
 |
SPROLOQUIU ITALIANU
Caru Maurizio Costanzo Show,
U dutture de i desideri. U sproloquiu abilita a menta a trascendere se stessa. Casi de casa un su' cosa né cosi de chiesa. U famigeratu "iu" si riconfigura a ghiribizzu sue. Damigelle fluttuanti si sguagliunizzanu ccu grazia implume. Ego logo meco e teco. Vagu ccu sguardu de magu ma no supra u lagu, locu chi fa rima ma ppe nente c'entra. Vagu 'n modu vagu, cumu sulu si pò vagare. Vagare, nente strafare. Vagare ppe evitare de stare. Chine sta, un vaga. Chine un vaga, un campa. Chine un campa, un campa. Chine un campa, un campa.
Si' scurdatu de chiru chi ti cunforta sempre ricordare. Evita oppuru no de evitare i novità chi intra i meandri tui puru s'ammuccianu. A Novità è sempre na novità, o comunque ci assumiglia tantissimu. Assumigliare è già nu difettu gravu, ma a perfezione è difettu ancora cchiù gravu, ppe cui è megliu assumigliare chi essere perfettamente quarche cosa chi allura un assumiglia mancu a se stessu. Ammuccia nu sensu, chistu periodu apparente? Un si vò u sapìre de sicuru! Cuncetti chi assumiglianu a avìre sensu su' male, ma su' megliu de cuncetti chi nu sensu u tenanu e u tenanu precisu e perfettamente. Pecchì? Chine u sa. Un si sa mancu si è accussì. O diversamente. Un si sa nente. Si finge de sapìre de un fingere de sapìre. Un si sa nente, mancu chi un si sa nente. Sapìre de un sapìre nente è assai zen, e ipocrita, e scemu. È paradossale, 'n modu banale. Sapìre de gelatu alla fragola è cchiù semplice e puru gustusu. Tutti vulissaru sapìre de fragola, prima o pue intra a vita loro, o intra a vita de quarcunu chi hannu 'ncuntratu. Nu scemu dicissa chi ogni fragola vulissa prima o pue sapìre de quarcunu chi vò sapìre de illa. Simu tutti scemi, e allura dicimulu, ccu u gustu de chine un tenennu gustu de fragola si calma ccu tutti i gusti chi ppe casu sartanu supra i papille gustative de l'interfaccia sua percettiva. Scuprimu tra l'atru de essere u semplice elencu cchiù o menu ordinatu de l'infedele registrazione du magma de fenomeni percettivi chi n'hannu riguardatu. È na frase incompleta, cumu tutti i frasi, e vò dicere bene pocu. Esistanu frasi chi vuonnu dicere bene assai? Si i frasi su' frasi fatte un vuonnu dicere nente ma u dicianu 'n modu assai comprensibile e bene condivisibile. Si i frasi un su' frasi fatte vuonnu dicere magari de cchiù ma dicennulu un u dicianu propriamente, o 'nveci sì. Eccu l'indeterminazione, o forse no, eccu però quarche cosa... o forse quarche atra cosa... è megliu na frase fatta oje chi na frase un fatta dumane. O viceversa. Chiunque sceglie oppuru no. Chiunque piglia vantaggiu da cunfusione sua personalissima ppe generare a release successiva de se stessu. Chiunque s'abbevera oppuru no de i fonti rare de cunfusione pura o comunque pocu adulterata. A cunfusione pò essere chiamata caos. Du Caos ppe Casu nasce Cosa, dice unu de i cchiù picettiani tra i Gigi Picetti chi intra i cosmi esistanu o esistissaru. U caos è u rimmiscamentu de i carte de jocu, è a riconfigurazione de l'archetipi. Chissà pue chi vò dicere chista urtima frase, ma sona tutta china de significatu recunditu, e u significatu, specie chiru recunditu, è a muneta de megliu corsu au granne mercatu de l'energia fattasi homo sapiens. Chine fuje a cunfusione fuje u principiu chi l'ha resu esistente, rinuncia au jocu de l'evoluzione, qualunque cosa chistu pò, vò o un pò o un vò significare, oppuru no, o 'nveci sì, armenu 'n parte.
