ancuo no soporto i sosiòloghi. Me ghe son messo a pensar sinque minuti, e me xe vegnù in mente che par èser riconossùi sosiòloghi basta ciapar na làurea in sosiologia, ovaro aver inparà le nosion che le xe drento un serto nùmero de libri stabilìi e aver passà i esami de queli (cosa par gnente difìsile par na persona de inteligensa normal) A la fine, el sosiòlogo col tìtolo no'l xe na persona che la ga mostrà de aver capìo qualcosa su'l conportamento de la società, ma na persona che la ga mostrà de aver studià queło che altri i ga capìo su'l conportamento de la società. La me definision la podaria sonar un fià estremista, lo amèto. Vedemo alora la question da n'altra angolasion: un tizio el studia tuti i libri regolamentari del corso de sosiologia, el ciapa el so bravo sertificato de sosiòlogo, po' el scarabocia artìcoli fati mal indove el inpastoca a vanvera con i conseti dei altri inparà da elo, o ancora pezo el va a dir qualche frase de efeto a la television, o el se fa serar par un ano soło in na grota par scrìver un libro ndando a sercar elo steso, e eco che la so identità de sosiòlogo la xe piena piena confermà e da tuti acetà. Davero, basta scrìver che uno el xe sosiòlogo su'l bijeto de visita, e quasi tuti ghe crede. Par far star siti queli che no ghe crede basta nominar qua e là come vien vien Mac Luhan e qualchedun altro che no so parché mi no son un sosiòlogo.
Propio parché no son un sosiòlogo, me son inbatù in serti pensieri mii che da nissun sosiòlogo - ahimè - me xe mai capità fin adeso de sentir, e che deso porto a ti, caro Maurizio Costanzo Show, e a chiunque, par mezo de ti, de ste me frasi el fusse bersaglio.
El suco el xe sénplice e in aparensa asè banal, e el se sera in na frase che la dize tuto e no la dize gnente: "LA TELEVISION LA XE LA RELIGION MODERNA."
Beła scoperta, i dirà tanti. Ma no fermémose sora, digo mi, e analizemo le conseguense. Prima de tuto: a cosa la xe servìa, la serve e senpre la servirà, in ogni tenpo e posto del mondo, qualunque religion? Gnente sofismi o risposte intorcolà, par piaser! Na sola risposta ciara, sénplice, pràtica, che no se pol contrastar: "La religion la serve a dar a la popolasion modełi comuni de conportamento."
Ti pol ciamarli come ti vol: ètica, moral, valori ecc. La sostansa la xe la stessa. In ogni tenpo e posto del mondo la religion la serve par far saver a la gente come che se ga da conportar. Chiunque el ga davero fede inte la so religion, el se conporta come la so religion la comanda.
La religion la xe indispensàbile par l'organizasion sosial, e chi pensa el contrario el xe un macaco e lo mostrarò fra poco. No esiste, né i xe mai esistìe, società umane sensa religion. Ghe xe sora questo asè confusion de tèrmini, parché soltanto le religion tradisionali le par ancuo cussì a chiunque de noaltri (ma no xe stà senpre cussì; ancuo el cristian el sa che anca el maometan el ga na religion; sècoli fa, el no-cristian el gèra par el cristian soło un infedel che no'l merita de vìver, e de fato la gèra asè popolar la guera santa, ancora ancuo popolarìssima tra i islàmici) Le religion no-tradisionali, invese, no le xe ancora stà riconossùe come religion a tuti i efeti. La pì resente e potente tra le nove religion no-tradisionali la xe la Television, e nissun ghe ne ga ancora ciapà e dito in pùblico piena cosiensa.
I sosiòloghi i ciàcola su la ciara considerasion che la Television la sia el pì potente strumento de comunicasion che mai el sia esistìo. Questo el xe vero. Ma el xe soło el scomensamento.
