‹ Indiz de' sit · Ca de' museo · repêrt restaurê
Italiano Latina Zeneise Napulitano Venesian Romanesco Sicilianu Bulgnais Sardu Milanes FurlanFurlan PiemontèisCalabrisiBaréseFiorentinoRomagnolo
Prupòsit Epistulêr (Caro Maurizio Costanzo Show... lettera n.0)
Roberto Quaglia
l
e
t
t
e
r
a
zero





I sta zughènd a un zug. I sta zughènd a nö zughê a un zug. S'a j fëz vdé ch'a j vèd zughê, a rumparò al rëgul e i m'castigarà. A j ò da zughê a e' su zug, ad nö vdé ch'a vèd e' zug.

R. D. LAING



PRUPÒSIT EPISTULÊR

Caro Maurizio Costanzo Show,

da quasi tot al pêrt ch't la guêrd, questa l'è pröpi una lètra ch'la t'è arivêda, dato ch't la stê lizènd. A t'l'ò scrèta me. Me a so un èsar umân o giù ad lè. E' mi nòm l'è zà scrèt da tot al pêrt e alóra a n' e' ripèt ènca int la lètra. A t'avìs ch'a t'scrivarò una masa ad lètri, dop questa. A t'avìs ènca ch'a t'al spedirò, sinò che lètri al sarèb? A t'avìs pu che tot cal tânti lètri ch'a t'spedirò fórsi a la fin al dvintarà ènca un lìbar ch'a publicarò e ch'u m'farà guadagnê una masa ad bajûch o almânch tânt o insòma quèlch quèl. A t'avìs ènca ch'a t'mandarò sti lètri ènca par Internet, cumè ch'l'è tânt d'mòda incù. A sper che j italiân i n' m'imitarà. Se tot i t'scriv acsè tânti lètri cumè ch'a j ò dezìs ad fê me, chissà quânt purèt èlbar i à da druvê par fê tota la chêrta ch'la s'serv. E ènca su Internet, chissà quânt elètron i andarèb sprighé.
Scusa s'u pê ch'a n' sò scrìvar cun tot cal frês cumplichêdi ch'l'è bël mètar int i lìbar mo ènca int al lètri. In realtà un pô a l'sò fê, mo l'è mèi ch'a l'evit, almânch a e' prinzìpi. Ènca s'a sò che questa l'è una lètra (a j ò zà preparê ènca la busta e e' francbòl par la versiôn ad chêrta), a sò pu listès ch'l'è ènca e' prinzìpi d'un lìbar, e ènca la pêrt d'inizi d'un mòcc ad parôl finidi una vôlta su Internet par stêi par sèmpar. Dop tot l'è quèl ch'a t'ò apèna dët, ciò scrët. E dato che listès fórsi l'è ènca e' prinzìpi d'un lìbar, me a j ò pinsê ch'l'era mèi nö mètar sóbit tota cla ròba incasinêda cun al parôl cumplichêdi che pu la zènta la n' capès gnit e la bòta vì e' lìbar.
Scusêm s'a vagh a chê un pô ènca a spropòsit.
Vèd, Maurizio Costanzo Show, se sta lètra la dvintèss dabón e' prinzìpi d'un lìbar, pu fórsi quèlcadun e' l'vèd int una libreria cun e' su tìtul ch'e' fa l'òc (a j ò pinsê ch'u i vô un tìtul ch'e' fëza una masa l'òc) e alóra e' l'avrès par vdé s'e' l'vô cumprê e e' lèz la prèma ròba ch'u i capita. Bén, una masa i avrès e' lìbar a caš, e par lô me a n' pòs fê gnint, purèt a me! U m'tuchèva fê e' lìbar tot acsè, cumè ch'l'è adës, ch'però u n'è ch'u m'piasa pröpi una masa. Ciò, u m'pis, mo nö par tot e' lìbar.
A sper che t'a i capèss quèlcòs int quèl ch'a stagh a dì.
Una masa ad parsôn invezi j avrès e' lìbar da e' prinzìpi o da la fin, par vdé s'u j pis. Bé, par quì ch'i l'avrès a la fin a i pinsarò a la fin de' lìbar, ch'adës l'è un pô prëst dato ch'l'è apèna cminzê. Mo par quì ch'invezi i l'avrès a e' prinzìpi, sèmpar par vdé s'u j pis e s'i l'à da cumprê, alóra a j ò pinsê ad scrìvar acsè, un pô a la purtêda dla zènta (A sper ad nö ësar Presuntuós), sènza tot cal dificoltà che parchè mai bsògna andêli a zarchê int un lìbar quând che ón fórsi e' vlèva sôl distrês, cum'l'è giöst? Se pu a quèlcadun ch'e' sta lizènd u n' i pis tot quèst, alóra e' pò pruvê a avrì in mëz a e' lìbar, ch'fórsi e' sarà un pô divérs e alóra e' l'cômpra listès. L'impurtânt l'è ch'e' l'cômpra. Se quèlcadun e' lèz sti righ dentr'a un lìbar sbirciê int una libreria, ch'e' vëga sóbit a la càsa a cumprêl, a gl'e' cunsèj me ch'a so l'autór.
Però te, Maurizio Costanzo Show, t'an e' sé incôra che quèst l'è un lìbar, parchè la t'è apèna arivêda sta lètra, che da quasi tot al pêrt ch't la guêrd l'è pröpi una lètra e d'sicur la n' pò zà ësar ènca un lìbar, ènca s'listès l'è una ròba strâna su Internet.
E me a t'spedirò una masa ad lètri, una a e' dè, sperènd ch't'a m'ciâma ènca me int la tu trasmissiôn che l'è acsè impurtânt andêi, cumè ch'i sa tot.
