
 |
PARCHÈ S'CMÌNZA A DRUGHÊS
Caro Maurizio Costanzo Show,
te ch't'é sèmpar dét dal bël parôl contra l'usânza ch'la règna ad un bôn 1% dla zuventù italiâna d'infilzês la chêrna cun una siringa par impinìs e' sangv d'eroina, t'am scultarè ad sicur adës ch'a m'prepêr a cunfidêt la spiegazion sèmpliza ch'a m'so dê da par me dal cavs ad stu fenòmen.
Caro Maurizio Costanzo Show, t si una Divinitê Bona, t dì dal cös bon contra la cultura dla dròga e quèla dla mafia, par Tu mèz e atravèrs ad Te i s'spècia i pont ad vèsta cuntrêri e u s'fèrma e' telêr ch'e' cambia ad sìmbul s'e' quêl dè dop dè u s'costruès e u s'trasfôrma la sucietê italiâna... e a pudrè andê avânti cun dal strunzêd cumpâgn par dagl'ór e invezi a pas sóbit a e' dunque.
In parôl pôvri: Parchè i zóvan i s'droga? Parchè i n's'droga brisa ènca i vciarèn? Opùr sól i vciarèn? O i dutùr, che s'i vô la dròga i l'à ènca a pôrta ad mân? E parchè i n's'droga brisa tot i zóvan? Parchè u n's'è mai vèst e' chês d'un calciadôr dla serie A ch'e' dvènta eroinòman? Insòma, parchè in zérti categurì ad persòn u s'droga e in êtri nö?
Sè sè l'emarginazion la mancânza ad valùr e chi quël alè... a in avèm sintù parlê mièra ad vôlt, mo a cuntinuèm a dì a nó e a chiêtar che in fònd in fònd pröpi a n'capèm brisa cumè ch'un pò decìdar ad cminzê a bušês, a cunclušèm che chi ch'e' s'bóša e' sbaja e basta, e alóra e' vô dì ch'a n'avèm capì gnint. Pruvèmji a mi môd, cun un aprocc un pô divêrs dla sòlita recita ad chi du o tri cuncèt trid e ritrid.
Rendèmsi cont prèma ad tot che l'èsar umân l'è un organìsum sucêl. A e' cuntrêri d'una préda, che s't la tù vi dla spiàza, dla cumpagnì dagl'êtri préd, e t la mèt da par lì int e' spazi vut in òrbita datònd a la tèra, alè la s'sta bona sénza lamintês nè patì ènca par zinch miliêrd d'èn (e dop e' sól - a sintì i dót - u s'slarghërà ingulènd e digerènd la tèra e ènca la nòstra préda), l'èsar umân, s't al ciàp e t al mèt un pô da par lò e' cmìnza quêši sóbit a patì. A e' cuntrêri dla préda, l'èsar umân l'à una vita sucêla. Cs'el ch'e' vô dì? E' vô dì che a l'èsar umân u j pis andê a al fèst int l'êlta sucietê? O ènca int quèla mèdia? Ènca.
In realtê e' vô dì una masa ad piò.
E' fat che l'Òm (e la Dòna la n'è brisa da mènch) l'àbia una vita sucêla e' vô dì che sénza vita sucêla u n'pò brisa campê. Cs'èl alóra la vita sucêla?
Sòstanzialmènt, la vita sucêla l'è e' fat ad fê quèl insèn a chiêtar. S'a guardèm cun piò atenzion, a vdèm che e' cuncèt ad vita sucêla e' cumpôrta e' fat ad fê quèl par chiêtar. Ucio: a n'so brisa drì a fê de' cuntrabând ad niseun ideêl pseudo-pio. Par chiêtar e' lavóra la crocerossina cumè che par chiêtar e' lavóra e' bòia. Sèmplizemènt, i n'è brisa drì a servì i stës "êtar". Robin Hood e' rôba a i sgnùr, mo e' dà a i purèt. E' sòlit pulìtic e' rôba a i purèt, mo e' dà a i sgnùr. Che l'èsar umân e' sia un animêl sucêl e' vô dì che chiunque e' dev èsar ùtil a quelcun êtar. L'asasèn u n'è brisa ùtil a la su vìtima, mo u l'è a e' mandânt. E' pulizìot u n'è brisa ùtil a e' lêdar, mo u l'è a e' citadèn. Quând i pulizìot, i pulìtic e i giùdiz i n'è brisa ùtil a e' citadèn e' vô dì ch'i è curòt, e alóra i è ùtil a i curutùr. Dal vôlt e' bòia l'è parfèna ùtil a la su vìtima, cumè int i rapôrt sado-masochìstic (e e' film "Portiere di notte" ad Liliana Cavani l'è un esèmpi sublìm ad stu chês). Ogni èsar umân dla tèra, par sintìs legitimê a esìstar, e' dev èsar ùtil a quelcun êtar. Ènca l'eremita, luntân da tot j èsar umân par su decisiòn, l'à spës di lìgam cun quèlch animêl, ch'e' j impìs e' bišògn ad sintìs ùtil a quelcadun.
