
 |
SPRULÒQUIE ITAGLIÈN
Caro Maurizio Costanzo Show,
E' dutôr di desidèri. E' sprulòquie l'abilita la ment a trascèndar sè stèsa. Câš ad ca i n' è cvël, nè cvìl ad ceša. E' famigerê "me" u s'arcunfigura a su capriz. Damigèli ch'al galegia al s'sfiulëša cun grazia senza pöna. Ego logo meco e teco. A vagh cun ôcc ad mâg mo nö s'e' lêgh, pòst ch'e' fa rima mo u n' c'entra gnint. A vagh in manira vaga, cumè ch'u s pò sól vaghê. Vaghê, gnint esagerê. Vaghê par n' stê. Chi ch'e' sta, u n' vaga. Chi ch'u n' vaga, u n' viv. Chi ch'u n' viv, u n' viv. Chi ch'u n' viv, u n' viv.
Scòrdat ad quel ch'u t cunsôla sèmpar arcurdê. Evita opör nö d'evitê al nuvità ch'al s'nascònd ènca int i tu meàndar. La Nuvità l'è sèmpar una nuvità, o cumunque la j smèja una masa. Smijê l'è za un difèt gròs, mo la perfeziòn l'è un difèt ancora piò gròs, par quèst l'è mëi smijê che ësar perfetamënt quèl ch'quindi u n' smèja gnânca a sè stès. E' nascònd un sèns, ste perìud aparènt? Ch'u n' s'vója savél ad sicur! I cuncèt ch'i smèja d'avé sèns i è mêl, mo i è mëi di cuncèt ch'un sèns i l'à e i l'à precìs e perfèt. Parchè? Chi e' sa. U n' s sa gnânca s'l'è acsè. O sinò. U n' s sa gnint. U s fa fint ad savé ad n' fê fint ad savé. U n' s sa gnint, gnânca ch'u n' s sa gnint. Savé ad n' savé gnint l'è una masa zen, e ipòcrita, e stupid. L'è paradossêl, in manira banêl. Savé ad gelê a la fràvula l'è piò sémpliz e ènca piò bon. Tót i vrèb savé ad fràvula, prèma o dop int la su vita, o int la vita ad qualcadón ch'i à incuntrê. Un patàca e' dirèb ch'ogni fràvula la vrèb prèma o dop savé ad qualcadón ch'e' vója savé ad lì. A sem tót patàca, e alóra dšèmal, cun e' gust ad chi che, n'avènd gust ad fràvula, u s'chêlma cun tót i gust ch'i salta a câš s'al papil gustativi dla su interfàza perzetiva. A scuvrèn tra l'êtar d'ësar e' sémpliz elènc piò o meno urdinê dla registraziòn infedêl de' magma ad fenòmen perzetiv ch'i c'à riguardê. L'è una frêša incumplèta, cumè tóti al frêši, e la vô dì ben pôc. U j è dal frêši ch'al vója dì ben tânt? Se al frêši agli è frêši fati al n' vô dì gnint mo al e' dis in manira ben capìbil e ben cundivìsibil. Se al frêši al n' è frêši fati al vô dì fôrsi ad piò mo, dšèndal, al n' e' dis pröpi, o invezi sè. Ècco l'indeterminaziòn, o fôrsi nö, ècco però quèl... o fôrsi quèl êtar... l'è mëi una frêša fata incù che una frêša n' fata dmân. O viceversa. Chiunque e' scèlga opör nö. Chiunque e' tira vantag da la su cunfušiòn persunalèsma par generê la release ch'la vén dop ad sè stès. Chiunque ch'e' bèva opör nö a al rêri funtân ad cunfušiòn pura o cumunque pôc adulterêda. La cunfušiòn la s pò ciamê câos. Da e' Câos par Câš e' nès Cvël, e' dis ón di piò picettiân tra i Gigi Picetti ch'i esést o i esistrèb int i còsum. E' câos l'è e' miscê dal chêrti da zug, l'è la ricunfiguraziòn di archètip. Chissà pu cs'la vô dì st'ultma frêša, mo la sòna tota pina ad significhê nascôst, e e' significhê, sóratót quel nascôst, l'è la muneda ch'la côr mëi a e' grând marchê dl'energì dvintêda homo sapiens. Chi ch'e' scapa da la cunfušiòn e' scapa da e' principi ch'u l'à fat esést, e' rinunzia a e' zug dl'evoluziòn, quêlsiasi cvël ch'e' pòsa, e' vója o u n' pòsa o u n' vója significhê, opör nö, o invezi sè, almânc in pêrt.
