oje nun suppòrto ll'animaliste. Nun ce ll'aggio cu ll'animale, sia bbuono 'ntiso, ca anze me piace vedé e ricanóscere attuorno a me dint'â cchiù varia gamma ca se po'. Chi nun suppòrto, pecché assaje assurde dint'a ll'ossessione lloro, sò ll'animaliste cunvinte, ll'estremiste animaliste. Ma ancora cchiù fastidio me dànno ll'animaliste muderate, ca putarrìamo chiammà ll'animaliste qualunquiste, ca miso sotto a qualunque anàlese lògeca móstrano 'e essere ancora cchiù assurde, dint'â pusizione cunfusa lloro, 'e ll'animaliste estremiste. Tanto pe accummencià, distinguimmo: Chi sò ll'animaliste estremiste, e chi sò ll'animaliste qualunquiste?
'E perfette animaliste estremiste se 'mmedèsemano 'a dint'a 'e vìscere cu tutte ll'animale, d''o visone ô gatto, d''a foca mòneca â zònzola, 'a ll'urzo grizzly ô totano. Che vo' dìcere ca se 'mmedèsemano cu lloro? Vo' dìcere ca dànno a tutte ll'animale 'e sentimente suoje. Nun me piace essere acciso, dice ll'animalista estremista, accussì nun piace manco a ll'animale. 'O animalista estremista nun se ciba maje 'e animale muorte (né vive), nun accide 'a zònzola ca sta pe 'o pógnere, ma se lìmmeta a 'a caccià (si 'mméce 'a accide, è 'n animalista estremista 'mperfetto). Nun se vève 'o latte 'e vacca, pecché accussì facenno 'o levarrìa ô vitiello, nun magna ova, ovèro futuri pucine (quanno po' ll'uovo, comme spisso succede, è già fecunnato, è a tutte ll'effette - tècnece e morale - 'n aborto 'e gallina), nun se mette visune, muntune, giacche scamosciate, scarpe 'e cuojo, purtafogli 'e pelle. 'O animalista estremista se 'mmedèsema cu tutte 'e forme 'e vita animale, ma nun cu chelle vegetale, ca se ne ciba senza rimorse. Quacche vota nun se 'mmedèsema manco cu ll'essere umano, suffrenno p''a morte 'e 'n animale assaje cchiù ca pe chella 'e 'n individuo umano.
'O animalista qualunquista, 'mméce, se 'mmedèsema 'a dint'a 'e vìscere cu tutte ll'animale ca tènono 'n aspetto conforme a ll'archetipe 'e dinto suoje. 'Nzomma: se 'mmedèsema dint'a 'nu gatto, 'nu visone, 'nu cuniglio, 'nu cane, ma nun dint'a 'nu zòccola, 'na mosca, 'nu serpente, 'nu vèrmone. Se 'mmedèsema dint'a chelle poche bestie ca 'o caso e 'a selezione naturale hanno vuluto morbide e cu 'n aspetto bello pe ll'uocchio umano, ma nun dint'a tutte ll'ate animale. 'O animalista qualunquista è fórzo una d''e cchiù gruosse spressione 'e ipocrisìa ca se pònno descrìvere, e d''o tutto deliranti e cuntraddittòrie sò tutte ll'argumiente suoje. Una d''e cchiù tìpeche manifestazione è 'o fatto ca ce ll'ha a morte cu chi se mette pellicce 'e visone. "Animale vénono accise" recita 'o pio animalista "pe se ne pòtere mèttere 'a pelliccia! (Orrore!)", e dice chesto cu 'o patètico fervore 'e chi ha appena scuperto ca ll'acqua cauda è cauda.
