tu ca hê sempe ditto belle parole cuntra ll'usanza ca regna 'e 'nu bbuono 1% d''a popolazione giovanile taliana 'e se 'nfilzà 'e carne cu 'na siringa pe se jénchere 'o sango 'e eroina, m'ascutarraje 'e certo mò ca me metto a te cunfidà 'a semplice spiegazione ncopp'a 'e cause 'e stu fenòmeno ca io aggio dato a me stesso.
Caro Maurizio Costanzo Show, sì 'na Divinità Bona, dice cose bone cuntra 'a cultura d''a droga e chella d''a mafia, pe miezo Tujo e attraverso 'e Te se specchiano 'e punte 'e vista cuntrarie e se forgia 'o mutèvole telaro 'e sìmbule ncopp'ô quale juorno doppo juorno se custruisce e se trasforma 'a società taliana... e putarrìa cuntinuà cu strunzate sìmmele pe ore e 'mméce passo sùbbeto ô dunque.
'N parole povere: Pecché 'e giùvene se drògano? Pecché nun se drògano pure 'e vicchiarielle? Oppure sulo 'e vicchiarielle? O 'e mìdece, ca si vònno 'a droga ce ll'hanno pure â mano? E pecché nun tutte 'e giùvene se drògano? Pecché nun s'è maje dato 'o caso 'e 'nu pallunaro 'e serie A ca addiventa eroinòmane? 'Nzomma, pecché 'n certe categurie 'e perzone ce se droga e 'n ate no?
Sì sì ll'emarginazione 'a mancanza 'e valure e chelle cose llà... ne avimmo sentuto parlà migliara 'e vote, ma cuntinuammo a dìcere a nuje e a ll'ate ca 'nfunno 'nfunno proprio nun capimmo comme uno po' decìdere 'e accummencià a se 'mpuntà ll'ago, concludimmo ca chi se buca sbaglia e abbasta, e accussì vo' dìcere ca nun avimmo capito niente. Pruvàmmoce a muodo mio, cu 'n approccio 'nu poco diverso d''a sòleta recita 'e chille duje o tre cuncètte trite e ritrite.
Rendìmmoce primma 'e tutto cunto ca ll'essere umano è 'n organismo sociale. Ô cuntrario 'e 'na preta, ca si 'a luove d''a spiaggia, d''a cumpagnia d''ate prete, e 'a miette sola dint'ô spazio vacante 'n òrbita attuorno â terra, llà se ne sta bona senza se lamentà né suffrì pure pe cinche miliarde 'e anne (e doppo 'o sole - a dìcere d''e dotte - se spannarrà agliuttenno e addigerenno 'a terra e pure 'a preta nosta), ll'essere umano, si 'o pìglie e 'o miette 'nu poco sulo accummència quase sùbbeto a suffrì. Ô cuntrario d''a preta, ll'essere umano tène 'na vita sociale. Che vo' dìcere? Vo' chesto dìcere ca a ll'essere umano lle piace ì a 'e feste dint'â auta società? O pure 'n chella media? Pure.
'N realtà vo' dìcere assaje 'e cchiù.
'O fatto ca ll'Ommo (e 'a Femmena nun è 'a meno) tène 'na vita sociale vo' dìcere ca senza vita sociale nun po' vìvere. Che è allora 'a vita sociale?
