
 |
ELÒGGE DE LA FANTASCIÈNZE
Caro Maurizio Costanzo Show,
agghie notàte ca da te se parle de tutte, fòre ca de fantasciènze. Nan jè n'argomènde abbastànze sèrie? Ma sìme sìcure de capì tutte la stèssa cose quanne ausàme la paròle "fantascienza"? Jì sò sìcure de no.
Esploràme quinde u significàte ca se pòte dà e ca jè date a la paròle "fantascienza". La paròle "fantascienza", tande pe accumenzà, esìste sule in italiàne. Jè nu neologìsme conzàte pe reprodùce u significàte de l'espressiòne ngelèse science fiction, e assumìme quinde ca tène u stèsse significàte.
Ind'a le decènnie, de la fantasciènze (science fiction) honne state date assà definiziòne, a òpere de illùstre intellettuàle, scrittùre, espèrte de tutte le gènere ecc., e nisciùne jè uguàle a n'alde, pure ce ce stà sèmbe quacche elemènde in comùne. Parèsse ca nisciùna definiziòne pòte da sole definì cudde ca la fantasciènze jè veramènde, parèsse ca ogne definiziòne mètte in lusce une de le aspètte de quèsta letteratùre ricchìsseme de ci purtròppe tròppe crestiàne nan zànne pròprie nudde.
Tutte sànne, o crèdene de sapè, cè vòle dìsce la paròle "fantascienza". Fantascienza jè nfatte na paròle ca canoscìme tutte, ce stà pure ind'a le vocabolàrie. U 100% de le italiàne ca sànne parlà, interrogàte sop'a quèste, avà da darve na resposte sò. Resposte ca ràre vòlde tène quacche dùbbie. Fantascienza, pe u 99,9% de le italiàne, vòle dìsce guèrre ind'o spàzie o invasiòne da u spàzie o UFO o mùstre schifòse o semblecemènde jè n'aggettìve ausàte pe sfogàrse pe dìsce male de quacche cose ca nan ze capìsce. U 99,9% de le italiàne (e ind'o rèste du munne la situaziòne nan jè tande mègghie) nan ha mà lètte nu libbre de fantasciènze. Eppùre la paròle americàne science fiction (e pure cudda italiàne fantascienze) jè nàte accome etichètte de na categorìe de raccònde e romànze ca tenèssere accome elemènde distintìve - rispètte a la letteratùre fìne a allòre de mòde - l'indènde de cundà na stòrie du fùture plausìbbele sotte u pùnde de vìste scientìfeche.
Passànne da nu cìrchele strìtte de lettùre struìte o grànne pùbbleche de tutta la popolaziòne, u significàte ca comunemènde se capìsce de la paròle science fiction (in Itàlie fantascienze) jè cangiàte.
Sule u 0,1% (percentuàle ottimìsteche; probabbilmènde jè cchiù gìuste u 0,05%) de la popolaziòne italiàne ha mà apèrte nu libbre de fantasciènze, e sule u 0,02% lègge fantasciènze cu na cèrta regolarità. Tutte l'alde sànne de sapè cè vòle dìsce u tèrmene fantascienze, ma ovviamènde nan pònne tenè la stèssa opiniòne de ci ha lètte la fantasciènze ind'a le libbre.
Quacchedùne potèsse obiettà ca nan jè necessàrie lèggere fantasciènze pe sapè cè jè, potèsse bastà gustàrsele o cìneme...
Bbè, sop'a quèste jì dìche sule na cose: nu bbuène libbre de fantasciènze stà a nu bbuène film de fantasciènze accome Charlie Chaplin stà a Jerry Calà. Ce dìscete ca nan ve piàsce la fantasciènze picchè l'avìte vìste sule o cìneme (o pèsce angòre a la televisiòne), jè accome ce dicèssere ca nan ve piàsce u cìneme umorìsteche picchè avìte vìste sule le film de Jerry Calà, cu tutte u rispètte ca quacchedùne tenarà pe le film de Jerry Calà.
La letteratùre de science fiction (àuse da mò nnanze sule u tèrmene ngelèse picchè forse confònne mène de cudde italiàne) jè une de le cchiù àlde espressiòne de la ndelligènze de l'Òme ausàte pe esplorà le trasformaziòne ca la ndelligènze de l'Òme produciarà ind'o fùture ind'a la vite de l'Òme. Ind'a la mènde de nu crestiàne ndelligènde, ca tène la tendènze a ausà la vite sò pe allargà la cultùra sò, nan pòte mangà na canoscènze de base de quiste vaste univèrse letteràrie ca nisciùne còrse de laurèe universitàrie ind'o munne (o quàse; ind'a le Stati Uniti quacche cose se mòve in quiste sènze) angòre se pìgghie la brighe de spànne. Ind'a la bbòne letteratùre de science fiction (ce stà pure cudde cattìve, ovviamènde, accome in tutte le settòre), ce se nùtre de le estrapolaziòne brillànde sop'o fùture de la sciènze, de le costùme sociàle, de le tabù, de la psicologìe, de la sociologìe, de la semàndeche, de l'arte, de la pulìteche e, in generàle, de tutte cudde ca tène o potèsse tenè cittadinànze ind'o univèrse mmaggenàte o mmaggenàbbele da l'Òme. E esplorànne le reaziòne ca l'Òme (e pure la Fèmmene) farà vedè in resposte a le condèste ambientàle cangiàte, la science fiction se mètte ogge accome u mègghie e u cchiù complète de le laboratòrie pe studià cudde ca sìme, cudde ca n'ha originàte e le destìne possìbbele nùestre.
A cudde (ca sò assà) ca pe ignorànze ne sottovalùtene l'importànze culturàle, tenìme a dìsce ca u Presidènde de le Stati Uniti e u Pentagono nan fàscene accussì. Da paricchie anne ormà, lòre accàttene consulènze da le cchiù mbortànde scrittùre de science fiction americàne, sop'a la cundinuaziòne de le trasformaziòne pulìteche e sociàle. Quèste picchè le scrittùre de science fiction tènene da dà resposte. Nu muèrse de resposte. E generalmènde pure abbastànze sensàte.
Ind'a l'associaziòne internazionàle M.E.N.S.A., ca mètte nzìme sule crestiàne cu nu Q.I. (Quoziènde d'Intelligènze) cchiù àlde de 140 (u valòre mèdie jè 100), na percentuàle ca potèsse arrevà o 30% lègge abitualmènde science fiction (la mèdie italiàne nan supère u 0,02%).
Ind'a na pròssema lèttere, caro Maurizio Costanzo Show, vedìme accome la letteratùre de science fiction jè nàte, quanne jè nàte e sopratùtte picchè.
Roberto Quaglia
L'òpere "Caro Maurizio Costanzo Show...", tutta sane o a pìezze, pòte èssere lètte, scarecàte sop'o computer, stambàte e copiàte senza lìmete, sule pe ùse personàle. Tutte le tèste e le illustraziòne sò proprietà de Roberto Quaglia e nan ze pònne ausà sane o a pìezze senza permèsse. U progètte gràfeche e le pìezze gràfece de quìste pàggene sò proprietà riservàte de Roberto Quaglia. L'òpere "Caro Maurizio Costanzo Show...", tutta sane o a pìezze, nan pòte èssere mettùte in vèndete a nisciùne tìtue senza permèsse de prime.
© 1994-2000 Roberto Quaglia.
|