
 |
L'IMPRUVISAZIÒN
Caro Maurizio Costanzo Show,
l'è l'Alessandro Testa ch'l'è in me ch'e' scrivarà al paròl ch'al vén dop, parchè un truc bràv u m permèt d'arivê dritt a al prucedùr d'elaburaziòn de' su zarvël.
A v'scriv int la vesta multìplica dl'idolàtra ch'u s'acosta umilmënt a e' su tòtem, arichènd la su cuscènza stólta cun i vantag d'ilušiòn che sta suplica ad chêrta la purtarèb a la su cuscènza televisivamënt minusabbiènta, e ènca sota al spòj busêrdi de' cumpiladôr mercenêri ad zentòn n' letarê par ûš ad manichìn magnaossbùš impalê int l'adoraziòn stóida di su pulsìn inamidê; e piò ancora a m fëg memòria fotostàtica de' cantôr de' pastèc e de' gorgonzola ch'e' dvènta ranzid dsmenghê int al credènzi meneghini vèci, l'inarivàbil dulurânt Carlo Emilio; e meno ad tót a m dichêr e' vòstar umil sêrv e spetadôr Alessandro Testa.
Che la natura dl'impruvisaziòn, dla lodêda e disprezêda impruvisaziòn ch'la rimpinza al dissertaziòn dòti e sbrudlòsi di fiô senza sângv de' De Sanctis, di epìgon d'un Getto arnuvê int e' pàlid anguicrinito ad Ferrara, la sia ròba scnusùda a la piò pêrt, ad piò int un mond ch'u s'inznòcia a adurê e' fetìc dl'iperspecializaziòn e dla cnusènza superscientìfica, che la natura dl'impruvisaziòn, a v'dgèva, la zéša int e' piò cumplèt abandon sumersa da e' strapotêr dla Fòrmula, de' Palinsèst, a la fin di cont dla pretèša tota alfieriâna d'avé un significânt par ogni significhê, la farèb vér e' dogma hegeliân de' "tót quel ch'l'è rêl..." e acsè vi; mo che drì a sta pretèša ad cmand s'l'univêrs mond, sta vluntê ad putènza znina znina, piò simil a e' "volli, volli, fortissimamente volli" dl'adùltar ross che a e' stupôr da burdèl de' superóm mansuêt, u s nascònda una sustanziêla incumprensiòn dla natura dal cös l'è una nutizia ch'l'à avù pôca circulaziòn int l'ultum pêr ad sècul, fôrsi fôra che par pôch Untermenschen negar ch'i pratica e' sintìr strèt e scòmd de' blues.
Aiùtum adës, tòtem multipotènt ch't'aspèrž s'e' pòpul ignurânt al tu benedizion gnòstichi catòdichi, fa che cun l'aiuto sânt dla tu savieza ch'la vén in un unic flus senza interuziòn da cl'Ón ch'la mi lèngua profâna la n' è dègna ad numinê e' su nom ad quàtar sìlab, la mi sienza limitêda e pcadôra la pòsa tirê sò una faliva ad cla lùš ch'la vén da l'eternità da la sóla funtâna, da e' sól bèn, da e' sól vasèl d'ogni cnusènza parchè la mi lèngua e e' mi terminêl i pòsa ardì ad captê par la Su piò grânda glòria una faliva ad verità da dunê, Promèteo nôv, a i tu fiô ch'i zèš int e' scur. Acsè sia.
A un zert pont, a dégh me, chi ch'u t'ariva? Un spilungòn cun almânc tri palum ad còl, a dégh me, ón ch'e' sostèn che quel ch'u s ved l'è tota una fandònia, e ròbi d'e' gènar.
Cl'è là e' dis che quel ch'a vdèn, sânta pulènta, u n'è mìga vér mo l'è tót un'imaginaziòn di ôcc, o ròbi acsè. Ròbi da n' crèdar, a dégh me.
Mo cs'u j c'entra quèst cun l'impruvisaziòn, a dirì vó, mi pznin amìg? Cs'u j c'entra la natura dla realtà cun un prucediment artìstic secundêri, mo csa dégh artìstic, da pantomima, da avanspetàcul, da circh!
Intânt che e' fiôl ad sti temp iluminê e prugresìv e' rumèga in pultrôna cuncèt ormai avultê in bòl d'enzim ch'i à za fat da un pëz e' su lavôr digestìv lènt mo ch'u n' s fêrma, dgradènd ogni ròba in una papa opaca ch'la spuza ch'la n'aspèta êtar che d'ësar butêda fôra par j orifizi che la natura, madrègna mo savia, l'à prepêrê pr'e' bsògn, un êtar, meno sedentêri, u s mèt a tirê fôra da e' magma senza forma de' n' determinê, demiùrgo nôv, la Splendènta Gèma de' Nôv.
Mo che gèma-splendènta-de'-nôv la sarèb, s'la fos za cnusùda?
E' sêlta quindi a la tu cuscènza furba, amìg letôr, cumè ogni òpra ad vira scuvêrta la sia pusèbil sól pr'e' mèz e' nòbil strumènt dl'impruvisaziòn.
Ricèta par una bôna impruvisaziòn:
1) Ogni vôlta ch't'trôv quèl ch'u t pê dègn d'ësar tnù, lasal sóbit.
2) Fidat poc ad tót quel ch'e' riès a la prèma
3) Fidat poc ad tót quel ch'u n' riès a la prèma
4) U n' gn'è giöst
5) U n' gn'è sbagliê
6) Quand ch't'an sé cumè fê, impruviša
S't'tnirè la tu calma quand ch'tót d'intûran a te i l'avrà pêrsa
S't'acetarè la riuscida e e' fallimènt dal tu impruvisaziòn cun e' stès surìs s'al lèbar
Se una vôlta fnida la tu impruvisaziòn t'an la mitarè da pêrt, scurdèndla par butêt int un lavôr nôv
Alóra, fiôl, t'sarè un impruvisadôr.
Alessandro Testa
L'òpera "Caro Maurizio Costanzo Show...", tota intìra o in pêrt, la pò ësar lèta, scarghêda int e' computer, stampêda e cupiêda sènza lèmit, sôl par ûs persunêl. Tot i tèst e al ilustraziôn i è pruprietà ad Roberto Quaglia e i n' pò ësar druvê tot intìr o in pêrt sènza autorizaziôn. E' prugèt gràfic e i cumpunént gràfic ad sti pàgin i è pruprietà riservêda ad Roberto Quaglia. L'òpera "Caro Maurizio Costanzo Show...", tota intìra o in pêrt, la n' pò ësar mesa in vèndita a niseun tìtul sènza autorizaziôn prèma.
© 1994-2000 Roberto Quaglia.
|