ancheuj i suport nen ij filòsof. Ij filòsof d'ancheuj. I ancaminè a mal suporteje an gioventù, për l'aparenta inutilità dj'argoment con ij cui a tentavo ëd rende mè servel pì simil al sò. Ma a col temp i savìa nen, com i sai adess, an mòd ciàir, precis e enòrm qual a l'era esatament ël mostruos eror ant ël qual lor a son fier ëd condue soa vita.
A-i j'ero na vira ij filòsof. Lor a j'ero la cùspid dla conossensa ant la società ëd cui a j'ero part. Ij filòsof a contnisìo drinta ëd sé tut lë s-cibil nòto, a savìo lòn ch'minca filòsof dël passà a l'avìa precedentement savù, e an sù tal base lor a portavo anans l'antrega comprension uman-a d'un àutr pòch. Lor a savìo ëd fìsica com d'ética, ëd biologìa com ëd moral e d'astrofìsica. Lor a savìo tut lòn ch'a-i era da savèj dàit che lòn ch'a-i era da savèj a podìa vnì aprendù an un arch ëd temp inferior a col dla durà d'na vita uman-a. Ant ël top dle scarne conossense che l'umanità faticosament a sotraìa a l'Ignoransa, lor a brilavo ant l'eròich gest ëd dventé l'espression dla màssima sìntesi dle conossense possedùe da la specie uman-a ëd sò temp.
Tut sòn a fu, e pì a l'é nen. J'ùltim sent agn ëd stòria uman-a a l'han obnubilà ij fulgor ëd senten-e ëd milion d'agn d'evolussion dla vita an sla tèra. Senten-e ëd milion d'agn d'evolussion prima che la vita marin-a a riessèissa a conquisté le tère emerse, àutre senten-e ëd milion për conquisté cola forma ëd cui i andoma tant fier, e adess, a men ëd sent agn da l'invension dl'eletrissità ecco la vita conquisté lë spassi, rivé a la lun-a e con soe artifissiaj propàgin ciamà sonde ël sistema solar tut. Ecco la vita difondse al silissi ant ël fenòmen ch'impròpriament i ciamoma ancora "informàtica", ecco l'univers dij fenòmen e dj'idèje fesse rich com an tuta la stòria dla vita a l'era stàit mai. Ecco la stòria dla vita midema emerge dal limbo dl'ignoransa, ecco n'umanità geocéntrica, antropocéntrica, egocéntrica ilumine-se d'insospetàbij cossiense riguard le maravije ëd lòn ch'i ciamoma evolussion, perdse ant j'abiss ëd temp ricavà da l'interoghesse an sël significà dël passà, e spande soa idèja ëd spassi anvers confin sìa a distanse vertiginose ma nen assurde.
An sta fùlgida esplosion d'evolussion, ecco ëdcò detrit fòssij a la deriva, tratà con na riverensa fòssil ëdcò chila, vàire ridìcola. Ecco për esempi ij filòsof, tra le pì grotesche manifestassion ëd tal fòssil paretichëssa, dàit ch'idealment prepòst a la comprension ëd lòn ch'nopà manifestament as dimostro dël tut incapaci ëd comprende. Ant soa vetusta deriva, a fan ëdcò inconsapèivola sciagurà esibission ëd soa misera e oscen-a cëcità inteletual.
Coj che la società tòtament as dileta a ciamé filòsof, a son nen filòsof. A l'han disimprendù la filosofìa seguend un cors ëd làurea an filosofìa scadù milenni fa, a l'han incancrenì soa stolidità mostrand a d'àutri lòn ch'a l'ha avù sens quand le conossense uman-e a j'ero parèj pòche da podèjse stivé an qualsëssìa ment aceptabilment dotà. A l'han conquistà ël vèrtes dla ridicolerìa convincend-se d'esse "filòsof", visadì ëd savèj aceptabilment scimiotté ij concet ch'an top époche d'ignoransa autèntich géni a l'han avù la grandiosità - lor, sì! a l'han avùla! - ëd concepì. Coj che la società ancheuj a ciama filòsof a son an géner d'àutr che stòrich dla filosofìa - e la diferensa a l'é imana! Lor d'àutr a capisso nen dëdlà a l'ombra ëd lòn ch'sécoj fa géni ignorant a l'han capì. Lor gnente a san ëd lòn che ëd saliant an sti ùltim desenni l'umanità a l'ha ancaminà a pensé.
