el xe de moda l'oror, purché el sia par finta. Mejo se el xe real, ma senpre par finta. Viva el racapriciante, purché se àbia certesa che'l sia par finta. Se se diverte a farse paura davero in virtù de cause verosìmili, ma finte.
Se se cała inte la angòsia de un film de l'oror, indove tuti i protagonisti i vien squarsà par finta davero. Se se nutre de un telegiornal che'l ne vòmita inte i oci scene de altri protagonisti, squarsà stavolta davero, ma par finta. I morti veri del telegiornal i lo xe par finta, de fato basta canbiar canal e lori i sparise, asolutamente e par senpre, da le nostre vite, indove cussì descovrimo che no i gera mai aparsi davero, ma soło par finta.
Se se cała in qualunque version de finto oror con pasion che i òmeni qualche volta i ciama morbosa. In realtà la xe la pasion de chi el inpara l'oror atraverso le so rapresentasion ireali, par méterse in grado de afrontarlo mejo quando mai el se presentase davanti a noaltri co'l spietà so càrico de efetiva realtà. Se se alena a l'oror vero, che par fortuna de raro ne toca, imedesimàndose inte l'oror finto fintìsimo dei film pieni de mostri inprobàbili, e in queło vero, ma finto par noaltri, dei telegiornali pieni de mostri probàbili.
Ma asìster a ste rapresentasion de oror el xe tuto somà esersisio alquanto pasivo. Se inpara a baso liveło, parché tuto queło che'l teleschermo ne inpara el xe a baso liveło. Par capir mejo l'oror, e èser pronti a afrontarlo quando mai el ne gavese da ciapar de mira, el xe pì ùtile doparar la pròpria imaginasion. De fato, el xe senpre pì ùtile doparar la pròpria imaginasion invese del televisor par inparar, capir, sentir, aprezar o disprezar qualcosa. Par vasinar se stesi dai rischi che l'oror vero el conporta, ghe vol prima de tuto no gaver paura de imaginàrselo. Se ciapa sodisfasion dai film de l'oror e dai telegiornali (chi no'l ciapase sodisfasion no i vardaria, el xe ovio) proprio parché lori i se sostituise a noaltri inte la responsabilità de scèjer qual oror imaginarse. Afiora in noaltri come un senso de colpa, a imaginar inpropriamente de oror che no desideremo par la nostra vita e par queła dei altri. El xe un senso de colpa fora luogo, dovù a'l nostro timor che imaginar un oror el posa indur a cométerlo, quando el xe speso invese vero el contrario.
Ciapemo alora in considerasion la idea de inpalar el gato de casa nostro o el nostro caneto. Poareti, come i sofriria. La idea la ne urta, e alora insistemo imaginando el contrario de queło che ne vien istintivo, ovaro de méterse a rìder con profondo sàdico piaser davanti a l'agonizante nostro tesoreto domèstico, e proprio quando la comosion ne induria a finirla ghe spuemo invese in facia, a'l poareto nostro cucioło che cussì tanto el ne ga senpre volù ben, strapàndoghe i peli uno a uno e inpisando la so coda inbevù de àlcol. El xe un pensiero poco gentile. Ma se pol far de mejo. Podemo imaginar un regalo de conpleano del tuto particolar par la nostra cara nona, che quando gerimo pìcoli la ne contava cussì ben le fàvołe, o par el nostro amà noneto. Co la scusa che'l xe el so conpleano li tachemo a na carega par zogo, e quando i se speta che riva el regalo ghe inietemo invese a ripetision aqua salà boiente inte'l naso, no sensa gaverli prima acuratamente inbavajà. Po, quando l'atmosfera la se xe scaldà abastansa fasemo entrar in casa la pìcola banda de pastori stupratori che gavemo reclutà dopo longhe ricerche, indivìdui tenprà da ani de coiti con pégore e galine, e quando lori i se dà da far co i poareti nostri noni noaltri gavemo el bon gusto de imortalar ogni detàjo co la nostra pìcola telecàmera, fasendo sùbito dopo rivéder a le estenuà none el filmà de le so involontarie prodese, informàndole par coretesa che mediante un espediente tècnico semo colegà con l'antena condominial su la frequensa giusta, cussì che tuto el palaso el sta deso amirando a'l posto de RAI UNO. Volendo esagerar podaresimo iméter i fotograma mejori su'l circuito telemàtico de INTERNET, meténdoli cussì a disposision de vinti milioni de utenti in tuto el mondo. Ma a furia de esagerar l'oror ben presto el se trasforma in umorismo negro, e no'l fa pì el steso efeto.
Qualcun el podarà scandalizarse, pensando che qualchedun altro el posa osar pensar qualcosa de sto genere. Se el xe par questo poso osar pensar ben de pezo, ma no voleva deso dimostrar quanto mi sia in grado de imaginarme de orìbile. Voleva méter in evidensa el fato che imaginarse da soli de oror el xe na evolusion rispeto a'l gesto de vardarse de oror in un film o inte'l telegiornal. Se se stupise dei orori esibìi in un film de Dario Argento & Colleghi e se se stupise dei orori esibìi in un telegiornal par la mancansa de imaginasion che tradimo a no imaginarse par conto nostro queło che'l regista del film el ga invese savù imaginarse e queło de ripugnante che i giornalisti marpioni i xe riusìi a scuvar atorno par la società.
L'oror el atrae parché el esiste e parché dato che'l esiste ghe vol saverse difénder. No se conose davero fin a quando no se incontra. Ma se se avisina a conóserlo osservando i esenpi che i film e i telegiornali i ne fornise, opur doparando la pròpria imaginasion. Quanto pì se se xe avisinà a conóserlo, tanto pì se xe in grado de afrontarlo quando el ne tocase diretamente. A questo i serve i film de l'oror, la violensa in tivù, e i telegiornali. A questo el serve, ben de pì, la imaginasion, par chi la sa doparar. Imaginar l'orìbile, savendo che'l xe orìbile, in tuti i so detaji, el ne fornise un bon potensial de difesa contra de lu.

Roberto Quaglia