Essenzialmente, 'a vita sociale è 'o fatto 'e fa quaccosa 'nzieme cu ll'ate. Si guardammo cchiù attentamente, vedimmo ca 'o cuncètto 'e vita sociale implica 'o fatto 'e fa quaccosa pe ll'ate. Attenzione: nun sto cercanno 'e cuntrabbandà nisciun ideale pseudo-pio. Pe ll'ate aggisce 'a crocerossina comme pe ll'ate aggisce 'o boia. Semplicemente, nun stanno servenno 'e stesse "ate". Robin Hood arrobba a 'e ricche, ma dà a 'e puverielle. 'O tìpeco polìteco arrobba a 'e puverielle, ma dà a 'e ricche. Ca ll'essere umano sia 'n animale sociale vo' dìcere ca chiunque ha 'a essere ùtile a quaccheduno ato. ll'assassino nun è certo ùtile â vìttima soja, ma 'o è ô mandante. 'O pulizziotto nun è certo ùtile ô mariuolo, ma 'o è ô cittadino. Quanno 'e pulizziotte, 'e polìtece e 'e giùdece nun sò ùtile ô cittadino vo' dìcere ca sò corrotte, e allora sò ùtile a 'e corrutture. Quacche vota 'o carnefice è addirittura ùtile â vìttima soja, comme dint'a 'e rapporte sado-masochìstece (e 'o film "Portiere di notte" 'e Liliana Cavani è 'e stu caso 'nu sublime esempio). Ogne essere umano d''a terra, pe se sentì legittimato a esìstere, ha 'a essere ùtile a quaccheduno ato. Pure ll'eremita, pe decisione soja luntano 'a tutte ll'essere umane tène spisso legame cu quacche animale, ca lle jénche 'o bisuogno 'e se sentì ùtile a quaccheduno.
Quanno 'n essere umano penza 'e nun essere (cchiù) ùtile a nisciuno, sente ca 'a vita soja nun tène nisciun senzo e spisso s'accide isso stesso.
Ma, specialmente quanno se è giùvene, primma 'e s'accìdere se pròvano tutte. Quanno se è giùvene ll'imperativo è chillo 'e s'inzerì dint'â società, truvà una o cchiù funzione 'a 'ncarnà, e ncopp'a chelle forgià 'a identità soja ancora 'nesistente 'e individuo aduto, 'nzieme ô posto d''a identità nun cchiù vàleda 'e criaturo o adolescente. Se pròvano tutte partenno 'a 'ncoppa, d''e funzione cchiù aute ca pàreno a 'a purtata soja. Se cèrcano bone amicizie, 'nu bbuono lavoro, 'nu bbuono rapporto sentimentale. Si nun se trova niente e nisciuno ca móstra 'e tené abbisuogno 'e nuje, s'abbàssano 'e pretese. Si pure abbassanno 'e pretese se rummane sule e inùtile, se cerca ancora cchiù abbascio, se scenne e se scenne e se scenne, fino a quanno 'nfunno â scala sociale, quanno ormaje, pe via d''e tante 'nzuccesse, ll'amarezza e 'a raggia règnano sovrane, ecco finalmente 'na microsocietà 'e ate arraggiate e tradite ca finalmente t'accèttano, ca finalmente tènono abbisuogno 'e te. Ecco 'e tòssece e ecco, suprattutto, 'e spacciature e 'e 'nvisìbbile narcotraffecante luntane. 'E spacciature tènono abbisuogno 'e te, 'e te ca sì senza funzione e identità e staje cercanno tutt'e dduje. Tènono abbisuogno 'e te e tu, ca sì senza identità aduta, ca nun truove nisciuno ato ca te dà 'na identità aduta tenenno abbisuogno 'e te, ca nun truove ate ca se vàlgono d''a esistenza toja, tu, senza ata scelta, scìglie ll'ùneca scelta ca tiene.
Nun è certo chella ca aggio fatto 'na anàlese completa d''o fenòmeno droga. Varie ate approcce sò pure valide. Ma ll'hanno già fatte ate e nun m'è parza chesta 'a sede pe ll'arripètere. 'O mio è sulo uno d''e pussìbbile muode 'e vedé chello ca succede. Ll'aggio ccà esposto, umilmente, annanze â cchiù putente d''e divinità muderne. Ca ognuno aggiunga 'o punto 'e vista mio a 'e suoje, pecché è sulo arricugliènno dint'a sé 'o cchiù nùmmero 'e punte 'e vista ca ognuno se po' avvicinà sempe cchiù â sfuggente e 'nfinitamente luntana perfetta comprensione d''e cose.

Roberto Quaglia