Inte tanti dei paesi indove la Television pì la se ga spanto, la religiosità popolar tradisional la se ga sbasà asè. Parché? Queło che sto scrivendo, come za dito, no'l vol èser (come de fato no'l xe) un saggio sosiològico su le relasion che ghe xe tra television e senso religioso, ma na létera al Maurizio Costanzo Show indove sénplicemente se gira la luze de la cosiensa coletiva in na diresion fin adeso poco batùa. Tante e trope somilianse se trova inti conportamenti de chi el xe devoto a na religion tradisional e de chi el xe devoto a la Television, par farle passar come casualità. Quale somilianse? Beh, provemo a trovàrghene qualcheduna insieme:

• I MODEŁI COMUNI DE CONPORTAMENTO: Come za dito, chiunque el xe devoto a na religion, da eła el ciapa i so modełi de conportamento. El sucede ai cristiani, ai budisti e ai maometani. E cussì de fato el sucede anca ai telespetatori: lori i conpra i prodoti reclamizà a la Television, i copia le batude de spìrito dei cabaretisti Televisivi, i guida la màchina co la sperecolatesa con cui se guida a la Television (cussì fasendo, par esenpio, le famose strage del sabo sera), i inpara a far la violensa co la sregolatesa con cui se fa a la Television (come el senò no spiegà fenòmeno de l'iperviolensa dei fiołi in America el mostra), i forma le so preferense sesuali su'l modeło del groso catàlogo de sex-symbols che ghe xe inte l'universo Televisivo, e cussì avanti.
• I DOGMI: Chiunque el xe devoto a na religion, el ne aceta sensa pensar i dogmi. I devoti inte la Television, crede dogmaticamente a queło che ghe vien dito inte'l telezornal (queli pì scaltri i se gode a créder a un serto telezornal pì che a un altro, ma la sostansa no la canbia). Enblemàtica la xe su questo la famosa frase, doparà par mostrar la verità de na informasion: "Lo ga dito la television..."
• LA "TRANCE": Caràtere de ogni fedel intanto che se fa la funsion religiosa el xe el so cascar in stato de trance. El sucede a budisti, catòlici, islàmici e zulù. El sucede anca a chi el xe imbanbìo drento un programa televisivo. Vardando la television uno el se descoła da la so realtà individual e el sarvèło el manda fora onde alfa (segno che no se pol negar de na alterasion del stato de cosiensa). Come in cesa col so dio, davanti a la Television uno el se imedèsima con l'ogeto de la so venerasion, ovaro i personaji Televisivi. Quando l'imedesimasion no la riesse se canbia canal (uno el se gira a un altro santo), ma no se esse da la cesa, ovaro no se studa la Television. Se ricore al zapping quando no se sa pì a che santo votarse.
• EL RISPETO DE L'AUTORITÀ SASERDOTAL: Qualunque vero fedel de qualunque religion el se acostarà tremando a chi el inpersona el sìnbolo del so culto, ovaro l'autorità saserdotal. A vardar i tremołi, i tartajamenti e la solenità de drento de chiunque el se trova fàcia a fàcia con la selebrità Televisiva preferìa soa, no par èserghe dubi che se trata del steso e idèntico fenòmeno mental.
• L'ERESIA: Uno dei caràteri de qualunque religion che la sia cussì potente che i fedeli i ne ga na esperiensa cussì asoluta da no èser par gnente consapévoli che se trata de na religion, el xe queło de far nàser el fenòmeno de l'eresia, ovaro la sensa pietà demolision de chiunque no'l mostra inti fati de èserne seguase. El xe suceso - con picole varianse - inte'l Catolicismo e inte'l Nazismo, e ancora ancuo el sucede - in mesura diversa - inte le nove religion no tradisionali, come la ricerca sientìfica, la psicanàlisi (Riciapemo prima o dopo, inte qualch'altra létera - o anca no... chi lo sa? - l'argomento che anca la siensa, come la psicanàlisi - che siensa no la xe - le sia, in sostansa, struturà no asè diverso a paragon de le religion tradisionali.), e la Television. Provasse el letor, se a le me parołe no'l crede, a far finta con chi parla de no saver cosa che'l xe el Maurizio Costanzo Show, el Telezornal, i no saver chi i xe pippobaudo, mikebongiorno, mauriziocostanzo, sgarbi... Insistendo a oltransa, con chiunque, de no saver asolutamente chi o cosa che le dite divinità le sia, uno el se guadagnarà la fama de indivìdui "strani", asosiali, che i fa finta de èser mati o invese lo xe. Insoma, uno el se trovarà del tuto messo da parte. El xe el marchio de l'eresia moderna. Epuro, quasi nissun de noaltri el ga mai visto le dite divinità con i so oci... dal vivo! Quełe le àbita inte i nostri sarvèli parché ciapemo la so esensa a la Television, cussì come el bon cristian el ciapa l'esensa de Dio in Cesa. Sicome l'esensa Televisiva la xe pì fàsile da ciapar de queła de la cesa, parché la ga bone imàgini a colori e soni convincenti (deso anca stereo), la religion Televisiva la sta del tuto ciapando el posto de queła de la cesa tradisional.

