i-i tnisìa a dì un para ëd ròbe ëdcò mi an sù lòn ch'col'àutr mi midem a l'ha dit ant la lettera ëdnans ch'i-m ricòrdo ch'i l'hai scrit quand i j'era chiel. Mi i son an efet col'àutr mi midem ch'a-i é drinta ëd mi quand i son inteligent, visadì quand i lo son nen com adess a-i é sempe però drinta col ch'a lo l'é ëdcò s'as në sta ciuto.
Col'àutr mi midem a parla ch'a l'ha conossù Baccini quand a l'era nen Baccini, am par ëd capì. Ma a l'ha nen fàit ij cont sensa l'òst, ch'peui i son mi, ëdcò literariament, ant la Panteca. I-i era an efet ëdcò mi, drinta al mè còrp, quand as stasìa a menèsla ansema a Baccini ant la Panteca. Ma disoma pura pan al pan. Mi i son nen gelos che Baccini adess a l'é famos e ch'as cuca tute le fomne ch'a veul, ëdcò se miraco parèj fasend as coro coj risigh dl'AIDS, com a dis Lupo Alberto. I son nen gelos però i diso ch'a l'é pròpi n'ingiustissia che Baccini a ven-a nen a porté tute le brise ëd fomne ch'a-j avanso a nojàutri ch'i soma restà sfigà drinta la Panteca. S'am sent col'àutr mi midem inteligent ch'as stërma drinta ëd mi për peui salté fòra quand mi i-m dëstraio, as anrabia, e ël risigh a l'é ch'am sfrata. Chiel a l'é convint ch'i lo sputan-o, a parlé a nòm ëdcò sò con un lengagi sempi e sincer, ch'chiel a dis ch'a l'é pien d'eror e da defissient. Ma i peuss nen sté ciuto dëdnans a j'ingiustissie. L'àutra mia personalità inteligenta av l'ha nen dit tute le ròbe perverse ëd Baccini quand a l'era sfigà. A l'era pròpi com mi quand i son com adess, ant mia version sempia ma sincera. A savìa mai còs dì a gnun. An efet a disìa gnente. A martelava an sël pianoforte, le fijëtte sensa gnun gust as setavo davzin a chiel a vardelo soné e s'a-j ciamavo quaicòs chiel a savìa mai còs risponde. A l'era pròpi com mi da sempi, ma mi almanch ël coragi ëd parlé i lo l'hai. L'ùnica ròba ch'a savìa dì a le fijëtte a l'é s'a l'avìo bzògn d'un passagi a ca, e quàidun-e ël bzògn a lo l'avìo dabon, e antlora chiel a-je compagnava a ca e sensa dije gnente (a le fijëtte) a un cèrt pont a-j saltava adòss e se la fijëtta a l'era nen perspicace a finìa ch'a-i stasìa sensa ancorzse e ch'as ritrovava ciavà an men ch'as disa. A cost mòd Baccini as aprofitava dle bzognose ëd passagi an màchina. A l'avìa na Due Cavalli rossa col sedil dël passegé dëdnans sfondà (veriament a l'era pròpi stacà da soe rotàje) e parèj chionque as setava davzin a chiel a l'era automaticament an posission ginecològica. I-m ricòrdo ch'ansema a chiel i l'hai fàit un viagi fin-a a Firenze an posission ginecològica. Ma con mi a l'ha nen provaje.
