invito chiunque stia liggenno ste righe, sia isso o essa màsculo o femmena o tutt'e dduje o nisciuno d''e dduje, a nun penzà ô sesso 'e chi ha scritto chello ca tu staje liggenno. Chi scrive, pe te oje nun tène sesso, anze, chi scrive oje nun esiste, pe te. Ce stanno sulo ste parole e tu 'e liegge.
Nisciuno accussì ha scritto ste parole. Ste parole rispècchiano 'nu punto 'e vista asètteco, luntano, asessuato, comme chillo 'e 'n extraterrestre ideale. Ecco, si proprio vuo' immaginà quaccheduno ca sia 'o responsàbbile 'e chello ca tu liegge, considèrame ll'ospite extraterrestre tuo.
Songo accussì virtualmente 'n extraterrestre, gentilmente ospitato dâ mente toja e 'e dintorne suoje, ovèro 'a società 'e cui si parte. Nun canosco 'e cuncètte vuoste 'e Bene e 'e Male, pecché nun tengo 'e preconcette vuoste, e accussì pe evità 'e fa ll'uno o ll'ato nun faccio niente, ma naturalmente parlo, e descrivo chello ca veco. Spero 'e nun fa d''o Male o d''o Bene semplicemente parlanno, ma 'n fin d''e cunte è ll'úneca licenza ca me piglio.
D''o punto 'e vista extraterrestre, 'e consuetúdene sessuale 'e 'na società ca nun se canosce sò uno d''e argumiente 'e cchiù efficace trastullo. Parlarraggio allora 'e chello 'e cchiù buffo ca aggio osservato 'n ste abitúdene voste.
Pe còsmeca decenza nun traso dint'ô particulare d''e fìsece incastre amoruse vuoste. Me astengo pure dâ scioccamente ripètere tutto chello a vuje perfettamente noto, pe nun ve annoà. Defatte ve parlarraggio 'e chello ca aggio osservato d''e cumpurtamiente sessuale vuoste nun quanno ce sta 'nu rapporto sessuale conclamato, ma quanno nun ce sta.
Chello ca 'n muodo particulare ha defatte attirato 'a attenzione mia è 'a curiosa modalità vosta 'e ve relazionà tra 'nu sesso e ll'ato proprio quanno ce sta totale assenza 'e rapporto sessuale conclamato.
Ovviamente nun ce sta niente 'a dìcere 'e quanno 'e màscule e 'e ffemmene sò completamente separate ll'une d''e ate, fìsecamente e sensorialmente, pecché allora niente tra màscule e ffemmene accade.
Ma appena se retròvano a cundivídere 'e stesse spazie, ecco ca 'a situazione cagna. Pure si nun se canóscono, màscule umane e ffemmene umane tènono 'nu recíproco cumpurtamiento sessuale. Fanno ovèro cose ca càusano effette 'e natura sessuale ncopp'a chille d''o sesso opposto.
Sti effette pòzzono naturalmente essere piacèvole o spiacèvole, e sò defatte sempe o ll'uno o ll'ato o tutt'e dduje.
Particolarmente buffe, d''o punto 'e vista extraterrestre mio, sò 'e effette negative. È defatte 'a sofferenza 'a faccenna cchiù intrigante pe chi nun 'a subisce, e addiventa pure 'a cchiù buffa quanno dint'a 'e cause ca 'a detèrmina se coglie ll'elemento assurdo e accussì 'a natura grottesca. D''o punto 'e vista extraterrestre mio, còglie ste cose è 'nu juoco 'a guagliune extraterrestre.
Comm'è ca se registra 'n effetto negativo? Embè, putarrìamo dìcere ca ce sta 'n effetto negativo quanno 'nu màsculo o 'na femmena, a causa d''a vicina presenza 'e quaccheduno d''o sesso opposto, prova 'nu senzo 'e malessere emozionale. 'N certe case, aggio notato, pare overamente ca màscule e ffemmene ca nun se canóscono fanno a gara pe s'infliggere a vicenda sti malessere emozionale.
'O malessere emozionale cchiù frequentemente pruvato d''o màsculo, truvànnose vicino a femmena, è causato dâ semplice osservazione d''a femmena, specie si 'e essa sò visìbbele o evidenziate 'e genitale, o certe zone d''o cuorpo ca fúngono 'a richiamo sessuale. È curioso comme abbasta accussì poco pe causà malessere emozionale dint'â cchiù parte d''e màscule. Evidentemente, 'o màsculo è assaje sensìbbile riguardo certe istinte suoje, e quanno subisce 'nu richiamo sessuale soffre si nun lle è permesso 'e rispònnere a isso. Cchiù forte è accussì 'o richiamo sessuale, cchiù gruosso è accussì 'o malessere emozionale d''o màsculo ô quale nun è concesso 'e rispònnere a stu richiamo.