Ch't'a m'ciâma o ch't'a n' m'ciâma, quând che al lètri al sarà acsè tânti ch'u s'pò fên un lìbar, alóra me a j ò zà dezìs ch'a i fëz un lìbar, e a t'spedirò stu lìbar par fêi la reclâm int la tu trasmissiôn cumè ch'i fa tot quì ch'i scriv i lìbar ad sucès. E alóra me a pens che te t'm'invitarè s't'an m'avìv invitê prèma, o t'm'invitarè d'nôv s't'l'avìv zà fat, parchè dop tot quèst l'è e' prèm lìbar ch'e' parla dirètamënt ad te (opùr "a te"), e se dop tot te t'é prumòs acsè tânt lìbar che insòma u n'è ch'i fóss tot di capulavór ènca s'i era sèmpar una masa bël, d'sicur u t'farà piasé presentê un lìbar ch'e' t'riguêrda.
Quând alóra a t'spedirò e' mi lìbar zà pront, questa la n' sarà piò una lètra, mo un lìbar. Dònca a n' sò s'adës t'stê lizènd la lètra o e' lìbar o la pàgina d'Internet, vèst che sti righ i è int tot e' trì, e me a j scriv una vôlta sôla.
Nö butê vì sta lètra, car Maurizio Costanzo Show. U n'è e' prèm lìbar ch'a stagh a scrìvar. A n'ò zà scrët almânch zinch mo aquè in Itàglia u i è un pô ad distraziôn e alóra i è tot praticamënt inédit. Mo int i paés luntân invezi i m'i publica (a n' sò parchè) e alóra là a so zà famós e i m'dmânda j autògraf e tot quèst u m'fa acsè tânt piasé ch'a j ò dezìs ch'l'è mèi dvintê famós ènca in Itàglia, ch'l'è piò avsèn che i paés luntân. (S't'an i crid ch'a so famós int i paés luntân a t'mând una videocassetta duv ch'u s'vèd che invezi a l'so).
A sër adës sta mi lètra zero, spieghènd però incôra int e' paràgraf ch'e' vèn, par chi ch'u n'à capì, quèl che ènca me a j ò fat fadiga a capì, ciò cs'ch'l'è sta lètra, o mèi stu lìbar. Scusêm s'a dvèint piò cumplichê. Sti lètri agli è (al sarà) piò che êtar trêzi lasêdi da un sôl zarvèl (e' mi), fati ad sotatrêzi ad zarvèl di êtar, mis-cêdi cun parìcc quintêl ad bôn ludâm. Insòma, u i n'è par tot i gost! Quând che sti lètri (che intânt ch'a scriv al n'i è, mo intânt che te t'lèz fórsi al i è zà opùr nö) al s'spusarà par fê un lìbar ad chêrta, agli ufrirà a e' legìtum e pagânt cumpradór de' lìbar stèss e ènca, s'capès, a i su amìg scrocûn o scrocûn e basta, l'ucasiôn ad andê dri a i sulch ad che zarvèl (ch'pu l'è sèmpar e' mi), e ad truvês int la su zóca i pinsìr che int la mi i è evidentemënt nèd, pröpi quând ch'a stasèva a scrìvi (mirâbil e pruvìda cumbinaziôn!). Un'ucasiôn ch'l'avrà un svilóp ènca int e' ciberspazi, duv che stu mi lìbar l'esistarà sènza fin, su Internet, duv che al lètri ch'a t'mând agli è fati cnòsar ènca a l'umanità ch'la i è interesêda. Un sôl mòcc ad parôl e frês par trì identità furmêli diversi. Lètra, lìbar vèr, lètra-lìbar virtuêl. E' mi lavór l'è ón e trino. U n' gn'è un fil, o fórsi u i sarà - chi l'sa! J idèi al chës sèlvadghi int una ment bën cuncimêda (int al ment nö cuncimêdi u n' chës gnint, mo u i è quèlch ligôr ad plàstica), e int e' su mis-ciôt caòtic mo genuin agli fa a vôlt di paesàg una masa piò interesânt ad quì che puntualmënt a truvèm mustrê cun ôrgòi int al ment, pur pregévuli e stimâbili, ad chi ch'l'à impòst a al su idèi i rigór d'una crescita urdinêda e disciplinêda. Insòma, a sem e a si abituê a lìbar urdinê, sequenziêl e coerènt. Quèl che stu lìbar o sequènza ad lètri l'è o e' sarà l'è invezi una selva incivìl. Cumè una vita interesânta.
Fin dla lètra zero.

Roberto Quaglia





Lasa un Cumént.

Lèz i cumént di êtar.

U m'pis! U m'pis! U m'pis!

Indiz dal lètar.

Cuperta.

Mo chi èl Roberto Quaglia?





L'òpera "Caro Maurizio Costanzo Show...", tota intìra o in pêrt, la pò ësar lèta, scarghêda int e' computer, stampêda e cupiêda sènza lèmit, sôl par ûs persunêl. Tot i tèst e al ilustraziôn i è pruprietà ad Roberto Quaglia e i n' pò ësar druvê tot intìr o in pêrt sènza autorizaziôn. E' prugèt gràfic e i cumpunént gràfic ad sti pàgin i è pruprietà riservêda ad Roberto Quaglia. L'òpera "Caro Maurizio Costanzo Show...", tota intìra o in pêrt, la n' pò ësar mesa in vèndita a niseun tìtul sènza autorizaziôn prèma.
© 1994-1999 Roberto Quaglia.