da squasi tute le part ch'it la vàrde costa a l'é pròpi na lettera ch'a t'é rivà dàit ch'it la ses lesend. I l'hai scrivutla mi. Mi i son n'esse uman o pòch dëdlà. Mè nòm a l'é già scrit da tute le part e antlora i lo ripeto nen ëdcò ant la lettera. It avviso ch'it scrivrai vàire e vàire lettere, apress cost-sì. It avviso ëdcò ch'i të-j mandrai, dësnò che lettere a sarìo? It avviso an pì che tute le vàire lettere ch'it mandrai forsi a la fin a vento ëdcò un liber ch'i publicherai e ch'am farà vagné vàire e vàire dné o almanch tanti o comsëssia quaicòsdin-a. It avviso ëdcò ch'it mandrai ste lettere ëdcò via Internet, com a l'é ancheuj tant ëd mòda. I spero che j'italian am imiteran nen. Se tùit at scrivo tante lettere com i l'hai decidù ëd fé mi, chi sà quanti pòvri erbo a devo dovré për fé tuta la carta ch'an serv. E ëdcò an sl'Internet, chi sà quanti eletron a andrìo dëspërdù.
Scusa se a smija ch'i sàpia nen scrive con tute le frase complicà ch'a l'é bel buté ant ij liber ma ëdcò ant le lettere. An realtà un pòch i lo sai fé, ma a l'é mej ch'i evita, almanch al prinsipi. Combin ch'i sàpia che costa a l'é na lettera (i l'hai già preparà ëdcò la busta e ël bòl për la version ëd carta), i sai comsëssia ëdcò ch'a l'é l'ancamin d'un liber, e ëdcò la part inissial d'un baron ëd paròle finìe na vira an sl'Internet për resteje për sempe. Dòp tut a l'é lòn ch'i t'hai pen-a dit, visadì scrivù. E dàit che comsëssia miraco a l'é ëdcò l'ancamin d'un liber, mi i l'hai pensà ch'a l'era mej nen buteje sùbit tuta cola ròba ambrojà con le paròle complicà che peui la gent a-i capiss gnente e a campa via ël liber.
Scusé se i vado a rìga neuva un pòch ëdcò a sproposit.
It vëdde, Maurizio Costanzo Show, se costa lettera a dventèissa dabon l'ancamin d'un liber, peui miraco quaidun a lo vëd an librerìa con sò tìtol ch'a fa l'euj (i l'hai pensà ch'a-i va un tìtol motobin ch'a fa l'euj) e antlora a lo deurb për vëdde s'a lo veul caté e a les la prima ròba ch'a-j càpita. Ebin, tanti a deurbo ël liber a la sgenà, e për lor mi i peuss fé gnente, ohimé! A-m tochèissa fé ël liber tut parèj, com a l'é adess, che però a l'é nen ch'am pias pròpi vàire. Visadì, am pias, ma nen për tut ël liber.
I spero ch'it-i capisse quaicòs an lòn ch'i son drè a dì.
Tante përson-e nopà a deurbo ël liber dal prinsipi o a la fin, për vëdde s'a-j pias. Beh, për coj ch'a lo deurbo a la fin i-i pensrai a la fin dël liber, che adess a l'é un pòch prest dàit ch'a l'é pen-a comensà. Ma për coj che nopà a lo deurbo al prinsipi, sempe për vëdde s'a-j pias e s'a lo devo caté, antlora i l'hai pensà ëd scrive parèj, un pòch a tira ëd man ëd la gent (I spero ëd nen esse Presontuos), sensa tute cole dificoltà che përchè mai a venta andesle a serché ant un liber quand un miraco a vorìa mach dëstraesse a giust rason? Se peui a quaidun ch'a les a-j pias nen tut sòn, antlora a peul prové a deurbe an mes al liber, che miraco a sarà un pòch diferent e antlora a lo cata l'istess. L'important a l'é ch'a lo cata. Se quaidun a les ste righe drinta un liber uceà an librerìa, ch'a vada sùbit a la cassa a catelo, i lo consijo mi ch'i son l'autor.
Ma ti, Maurizio Costanzo Show, it lo sas ancora nen ch'costa a l'é un liber, përchè at l'é pen-a rivà sta lettera, che da squasi tute le part ch'it la vàrde a l'é pròpi na lettera e ëd sigur a peul nen esse già ëdcò un liber, combin che comsëssia a l'é na ròba strambaa an sl'Internet.
