‹ Indiz de' sit · Ca de' museo · repêrt restaurê
Spartìs:FacebookXWhatsAppTelegramEmail
La Televisiôn l'è la Religiôn Mudêrna (Caro Maurizio Costanzo Show... lettera n.6)
lètra n.6

U n'basta avé una bôna ment; la cvël piò impurtânta l'è druvêla bën..

CARTESIO

La televisiôn l'è una religiôn ch'la à dal cìsi in tot al cà. S'ônn l'à una televisiôn znina, l'à una capulina. S'u n'à una grosa l'à una capulôna... pardon, una catedrêl.

GIGI PICETTI









































LA TELEVISIÔN L'È LA RELIGIÔN MUDÊRNA

Caro Maurizio Costanzo Show,

incù a n'sòpórt i sociòlogh. A m'i sò mes a pinsê sôra zéng minùd, e u m'è vnù in ment che par ësar ricunusù sociòlogh u i basta ciapê una laurea in sociologì, ciò avé imparê al nuziôn ch'al i è int un zért nùmar ad lìbar stabilì e avé pasê j esâm ch'i i va dria (una cvël ch'la n'è pröpi difézil par una parsôna d'intelighènza nurmêla) A la fin, e' sociòlogh cun e' tìtul u n'è una parsôna ch'l'apa dimustrê d'avé capì quèlch cvël de' cumpurtamént dla sucietà, mo una parsôna ch'l'apa dimustrê d'avé studiê quèl che chj êtar i à capì de' cumpurtamént dla sucietà. La mi definiziôn la pò sunê un pô estremésta, a l'amèt. Guardèm alóra la quistiôn da un'êtra parta: un tizi e' studia tot i lìbar regolamentêr de' córs ad sociologì, e' ciàpa e' su bël certifichê ad sociòlogh, pu e' scarabòcia di artìcul fat mêl int i quêl e' pastròcia a vànvera cun i cuncèt di êtar ch'l'à imparê, o ancóra pès e' va a dì quèlch fras d'efèt in televisiôn, o e' s'fa sarê par un an da par lò int una gròta par scrìvar un lìbar zarchènd sé stèss, e ecco che la su identità ad sociòlogh l'è bèla cunfermêda e acetêda da tot. Difati, u i basta scrìvar ch'u s'è sociòlogh s'e' bigliët da vìsita, e quasi tot i i crèd. Par fê stê zét quí ch'i n'i crèd u i basta citê aquè e alè a casàc Mac Luhan e quaicadun êtar ch'a n'so parchè me a n'sò un sociòlogh.
Pröpi parchè a n'sò un sociòlogh, a m'sò imbatù in zérti mi riflessiôn che da niseun sociòlogh - pôvar me - u m'è mai capitê fin adës ad sintì, e ch'adës a i pôrt ma te, car Maurizio Costanzo Show, e a chiunque, par mëz ad te, ad sti mi fras e' fóss mai bersàj.
E' sugh l'è sémpliz e d'aparènza banêl dimòndi, e u s'riassum int una fras ch'la dis tot e la n'dis gnint: "LA TELEVISIÔN L'È LA RELIGIÔN MUDÊRNA."
