invitu cu’ sia stia liggennu sti righi, sia iddu o idda màsculu o fimmina o tutti e dui o nuddu dî dui, a nun pinsari ô sessu di cu’ ha scrittu chiddu ca tu sta liggennu. Cu’ scrivi, pi tia oggi nun havi sessu, anzi, cu’ scrivi oggi nun esisti, pi tia. Ci su’ sulu sti paroli e tu li leggi.
Nuddu accussì ha scrittu sti paroli. Sti paroli rispècchianu nu puntu di vista asètticu, luntanu, asessuatu, comu chiddu di n’extraterrestri ideali. Ecco, si propriu vo’ immaginari quarchidunu ca sia lu responsabbili di chiddu ca tu leggi, cunsidèrami lu tuo òspiti extraterrestri.
Sugnu accussì virtualmenti n’extraterrestri, gentilmenti uspitatu dâ tò menti e li sò dintorni, cioè la sociità di cui si’ parti. Nun canusciu li vostri cuncetti di Beni e di Mali, pirchì nun aju li vostri precuncetti, e accussì pi evitari di fari l’unu o l’àutru nun fazzu nenti, ma naturalmenti parru, e descrivu chiddu ca vidu. Speru di nun fari dû Mali o dû Beni semplicementi parrannu, ma ’n fin dî cunti è l’única licenza ca mi pigghiu.
Dû puntu di vista extraterrestri, li cunsuetudini sessuali di ’na sociità ca nun si canusci su’ unu dî argumenti di cchiù efficaci trastullu. Parrirò allura di chiddu di cchiù buffu ca aju usservatu ’n sti vostri abitudini.
Pi còsmica decenza nun trasu ntô particulari dî vostri fisici incastri amurusi. Mi astegnu puru dû scioccamenti arripetiri tuttu chiddu a vuiautri perfettamenti notu, pi nun v’annuiari. Defatti vi parrirò di chiddu ca aju usservatu dî vostri cumpurtamenti sessuali nun quannu c’è nu rapportu sessuali cunclamatu, ma quannu nun c’è.
Chiddu ca ’n modu particulari ha defatti attiratu la mia attinzioni è la vostra curiusa mudalità di vi relazziunari tra nu sessu e l’àutru propriu quannu c’è totali assenza di rapportu sessuali cunclamatu.
Ovviamenti nun c’è nenti di diri di quannu li màsculi e li fimmini su’ cumplitamenti siparati l’uni dî àutri, fisicamenti e sinsurialmenti, pirchì allura nenti tra màsculi e fimmini accadi.
Ma appena si ritròvanu a cundividiri li stissi spazi, ecco ca la situazioni cangia. Puru si nun si canòscinu, màsculi umani e fimmini umani hannu nu recíprocu cumpurtamentu sessuali. Fànnu cioè cosi ca càusanu effetti di natura sessuali supra chiddi dû sessu oppostu.
Sti effetti pònnu naturalmenti essiri piacèvoli o spiacèvoli, e su’ defatti sempri o l’unu o l’àutru o tutti e dui.
Particularmenti buffi, dû miu puntu di vista extraterrestri, su’ li effetti negativi. È defatti la suffirenza la faccenna cchiù intriganti pi cu’ nun la subisci, e addiventa puru la cchiù buffa quannu ntê causi ca la detèrmina si cogghi l’elementu assurdu e accussì la natura grottesca. Dû miu puntu di vista extraterrestri, cogghiri sti cosi è nu jocu di picciotti extraterrestri.
Comm’è ca si registra n’effettu negativu? Embè, putissimu diri ca c’è n’effettu negativu quannu nu màsculu o ’na fimmina, a causa dâ vicina prisenza di quarchidunu dû sessu oppostu, prova nu sensu di malissiri emuziunali. ’N certi casi, aju notatu, pari daveru ca màsculi e fimmini ca nun si canòscinu fàzzanu a gara pi s’inflaggiri a vicenna sti malissiri emuziunali.
Lu malissiri emuziunali cchiù frequentimenti pruvatu dû màsculu, truvannusi vicinu a fimmina, è causatu dâ sèmplici usservazioni dâ fimmina, speci si di idda su’ visibbili o evidenziati li genitali, o certi zoni dû corpu ca fýncinu di richiamu sessuali. È curiusu comu abbasta accussì pocu pi causari malissiri emuziunali ntâ cchiù parti dî màsculi. Evidentimenti, lu màsculu è assai sensibbili riguardu certi sò istinti, e quannu subisci nu richiamu sessuali soffri si nun ci è permisu di rispònniri a iddu. Cchiù forti è accussì lu richiamu sessuali, cchiù granni è accussì lu malissiri emuziunali dû màsculu ô quali nun è concessu di rispònniri a stu richiamu.