Cristàl e papagàl, pôch i cristàl, i avânza papagàl culurê par fint, cumè tót i pupàz. I papagàl, ènca bòt o vuid d'urina, i dà e' via a una frêša ch'la n' sa cumè andê avânti. Al frêši ch'al n' va avânti agli è cumè dal minivìti tarbêdi, agli è dla realtà e fê fint ch'u n' sia acsè l'è una manifestaziòn ridìcula ad bassa umanità o d'êlta animalità, o viceversa opör nö. Piò frêši ch'al nès ch'al n' sapia andê avânti, piò frêši maraviòši invezi al nès e al s'mostra int e' su unic e, da cl'mumènt, imitàbil splendôr. Se tota l'umanità la dscurès sèmpar e sól druvènd ogni individuo a ogni frêša sèmpar e sól frêši che mai niseun l'épa dët prèma, l'umanità la srèb una ròba difarènta. L'è ben pusèbil, parchè l'umanità l'è pôch miliêrd ad crâni cun e' côrp tachê e al frêši pusèbil epör mai dëti milión ad miliêrd e, a dégh ad piò, agli è ancora ad piò e me a j ò dët milión ad miliêrd par e' sòn cunvincènt ch'e' nòmar, tót sumê astràt, l'à o ch'u c'pê spès ch'e' j épa. Brota la vita fata ad frêši astrusi a fêši, o quasi, eh? La vita senza fêši o cun pôchi, cun fêši ben definidi cun l'etichèta DOC, etichèti cundivisi da i piò e da i piò di piò int e' su significhê presunt, la vita acsè la v'aligra, sè, ench se a n' nighì ch'la sia acsè acsè. Pôchi fêši pôc cunfuši al n' v'cunfònd e al v'smorza, acsè che dl'ardôr pêrs a pasì j an a arcurdê da patàca l'ardôr. U n'è fôrsi da patàca strugês a arcurdê l'ardôr dl'ardôr? L'è cumè implòdar a pinsê a l'amôr dl'amôr, a i sòld di sòld, a i paperòn di paperòn, a pinsê ad pinsê... o invezi nö? Pinsì ad pinsê, pu pinsì ad pinsê ad pinsê... S'a si principiânt andì avânti un pô a la vôlta. Afruntì e' vòstar prèm pinsìr pôc a la vôlta, par n' slughêv e' zarvël. Prèma mëz, o ancora meno. Quand ch'a j avrì un pinsìr intìr, cun tânta prudènza mitìi insèn un êtar, ch'u s'ucupa de' prèm. Un pinsìr ch'u s'n'acôrza d'un êtar pinsìr. Pu, int la mata escalation ch'i bon mât a l'êrta i impêra da par lór, adurnì, sgònd un'urèbil metàfura, l'êlbar ad Nadêl de' vòstar ësar a e' mond cun una lušènta custelaziòn ad pinsìr indipendènt ench se cunès, ognón o quasi testimòni ad ch'j ëtar e quêlch vôlta ènca ad sè.
Gnint cumè e' sprulòquie ch'e' parla ad sè stès u c'surprènd, se a ësar surprèš nó par natura o par scèlta a s'artruvèn purtê. E' sprulòquie ch'e' parla ad sè stès e' s'duvrèb insgnê a scôla cumè materia a pêrt, cumè disciplina ad palèstra mentêl, cumè vacìn contra ogni fundamentalèsum, cumè prufilassi d'una masa ad patulugì ch'a n' cont aquè e adës parchè al n' m vén in ment e a n' vegh parchè a duvrèb sfurzêm piò ad tânt - ânzi, acsè a sutmèt a la vluntê suvrâna ad chiunque ch'e' lèz adës l'upziòn ch'a sugerès me d'acetê quel ch'a ste pont e' tradès d'ësar un còmpit da fê a ca sotintès, acsè sotintès ch'a evit senz'êtar ad suvraintendël dšèndal.
Cumunque, o adiritura dônca, parchè sota sota a so dèst adës a m'arèst, a atèst ch'a n' v'arèst nè a v'dèst se dèst ancora a n' si, e lèst a m'aprèst a fnì ste cungèst fôrsi ènca molèst mo unèst manifèst, parchè mai a urchèstr e' vòstar sequèstr, nè a v'infèst o a v'tempèst cun e' mi capèstr. A so un pô mèst, e quèst a e' detèst. La mi vèja la vôlta a e' vèspr. Mo prèst, se e' zarvël dla ment a n' e' svèst, a m'armitrò in sèst, cun un sól gèst. Fin de' tèst.
Roberto Quaglia
L'òpra "Caro Maurizio Costanzo Show...", tota o in pêrt, la s pò lèz, scarghê s'e' computer, stampê e cupiê senza limit, sól par ûs persunêl. Tót i tëst e al figurèni j è ad Roberto Quaglia e i n' s pò druvê, tót o in pêrt, senza parmès. E' prugët gràfic e i pëz gràfic ad sti pàgin j è ad Roberto Quaglia e basta. L'òpra "Caro Maurizio Costanzo Show...", tota o in pêrt, la n' pò ësar mesa in vendita par nisun mutiv senza e' parmès prèma.
© 1994-2000 Roberto Quaglia.
|