E mi it mandrai vàire e vàire lettere, un-a al dì, sperand ch'it ciame ëdcò mi ant toa trasmission ch'a l'é parèj d'important andeje, com a san tùit.
Sia ch'it me ciame o ch'it me ciame nen, quand le lettere a saran parèj tante ch'as peul fene un liber, antlora mi i l'hai già decidù ch'i-i faso un liber, e it mandrai cost liber për reclamelo ant toa trasmission com a fan tùit coj ch'a scrivo ij liber ëd sucess. E antlora mi i penso ch'it m'invitrai se t'l'avìe nen invitame prima, o t'me reinvitrai se t'l'avìe già fàit, përchè dòp tut cost a l'é ël prim liber ch'a parla diretament ëd ti (o pura "a ti"), e se dòp tut ti't l'has promovù parèj tanti liber che nsomma a l'é nen ch'a fusso tùit dij cap-d'òpera combin ch'a fusso sempe motobin bej, ëd sigur at farà piasì presenté un liber ch'at riguarda.
Quand antlora it mandrai mè liber già pront, costa a sarà pì nen na lettera, ma un liber. Donca i sai nen s'adess it ses lesend la lettera o ël liber o la pàgina d'Internet, dàit che ste righe a-i son an tùit e tre, e mi i-j scrivo na vira sola.
Campa nen via costa lettera, car Maurizio Costanzo Show. A l'é nen ël prim liber ch'i son drè a scrive. I n'hai già scrivù almanch sinch ma sì an Italia a-i é un pòch ëd dëscura e antlora a son tùit pràtica inédit. Ma an pais lontan nopà am-je publico (i sai nen përchè) e antlora là i son già famos e am ciamo j'autògraf e am fa tut parèj motobin piasì ch'i l'hai decidù ch'a l'é mej vnì famos ëdcò an Italia, ch'a l'é pì davzin dij pais lontan. (Se t'i chërde nen ch'i sia famos an pais lontan it mando na videocasseta anté ch'as vëd che nopà i lo son).
I saro adess sta mia lettera zero, spiegand però ancora ant ël paràgraf ch'a ven, për chi ch'a l'ha nen capì, lòn ch'ëdcò mi i l'hai fàit fatiga a capì, e visadì còs a l'é sta lettera, o mej cost liber. Scusé se i vento pì complicà. Ste lettere a son (a saran) prevalentement trasse lassà da un sol servel (ël mè), fàite ëd sot-trasse ëd servej dj'àutri, mës-cià con vàire quintaj ëd bon ledam. Nsomma, a-i na j'é për tùit ij gust! Quand ste lettere (che antramentre ch'i scrivo a-i son nen, ma antramentre ch'it lese miraco a-i son già o pura nen) as unieran an matrimòni për fé un liber ëd carta, a ofriran al legìtim e paghent catant dël liber midem e ëdcò, evidentement, a ij sò amis scrocon o scrocon e basta, l'oportunità ëd seguité ij solch ëd col servel (ch'a l'é peui sempe ël mè), e ritrovesse ant soa süca ij pensé che ant ël mè a son evidentement nassù, pròpi quand i j'era antent a scrivje (miràbil e providuda coincidensa!). Oportunità ch'a l'avrà svilup ëdcò ant ël siberspassi, anté che tal mè liber a esistrà a l'infinì, an sl'Internet, anté che le lettere ch'i të mando a son portà a conossensa ëdcò ëd l'umanità ch'a-j anteresso. Un sol baron ëd paròle e frase për tre identità formaj diverse. Lettera, liber real, lettera-liber virtual. Mè travaj a l'é un e trin. A-i é nen un fil, o miraco a-i sarà - chi lo sa! Le idèje a chërso servaje ant na ment bin ledamà (ant le ment nen ledamà a chërs gnente, ma a-i é quaich luserta ëd plàstica), e ant soa caòtica ma genuin-a mës-ciura a formo dle vire dij paisagi pì anteressant assè che coj ch'i trovoma puntualment orgojosament mostrà ant le pura pregévoj e stimàbij ment ëd chi a soe idèje a l'ha ampòst ij rigor d'na chërsùa ordinà e dissiplinà. Nsomma, i soma e i seve dizuà a liber ordinà, sequensiaj e coerent. Lòn ch'cost liber o sequensa ëd lettere a l'é o a sarà a l'é nopà na selva dëssivilisà. Com na vita antaressanta.
Fin ëd la lettera zero.

Roberto Quaglia