pi quantu la talii di tutti li parti, chista è propriu ’na lettera ca t’è arrivata, datu ca la stai liggennu. Ti l’aju scritta ju. Ju sugnu n’essiri umanu o pressapocu. Lu nomu miu sta già scrittu di tutti li parti e allura nun lu ripètu puru ntâ lettera. T’avvisu ca ti scrivu ’na muntagna di lettiri, doppu chista. T’avvisu puru ca ti li mannu, sinnò chi lettiri sarrìanu? T’avvisu ’n cchiù ca tutti li tanti lettiri ca ti mannu fòrsi â fini addivèntanu puru nu libbru ca publicajù e ca mi farà guadagnari ’na muntagna di dinari o almenu assai o comunqui quarchicosedda. T’avvisu puru ca ti mannu sti lettiri puru pi Internet, comu oggi è tantu di moda. Speru ca li taliani nun mi còpianu. Si tutti quanti ti scrìvinu accussì tanti lettiri comu aju dicisu di fari ju, cu’ sapi quanti pòviri arvuli hannu a adupirari pi fari tutta la carta ca ni servi. E puru supra Internet, cu’ sapi quanti elettruni ssì sprecassiru.
Scusa si pari ca nun sacciu scriviri cu tutti li frasi ’mbrugghiati ca è beddu mèttiri ntê libbra ma puru ntê lettiri. ’N realtà nu pocu lu sacciu fari, ma è megghiu ca l’evitu, almenu â prima. Puru si sacciu ca chista è ’na lettera (aju già appruntatu puru la busta e lu francubbullu pâ virsioni di carta), sacciu puru comunqui ca è puru l’accuminzu di nu libbru, e puru la prima parti di nu muntuni di paroli juti ’na vota supra Internet pi ci ristari pi sempri. Doppu tuttu è chiddu ca t’aju appena dittu, ovveru scrittu. E datu ca comunqui fòrsi è puru l’accuminzu di nu libbru, ju aju pinsatu ca era megghiu nun ci mèttiri sùbbitu tutta chidda rrobba ’mbrugghiata cu li paroli ’mbrugghiati ca po’ la genti nun ci capisci nenti e jetta lu libbru.
Scusatimi si vaju a capu nu pocu puru a sproposito.
Vidi, Maurizio Costanzo Show, si chista lettera addivintassi daveru l’accuminzu di nu libbru, po’ fòrsi quarchidunu lu vidi ’n ’na libbraria cû sò tìtulu ca fa l’occhiu (aju pinsatu ca ci voli nu tìtulu ca fa assai l’occhiu) e allura l’apri pi vidiri si s’u voli accattari e leggi la prima cosa ca ci capita. Ebbe’, assai aprìscinu lu libbru comu veni veni, e pi iddi ju nun pozzu fari nenti, ahimè! Mi tuccava fari lu libbru tuttu accussì, comu sta ora, ca però nun è ca mi piaci propriu assai. Cioè, mi piaci, ma nun pi tuttu lu libbru.
Speru ca ci capisci quarchi cosa ’n chiddu ca staju dicennu.
Assai pirsuni ’mmeci aprìscinu lu libbru di l’accuminzu o â fini, pi vidiri si ci piaci. Be’, pi chiddi ca l’aprìscinu â fini ci pinsajù â fini dû libbru, ca ora è nu pocu prestu datu ca è appena accuminzatu. Ma pi chiddi ca ’mmeci l’aprìscinu â prima, sempri pi vidiri si ci piaci e si s’u hannu a accattari, allura aju pinsatu di scriviri accussì, nu pocu â purtata dâ genti (Speru di nun essiri Prisuntuusu), senza tutti chiddi difficurtà ca pirchì mai s’hannu a jiri a circari ’n nu libbru quannu unu fòrsi vuliva sulu si spassari giustamenti? Si po’ a quarchidunu ca sta liggennu nun ci piaci tuttu chistu, allura pò pruvari a aprìri ’mmenzu ô libbru, ca fòrsi sarà nu pocu diversu e allura s’u accatta lu stissu. L’impurtanti è ca s’u accatta. Si quarchidunu leggi sti righi dintra nu libbru sbirciatu ’n ’na libbraria, vaja sùbbitu â cassa a s’u accattari, ci u cunsigghiu ju ca sugnu l’auturi.
Però tu, Maurizio Costanzo Show, nun lu sai ancora ca chistu è nu libbru, pirchì t’è appena arrivata chista lettera, ca pi quantu la talii di tutti li parti è propriu ’na lettera e di sicuru nun pò già essiri puru nu libbru, puru si comunqui è ’na rrobba strana supra Internet.
