i confesso ch'i conòsso Gigi Picetti. Nà ant ël 1939, Gigi Picetti a l'ha ant l'istant ch'i scrivo 55 agn, e a l'é n'individ ùnich an Italia. Prima ëd tut a l'é un geni-cit, e com a l'é sempe càpità a la magior part dij geni-cit, pòche përson-e a son rivà a comprendlo an soe ìntime peculiarità, e tra ëd lor gnun-a përson-a normal.
Gigi Picetti a l'é célib («I l'hai mai comëttù un matrimòni»), pòver ëd dné ma richìssim ëd giovo grassiose fije ch'a amo orbiteje dantorn («A l'é nen mi ch'i l'hai sucess con le giovo, a son le giovo ch'a l'han sucess con mi»), e ant soa òrbita a l'é dle vire costrèit a penetré («Chi ch'a gis a acconsent»), as é sempe tnù a la larga dai travaj tedios e ripetitiv («I-m rompo ma i-m implego nen»), e da vàire desenni a l'é un volcan an perene erussion d'idèje, aforism e batùe originaj, ch'i troveve nen là anté le furmìe as anrabio né ant d'àutri leugh dël mond an sù carta stampà. Quaidun a obieta ch'a peul nen esse sublim autor d'aforism col ëd cui aforism mai gnun as degnè ëd cheuje ant ij liber prepòst? A costì i rispondo superiorment con un pertinent aforism ëd Gigi Picetti: «Nen tùit j'aforism a finisso ant ij liber.»
Gigi Picetti a esist intensament, istant apress istant, con vasta cossiensa dël moment altrimenti fugent.
A nassè mòrt, lontan da minca ospidal. Ël médich a diagnostichè ch'a-i era nen speransa. Muto sugeriment: "Campelo pura via." L'ignoranta fomna ch'a assistìa mare e dotor as në stete nen a tal sentensa. A maltratè ël cadàver ëd Gigi Picetti fin-a ch'a resussitè. Gigi Picetti a l'avìa ancaminà a stupì.
Sàut spassiotemporal!
Ant ël 1970 Gigi Picetti as passegia për l'urbe con un gròss registrator a tracòla e un pàira ëd voluminose cufie an sla tèsta, scotand jazz, e ij passant a lo vàrdo com a fussa mat; a l'ha precors ij temp anventand për sò ël walk-man vint agn prima dij giaponèis.
Sàut spassiotemporal!
Ant ël 1977 Gigi Picetti a gira për Roma e anfiltrand-se an salòt as mës-cia a Zavattini, Moravia, Ruggero Orlando, Nicolini, Reim e Di Nola.
Sàut spassiotemporal!
Ant ël 1975 durant sò perìod parisin, Gigi Picetti a carpiss in extremis j'ùltim àtim ëd vita d'esse uman selessionà tra ij pì significativ ëd nòst sécol: Jean Paul Sartre, Simone de Bovoir, Joris Yven, Michel Foucault.
Sàut spassiotemporal!
Ant ël 1991, ël prim d'Avril, Gigi Picetti a anventa për gieugh a Gènoa un partì pòlitich e a lo ciama PCS (PARTITO CENTRO STORICO, e ëdcò crasi otimal tra PCI e PDS). A l'é un sucess! Prima pàgina ëd "Il Secolo XIX". Artìcoj a ripetission an sù tùit ij quotidian sucessiv. Mijàra ëd telefonà d'iscrivend. Artìcol a pien-a pàgina an sù "La Repubblica". Gigi Picetti as gòd sta soa òpera d'art moderna fin-a ch'a - da ver artista - as në disanteressa an scioltëssa për dedichesse a na sucessiva creatura.
Sàut spassiotemporal!
Ancora anfant, 1950, a scarabòcia an sù feuj a quàder ël profil d'n'autò monovolum a forma ëd bomba dëmesà. A l'é la Twingo, 35 agn prima.
Sàut spassiotemporal!
Ant ël 1973 as ambat an Dario Fo e a-j toca fé për tre agn l'ator për chiel.
Sàut spassiotemporal!
Ant ël 1983, për ripaesse da improvisa pieuva durant un gir a Milan, as anfila ansema al sotscrit an un palass a cas anté as fasìa ël convegn nassional dij fotògraf artigian. Un apress l'àutr ij fotògraf candidà a la presidensa dla categorìa as avvicendo an sël pùlpit, pòch esprimend ant la letura dij sò tedios discors. Gigi Picetti as iscriv a parlé, a improvisa con travolgenta oratòria dëscadnand consens, e quand a l'han squasi elet president dij fotògraf italian a l'ha antratant chità ëd pieuve e antlora i-i andoma, parèj, sempliciament.
Sàut spassiotemporal!
Ant ël 1976 a decid ëd ciamé Teatro dell'Archivolto un leugh strapà a l'entropìa, e lì a propon, për la prima vira an sità, la presensa d'un dëscnossù Benigni, e ij film d'un cèrt Fassbinder.

Oscar Wilde, liberà dai sò doi prinsipaj difet - nen conòsse l'italian e esse già mòrt - sértament as levrìa ël silìndro al cospet ëd Gigi Picetti.

Roberto Quaglia