Ancheuj, ël ver filòsof a perd nen temp a procuresse ël tìtol ëd filòsof. A l'é pì nen com ant ij sécoj passà, ancheuj a-i é tròp da amprende! E a-i é tròp da NEN amprende. Ecco la granda diferensa, ch'gnun a bùta an evidensa. La ramificassion dle siense e dle dissiplin-e a l'é tal, la mòle dle informassion a l'é tal, che la vita uman-a a l'é tròp curta për aprende tut - ma nen mach! La vita uman-a a l'é ëdcò tròp "lenta" an confront a l'incalsé dle neuve conossense! Ëdcò vivend an etern, ancheuj, n'individ a podrìa MAI tnì ël pass con ël virulent proliferé dle neuve conossense, e ann dòp ann ël divari tra lòn ch'chiel a sa e lòn ch'a podrìa savèj a aumenterìa con progression esponensial.
A l'é n'època esaltanta, la nòstra, considerandla ant ij giust termin. A la stupidità ëd selebré chi ch'as pregia d'essse incancrenì an su nossion ch'a l'han avù sens sécoj fa, as uniss la cëcità stratégica ëd chi ch'an quàiche mòd ant l'organisassion dël progress dël savèj a l'ha un ròl important. I vivoma ant la recenta època dl'esaltassion dla specialisassion, dl'arserca siientìfica aplicativa, dl'arserca dël savèj finalisà a la produssion ëd dné. Ecco përchè i trove pì nen ver filòsof da gnun-a part, car mè, e s'i-je trove i-je riconòsse nen! Përchè ël VER filòsof contemporani a l'ha nen perdù tròp temp an università omogeneisant, an specialisassion aplicative ch'a lo rendo ël màssim espert mondial d'na sot-fonsion ëd quàiche sot-sot-sot-procedura produtiva. Ël VER filòsof a l'ha nen perdù na sostansiosa part ëd soa vita a masturbesse la cortëccia an sle mòrte problemàtiche ëd col amass ëd defunt e sotrà géni ignorant da l'etichëtta DOC: "Platone". "Hegel". "Kant". Ël VER filòsof a l'ha bzògn ëd soa vita për assorbì tute le sconvolgente implicassion dla teorìa dla Relatività, dla Fìsica Quantìstica... ma nen mach! Dla teorìa dël Caos! Dla teorìa dle Catàstrofi! Dl'Olism! Dij misteri dla geometrìa Frattal! Dle stupefacente comprension dla Neurologìa e dla Psicologìa! Dla teorìa dla Ment Bicameral! ...ma nen mach! Dle miràbij invension ëd chi ch'soa ment a impiega a comprende ël present imaginand ël futur, ij scritor ëd fantasiensa! Dle profonde relassion tra siensa e art, tra geometrìa, matemàtica e mùsica! Ël VER filòsof ancheuj a deuv amprende a evité d'ostinesse an sl'aprendiment ëd conossense fonsionalment ùtij, ma idealment irrilevante. Ël VER filòsof a deuv amprende a distingue tra lòn ch'a l'é da amprende e lòn për cui a l'ha nen sens ch'chiel a perda temp. Ël VER filòsof a deuv spassié an tùit ij camp dl'odiern s-cibil, e dàit che l'amass ëd informassion a l'é mastodòntich e a chërss sempe ëd pì sempe pì an pressa, chiel a deuv amprende a trascuré ij détaj, tùit ij détaj irrilevant, e dé forma drinta lë spassi mental ch'a cultiva an sé a n'organisà costelassion ëd sìntesi. La sìntesi ëd minca camp ëd riflession a deuv esse plàstica e mai dogmàtica, susetìbil d'esse stravòlta da un moment a l'àutr, dàit che sti-sì a son j'atuaj temp dl'evolussion dël progress uman. La suprema sìntesi d'na Weltanschauung superior a vnirà donca da sé, spontaneament, com spontani a l'é tut lòn ch'an minca leugh da sempe a sorz e a càpita, për quant sòn a significa quaicòs, për quant a quàidun a-j pias chërde diversament. Car Maurizio Costanzo Show, am dëspias për ti, com am dëspias për mi e për l'Italia, ma ant la trasmission ch'ti't ses i l'hai nen mai vist e scotà un VER filòsof. Contut a na esisto. I na l'hai conossù divers. Ma i-je son dovù andé a serché, përchè contrariament a le superstission, lor a l'han nen scrivulo an front, né an sù quàiche certificà prestampà.
E për terminé con adeguà facessia, ecco modesta arsètta ch'a mimetisa sìntom a la sgenà: Cacé ij cacciari e inalberé nen j'alberoni!

Roberto Quaglia