Lu malissiri emuziunali cchiù frequentimenti pruvatu dâ fimmina, truvannusi vicinu a nu màsculu, è ca lu màsculu risponni ê richiami sessuali cî quali idda lu ha culpitu pi sbagghiu. Nun vogghiu defatti pinsari ca ’na fimmina indirizza richiami sessuali versu màsculi ca nun vogghia culpiri cu iddi. La risposta dû màsculu ê richiami sessuali ca ha ricivutu, su’ richiami sessuali puru iddi, sebbeni àbbianu forma diversa. Mentri li richiami dâ fimmina versu lu màsculu su’ privalentimenti di tipu visivu, chiddi dû màsculu versu la fimmina su’ spissu di tipu vucali-uditivu, quarchi vota puru tàttili. Lu màsculu emetti dunqui suoni di inequivocabbili cuntinutu sessuali, oppuru tocca câ manu li parti di richiamu sessuali femminili ca lu hannu richiamatu. Ricivennu sti richiami la fimmina trai spissu nu malissiri emuziunali paragunabbili a chiddu ca trai lu màsculu ricivennu chiddi dâ fimmina. Sebbeni quarchi vota lu màsculu umanu emetta sti sò richiami sonori o tàttili puru senza ca la fimmina àbbia pricèdentimenti emissu li propri richiami visivi, aju cunstatatu ca ntâ magghiuranza dî casi è la fimmina a emèttiri pi prima li propri signali visivi, ê quali lu màsculu, quannu nun arrinesci a si reprimiri, risponni cî propri.
Chiddu ca ê mei innucenti occhi extraterrestri apparisci spassusissimu pirchì assurdamenti grottescu ntô cuntestu dâ prisunta civiltà dû accussì dittu essiri umanu, speci prisunta ’ntilligenti di stu pianeta sinnò coerenti, è ca c’è ntê essiri umani granni disparità di giudizziu rispettu ô fattu di causari ê individui di sessu oppostu ô propriu, malissiri emuziunali mediante la emissioni dî propri caratteristici richiami sessuali. ’N àutri paroli, sia màsculi ca fimmini su’ privalentimenti d’accordu ca la fimmina àbbia lu pienu dirittu di culpiri qualsiasi màsculu ’ncontra pâ strata cî propri putenti richiami sessuali visivi, causannuci eventuali malissiri emuziunali, mentri l’omu nun àbbia dirittu di culpiri qualsiasi fimmina ’ncontra pâ strata cî propri richiami sessuali vucali, o mudiratamenti tàttili, causannuci eventuali malissiri emuziunali. Li richiami sessuali maschili vèninu chiamati "atti di libbidini", pirchì evidentimenti sèrvinu ô màsculu pi comunicari la sò libbidu â fimmina versu la quali li cumpi. Curiusamenti, li richiami sessuali femminili nun vèninu chiamati "atti di libbidini", benchì evidentimenti sèrvanu â fimmina pi comunicari la sò libbidu a tutti li màsculi ca su’ ’n gradu di la vidiri. Dû miu modestu puntu di vista extraterrestri mi pari ca la fimmina umana, mustrannu o evidenziannu li parti sessuali dû propriu corpu, cumpi automàticamenti "atti di libbidini" versu cu’ sia vidennula accussì prova lu malissiri emuziunali di cui avemu già parratu.
Nun vurrìa ca quarchidunu pinsassi mali di nuiautri extraterrestri pirchì dicu chiddu ca vidu.
La natura, ovviamenti, nun si cura dî prigiudizzi dî speci inferiuri comu chidda umana a cui ju nun appartegnu, e ntô tempu riequilibbra li asimmitrìi ca nun hannu sensu.
Si ’n futuru li fimmini umani lancirannu sempri di cchiù li sò richiami sessuali esibennu unni sia nateddi e sini, sempri cchiù spissu gonfi di silicuni, accadirà accussì prima o po’, fatalmenti, ca li màsculi umani s’emancípinu dâ archetipu culturali ca ancora li trattèni dû fari tutti sempri lu stissu, e s’adeguinu a fari tutti lu stissu, e sempri.
Chistu è chiddu ca ju aju notatu, dû miu puntu di vista extraterrestri. Sti prubblemi pirsunalmenti nun mi tòccanu, datu ca nuiautri dâ mia speci extraterrestri semu sessualmenti autòctuni, e nu jornu vi spiegirò chi chistu significa.
Pinsati beni a chiddu ca v’aju dittu, datu ca doppututtu nun vi capita tutti li jorna ca n’extraterrestri vi faccia notari cosi supra lu vostru modu di viviri ca iddu arrinesci a vidiri sulu pirchì è n’extraterrestri, e nun havi accussì interessi pirsunali ntâ vicenna dâ esistenza umana. Pinsatici, senza vi cunvinciri ca ju àbbia tortu senza mancu ci aviri pinsatu. Nun pozzu defatti aviri tortu, pirchì nun aju spressu nudda opinioni. V’aju sulu cuntatu chi si vidi di ccà supra di unni ju vi vidu, e nun cridati ca àbbia vistu mali, pirchì aju ’na òttima vista. Mittitivi ô postu miu e taliativi, e puru vuiautri aviràiti nu pocu dâ mia saggezza extraterrestri.

Roberto Quaglia