I l'hai ëdcò da ridì an sù tut lòn ch'ël mè alter ego a l'ha dit an sla Panteca. A l'é ver ch'a l'é un pòst da sbal, ma mìnga për le ròbe pseudo-culturaj ch'a dis chiel. S'mi i fussa nen ansema a chiel ël gestor i-i andrìa për ël sbal, ëd cui chiel a l'ha gnanca parlà. An Panteca as sbala përchè a-i é bordel, quand quaidun a son-a ël volum a l'é giustament a stecca e tùit coj ch'a ven-o lì për fé j'inteletuaj a la facia ëd nojàutri pì sempi ma sincer as lo pijo ant ël daré përchè con tut col bordel a peulo gnanca parlé e dì tute cole ròbe ch'sbaliand a-je fan sente superior. Ël bordel a-je fa sté ciuto e a nojàutri an fa sbalé e a l'é giust parèj, përchè nojàutri i soma la magioransa e lor la minoransa e nojàutri i soma an un pais democràtich. Pì bordel a-i é, men as pensa, e men as pensa e mej as sent. A lo capirìa ëdcò chionque, basta ch'a fasa nen part ëd coj quat gat ch'as sento inteligent ch'però a lo son nen përchè ij ver inteligent i soma nojàutri ant nòstra semplissità democràtica. A peulo nen esse lor ij ver inteligent pròpi për via dla democrassìa, com an mostra la television. La magioransa a l'ha sempe rason, e la magioransa i soma nojàutri, an efet le trasmission ch'i vardoma nojàutri a la television a l'han ij màssim ìndes d'ascolt, e sòn a lo peul canselé gnun.
Scusé s'i vado un pòch fòra dël discors. A l'é ch'ij drit uman a ancamin-o pròpi quand as va an discotèca, o an Panteca, o an tùit coj pòst për nojàutri giovo. Con che drit ij così dit inteligent an veulo fé la prédica disend lòn ch'i dovoma nen fé mach përchè a-j pias nen a lor? A nojàutri ch'an sbala fé bordel ij dùbit an ven-o nen e i soma tùit d'acòrdi ch'ël drit a fé bordel a l'é un drit uman, dàit che dòp-tut pròpi për la question democràtica i soma pì uman nojàutri dij così dit inteligent dàit che la magioransa i lo ripeto i soma nojàutri. Saré le discotèche e tute cole àutre limitassion a l'é antlora na violassion dij drit uman. I soma ant l'època dël progress, e a l'é giust che tut a aumenta, e parèj a l'é giust ch'a aumenta ëdcò ël volum e tùit ij sbal ch'adess iv diso nen se nò peui am arèsto violand ij mè drit uman.
Tornand a Baccini, almanch le brise ëd tute le fomne ch'a-j leco le scarpe a podìa ëdcò portecje. A l'é che dòp ch'a l'é dventà famos chiel as é montà la tèsta e adess a l'é convint d'esse superior, com le përson-e ch'a diso d'esse inteligent. Chiel almanch a dis nen d'esse inteligent, e a l'é già quaicòs. Tute le përson-e ch'a lo conossìo prima a son tute d'acòrdi: almanch le brise dle fomne ch'a-j avansavo a podìa portecje. Tant pì ch'a son tute fomne sempie com nojàutri, a nòstra portà, an efet a-j avanso.
I spero che tra vojàutri tùit a san chi ch'a l'é Baccini. A l'é l'ùnica përson-a ch'i l'hai conossù ch'peui a l'é dventà famosa. S'i lo conòsse nen am fé un dëspet përchè am gave ëdcò sòn. A l'é nen ch'am impòrta për chiel - i son nen mìnga inteligent!
I spero ch'almanch vojàutri i capisse tut lòn ch'i diso, dàit ch'mi për fortun-a i-i riesso nen sempe, altrimenti i l'avrìa por ch'i son dventà torna col là inteligenton drinta ëd mi ch'a fa sempe finta vàire bin ëd capì tut ma mi i sai ch'a l'é nen parèj ëdcò s'i deuv amëtte che tante ròbe a-je capiss dabon mè malgré.
Vnì antlora an Panteca, iv racomando, ma mach quand a-i é bordel, bordel democràtich, e antlora sì che con ël bel bordel ch'a-i é e ch'a cheurb tùit ij nòstri discors i soma dabon democraticament tùit uguaj.

Roberto Quaglia