Bëla scuvêrta, i dirà in tânt. Mo n'a s'farmèm a la superfice, a dégh me, e analizèmni al cunseguènzi. Prèma ad tot: a cs'éla servida, cs'éla ch'la sêrv e ch'la sarvirà sèmpar, in ògni témp e pöst de' mond, qualsìasi religiôn? Gnint sofèsum o rispòst intòrti, par piasé! Una rispòsta sôla, ciêra, sémpliza, pràtica, ch'la n's'pò cuntrastê: "La religiôn la sêrv a dê a la populaziôn i mudèl cumùn ad cumpurtamént."
T'i pu ciamê cumè ch't vu: ètica, moralità, valùr ecètra. La sustânza l'è la stèsa. In ògni témp e pöst de' mond la religiôn la sêrv par fê savé a la zénta cum ch'u s'à da cumpurtês. Chiunque ch'l'apa dabón fede int la su religiôn, e' s'cumpôrta cumè che la su religiôn la cmânda.
La religiôn l'è indispensàbil par l'urganizaziôn suciêla, e chi ch'e' pensa e' cuntrêri l'è un pataca e a e' dimustrarò fra pôch. U n'esèst, nè j è mai esistì, dal sucietà umâni sénza religiôn. U i è a stu riguêrd una gran cunfusiôn ad parôl, parchè sôl al religiôn tradiziunêli al pê incù acsè a chiunque ad nô (mo u n'è stê sèmpar acsè; incù e' cristiân e' sa che ènca e' maumetân l'à una religiôn; di sècul fa, e' nö-cristiân par e' cristiân l'éra sôl un infedèl ch'u n'mitéva d'vivar, e difati l'éra dimòndi pupulêr la guèra santa, ancóra incù pupularèssma fra j islàmic) Al religiôn nö-tradiziunêli, invezi, al n'è ancóra stêdi ricunusùdi cumè religiôn a tot j efèt. La piò nôva e putènta fra al religiôn nôvi nö-tradiziunêli l'è la Televisiôn, e niseun u n'à ancóra ciapê e dèt in pùblic pina cunzìnza.
I sociòlogh i ciàcara a vôd dla cunsideraziôn ubvia che la Televisiôn la sia e' strumént ad cumunicaziôn piò putént ch'u sia mai esistì. Quèst l'è vér. Mo l'è sôl e' prinzìpi.
Int una masa di paés duv che la Televisiôn la s'è spânta ad piò, la religiosità pupulêra tradiziunêla la s'è sbasêda dimòndi. Parchè? Quèl ch'a stëgh a scrìvar, cumè ch'a j ò zà dèt, u n'vô ësar (cumè difati u n'è) un sàg sociològic sóra al relaziôn ch'a i è tra televisiôn e sens religiós, mo una lètra a e' Maurizio Costanzo Show duv ch'a s'vôlta sémplizmënt la luz dla cunzìnza cutetìva int una direziôn fin adës pôch batùda. Tânti e tròpi sumiànzi u s'tróva int i cumpurtamént ad chi ch'l'è devòt a una religiôn tradiziunêla e ad chi ch'l'è devòt a la Televisiôn, par liquidêli cumè câs. Quêli sumiànzi? Bé, pruvèm a scuvrìn quaicadun insèm:

  • I MUDÈL CUMÙN AD CUMPURTAMÉNT: Cumè ch'a j ò zà dèt, chiunque ch'e' sia devòt a una religiôn, e' tira fura da lì i su mudèl ad cumpurtamént. U i sucéd ma i cristiân, ma i budésta e ma i maumetân. E acsè difati u i sucéd ènca ma i telespetadùr: lô i cumpra i prudòt publicizê in Televisiôn, i còpia al batùd ad spìrit da i cabarettésta Televisìv, i guida la machina cun la sbrighëza cun la quêla u s'guida in Televisiôn (acsè causènd, pr esèmpi, al famigerêdi strâg de' sàbat sîra), i impêra a fê la viulènza cun la nunzalânza cun la quêla la vén fata in Televisiôn (cumè ch'e' dimòstra e' fenòmen dl'iperviulènza di burdèl in Amèrica, ch'sinò u n's'spiegarèb), i fa al su preferènzi sessuêli s'e' mudèl de' grând catàlog ad sex-symbols ch'u i è int l'univêrs Televisìv, e acsè avânti.
  • I DOGMA: Chiunque ch'e' sia devòt a una religiôn, e' n'acèta sénza pinsê i dogma. I devòt int la Televisiôn, i crèd dogmaticamënt a quèl ch'u i vén dèt int e' telegiurnêl (i piò furb i s'cumpiâs ad crèdar a un zért telegiurnêl piò che a un êtar, mo la sustânza la n'câmbia). Emblemàtica l'è a stu prupòsit la famósa fras, druvêda par dimustrê ch'una nutizia l'è vera: "L'à dèt la televisiôn..."
  • LA "TRANCE": La caraterìstica d'ògni fedèl int la funziôn religiôsa l'è e' su caschê in stê ad trance. U i sucéd ma budésta, catòlic, islàmic e zulù. U i sucéd ènca ma chi ch'l'è afundê int un prugrâma televisìv. Guardènd la televisiôn u s'stàca da la su realtà individuêla e e' zarvèl e' manda fura dal ònd alfa (sègn ch'u n's'pò negà d'un'alteraziôn de' stê ad cunzìnza). Cumè in cìsa cun e' su dio, davânti a la Televisiôn u s'identifica cun l'ugèt dla su venerazziôn, o sia i parsunàg Televisìv. Quând che l'identificaziôn la n'riès u s'câmbia canêl (u s'vôlta a un êtar sânt), mo u n's'vén fura d'cìsa, ciò u n's'smôrza la Televisiôn. U s'fa e' zapping quând ch'u n's'sa piò a che sânt avudês.
  • E' RISPÈT DL'AUTORITÀ SAZERDUTÊLA: Qualsìasi autèntic fedèl ad qualsìasi religiôn e' s'avsinarà tarmènd a chi ch'l'incarna e' sìmbul de' su cult, o sia l'autorità sazerdutêla. A guardê i trimùr, i tartaiamént e la sulenità d'dentar ad chiunque e' s'tróva a tu par tu cun la su celebrità Televisiva preferida, u n'pê ch'u i sia dubi ch'u s'trata de' stèss e idèntic fenòmen mentêl.
  • L'ERESÌ: Una dal caraterìstichi ad qualsìasi religiôn ch'la sia acsè putènta che i fedèl i n'apa un'esperiénza acsè assoluta da nö ësar par gnint cunsapèvul ch'u s'trata d'una religiôn, l'è quèla d'fê nàsar e' fenòmen dl'eresì, ciò la demoliziôn sénza pietê ad chiunque ch'e' n'dimòstra int i fat d'ësan seguêz. L'è sucès - cun pznini varianti - int e' Catolicèsum e int e' Nazèsum, e ancóra adës u sucéd - in misura divêrsa - int al religiôn nôvi nö tradiziunêli, cumè la ricerca scientìfica, la psicanàlisi (A turnarèm prèma o dop, int quèlch êtra lètra - opùr nö... chi e' sa? - s'l'argumént che ènca la sciènza, cumè la psicanàlisi - ch'la n'è sciènza - al sia, in sustânza, fati nö tânt divêrs da al religiôn tradiziunêli.), e la Televisiôn. Ch'e' prôva e' letór, s'u n'crèd a al mi parôl, a fê finta cun la zénta ch'e' i parla d' nö savé cs'l'è e' Maurizio Costanzo Show, e' Telegiurnêl, d' nö savé chi ch'i sia pippobaudo, mikebongiorno, mauriziocostanzo, sgarbi... Insistènd a ôltrânza, cun chiunque, d' nö savé dl'ignìt chi o cs'al sia al sudëti divinità, u s'guadagnarà la fâma d'individui "strân", asuciêl, ch'i fa finta d'ësar mât o invezi i è. Insòma, u s'artruvarà dl'ignìt lasê da pêrt. L'è e' marchi dl'eresì mudêrna. Epùr, quasi niseun ad nô l'à mai vèst al sudëti divinità cun i su òc... dal vìv! Lôri al stà int i nòstar zarvèl parchè a ciapèm la su essènza in Televisiôn, cumè che e' bôn cristiân e' ciàpa l'essènza ad Dio in Cìsa. Parchè l'essènza Televisiva l'è piò fàzil da ciapê ad quèla dla cìsa, dato ch'la à dal bòni imàgin a culùr e di sùn ch'i cunvènz (adës ènca stereo), la religiôn Televisiva la sta ciapènd dl'ignìt e' pöst ad quèla dla cìsa tradiziunêla.

