oe no supporto sos sotziòlogos. Mi bi so postu a pensare chimbe minutos, e m'est bènnidu a conca chi pro èssere reconnotos sotziòlogos bastat leare una làurea in sotziologia, o mègius àere imparadu sas notziones chi sunt in unu tzertu nùmeru de libros istabilidos e àere coladu s'esàmene de cussos (cosa pro nudda difìtzile pro una persone de intelligèntzia normale). A sa fine, su sotziòlogu cun su tìtulu no est una persone chi at mustradu de àere cumpresu carchi cosa subra su cumportamentu de sa sotziedade, ma una persone chi at mustradu de àere istudiadu su chi àteros ant cumpresu subra su cumportamentu de sa sotziedade. Sa definitzione mia diat poder sonare unu pagu estremista, l'ammito. Bidimus tando sa chistione dae un'àtera angulatura: unu tìpicu istùdiat totu sos libros regulamentares de su cursu de sotziologia, leat su bravu tzertificadu suo de sotziòlogu, posca iscarabotzat artìculos fatos male in ue impastoccat a bàngena cun sos cuntzetos de sos àteros imparados dae issu, o galu peus andat a nàrrere carchi frase de efetu in sa televisione, o si faghet inserrare pro unu annu a sa sola in una gruta pro iscrìere unu libru andende a si chircare issu etotu, e eccu chi s'identidade sua de sotziòlogu est prena prena cunfirmada e dae totus atzetada. A beru, bastat iscrìere chi unu est sotziòlogu in su biglietu de visita, e belle totus bi creent. Pro fàghere istare mudos cussos chi no bi creent bastat numenare inoghe e incue comente benit benit Mac Luhan e calicun àteru chi no isco proite deo no so unu sotziòlogu.
Propiu proite no so unu sotziòlogu, mi so imbàtidu in tzertos pensamentos mìos chi dae perunu sotziòlogu - uhi a mie - no m'est mai capitadu fintzas a immoe de intèndere, e chi immoe giugo a tie, caru Maurizio Costanzo Show, e a chie si siat, in mesu de tie, de custas frases mìas mai esseret bersàgliu.
Su sutzu est simple e a su parre banale meda, e si serrat in una frase chi narat totu e no narat nudda: "SA TELEVISIONE EST SA RELIGIONE MODERNA."
Bella iscoberta, ant a nàrrere medas. Ma no nos firmamus in susu, naro deo, e nd'analizamus sas cunseguèntzias. Primu de totu: a ite est serbida, serbit e semper at a serbire, in ogni tempus e logu de su mundu, cale si siat religione? Nudda sofismas o rispostas intortas, pro piaghere! Una risposta ebbia crara, simple, pràtica, chi no si podet contrastare: "Sa religione serbit a dare a sa populatzione modellos comunes de cumportamentu."
Los podes tzerriare comente cheres: ètica, morale, valores etc. Sa sustàntzia est sa matessi. In ogni tempus e logu de su mundu sa religione serbit pro fàghere ischire a sa gente comente si depet cumportare. Chie si siat tenet a beru fide in sa religione sua, si cumportat comente sa religione sua cumandat.
Sa religione est indispensàbile pro s'organizatzione sotziale, e chie pensat su contràriu est unu maccu e lu apo a mustrare tra pagu. No esistint, ne sunt mai esistidas, sotziedades umanas chene religione. B'at subra custu meda cunfusione de tèrmines, proite isceti sas religiones traditzionales parent oe gasi a chie si siat de nois (ma no est istadu semper gasi; oe su cristianu ischit chi fintzas su maumetanu tenet una religione; sèculos a como, su no-cristianu fiat pro su cristianu isceti unu infidele chi no mèritat de bìvere, e de fatu fiat meda populare sa gherra santa, galu oe popularìssima in mesu a sos islàmicos). Sas religiones no-traditzionales, imbetzes, no sunt galu istadas reconnotas comente religione a totu sos efetos. Sa prus reghente e putente in mesu a sas noas religiones no-traditzionales est sa Televisione, e nemos nd'at galu leadu e naradu in pùblicu cun prena cussèntzia.
Sos sotziòlogos ciàcciant subra sa crara cunsideratzione chi sa Televisione siat su prus putente istrumentu de comunicatzione chi mai siat esistidu. Custu est beru. Ma est isceti su cumintzu.
