përmëttù ëd risponde a chiel. Pì fòrt a l'é donca l'arciam sessual, pì gròss a l'é donca ël malèsser emossional dël mas-cc al qual a l'é nen concedù ëd risponde a tal arciam.
Ël malèsser emossional pì frequentement provà da la fumela, trovand-se ant ij pressi d'un mas-cc, a l'é ch'ël mas-cc a rispond-a ai arciam sessuaj con ij cui chila a l'ha colpìlo për eror. I veuj an efet nen pensé ch'na fumela a indrissa arciam sessuaj anvers mas-cc ch'a veula nen colpì con lor. La rispòsta dël mas-cc ai arciam sessuaj ch'a l'ha arseivù, a son arciam sessuaj ëdcò lor, combin ch'a l'abio forma diversa. Antramentre ch'j'arciam dla fumela anvers ël mas-cc a son prevalentement ëd tipo visiv, coj dël mas-cc anvers la fumela a son dëspess ëd tipo vocal-auditiv, dle vire ëdcò tàtil. Ël mas-cc a emet donca son d'inequivocàbil contnù sessual, o pura a toca con man le part d'arciam sessual femminij ch'a l'han arciamàlo. Arseivend taj arciam la fumela a tira dëspess un malèsser emossional paragonàbil a col ch'a tira ël mas-cc arseivend coj dla fumela. Combin che dle vire ël mas-cc uman a emeta taj sò arciam sonor o tàtij ëdcò sensa ch'la fumela a l'abia precedentement emëttù ij sò arciam visiv, i l'hai constatà ch'ant la magioransa dij cas a l'é la fumela a emëtte për prima ij sò segnaj visiv, ai cui ël mas-cc, quand a riess nen a reprimse, a rispond con ij sò.
Lòn ch'ai mè innossent euj estraterèstr a apar spassosìssim dàit che assurdament grotesch ant ël contest dla presunta siviltà dël così dit esse uman, spece presunta inteligenta ëd cost pianeta altrimenti coerent, a l'é ch'a-i é ant j'esse uman granda disparità ëd giudissi an confront al fàit ëd causé a j'individ ëd sèss opòst al sò, malèsser emossional midiant l'emission dij sò caraterìstich arciam sessuaj. An àutre paròle, sia mas-cc che fumele a son prevalentement d'acòrdi che la fumela a l'abia ël pien drit ëd colpì qualsëssìa mas-cc a ancontra për stra con ij sò potent arciam sessuaj visiv, causand-je eventual malèsser emossional, antramentre che l'òm a l'abia nen drit ëd colpì qualsëssìa fumela a ancontra për stra con ij sò arciam sessuaj vocaj, o moderatament tàtij, causand-je eventual malèsser emossional. J'arciam sessuaj mas-cc a ven-o ciamà "at ëd libìdin", dàit ch'evidentement a servo al mas-cc për comuniché soa libido a la fumela anvers la qual a-je compiss. Curiosament, j'arciam sessuaj femminij a ven-o nen ciamà "at ëd libìdin", combin ch'evidentement a servo a la fumela për comuniché soa libido a tùit ij mas-cc ch'a son an grado ëd vëddla. Dal mè modest pont ëd vista estraterèstr am smija che la fumela uman-a, mostrand o evidensiand le part sessuaj ëd sò còrp, a compia automaticament "at ëd libìdin" anvers chionque vëddendla parèj a preuva ël malèsser emossional ëd cui i l'oma già parlà.
I vorìa nen ch'quaidun a pensèissa mal ëd nojàutri estraterèstr përchè i diso lòn ch'i vëddo.
La natura, evidentement, as cura nen dij pregiudissi dle specie inferior com cola uman-a a cui mi i apartn-o nen, e ant ël temp a riequìlibra le asimetrìe ch'a l'han nen sens.
Se an futur le fumele uman-e a lansran sempe ëd pì ij sò arciam sessuaj esibend daspërtut ciap e sen, sempe pì dëspess gonfi ëd silicon, a capiterà donca prima o peui, fatalment, ch'ij mas-cc uman as emancipo da l'archetipo cultural ch'ancora a-je traten dal fé tùit sempe altretant, e as adegio a fé tùit altretant, e sempe.
Sòn a l'é lòn ch'mi i l'hai notà, dal mè pont ëd vista estraterèstr. Sti problema personalment am toco nen, dàit che nojàutri ëd mia specie estraterèstra i soma sessualment autòcton, e un dì iv spiegherai còs sòn a significa.
Pensé bin a lòn ch'iv l'hai dit, dàit che dòp-tut av càpita nen tùit ij dì ch'un estraterèstr av fasa noté dle ròbe an sù vòst mòd ëd vive ch'chiel a riess a vëdde mach përchè a l'é un estraterèstr, e a l'ha donca nen anteresse personaj ant la vicenda dl'esistensa uman-a. Penseje, sensa convincheve ch'mi i l'abia tòrt sensa gnanca avèjie pensà. I peuss an efet nen avèj tòrt, dàit ch'i l'hai esprimù gnun-a opinion. Iv l'hai mach contà còs as vëd da sù-lì da anté ch'mi iv vëddo, e chërde nen ch'i l'abia vist mal, përchè i l'hai n'ótima vista. Buteve al pòst mè e vardeve, e ëdcò vojàutri i l'avreve un pòch ëd mia saviëssa estraterèstra.

Roberto Quaglia