    La forza piò grosa dla religiôn Televisiva l'è che tot i su fedèl - ch'i sa piò o manch cs'l'è una religiôn - i n' à cunzìnza ch'u s'trata d'una religiôn, e dònca i i è devòt cumè ad piò i n'putrèb. Cun quèst a n'tir cunclusiôn murêli sóra la piò o manch "bontà" dla religiôn Televisiva. Bontà e Catìvria al è categurì infìdi, ch'al n'mèt mai d'acôrd e' giudéz. Sénza dubi i duvèt parè "catìv", ma j erètic turturê da l'Inquisiziôn Cristiâna, i sazerdòt dla Santa Mâdar Cìsa, ch'i i turturéva nö par catìvria sóva, mo par genuina cunvinziôn che i "catìv" i fóss chj êtar.
    La religiôn Televisiva la n'è nè bôna, nè catìva, ènca se int lì u s'pò ciapê sia e' Bén che e' Mêl. La Televisiôn la dà incù a tot nô i mudèl cumùn ad cumpurtamént. La insègna e' valór dl'ecologì (valór dl'ignìt mânch in tot i paés duv che la Televisiôn la n'l'apa prumòs a lóng), mo ènca e' valór dla viulènza (quèst l'è par quaicadun, me cumprès, un valór negatìv, mo par chj êtar un valór pusitìv, tânt l'è vér ch'la vén fata da tânt cun fierëza). La insègna e' valór di dirèt zivìl, mo ènca e' valór di dvér consumèstic, cundiziunèndas a duvé cunsumê, cunsumê, e sèmpar ad piò lavurê par cunsumê ad piò. La insègna e' valór dla lealtà spurtiva, mo ènca dla guerìglia fra tifuserì, cundanèndla a parôl, mo int e' stèss témp prumuvèndla, fasèndan un mit negatìv dla trasgressiôn. La insègna e' valór dla solidarietà, mo ènca quèl de' rampantèsum, dla richëza a tot i cost. La insègna e' valór de' Catolicèsum, tnèndas agiurnê sóra al preghiêri de' Pâpa, mo ènca e' valór d'una visiôn sôl genitêla de' sès, mitèndas a dispusiziôn mièra ad videocassette porno. La insègna e' valór d'ësar cumè madreteresadicalcutta, mo ènca e' valór de' consumèsum sentimentêl a l'americâna.
    T'capès, car Maurizio Costanzo Show, cum ch'al stà al cös? La piò pêrt di nòstar valùr e dal nòstri cunvinziôn i s'vén dê incù da la Televisiôn, pröpi cumè ch'i s'vnéva dê una vôlta da e' timór ad Dio. Mo la Televisiôn l'esèst da pôch témp, da pôch pôch témp. La piò pêrt di itagliân l'è carsùda sénza e' timór dla Televisiôn, e una cunversiôn da grând la n'vèl una fede radichêda fin da i prèm an ad vita. I vér e autèntic adèpt assolùt a la religiôn dla Televisiôn i è sôl i burdèl ch'i sta ancóra cresènd... e l'è dònca int la sucietà ad dmân, quând tot i sarà carsù fin da e' prinzìpi int e' timór Televisìv, ch'a vdirèm in pìn j efèt clamorós dla rivoluziôn ch'la è in àt...
    Speculê l'è lécit, divertènt e quèlch vôlta duvùd, car Maurizio Costanzo Show. E' sarà int un'êtra lètra, fórsi, ch'a m'sbizarirò a speculê sóra cum ch'la sarà la sucietà ad dmân, quând che la Televisiôn la rgnarà sovrâna fra al religiôn de' mond, un règn acsè assolùt che i sùdit i i ubidirà a òc sarê, cun una devoziôn cumpàgna a quèla che chj êtar sùdit, in êtar témp, i à avù vers e' su re, e' su pâpa, o vers e' strigòn de' paés. Cunsapèvul sôl dla diversità gerarchica ch'la n's'pò culmê ch'la i spartirà da i su dèi nôv.

    Roberto Quaglia





Lasa un Cumént.

Lèz i cumént di êtar.

U m'pis! U m'pis! U m'pis!

Indiz dal lètar.

Cuperta.

Mo chi èl Roberto Quaglia?





L'òpera "Caro Maurizio Costanzo Show...", tota intìra o in pêrt, la pò ësar lèta, scarghêda int e' computer, stampêda e cupiêda sènza lèmit, sôl par ûs persunêl. Tot i tèst e al ilustraziôn i è pruprietà ad Roberto Quaglia e i n' pò ësar druvê tot intìr o in pêrt sènza autorizaziôn. E' prugèt gràfic e i cumpunént gràfic ad sti pàgin i è pruprietà riservêda ad Roberto Quaglia. L'òpera "Caro Maurizio Costanzo Show...", tota intìra o in pêrt, la n' pò ësar mesa in vèndita a niseun tìtul sènza autorizaziôn prèma.
© 1994-2000 Roberto Quaglia.




















Spartìs:FacebookXWhatsAppTelegramEmail