a-i é delìri e delìri ël fàit ch'mi ëd tant an tant i esibìssa na cèrta competensa ant lë sproloqui a l'é opinàbil ancheuj a m'é càpita ëd seguì ël cors dij seguent pensé ch'a corìo da chiel për la mìnima bugerà soa vagin-a e soa cocincin-a a l'han ij dné e parèj a l'han sempe rason lor i lo mariërìa gnanca s'a fussa l'ùltim òm al mond e peui a l'han quaicòs ëd curios ij sò fiòt sempe a odoré da tute le part cole sporcacion-e am ciamava se lòn ch'i fasìa a l'avìa cativ odor e ch'a vorìa ch'i fasèissa se nen col òr miraco che rassa ëd domande s'i-j la spalmava un pòch daspërtut an sù col vis vej tut ruse coj mè compliment a l'avrìa capì antlora a la passa bin passa còsa da com a na parlava i pensava ch'a parlèissa dla ròca ëd Gibilterra a propòsit a l'é na bela invension dabon però dòp am pias lasseme andé giù ant la tassa forsand ël pì possìbil e peui tiré la caden-a për annafielo bin ponture ëd spingola giassà però l'àutr sistema a l'ha ij sò vantagi i savìa sempe da com a la fasìa Milly da cita s'a l'avìa ij verm o nò però deje dij dné l'istess quant a l'é dotor prego na ghinea e am ciamava s'i l'avìa omission ëd frequent ma anté ch'a-j van a serché cole paròle coj parucon omission con coj euj da miòp ch'am tnisìa adòss ëd travers i-m sarìa nen fidà a feme dé dël cloròform o Dé a sa còs d'àutr però am piasìa quand as é butasse a sté a scrive tut parèj serios e ancipià nas parèj inteligent al diàul brut busiard Oh tut lòn ch'as veul men che n'idiòt a l'era assè dësvija da ancorzsne via a dipendìa tut dal pensé a chiel e a soe lettere pàsse Stelin-a mia tut lòn ch'a riguarda tò splèndid Còrp tut sotlignà ch'a ven ëd là a l'é na ròba ëd blëssa e ëd gòj për l'eternità quaicòs ch'a l'ha trovà an quaidun dij sò stùpid liber mi sempe a le prèise 4 o 5 vire al dì e i-j disìa ëd nò e sigura Oh sì i disse i son sigurìssima an un cèrt sens i-j tapè la boca i savìa lòn ch'a stasìa për vnì debolëssa natural e basta a fu chiel ch'am ecitè i sai nen com la primìssima sèira ch'i-s ancontrèro quand i abitava a Rehoboth Terrace as restè an pé a vardene për almanch 10 minute com s'i-s fusso già ancontrà da quàiche part i chërdo për via ch'i j'era ebrea i l'hai pijà da mama am divertìa antlora le ròbe ch'a disìa con col sò soris indolent e tùit ij Doyle a disìo ch'as sarìa portà deputà Oh scema nassùa ch'i j'era d'àutr a chërde a tute cole soe ciàcole an sl'autonomìa irlandèisa e l'union nassional am mandè cola barba ëd romansa dai Ugonotti da canté an fransèis përchè a fasìa pì fin O beau pays de la Touraine i l'hai mai cantàla gnanca na vira na mùcia ëd spiegassion e filastròche an sla religion e la persecussion at fa gòde gnente naturalment e peui a podìa chiel mach a la prima ocasion an via ëd favor ch'a-j capitava a Brighton square a corè ant mia càmbra da let fasend finta d'essse maciasse le man con dl'inciòster për laveje con col savon a lë sòlfer e làit d'Albion ch'antlora i dovrava a l'era ancora drinta a l'invòlucr trasparent Oh i schiantè dal rije col dì a penseje a l'é mej ch'a-i fasa nen na sedùa fin-a a la matin an sù cost afé a dovrìo fé dij vas ëd dimension naturaj an mòd ch'na fomna a-i peula sté-i sù còmoda chiel as gënoja për fela mi i diso ch'a-i é an tut ël mond n'àutr ch'a l'abia soe abitùdin varda col mòd ch'a l'ha ëd deurme ai pé dël let com a fa sensa un cussin dur men mal ch'a tira nen càuss se nò am farìa salté tùit ij dent a respira con la man an sël nas com col dé indian ch'am portè a vëdde na dumìnica piovosa al museo ëd Kildare street tut giàun con un faudalin dëstèis an sël fianch pogià a na man con le dij dij pé fòra ch'chiel a disìa a l'era na religion pì granda ëd cola dj'ebreo e ëd Nostro Signore butà ansema an tuta l'Asia a lo imita com a l'é soa abitùdin d'imité tùit i chërdo ch'ëdcò chiel a deurmèissa con la tèsta ai pé dël let con cole piòte squadrà an boca a la fomna che sudisserìa comsëssia anté ch'i l'hai butà cole pesse ah sì i lo sai speroma ch'l'armari a scriccola nen ah i lo savìa chiel a deurm sòd as deuv essse divertì a-j deuv avèj fàit spende bin sò dné naturalment mìnga a l'ha avùla grata Oh che scociatura i spero ch'a-i sia riservà quaicòs ëd mej ant l'àutr mond a leghene tute parèj Dé an scampa e libera për staneuit va bin parèj e adess ël vej let bozolos e tintinnant am ricòrda sempe ël vej Cohen a-i-s deuv essse gratà dëspess drinta e chiel a chërd ch'papà a l'ha catalo da Lord Napier ch'mi i amirava da fijëtta përchè i-j avìa dit pianin pian Oh com as sta bin a let Dé i-i soma torna com al sòlit dòp sëddes agn an quante ca i saroma stàit Raymond terrace e Ontario terrace e Lombard street e Holles street e chiel as në va an gir subiand minca vira ch'as deuv sloghé sempe coj ugonòt o la marcia dle rane fasend finta d'giuté j'òm con coj 4 stich ëd mòbij ch'i l'oma e peui l'albergh City Arms ëd pes an pes a dis ël provòst Daly col postin delissios an sël pianeròtol sempe quaidun drinta a preghé peui tùit as lassavo daré tute soe spusse as sa sempe chi ch'a-i é stàit për ùltim e còs it na dise ëd taj pensé ël cui cors ancheuj a m'é càpita ëd seguì a fan schìfo a son bej ël truch ch'i l'hai dovrà për penseje a l'é un vej truch i l'hai duvertà l'Ulisse ëd Joyce e i na l'hai lesù na pàgina antramentre ch'ij mè euj a scorìo ël test i-m son ritrovà taj paròle an ment e donca sensa dùbit i-je stasìa pensand già ch'i-i era i l'hai për coincidensa scrit an temp real lòn ch'am passava për la tèsta al ritm fiss dla letura e ecco antlora avansé sta lettera dòp la sarura dël liber e la scomparsa ëd coj pensé da mia tèsta donca fòra che për le prime vint paròle sirca ëd cost tòch e peui adess a ripartì da quàiche moment fa nopà che deliré mi i l'hai lassà deliré Joyce e peui dime vojàutri se chiel a sò temp e peui ëdcò dòp sò temp av l'ha nen pijà për ël cul tùit.

Roberto Quaglia