'O malessere emozionale cchiù frequentemente pruvato dâ femmena, truvànnose vicino a 'nu màsculo, è ca 'o màsculo risponne a 'e richiame sessuale cu 'e quale essa ll'ha colpito pe sbaglio. Nun voglio defatte penzà ca 'na femmena indirizza richiame sessuale verzo màscule ca nun voglia colpì cu esse. 'A risposta d''o màsculo a 'e richiame sessuale ca ha ricevuto, sò richiame sessuale pure lloro, sebbene tèngano forma diversa. Mèntre 'e richiame d''a femmena verzo 'o màsculo sò prevalentemente 'e tipo visivo, chille d''o màsculo verzo 'a femmena sò spisso 'e tipo vocale-uditivo, quacche vota pure tàttile. 'O màsculo emette dunque suone 'e inequivocàbbile contenuto sessuale, oppure tocca cu 'a mano 'e parte 'e richiamo sessuale femminile ca ll'hanno richiamato. Ricevenno sti richiame 'a femmena trae spisso 'nu malessere emozionale paragonàbbile a chillo ca trae 'o màsculo ricevenno chille d''a femmena. Sebbene quacche vota 'o màsculo umano emetta sti richiame suoje sonore o tàttile pure senza ca 'a femmena àbbia precedentemente emesso 'e richiame visive propie, aggio constatato ca dint'â maggioranza d''e case è 'a femmena a emèttere pe primma 'e signale visive propie, a 'e quale 'o màsculo, quanno nun riesce a se reprímere, risponne cu 'e suoje.
Chello ca a 'e innocente uocchie extraterrestre mije appare spassosíssemo pecché assurdamente grottesco dint'ô cuntesto d''a presunta civiltà d''o accussì ditto essere umano, specie presunta 'ntelligente 'e stu pianeta altrimenti coerente, è ca ce sta dint'a 'e essere umane granne disparità 'e giudizio rispetto ô fatto 'e causà a 'e individue 'e sesso opposto ô propio, malessere emozionale mediante 'a emissione d''e caratterísteche richiame sessuale propie. 'N ate parole, sia màscule ca ffemmene sò prevalentemente d'accordo ca 'a femmena àbbia 'o pieno diritto 'e colpì qualunque màsculo 'ncontra pe via cu 'e putente richiame sessuale visive propie, causànnole eventuale malessere emozionale, mèntre ll'ommo nun àbbia diritto 'e colpì qualunque femmena 'ncontra pe via cu 'e richiame sessuale vocale propie, o moderatamente tàttile, causànnole eventuale malessere emozionale. 'E richiame sessuale maschile vènono chiammate "atte 'e libbídene", pecché evidentemente sèrvono ô màsculo pe comunicà 'a libbido soja â femmena verzo 'a quale 'e cumpie. Curiosamente, 'e richiame sessuale femminile nun vènono chiammate "atte 'e libbídene", benché evidentemente sèrvano â femmena pe comunicà 'a libbido soja a tutte 'e màscule ca sò 'n grado 'e 'a vedé. D''o modesto punto 'e vista extraterrestre mio me pare ca 'a femmena umana, mustranno o evidenzianno 'e parte sessuale d''o cuorpo propio, cumpie automàtecamente "atte 'e libbídene" verzo chiunque vedènnola accussì prova 'o malessere emozionale 'e cui avimmo già parlato.
Nun vurrìa ca quaccheduno penzasse male 'e nuje extraterrestre pecché dico chello ca veco.
'A natura, ovviamente, nun se cura d''e pregiudizie d''e specie inferiore comme chella umana a cui io nun appartengo, e dint'ô tiempo riequílebra 'e asimmetrie ca nun tènono senzo.
Si 'n futuro 'e ffemmene umane lanciarranno sempe 'e cchiù 'e richiame sessuale lloro esibenno addovunque nàteche e ppiette, sempe cchiù spisso gunfie 'e silicone, accadarrà accussì primma o po', fatalmente, ca 'e màscule umane s'emancípino dâ archetipo culturale ca ancora 'e trattène dâ fa tutte sempe 'o stesso, e s'adeguíno a fa tutte 'o stesso, e sempe.
Chesto è chello ca io aggio notato, d''o punto 'e vista extraterrestre mio. Sti prubbleme personalmente nun me tòccano, dato ca nuje d''a specie extraterrestre mia simmo sessualmente autòctone, e 'nu juorno ve spiegarraggio che chesto significa.
Penzate bene a chello ca v'aggio ditto, dato ca doppotutto nun ve capita tutte 'e juorne ca 'n extraterrestre ve faccia notà cose ncopp'ô muodo 'e vívere vuosto ca isso riesce a vedé sulo pecché è 'n extraterrestre, e nun tène accussì interesse personale dint'â vicenna d''a esistenza umana. Penzàtece, senza ve cunvíncere ca io tenga tuorto senza manco ce avé penzato. Nun pòzzo defatte tené tuorto, pecché nun aggio espresso nisciuna opinione. V'aggio sulo cuntato che se vede 'a cca 'ncoppa 'a addó io ve veco, e nun credite ca àbbia visto male, pecché tengo 'na òttema vista. Mettíteve ô posto mio e guardàteve, e pure vuje avarrite 'nu poco d''a saggezza extraterrestre mia.

Roberto Quaglia