bi tenia a nàrrere unu paja de cosas fintzas deo subra cussu chi cudd'àteru deo etotu at naradu in sa lìtera precedente chi mi regordo chi apo iscritu cando fia issu. Deo so difatis cudd'àteru deo etotu chi b'est in intro de me cando so intelligente, est a nàrrere cando no lu so comente immoe b'est semper però in intro cuddu chi lu est fintzas si si nde istat mudu.
Cudd'àteru deo etotu faeddat chi at connotu Baccini cando no fiat Baccini, mi paret de cumprèndere. Ma no at fatu sos contos sena s'ostieri, chi poi so deo, fintzas literariamente, in sa Panteca. Bi fia difatis fintzas deo, in su corpus meu, cando si fiat a si la maniggiare paris cun Baccini in sa Panteca. Ma naramus fintzas pane a su pane. Deo no so gelosu chi Baccini immoe est famadu e chi si corcat totu sas fèminas chi cheret, fintzas si forsis gasi faghende si corrent cussos arriscos de s'AIDS, comente narat Lupo Alberto. No so gelosu però naro chi est pròpiu una ingiustìtzia chi Baccini no benit a portare totu sas brìciolas de fèminas chi li abbàntzant a nois chi semus abbarrados isfigados in sa Panteca. Si mi intendet cudd'àteru deo etotu intelligente chi si cuat in intro de me pro poi saltiare a foras cando deo mi distraigo, si inchietat, e s'arriscu est chi mi isfratat. Issu est cumbintu chi deo lu sputtano, a faeddare a nòmine fintzas suo cun unu limbàgiu sìmplitze e sinceru, chi issu narat chi est prenu de errores e de deficientes. Ma no potzo istare mudu in antis a sas ingiustìtzias. S'àtera personalidade intelligente mea no bos at naradu totu sas cosas perversas de Baccini cando fiat isfigadu. Fiat pròpiu comente a me cando so comente immoe, in sa versione mea sìmplitze ma sincera. No ischiat mai ite nàrrere a nemos. Difatis no naraiat nudda. Martelaiat subra su pianoforte, sas pitzocheddas sena perunu gustu si setziant a curtzu a issu a lu abbaidare sonare e si li pediant carchi cosa issu no ischiat mai ite rispòndere. Fiat pròpiu comente a me su sìmplitze, ma deo a su nessi su coràgiu de faeddare l'apo. S'ùnica cosa chi ischiat nàrrere a sas pitzocheddas est si teniant bisonzu de unu passàgiu a domo, e carchiuna su bisonzu l'aiant a beru, e tando issu las acumpangiaiat a domo e sena lis nàrrere nudda (a sas pitzocheddas) a unu tzertu puntu lis saltiaiat a coddu e si sa pitzochedda no fiat perspicace acabaiat chi bi fiat sena s'acatare e chi si retrovaiat iscopada in mancu de cantu no si narat. A custu modu Baccini s'aprofitaiat de sas bisonzosas de passàgios in màchina. Teniat una Due Cavalli ruja cun su sedile de su passegeri in antis isfundadu (a beru fiat pròpiu isteradu dae sas roeas suas) e gasi chiesisiat si setziat a curtzu a issu fiat automàticamente in positzione ginecològica. Mi regordo chi paris cun issu apo fatu unu biàgiu fintzas a Firenze in positzione ginecològica. Ma cun me no b'at proadu.
Tèngio fintzas de ridìere subra totu cussu chi s'alter ego meu at naradu subra sa Panteca. Est a beru chi est unu logu de sballu, ma no pro sas cosas pseudo-culturales chi narat issu. Si deo no fia paris cun issu su gestore bi andaiat pro su sballu, de su cale issu no at mancu faeddadu. In Panteca si sballat proite b'at burdellu, cando calicunu sonat su volume est giustamente a stecca e totu cussos chi benint inue pro fàghere sos intelletuales in cara de nois prus sìmplitzes ma sinceros si lu pigant in su daisegus proite cun totu cussu burdellu no podent mancu faeddare e nàrrere totu cussas cosas chi isballende los faghent sentire superiores. Su burdellu los faghet istare mudos e a nois nos faghet sballare e est giustu gasi, proite nois semus sa majoria e issos sa minoria e nois semus in unu paisu democràticu. Prus burdellu b'at, mancu si pensat, e mancu si pensat e mègius si sentit. Lu diat cròere fintzas chiesisiat, bastat chi no fatzat parte de cussos bator gatos chi si sentint intelligentes chi però no lu sunt proite sos veros intelligentes semus nois in sa semplitzidade democràtica nosta. No podent èssere issos sos veros intelligentes pròpiu pro via de sa democratzia, comente nos imparat sa televisione. Sa majoria tenet semper resone, e sa majoria semus nois, difatis sas trasmissiones chi abbaidamus nois a sa televisione tenent sos màssimos ìndices de ascurtu, e custu no lu podet cancellare nemos.
Iscusade si ando unu pagu a foras de su discursu. Est chi sos diritos umanos cumintzant pròpiu cando si andat in discoteca, o in Panteca, o in totu cussos logos pro nois giòvanos. Cun cale diritu sos gasi narados intelligentes nos cherent fàghere sa prèdica narende cussu chi no depimus fàghere isceti proite no lis piaghet a issos? A nois chi nos sballat fàghere burdellu de dudas no nos benint e semus totus de acordu chi su diritu de fàghere burdellu est unu diritu umanu, dadu chi a pustis de totu pròpiu pro sa chistione democràtica semus prus umanos nois de sos gasi narados intelligentes dadu chi sa majoria lu repito semus nois. Serrare sas discotecas e totu cussas àteras limitatziones est tando una violatzione de sos diritos umanos. Semus in s'època de su progressu, e est giustu chi totu aumentat, e gasi est giustu chi aumentat fintzas su volume e totu sos sballos chi immoe no bos naro sinono poi mi arrestant violende sos diritos umanos meos.
Torrende a Baccini, a su nessi sas brìciolas de totu sas fèminas chi li lìnghent sas iscarpas podiat fintzas nos las portare. Est chi a pustis chi est diventadu famadu issu si est muntadu sa conca e immoe est cumbintu de èssere superiore, comente sas persones chi narant de èssere intelligentes. Issu a su nessi no narat de èssere intelligente, e est giai carchi cosa. Totu sas persones chi lu connoschiant in antis sunt totus de acordu: a su nessi sas brìciolas de sas fèminas chi li abbantzaiant depiat nos las portare. Tantu prus chi sunt totu fèminas sìmplitzes comente a nois, a sa portada nosta, difatis li abbàntzant.
Ispero chi intre bois totus ischint chie est Baccini. Est s'ùnica persone chi apo connotu chi poi est diventada famada. Si no lu connoschides mi faghides unu dispetu proite mi bogades fintzas custu. No est chi mi importat pro issu - no so mancu intelligente!
Ispero chi a su nessi bois cumprendides totu cussu chi naro, dadu chi deo pro fortuna no mi resesso semper, sinono dia tènnere timòria chi so diventadu de nou cuddu incue intelligentone in intro de me chi faghet semper finta meda bene de cumprèndere totu ma deo isco chi no est gasi fintzas si apo de ammìtere chi medas cosas las cumprendet a beru a malgradu meu.
Benide tando in Panteca, bos racumando, ma isceti cando b'at burdellu, burdellu democràticu, e tando eja chi cun su bonu rumore chi b'at e chi cobèrgiat totu sos discursos nostros semus a beru democràticamente totus uguales.

Roberto Quaglia