Cristalli e pappagalli, pochi i cristalli, avanzanu pappagalli variopinti ppe finta, cumu tutti i pupazzi. I pappagalli, puru utri o vacanti de urina, dunanu u via a na frase chi un sa cumu cuntinuare. Frasi chi un cuntinuanu su' cumu minivite troncate, appartenanu alla realtà e fingere chi chistu un è è na ridicula manifestazione de vascia umanità o àuta animalità, o viceversa oppuru no. Quantu cchiù frasi nascianu chi un sannu cuntinuare, tantu cchiù frasi mirabili 'nveci nascianu e si manifestanu intru u splendure loro unicu e de chiru mumentu imitabile. Si tutta l'umanità parlassa sempre e sulu usannu ogni individuu a ogni frase sempre e sulu frasi chi mai nullu ha prima pronunciatu, l'umanità fussa na cosa diversa. Chistu è bene pussibile, essennu l'umanità pochi miliardi de crani ccu cuorpu allegatu e i frasi pussibili eppuru mai pronunziate miliuni de miliardi e dicerò de cchiù illi su' ancora de cchiù e iu dissi miliuni de miliardi ppe u sonu cunvincente chi chistu numeru tuttu sommatu astrattu tene o a nue spissu pare chi tene. Brutta a vita fatta de frasi astruse a fasi, o quasi, eh? A vita senza fasi o ccu poche de illi, ccu fasi bene definite etichettate DOC, etichette de i cchiù e de i cchiù de i cchiù intru u significatu loro presuntu condivise, a vita accussì v'allieta, sì, puru si un negati chi è accussì accussì. Pochi fasi pocu cunfuse un vi cunfunnanu e vi stutanu, accussì chi de l'ardore persu passati anni a ni rimembrare scioccamente l'ardore. Un è forse scemu si struggere a rimembrare l'ardore de l'ardore? È cumu implodere a pensare all'amure de l'amure, ai sordi de i sordi, ai paperon de i paperoni, a pensare de pensare... o 'nveci no? Pensati de pensare, pue pensati de pensare de pensare... Si siti principianti procediti ppe gradi. Affrontati u primu pinsieru vuostru pocu alla vota, ppe un vi sbrogare u ciarviellu. Prima menzu d'illu, o ancora de menu. Quannu nu pinsieru interu avrete, ccu somma cautela abbinatici n'atru, chi s'occupa du primu. Nu pinsieru chi s'accorge de n'atru pinsieru. Pue, intra a pazza escalation chi i boni pacci ad arte spontaneamente 'mparanu, adornati, secunnu na metafora abominevule, l'arburu natalizio du vuostru essere allu munnu ccu na costellazione barluccicante de pinsieri indipendenti puru si connessi, ognunu o quasi testimone de l'atri e quarchi vota puru de se.
Nente cumu u sproloquiu autotematizzante ni sorprende si a essere sorpresi nue ppe natura o ppe scelta ni ritruvamu 'nclini. U sproloquiu autotematizzante s'avissa de 'mparare a scola cumu materia a se, cumu disciplina de palestra mentale, cumu vaccinu contra ogni fondamentalismu, cumu profilassi de na vasta gamma de patologie chi ccà e mo un enumeru pecchì un mi venanu 'n menta e un viju pecchì m'avissa de sforzare cchiù de tantu - anzi accussì suttamintu alla vuluntà sovrana de chiunque mo legge l'opzione de mia suggerita de accettare chiru chi a chistu puntu tradisce de essere nu compitu sottinteso de fare a casa, accussì sottinteso chi evitu senz'atru de u sovraintennere dicennulu.
Comunque, o puru dunque, pecchì sutta sutta sugnu destu mo m'arrestu, attestu chi un v'arrestu né vi destu si destati ancora un siti, e lestu m'appruntu a mintere fine a chistu congestu forse puru molestu ma onestu manifestu, pecchì giammai orchestru u sequestru vuostru, né v'infestu o tempestu ccu u capestru mie. Sugnu nu pocu mestu, e chistu u detestu. A veglia mia mo gira versu u vespru. Ma prestu, si u ciarviellu da menta un svestu, mi rimintirò 'n sestu, ccu nu sulu gestu. Fine du testu.
Roberto Quaglia
L'opera "Caro Maurizio Costanzo Show...", 'n tuttu o 'n parte, pò essere letta, scaricata supra computer, stampata e copiata senza limiti, sulu ppe usu personale. Tutti i testi e l'illustrazioni su' proprietà de Roberto Quaglia e un pònnu essere usati 'n tuttu o 'n parte senza autorizzazione. U progettu graficu e i cumpunenti grafiche de chisti pagine su' proprietà riservata de Roberto Quaglia. L'opera "Caro Maurizio Costanzo Show...", 'n tuttu o 'n parte, un pò essere misa 'n vinnita a nullu titulu senza previa autorizzazione.
© 1994-2000 Roberto Quaglia.
|