Si vulite castigà 'n animalista qualunquista ca ha appena ditto stu spruluquio, cercate ncopp'a isso (o essa) 'e piezze 'e muorto d'animale ca quase certamente sta purtanno senza manco ce penzà. Facitelle nutà comme isso (o essa) cìnicamente e senza vrigogna pesta cu 'e piede suoje (ca puzzano?) 'o cuojo d''e scarpe soje, ca fuje 'a pellaccia 'e 'n animale ca venette ammazzato acchì isso (o essa), mò 'a aduperasse pe cammenà sotto â chiuvuta, 'nciampecà ncopp'a 'e marciappiede e pestà 'e cacche 'e cane. Facitelle nutà quale fuje ll'identità d''o purtafoglio o burzetta 'e pelle soja, pelle ca fuje 'e 'n animale, acciso acchì isso (o essa) mettesse 'e denare suoje dint'a 'n 'nvòlucro 'e prestiggio ca tène addore 'e pelle 'mméce ca 'e plàsteca. Dummannàtelle pecché nun s'arraggia e nun se scannalìa cu 'a stessa foga cu chi se mette 'nu giubbotto 'e pelle, 'nu "chiodo", 'nu muntone arruvutato. Dummannàtelle si isso (o essa) tène sti vestite dint'ô guardarobba suo, e si 'e tène, si 'e chesto nun se ne vrigogna. E si nun se vrigogna, pecché avarrìa 'a se vrigugnà chi tène 'na pelliccia 'e visone? Tène certamente 'a se vrigugnà chi tène 'na pelliccia 'e leopardo, pecché 'o leopardo se sta estinguenno, e 'a accussì ditta "biodiversità" è 'na ricchezza d''o munno ca nun se po' negà e ca avarrìamo 'a salvaguardà 'mméce 'e destrùggere, comme stammo 'mméce facenno. Ma 'o visone nun riseca 'e s'estìnguere, vène allevato pe ne fa pellicce, vène allevato comme 'e voje, 'e muntune, 'e galline vénono allevate pe s''e magnà e ne fa 'e tutto. Miso strìnto strìnto, ll'animalista qualunquista, pe nun ammèttere ll'ipocrisìa soja, ve dicarrà: "Ma si ll'animale vénono allevate pe s''e magnà, nun è immorale..." Stammo dint'â farneticazione totale. A parte 'o fatto ca 'e vegetariane dimòstrano ca senza carne se po' benissimo vìvere, e ca accussì chi magna carne 'o fa pecché lle piace, e nun pecché ne tène abbisuogno (proprio comme chi accatta 'nu visone 'o fa pecché lle piace, e nun pecché ne tène abbisuogno), nun è chella 'e s''e magnà, 'mméce 'e 'na attenuante, 'mméce 'na aggravante? Specialmente si se cunsidera ca magnà carne è tutt'ato ca obbligatorio, essenno ll'essere umano onnìvoro? Nun è màcabro ammazzà 'n animale a sango cauto, 'n animale ca tène 'nu cerviello, 'na vita sessuale, p''o scopo 'e ce cibà d''e cugliune suoje, d''a lengua soja, d''o cerviello suo, d''o core suo, d''o fècato suo, d''e rine suoje, d''o 'ntestino suo, d''e mùscule suoje, masticànnole a luongo 'mmocca pe se gòdere 'o ssapore ca chillu muorto ce dà? Nun è chesto pure cchiù màcabro 'e chi d''o animale muorto ama mèttere 'o 'nvòlucro, ovèro 'a pelliccia? Nun nego ca mèttere 'a pelle 'e mammìfero muorto po' essere 'nu gesto 'e malo gusto, pe 'nu spìreto nòbbele. Ma vói scì lussuriosamente 'e ntràme nun 'o po' essere 'e meno.
Pe demolì allora pe sempe ll'incàuto animalista qualunquista ca d''a ipocrisìa soja ha appena cercato 'e ne fa 'nu vanto a 'e uocchie vuoste e suprattutto a 'e suoje, trafiggìtelo cu 'na nozione banalìssema ca poche sanno, pecché a poche 'nteressa:
D''e denocchie d''e voje (muorte e senza uosse) vène cacciata 'na sostanza ca vène aduperata pe fa ll'emulsione d''e pellìcule fotogràfeche.