E ju ti mannu ’na muntagna di lettiri, una ô jornu, spirannu ca chiami puru a mia ntâ trasmissioni toa ca è accussì impurtanti a ci jiri, comu sannu tutti.
Sia ca mi chiami o ca nun mi chiami, quannu li lettiri sarannu accussì tanti ca ci si pò fari nu libbru, allura ju aju già dicisu ca ci fazzu nu libbru, e ti mannu stu libbru pi lu riclamizzari ntâ trasmissioni toa comu fànnu tutti chiddi ca scrìvinu li libbra di successu. E allura ju pensu ca tu m’invitirài si nun m’avivi ’nvitatu prima, o mi rinvitirài si l’avivi già fattu, pirchì doppu tuttu chistu è lu primu libbru ca parra dirittu di tia (oppuru "a tia"), e si doppu tuttu tu hai purtatu avanti accussì tanti libbra ca ’nzumma nun è ca èranu tutti capolavura puru si èranu sempri assai beddi, di sicuru ti farà piaciri prisintari nu libbru ca ti riguarda.
Quannu allura ti mannu lu libbru miu già prontu, chista nun sarà cchiù ’na lettera, ma nu libbru. Accussì nun sacciu si ora stai liggennu la lettera o lu libbru o la pàggina di Internet, vistu ca sti righi ci su’ ’n tutti e tri, e ju li scrivu ’na vota sula.
Nun jittari chista lettera, caru Maurizio Costanzo Show. Nun è lu primu libbru ca staju scrivennu. Nn’aju già scritti almenu cincu ma ccà ’n Italia c’è nu pocu di scunciertu e allura su’ tutti quanti quasi inèditi. Ma ’n paisi luntani ’mmeci mi li publicànu (nun sacciu pirchì) e allura ddà sugnu già famusu e mi chièdinu li autògrafi e mi fa tuttu accussì assai piaciri ca aju dicisu ca è megghiu addivintari famusi puru ’n Italia, ca sta cchiù vicinu di li paisi luntani. (Si nun ci cridi ca sugnu famusu ’n paisi luntani ti mannu ’na videocassetta unni si vidi ca ’mmeci lu sugnu).
Ora chiuju chista mia lettera zero, spiegannu però ancora ntô prossimu paràgrafu, pi cu’ nun ha capitu, chiddu ca puru ju aju fattu fatica a capiri, ovveru chi è chista lettera, o megghiu stu libbru. Scusatimi si addiventu cchiù ’mbrugghiatu. Sti lettiri su’ (sarannu) lu cchiù tracci lassati di nu solu ciriveddu (lu miu), fatti di sottotracci di ciriveddi di l’àutri, mìschiati cu parecchi quintali di bonu litamu. ’Nzumma, ci nn’è pi tutti li gusti! Quannu sti lettiri (ca mentri scrivu nun ci su’, ma mentri tu leggi fòrsi già ci su’ o no) si spòsanu pi fari nu libbru di carta, darannu ô legìttimu e paganti accattaturi dû stissu libbru, e puru, si capisci, ê sò amici scruccuna o scruccuna e basta, l’occasioni di siguiri li surchi di ddu ciriveddu (ca po’ è sempri lu miu), e s’attruvari ntâ propia cucuzza li pinseri ca ntâ mia si capisci ca su’ spuntati, propriu quannu stava a li scriviri (miràbbili e pruvida cumminazioni!). Occasioni ca avrà sviluppu puru ntô cibbirspaziu, unni stu libbru miu esistirà pi sempri, supra Internet, unni li lettiri ca ju ti mannu si fànnu canòsciri puru a l’umanità a cui interessanu. Nu solu muntuni di paroli e frasi pi tri identità furmali diversi. Lettera, libbru veru, lettera-libbru virtuali. Lu travagghiu miu è unu e trinu. Nun c’è nu filu, o fòrsi ci sarà - cu’ lu sapi! Li idei crèscinu sarvaggi ’n ’na menti bona cuncimata (ntê menti nun cuncimati nun cresci nenti, ma c’è quarchi lucertuluni di plàstica), e ntâ loro caòtica ma genuina mìschia fòrmanu ’a voti paisaggi cchiù interissanti assai di chiddi ca sempri truvamu cu superbia mustrati ntê menti puru prigevòli e stimàbbili di cu’ ê propii idei ha ’mpostu li rigura di ’na crescita ordinata e disciplinata. ’Nzumma, semu e siti avizzati a libbra ordinati, sequinziali e coerenti. Chiddu ca stu libbru o sequenza di lettiri è o sarà è ’mmeci ’na sirva senza educazioni. Comu ’na vita interissanti.
Fini dâ lettera zero.

Roberto Quaglia