saje che è 'o "stream of consciousness"? Io nun 'o ssaccio, p''o triste fatto ca 'e cose ca nun saccio sò 'nfinitamente cchiù assaje d''e cose ca ssaccio. Ma sapenno 'a lengua 'nglese e arrangianno 'e pertose cu 'a logica, m''o 'mmàggino, e si me sbagliasse vo' dìcere ca 'o significato ca sto pe sprìmere ll'aggio 'mmentato io, ca è ancora meglio - sotto certe punte 'e vista - ca ll'avé saputo pe ll'avé 'mparato.
Ebbè, tradotto 'n taliano, "stream of consciousness" vo' dìcere "sciummo 'e cuscienza", e io penzo ca cu chesto se vò dìcere ll'atto 'e se sprìmere cu 'e parole - parlanno o scrivenno - cu libbertà totale, ovèro senza pruggettà 'n nisciun muodo chello ca se sta pe dìcere o pe scrìvere, lassanno semplicemente ca tutto chello 'e linguìsteco ca 'a cuscienza genera venga sùbbeto ditto, 'n tiempo reale, senza filtrà cu 'o giudizio propio 'e parole, 'e frase e 'e cuncètte. 'N stu mumento nun me vènono 'mmente 'e particulare vantagge ca 'a chesta tècneca ascarrìano, fora ca uno, ca tengo pe 'mpurtante: 'a mente, senza 'na direzione e 'nu fine, è libbera 'e seguì cammine 'nesplorate, e fa nàscere cuncètte originale e 'nèdite, ca maje sarrìano state ditte si 'a 'o principio se fosse saputo chello ca se sarrìa juto a dìcere. Si nun me sbaglio ha aduperato sta tècneca pure Joyce, ma è facilìssemo ca io me sbaglio, pure cunsideranno ca Joyce nun ll'aggio maje liggiuto. (Ce aggio pruvato cu ll'Ulisse, ma m'è sùbbeto passata 'a voglia.) D'altronde manco Joyce, cu 'a scusa 'e essere muorto primma ca io nascesse, ha maje liggiuto a me.
Ecco, mò sto facenno quaccosa 'e stu genere. Fino a mò 'o discurzo è abbastanza coerente, o accussì me pare, pecché si nun me paresse coerente 'a spiegazione ca dongo 'e chello ca sto facenno, comme putarrìa cuntinuà a 'o fa?
«Annanze â tastiera d''o computer mio, pìggio 'e taste senza penzà, speranno ca ll'atto stesso 'e me sprìmere faccia nàscere 'nu significato ca mèreta 'e essere trasmisso, pecché 'e parole ca automaticamente prudùco tènono certamente 'nu senzo, e 'e frase ca 'e parole ammuntunate inevitabilmente compóngono tènono ancora cchiù senzo d''e parole.»
E pure si chello ca io scrivesse nun tenesse 'nu senzo cumpiuto, putesse sempe annascónnere quacche significato ascuso, scanusciuto pure a me ca 'o scrivo. 'N definitiva, chi maje arrìva a comunicà giusto giusto quanto sta dint'a ll'intenziune soje? 'Nu scrittore scrive 'e 'na deliziosa figliola, senza naturalmente metterce 'a fotografia dato ca essa esiste sulo dint'â mente soja, e ogne lettore s'immagginarrà chello ca lle vène cchiù bbuono 'e s'immagginà; 'o cinese s'immagginarrà 'na guagliona cinese, 'o svedese 'na bionda auta 'nu metro e nuvanta, 'o beduino 'na bella chiàttona cu 'e zizze gruosse, 'o pedòfilo 'na criatura 'e diece anne, 'o gerontòfilo 'na vicchiarella vista a ll'ospizio, 'o necròfilo chillu bellu muorto 'e femmena spiato a ll'obitorio. E è accussì pe ogne parola: ogne parola è 'na etichetta arreto â quale ognuno ce s'immàggina 'o cuntenuto ca vo'. Si accussì nun fosse 'o munno nun sarrìa chino 'e malintise. Quanno duje essere umane pàrlano, sulo 'na minima parte d''e significate trasmisse arriva a destinazione. Ce stanno cunverzazione addó ogne parola vène capita male. Abbasta penzà a certe sciarre tra 'nnammurate, addó ogne tentativo 'e spiegazione fa ll'effetto cuntrario a chillo ca se vuleva, e â fine d''a sciarra 'e duje amante nun sò cchiù 'nnammurate. Po' stanno 'nu poco 'e tiempo senza parlà tra 'e lloro e tórnano 'nnammurate.