'O cappio d''a logica è ormaje strìnto ô cuollo 'e ll'animalista. Quante vote ha fotografato, quante vote ha cunzumato uosse 'e voje ammazzate pure pe permèttere a isso (o a essa) 'e fa 'e fotografie? Quante fotografie ha sprecato, sbaglianno 'a messa a fuoco? Quante denocchie 'e voje sacrificate pe niente, p''o dilettanteseco dilietto 'a niente suo?
Pare ridìcolo. E 'o è, defatte. È ridìcolo comme è ridìcolo ca quaccheduno se scannalìa pecché 'na figliola s'abbellisce e s'arrecàveda cu 'na pelliccia. Si ll'interlocutore vuosto animalista è 'ntelligente, doppo chello ca ll'avite fatto nutà s'addonarrà 'e quanto è ridìcolo, e ncopp'a chesto meditarrà. Si nun è 'ntelligente, farfugliarrà 'ncoerente giaculatorie animaliste, ca ve cunvincarranno, si vuje site 'ntelligente, 'e 'o lassà 'o cchiù ampressa ô vacante autocunforto d''e preconcette suoje.
Capisce, caro Maurizio Costanzo Show, qual è 'o nucciulo d''o problema 'e ll'animalismo? 'O nucciulo è ca ll'animalismo se funna ncopp'â discriminazione razzista. 'E animaliste s'àrzano a difesa d''e razze "elette" tra 'e specie vivente, secondo criterie ca assumìgliano assaje ô credo razzista ca fuje d''e naziste.
Una d''e discriminazione: NUN TUTTE 'E SPECIE VIVENTE MERÌTANO 'O STESSO RISPETTO. 'E animaliste estremiste "elèggono" 'e specie vivente ca appartènono sulo ô munno animale. 'E Vegetale jèssero a se fa frìjere, comme defatte succede dint'â cucina cinese. Sulo pecché ll'animale sò cchiù sìmmele a nuje d''e vegetale, vanno salvaguardate a dispietto d''e secunne. A tutte ll'animaliste estremiste dico sulo 'na cosa: tra 50 o 100 anne ncopp'â terra nun esistarrà ca quacche àrbulo sparzo, nun cchiù giungle, nun cchiù vosche. Sarrà 'mméce sempe cchiù chino 'e voje, visune, galline e muntune. Sulo si maje vietàssero, 'n tutto 'o munno, 'a pelliccia 'e visone, 'o visone, nun cchiù allevato, s'estinguarrìa 'n quatto e quattott'otto. Penzate ô genocidio 'e ll'àrbule, ogne vota ca strazzate 'nu fuoglio 'e carta, ogne vota ca jettate decine 'e chile 'e giurnale appena spiate. Ma io 'o ssaccio ca m'illudo. Nun ce penzarrite, pecché site animaliste.
'N ata discriminazione: NUN TUTTE LL'ANIMALE VANNO PRESERVATE: 'E 'nsiétte, pe esempio, murèssero tutte nun sarrìa po' male. Nisciuna emozione accidenno 'na mosca. Gruossa pena p''o gatto ca 'o scugnizzo lle tira 'a coda. 'A discriminazione razzista è spietata. 'E animale sò "elette" e merìtano 'e vìvere si pe esempio pe caso prisèntano 'o cchiù nùmmero d''e seguente caràttere: Uocchie gruosse, capa gruossa a paragone d''o cuorpo, fronte tonna, morbida pelùria, gamme corte, naso piccolo e a ll'ammonte, masche chiéne, recchie gruosse, voce auta.
Pecché?
Pecché sti caratterìsteche, si ce penzate, sò chelle propie 'e ogne criaturo umano. Ce piàcono ll'animale ca dint'a lloro istintivamente ricanuscimmo 'e caràttere tìpece d''e criature piccerille, ca dint'a lloro retruvammo tutte chelle caratterìsteche ca ce fanno piacé 'e criature piccerille.
