confeso che conoso Gigi Picetti. Nato inte'l 1939, Gigi Picetti el ga inte l'istante che scrivo 55 ani, e el xe un indivìduo ùnico in Italia. Prima de tuto el xe un genio-creatura, e come el xe senpre suceso a la pì parte dei geni-creature, poche persone le xe rivà a capirlo inte le so pecularità ìntime, e tra de lore nissuna persona normal.
Gigi Picetti el xe cèlibe («No go mai comeso un matrimònio»), poareto de schei ma richìsimo de zóvani grasiose tose che le ama girar atorno a lu («No son mi che go suceso co le zóvani, le xe le zóvani che le ga suceso con mi»), e inte la cui òrbita el xe qualche volta costreto a entrar («Chi giase el consente»), el se xe senpre tegnù a la larga dai lavori tediosi e ripetitivi («Me speso ma no me inpiego»), e da varie deceni el xe un vulcan in perene erusion de idee, aforismi e batude originali, che no trovarì indove le formìgołe le se incasa né in nissun altro canton del mondo su la carta stanpà. Qualcun el obieta che no'l pol èser sublime autor de aforismi queło de cui aforismi mai nissun el se ga degnà de racòjer inte i libri aposta? A questi rispondo da sora con un pertinente aforisma de Gigi Picetti: «No tuti i aforismi i finise inte i libri.»
Gigi Picetti el esiste intensamente, istante dopo istante, con vasta cosiensa del momento che senò el scanpa.
El xe nato morto, lontan da ogni ospedal. El mèdego el ga diagnosticà che no ghe gera speransa. Muto suzerimento: "Butèlo pur." La ignorante fémena che la asisteva mama e dotor no la se xe stà a sta sentensa. La ga maltratà el morto de Gigi Picetti fin a quando lu el xe resussità. Gigi Picetti el gaveva scominsià a stupir.
Salto spasiotenporal!
Inte'l 1970 Gigi Picetti el pasegia par na sità con un groso registrator a tracoła e un paro de voluminose cufie in testa, scoltando jazz, e i pasanti i lo varda come el fuse mato; el ga precorso i tenpi inventando par lu el walk-man vint'ani prima dei giaponesi.
Salto spasiotenporal!
Inte'l 1977 Gigi Picetti el gira par Roma e infilàndose inte i saloti el se mìscia con Zavattini, Moravia, Ruggero Orlando, Nicolini, Reim e Di Nola.
Salto spasiotenporal!
Inte'l 1975 durante el so perìodo parigin, Gigi Picetti el ciapa in extremis i ùltimi àtimi de vita de èseri umani sielti tra i pì significativi del nostro sècolo: Jean Paul Sartre, Simone de Bovoir, Joris Yven, Michel Foucault.
Salto spasiotenporal!
Inte'l 1991, el primo de Aprile, Gigi Picetti el inventa par zogo a Zènova un partito polìtico e el lo ciama PCS (PARTITO CENTRO STORICO, nonché crasi otimal tra PCI e PDS). El xe un suceso! Prima pàgina del "Il Secolo XIX". Artìcoli a ripetision su tuti i quotidiani dopo. Mijara de telefonade de gente che la vol iscrìverse. Artìcolo a piena pàgina su "La Repubblica". Gigi Picetti el se gode sta so òpera d'arte moderna fin a quando - da vero artista - el se ne disinteresa con scioltesa par dedicarse a na creatura dopo.
Salto spasiotenporal!
Ancora puteło, 1950, el scaraboça su un fojo a quadreti el profiło de na màchina monovolume a forma de bonba dimesà. La xe la Twingo, 35 ani prima.
Salto spasiotenporal!
Inte'l 1973 el se inbate in Dario Fo e ghe toca far par tre ani l'atore par lu.
Salto spasiotenporal!
Inte'l 1983, par ripararse da na piova inprovisa durante un giro a Milan, el se intrufoła insenbre a'l sotoscrito inte un palaso a caso indove se stava fasendo el convegno nasional dei fotògrafi artisiani. Uno dopo l'altro i fotògrafi candidati a la presidensa de la categoria i se avisenda su'l pùlpito, poco esprimendo inte la letura dei so discorsi noiosi. Gigi Picetti el se scrive a parlar, el improvisa con travolzente oratoria scatenando consenso, e quando i lo ga quasi eleto presidente dei fotògrafi italiani el ga intanto finìo de piòver e alora se ne ndemo, cussì, sénplisemente.
Salto spasiotenporal!
Inte'l 1976 el decide de ciamar Teatro dell'Archivolto un canton strapà a l'entropia, e là el propone, par la prima volta in sità, la presensa de un desconosùo Benigni, e i film de un serto Fassbinder.

Oscar Wilde, liberà dai so do difeti prinsipali - no conóser el talian e èser za morto - de sicuro el se cavaria el silindro davanti a Gigi Picetti.

Roberto Quaglia