  La pì grossa forsa de la religion Televisiva la xe che tuti i so fedeli - che pur pì o manco i sa che'l xe na religion - no i ga cosiensa che se trata de na religion, e i ne xe cussì devoti come pì no i podaria. Con questo no tiro conclusion morali su la pì o manco "bontà" de la religion Televisiva. Bontà e Cativeria le xe categorie infide, che mai le mete d'acordo el judisio. Sensa dubio i ga vù da parer "cativi", ai eretici torturà da la Inquisision Cristiana, i saserdoti de Santa Mama Cesa, che li torturava no par cativeria soa, ma par genuina convinsion che i "cativi" i fusse i altri.
  La religion Televisiva no la xe né bona, né cativa, anca se drento de eła se pol ciapar sia el Ben che'l Mal. La Television la dà ancuo a tuti noaltri i modełi comuni de conportamento. La inpara el valor de l'ecologia (valor del tuto asente in tuti i paesi indove la Television no la lo ga portà avanti a longo), ma anca el valor de la violensa (el xe questo par qualcuni, mi conpreso, un valor negativo, ma par altri un valor positivo, tant'è vero che da tanti con fieresa la vien fata). La inpara el valor dei diriti sivili, ma anca el valor dei doveri consumìstici, condisionàndone a gaver da consumar, consumar, e senpre pì fadigar par pì consumar. La inpara el valor de la lealtà sportiva, ma anca de la guerija tra tifoserie, marcàndola co le parołe, ma al steso tenpo portàndola avanti, faséndone un mito negativo de la trasgresion. La inpara el valor de la solidarietà, ma anca queło del ranpantismo, de la richesa a tuti i costi. La inpara el valor del Catolicismo, tegnéndone agiornà su le preghiere papali, ma anca el valor de na vision soltanto genital del seso, faséndone trovar mijara de videocasete porno. La inpara el valor de èser come madreteresadicalcutta, ma anca el valor del consumismo sentimental a l'americana.
  Ti capisi, caro Maurizio Costanzo Show, come che le sta le robe? La major parte dei nostri valori e de le nostre convinsion i ne vien ancuo dà da la Television, propio come i ne vegneva na volta dal timor de Dio. Ma la Television la esiste da poco tenpo, da pochìssimo tenpo. La major parte dei italian la xe cresùa sensa el timor de la Television, e na conversion in età granda no la val na fede radicà dai primi ani de vita. I veri adepti asoluti a la religion de la Television i xe soltanto i zóveni che ancora i sta cresendo... e el xe cussì inte la società de doman, quando tuti i sarà cresùi dal scomensamento inte'l timor Televisivo, che vedaremo a pien i grandi efeti de la rivolusion che sta in ato...
  Fantasticar el xe lècito, divertente e qualche volta dovù, caro Maurizio Costanzo Show. El sarà in n'altra létera, forsi, che me sfrenarò a fantasticar su come che la sarà la società de doman, quando la Television la comandarà sovrana tra le religion del mondo, un regno cussì asoluto che i sùditi ghe ubidisse siegamente, con devosion sìmile a queła che altri sùditi, in altri tenpi, i ga vù verso el so re, el so papa, o verso el strion del vilajo. Consapévoli soltanto de l'incolmàbile diversità geràrchica che li dividarà dei so novi dei.

  Roberto Quaglia

  ---