Quând un èsar umân e' crèd ad n'èsar (piò) ùtil a niseun, e' sint che la su vita la n'à niseun sèns e spës e' s'amaza.
Mo, sôratot quând ch'u s'è zóvan, prèma d'amazês u s'al prôva tòti. Quând ch'u s'è zóvan l'imperatìv l'è quèl d'inserìs int la sucietê, truvê una o piò funzion da incarnê, e sóra d'lòri fê la su identitê d'individuo grând ch'la n'gn'è incóra, a e' pôst dl'identitê ad burdèl o ad adulescènt ch'la n'vêl piò. U s'al prôva tòti partènd da d'sóra, dal funzion piò êlti ch'al pê a pôrta ad mân. U s'zirca dagl'amicizi bóni, un bôn lavór, un bôn rapôrt sentimentêl. S'u n's'tróva gnint e niseun ch'e' mòstra d'avé bišògn ad nó, u s'sbasa al pretëši. S'ènca sbasènd al pretëši u s'arèsta da par sè e inùtil, u s'zirca incóra piò d'sota, u s'chêla e u s'chêla e u s'chêla, fintânt che in fònd a la schêla sucêla, quând ormai, par via d'una masa ad falimént, l'amarëza e la rabia al règna sovrâni, ècco finalmènt una microsucietê d'êtar arabì e tradì ch'i t'acèta finalmènt, ch'i à finalmènt bišògn ad te. Ècco i tòssic e ècco, sôratot, i spaciadùr e i narcotrafichînt luntân ch'i n's'vèd. I spaciadùr i à bišògn ad te, ad te ch't si sénza funzion e identitê e t si drì a zarchê tòti dô. I à bišògn ad te e te, ch't si sénza identitê da grând, ch't n'tróv niseun êtar ch'e' t'dâga un'identitê da grând avènd bišògn ad te, ch't n'tróv êtar ch'i s'sërva dla tu esistènza, te, sénza êtra scèlta, t'scòj l'unica scèlta ch't'é.
U n'è brisa quèla ch'a j ò fat un'anàlisi cumplèta de' fenòmen dròga. Divêrs êtar aprocc i è vàlid cumpâgn. Mo i j à bèle fat j êtar e u n'm'è parsù quèst e' pôst par ripètli. E' mi l'è sól un di môd pusèbil ad vdé quèl ch'e' suzèd. A l'ò spiegh aquè, umilmènt, d'nènz a la piò putènta dal divinitê muderni. Ch'ognun e' zónta e' mi pont ad vèsta a i sù, parchè l'è sól arcujènd dentr'ad sè e' piò grând nòmar ad pont ad vèsta che ognun e' pò avišinês sèmpar ad piò a la cumprensiòn perfèta dal cös, ch'la scapa e ch'l'è luntâna sénza fin.
Roberto Quaglia
L'òpera "Caro Maurizio Costanzo Show...", tota intìra o in pêrt, la pò ësar lèta, scarghêda int e' computer, stampêda e cupiêda sènza lèmit, sôl par ûs persunêl. Tot i tèst e al ilustraziôn i è pruprietà ad Roberto Quaglia e i n' pò ësar druvê tot intìr o in pêrt sènza autorizaziôn. E' prugèt gràfic e i cumpunént gràfic ad sti pàgin i è pruprietà riservêda ad Roberto Quaglia. L'òpera "Caro Maurizio Costanzo Show...", tota intìra o in pêrt, la n' pò ësar mesa in vèndita a niseun tìtul sènza autorizaziôn prèma.
© 1994-2000 Roberto Quaglia.
|