Cagno discurzo. È 'nu poco 'e tiempo ca dint'a 'e retrovie d''a mente mia, mèntre scrivevo chello ca aggio scritto fino a mò, me vène 'a penzà a 'na purtualla. Nun 'na purtualla qualunque. Ma 'a purtualla 'e cui aggio liggiuto dint'a 'nu libbro. Era 'na purtualla perfetta, tonna, paradossalmente quatra. Nun faceva niente 'e speciale. Veneva sulo descritta, o meglio, veneva annummenata pe sgarrà, accussì comme sto facenno io mò. Era 'nu scrittore famuso, e io nun 'o songo. Era 'na purtualla normale, eppure chiaramente 'mpurtante, si veneva annummenata dint'a 'nu libbro 'e 'nu scrittore famuso, e doppo, mò, ripigliata pure 'a me, scrittore tutt'ato ca famuso. 'A purtualla è ll'òrgano riprodduttivo 'e 'nu certo tipo 'e àrbule. A primma vista, guardanno 'e sbieco sta facenna (qualunque cosa 'a spressione 'e guardà 'e sbieco po' vulé dìcere), magnà purtualle putesse paré 'na pràteca schifosa e oscena, accussì comme magnà ova 'e gallina. 'Mméce è proprio chello ca ll'àrbule 'e purtualle vònno. Pure 'e pere, 'e prune, 'e vite e tutte 'e chiante ca fanno frutte nun vìdono ll'ora ca quaccheduno s''e magna. E pecché maje, se dummannarrà quaccheduno? Sò sti chiante tutte masochiste? Nun sò né masochiste, né sceme. 'E chiante ca fanno frutte sò 'mméce diabolicamente fine. Te mèttono llà 'o frutto lloro 'n bella vista, succuso, duce e mature, ma chino 'e seme tuoste, fastidiuse e 'ndigeste. Arriva ll'animale gulùso, se mózzeca tutto 'o frutto seme cumprise, se ne va a spasso pe 'n campagna larga, e primma o doppo fa 'na bella cacchina o 'na brutta caccona (dipenne 'a quale animale), tutta china d''e seme nun addigerite d''e frutte magnate. 'E seme germògliano dint'â terra sotto â cacca squagliata d''e chiuvute, e ecco ca chella chianta s'è riprodotta, senza fatica, a gran distanza d''o pizzo d''a esistenza ferma soja. A stu punto me vène 'nu dubbio: quanto avèvano 'a tené gruossa 'a vocca ll'animale ca, pe se fa magnà 'a lloro, 'e mellune se sò evolute accussì gruosse e cu 'a scorza accussì tosta? Era fórzo... 'e dinosaure? Caro Maurizio Costanzo Show, 'a dimanda è 'a niente, comme tutte 'e dimande ca 'a risposta nun ce porta 'nu vantaggio deritto. Se ne pònno 'mmaginà 'e ancora cchiù 'a niente 'e chella ditta. Pe esempio: ll'universo è 'nfinito? Che è ll'Universo? Ma... esiste 'n Universo, 'a là d''a recente acquisizione umana d''a cunvinzione ca 'n Universo esiste, fora d''o cielo nuosto, llà addó ato ca migliara 'e punticielle lucente nuje nun vedimmo?

Roberto Quaglia