E quale sò ll'animale ca tènono 'o cchiù nùmmero 'e sti caratterìsteche? 'O gatto, 'o cane, ll'urzacchiotto, 'o panda, ma pure 'o canarino e tante aucelluzze. Nun 'o vèrmone, nun 'o serpente, nun 'o pesce. 'N piena analoggìa a 'e criterie naziste, ll'animaliste appròvano o tollèrano 'a morte 'e ll'animale cunziderate 'e razza inferiore, e elèggono a razza superiore e accussì degna 'e vìvere ll'animale ca rispónnono a certe requisite estètece.
Quaccheduno obietta ca se vo' tutelà ll'animale cu cchiù 'ntelligenza, accussì cchiù 'n grado 'e capì 'a morte ca a lloro se dà? 'Pòcrite! Uno d''e cchiù 'ntelligente tra tutte 'e mammìfere è 'o zòccola, e che ha fatto ll'animalista ca p''e parole meje s'indigna, cuntra ll'umane stèrmine 'e zòccole? Quale animalista ha cercato pare deritte pe zòccole e visune? Tra ll'ato 'o zòccola prisènta tutte chelle caratterìsteche estètece ca ne avarrìano 'a fa 'nu cucciuluzzo 'e tutte. Se dice ca è gruosso, ma è cchiù piccolo 'e 'nu gatto. Se dice ca è aggressivo, ma è 'na buscìa. 'E felline sò carnìvore, aggressive e crudele, mèntre suricille e zòccole sò onnìvore e pacìfece. Certo pònno mòrdere si quaccheduno cerca 'e ll'accìdere, ma comme se pònno biasimà? 'O zòccola tène tutte 'e caratterìsteche pe piacé, tant'è overo ca cartune animate e fumette sò chine 'e eroe pusitive a forma 'e suricille. Pecché allora 'o zòccola nun piace?
Nun piace pecché nun fa fino 'nfunno 'o ruolo d''o "criaturo 'a vasà", pecché nun se sottomette ô domìnio 'e ll'Ommo. Tutte ll'animale ca nun sò 'e casa sò animale ca nun sò capace 'e se sottomèttere ô domìnio 'e ll'Ommo, e pe chesto ll'Ommo 'e stèrmina e estingue. 'O zòccola è particolarmente odiato pecché nun se sottomette e ô stesso tiempo nun se lassa sterminà e estìnguere.
Chi s'è maje commosso p''a morte 'e 'na formìcola? 'E furmicare sò strutture misteriose e organizzatìsseme, comme putèssero paré 'e città noste a 'nu gigantesco extraterrestre ca ce guardasse 'a 'ncoppa. 'E scienziate sò d'accordo ca 'e società d''e formìcole e d''e ape sò organisme ca funziónano a muodo 'ntelligente, ma sò accussì divèrze 'a nuje ca nun ce capimmo niente. E nun assumìgliano a 'nu piccolo criaturo umano, e accussì nun ce ne 'mmuove 'a morte.
Caro Maurizio Costanzo Show, 'a vita è 'na manifestazione d''a materia ca ce pare affascinantìssema, pecché ne facimmo parte, e ô livello cchiù auto, secondo chelle ca sò 'e canuscenze noste 'e mò. Ma tutte 'e valure ca assignammo sò prujezzione d''e archetipe nuoste, d''e preconcette nuoste, d''o penzà nuosto pe categurie. E tutte 'e lìmmete d''a cuscienza ca tenimmo 'e chello ca esiste e 'e chello ca vive, sò proporziunale ô spazio mentale ca tenimmo. 'E valure assolute sò chimere, e chi 'e prufessa 'mbroglia a sé e a ll'ate.
'O azione 'e prujettà 'e valure umane suoje ncopp'a chello ca d''o munno umano nun è, tène 'nu nomme preciso: Antropomorfismo.
'E animaliste sò 'e perfette guerriere 'e ll'antropomorfismo. Nun sò 'e sule, purtroppo. Oje avimmo parlato 'e lloro. Chissà si se sò 'ncazzate.

Roberto Quaglia