In medas de sos paisos in ue sa Televisione prus s'est ispainada, sa religiosidade populare tradizziunale s'est abbasciada meda. Proite? Su chi so iscriende, comente giai naradu, no cheret èssere (comente de fatu no est) unu saggiu sotziològicu subra sas relatziones chi bi sunt tra televisione e sentidu religiosu, ma una lìtera a su Maurizio Costanzo Show in ue semplicemente si girat sa lughe de sa cussèntzia colletiva in una diretzione fintzas a immoe pagu batida. Medas e tropu semigiàntzias s'agatant in sos cumportamentos de chie est devotu a una religione traditzionale e de chie est devotu a sa Televisione, pro las fàghere colare comente casualidade. Cales semigiàntzias? Beh, proamus a nde agatare calicuna paris:

• SOS MODELLOS COMUNES DE CUMPORTAMENTU: Comente giai naradu, chie si siat est devotu a una religione, dae issa leat sos modellos suos de cumportamentu. Sutzedit a sos cristianos, a sos budistas e a sos maumetanos. E gasi de fatu sutzedit fintzas a sos telespetadores: issos acatant sos produtos reclamizados in sa Televisione, còpiant sas batudas de ispìritu de sos cabarettistas Televisivos, gùidant sa màchina cun sa spericuladesa cun sa cale si gùidat in sa Televisione (gasi faghende, pro esempru, sas famadas istràges de su sàbadu a sero), imparant a fàghere sa violèntzia cun s'isregulesa cun sa cale si faghet in sa Televisione (comente su sinono no ispiegadu fenòmenu de sa iperviolèntzia de sos pitzinnos in Amèrica mustrat), formant sas preferèntzias sessuales suas subra su modellu de su mannu catàlogu de sex-symbols chi b'est in s'universu Televisivu, e gasi a in antis.
• SOS DOGMAS: Chie si siat est devotu a una religione, nd'atzetat chene pensare sos dogmas. Sos devotos in sa Televisione, creent dogmaticamente a su chi lis benit naradu in su telegiornale (cussos prus astutos si godent a crèdere a unu tzertu telegiornale prus chi a un'àteru, ma sa sustàntzia no càmbiat). Emblemàtica est subra custu sa famada frase, impreada pro mustrare sa veridade de una informatzione: "L'at naradu sa televisione..."
• 'A "TRANCE": Caràtere de ogni fedele mentras si faghet sa funtzione religiosa est su suo rùere in istadu de trance. Sutzedit a budistas, catòlicos, islàmicos e zulù. Sutzedit fintzas a chie est annuadu in unu programma televisivu. Abbaidende sa televisione unu si iscollat dae sa realidade individuale sua e su cherbeddu imbiat onde alfa (sinnu chi no si podet negare de una alteratzione de s'istadu de cussèntzia). Comente in crèsia cun su deus suo, ainnantis a sa Televisione unu si immedèsimat cun s'ogetu de sa veneratzione sua, o mègius sos personàgios Televisivos. Cando s'immedesimatzione no resessit si càmbiat canale (unu si girat a un'àteru santu), ma no si essit dae sa crèsia, o mègius no si istudat sa Televisione. Si ricorret a su zapping cando no si ischit prus a cale santu si bortare.
• SU RISPETU DE S'AUTORIDADE SACERDOTALE: Cale si siat beru fedele de cale si siat religione s'at a acostare tremende a chie personificat su sìmbulu de su cultu suo, o mègius s'autoridade sacerdotale. A abbaidare sos trèmulos, sos tartagliamentos e sa solennidade de intro de chie si siat s'agatat cara a cara cun sa tzelebridade Televisiva preferida sua, no parent bi àere dùbbios chi si tratat de su matessi e idènticu fenòmenu mentale.
• S'ERESIA: Unu de sos caràteres de cale si siat religione chi siat gasi putente chi sos fedeles nde tenent una esperièntzia gasi assoluta de no èssere pro nudda cussèntes chi si tratat de una religione, est cussu de fàghere nàschere su fenòmenu de s'eresia, o mègius sa chene piedade demolitzione de chie si siat no mustrat in sos fatos de nde èssere seguidore. Est sutzèdidu - cun piticas variàntzias - in su Catolitzismu e in su Nazismu, e galu oe sutzedit - in mesura diversa - in sas noas religiones no traditzionales, comente sa chirca scientìfica, sa psicanàlisi (Torramus a leare primu o poi, in carchi àtera lìtera - o puru nono... chie l'ischit? - s'argumentu chi fintzas sa scièntzia, comente sa psicanàlisi - chi scièntzia no est - siant, in sustàntzia, istruturados no meda diversu a paragone de sas religiones traditzionales.), e sa Televisione. Proet su letore, si a sas paràulas mìas no credet, a fàghere finta cun chie faeddat de no ischire it'est su Maurizio Costanzo Show, su Telegiornale, de no ischire chie sunt pippobaudo, mikebongiorno, mauriziocostanzo, sgarbi... Insistende a oltràntzia, cun chie si siat, de no ischire assolutamente chie o it'est chi sas ditas divinidades siant, unu s'at a guadangiare sa fama de indivìduos "istranos", asotziales, chi faghent finta de èssere macos o imbetzes lu sunt. Insomma, unu s'at a agatare de su totu postu a banda. Est su marcu de s'eresia moderna. E tanti est, belle nemos de nois at mai bidu sas ditas divinidades cun sos ogros suos... a beru! Cussas bìvent in sos cherbeddos nostros proite leamus s'essèntzia issoro in sa Televisione, gasi comente su bonu cristianu leat s'essèntzia de Deus in Crèsia. Proite s'essèntzia Televisiva est prus fàtzile a leare de cussa de sa crèsia, proite tenet bonas imàgines a colores e sonos cunvincentes (immoe fintzas stereo), sa religione Televisiva est de su totu leende su logu de cussa de sa crèsia traditzionale.

  Sa prus manna fortza de sa religione Televisiva est chi totu sos fedeles suos - chi fintzas prus o mancu ischint chi est una religione - no tenent cussèntzia chi si tratat de una religione, e nde sunt gasi devotos comente prus no diant poder. Cun custu no bogo cunclusiones morales subra sa prus o mancu "bondade" de sa religione Televisiva. Bondade e Malìtzia sunt categorias infidas, chi mai ponent de acordu su giudìtziu. Chene dùbbiu ant dèpidu pàrrere "malos", a sos erèticos torturados dae s'Inchisitzione Cristiana, sos sacerdotes de Santa Mama Crèsia, chi los torturaiant no pro malìtzia issoro, ma pro genuina cunvintzione chi sos "malos" esserent sos àteros.
  Sa religione Televisiva no est ne bona, ne mala, fintzas si in issa si podet leare siat su Bene chi su Male. Sa Televisione dat oe a totu nois sos modellos comunes de cumportamentu. Imparat su valore de s'ecologia (valore de su totu assente in totu sos paisos in ue sa Televisione no l'at giutu a in antis a longu), ma fintzas su valore de sa violèntzia (est custu pro calicunos, me cumpresu, unu valore negativu, ma pro àteros unu valore positivu, tantu est beru chi dae medas cun fieresa benit fata). Imparat su valore de sos deretos tziviles, ma fintzas su valore de sos doveres consumìsticos, cundizionèndenos a àere de consumare, consumare, e semper prus fadigare pro prus consumare. Imparat su valore de sa lealidade isportiva, ma fintzas de sa gherrilla tra tifoserias, marchèndela cun sas paràulas, ma a su matessi tempus giughèndela a in antis, faghèndende unu mitu negativu de sa trasgressione. Imparat su valore de sa solidariedade, ma fintzas cussu de su rampantismu, de sa richesa a totu sos costos. Imparat su valore de su Catolitzismu, tenèndenos agiornados subra sas pregadorias papales, ma fintzas su valore de una visione isceti genitale de su sessu, faghèndenos agatare mìgias de videocassetas porno. Imparat su valore de èssere comente madreteresadicalcutta, ma fintzas su valore de su consumismu sentimentale a s'americana.
  Cumprendes, caru Maurizio Costanzo Show, comente sunt sas cosas? Sa parte prus manna de sos valores nostros e de sas cunvintziones nostras nos benint oe dados dae sa Televisione, propiu comente nos beniant una borta dae su timore de Deus. Ma sa Televisione esistit dae pagu tempus, dae pochìssimu tempus. Sa parte prus manna de sos italianos est crèschida chene su timore de sa Televisione, e una cunversione in edade manna no balet una fide arraighinada dae sos primos annos de vida. Sos veros e beros adeptos assolutos a sa religione de sa Televisione sunt isceti sos pitzocos chi galu sunt creschende... e est gasi in sa sotziedade de cras, cando totus ant a èssere crèschidos dae su cumintzu in su timore Televisivu, chi amus a bìdere a pienu sos mannos efetos de sa rivolutzione chi est in atu...
  Fantasticare est lìtzitu, divertente e carchi borta dèpidu, caru Maurizio Costanzo Show. At a èssere in un'àtera lìtera, fortzis, chi mi apo a isfrenare a fantasticare subra comente at a èssere sa sotziedade de cras, cando sa Televisione at a cumandare suverana in mesu a sas religiones de su mundu, unu rennu gasi assolutu chi sos sùdditos li ubbidint tzegamente, cun devotzione simile a cussa chi àteros sùdditos, in àteros tempos, ant tentu cara a su re issoro, su paba issoro, o cara a su bruxu de su bighinadu. Cussèntes isceti de s'incurmàbile diversidade geràrchica chi los at a partzire dae sas noas deidades issoro.

  Roberto Quaglia

  ---