se allude spisso a quaccheduno ca parla pe "frase fatte", spisso adornanno sta allusione cu 'na accezione negativa. Quaccheduno s'è divertuto a ironizzà ncopp'a chesto, cumponenno ad arte dialoghe esclusivamente furmate 'a frase fatte. Ma nun ce stanno sulo 'e frase fatte.
Ce stanno, primma 'e tutto, 'e "parole fatte". Tìpeco 'e 'na frase fatta è ca essa se ripresenta sempe uguale o cu mìnemale variazione. Pe esempio: 'E giovane 'e oje nun tènono cchiù rispetto. Bene, p''o stesso mutivo, tutte 'e parole sò "fatte", pecché se ripresèntano sempe uguale. Pecché è accussì pe tutte 'e parole, nun ce abbadammo. Quacche inconveniente surge quanno vulimmo intènnere quaccosa ca nisciuna parola esistente pòzza rappresentà, pe esempio 'na quacche invenzione nosta - materiale o concettuale. Nun putenno semplicemente "ripètere" 'a sòleta parola ca racchiude chello ca vulimmo dìcere, ce truvammo 'n difficoltà. E si inventammo 'na nova parola surge 'o prubblema 'e essere cumprise, pecché nun se tratta 'e 'na parola "fatta", e nun avènnola maje sentuta nisciuno ne capisce 'o significato.
Ce stanno accussì 'e parole fatte, 'e quale quacche vota compòngono 'e frase fatte, e po'...?
Po' ce stanno 'e "cuncètte fatte". Lloro sò cchiù difficile 'a identificà, dato ca sùrgono d''o 'nzieme 'e frase nun necessariamente "fatte", e pure essènno sostanzialmente sempe uguale, nun tènono 'na forma ùneca e ricanoscìbbile. Tìpeco 'e 'nu cuncètto fatto è 'a evidenza ca isso nun sia surto dint'ô penziero 'e chi 'o esterna, ma ca sia 'a isso sulamente rimbalzato, proveniente 'a fora, comme evidentemente già succede cu 'e frase fatte.
È terrìbbile, anze normale, ma tutte raggiunammo 'n grannìssema prevalenza pe cuncètte fatte. Quanno esprimimmo 'na opinione ca credimmo nosta, ripetimmo quase sempe chello ca 'a assaje ate è già stato espresso, spisso assaje meglio ca 'a nuje. Ma pecché parlo 'e "nuje"? Me dispiace pe "vuje", ma io me chiammo fora, nun pecché 'a prevalenza d''e penziere mije nun sia custituita 'a cuncètte fatte, (e io ben saccio ca 'o è pecché accussì è pe ogne essere umano), ma pecché 'na parte d''e cuncètte ca me frùllano 'n capa non sono cuncètte fatte. E faccio ll'esempio 'e tutta sta riflessione ncopp'a 'e cuncètte fatte, ca nun aggio liggiuto o sentuto 'a nisciuna parte e aggio avuto 'a penzàrmela tutta d'a sola.
Se è accussì orgogliuse d''e opinione propie, ma 'e opinione nun sò propie, se difènnono tenacemente 'e idee propie ca nun sò propie... ma 'a addó vènono tutte ste opinione e idee ca nun sò noste pure parènnoce ca 'o sìano e ca ce fanno parlà pe cuncètte fatte? Embè, esse ce vènono d''e perzone cu 'e quale parlammo, ovviamente (è stato accussì 'a sempe), e... dâ televisione.
Ascutanno doje perzone discùtere o litigà 'e polìteca se sentarranno, formalmente peggiorate, tutta chella schiera 'e cuncètte fatte ca retruvarrammo 'n qualunque programma polìteco televisivo. 'A differenza tra 'na perzona e ll'ata se riduce â differente composizione d''o cocktail 'e cuncètte fatte ca ognuno ospita dint'â mente propia.
Tutto chesto nun è particolarmente negativo. Po' risurtà nuioso, ma è 'nu cuncètto fatto piuttosto sciocco sustené ca sia negativo. 'E cuncètte fatte sò 'n 'nu certo senzo archetipe, e 'n quanto tale necessariamente cummune a granne quantità 'e perzone. È accussì ca funziona 'a comunicazione tra essere umane. Si nun comunicàssemo facenno uso 'n grannìssema prevalenza 'e cuncètte fatte, 'a cchiù parte d''e vvote nun riuscarrìamo assolutamente a ce capì a vicenda.
Tuttavia, ognuno d''e miliune e miliune 'e sìngole passe dint'ô progresso culturale ca dint'a 'e millenne ce ha purtato a ce distìnguere sempe cchiù d''e ate animale, è stato cumpiuto 'n virtù d''a capacità 'e tutte chelle perzone ca nun se sò accontentate 'e raggiunà pe cuncètte fatte, e hanno conseguentemente evoluto pure certe originale cuncètte propie. Nun essere suddisfatte 'e penzà dint'a 'e sule tèrmene d''e pure necessarie cuncètte fatte è accussì 'o primmo passo pe contribbuì a ll'evoluzione d''a specie umana.
Sistematicamente demolì chiunque se sottrae â cunfortante consuetùdene 'e raggiunà pe cuncètte fatte, 'mméce, significa agì 'n direzione cuntraria a ll'evoluzione 'e ll'essere umano.
I cuncètte fatte sò indispensàbbele, pecché permèttono a 'e perzone 'e comunicà a 'n accettàbbile livello 'e realtà (qualunque cosa sta oscura frase pòzza significà).
'E cuncètte originale sèrvono 'mméce sulamente ô progresso d''a umanità, accussì non sò indispensàbbele, benché sìano altamente auspicàbbele.
Accennarraggio 'nfine a chello ca pe me è 'o zimbello d''e cuncètte: 'o cuncètto fatto travestuto 'a cuncètto originale. Quale pateticume suscita 'n me 'a fiera e oscena ostentazione 'e 'nu cuncètto presunto originale, presunto "nuovo", presunto "autèntecamente propio", presunto "'ntelligente" o ancora peggio "geniale", 'n realtà evidentemente "fatto", ovèro preconfezionato, precotto e stracotto. 'O cuncètto fatto nun è 'n sé negativo. Ma devènta redìcolo e patèteco quanno millanta 'e essere chello ca nun è, ovèro 'nu cuncètto nuovo e originale. ll'essere umano esibisce 'e miserie meno dignitose soje quanno presume 'e essere o 'e fa chello ca nun è e nun fa.
Riassumenno: 'A frase fatta è senza dubbio 'a quintessenza 'e 'nu cuncètto fatto, ma se pòzzono esprìmere cuncètte fatte pure senza ricórrere a 'e frase fatte. Tutte chille ca se cumpiàcciono 'e nun parlà pe frase fatte, analizzìno 'e cuncètte propie pe verificà si sìano fatte o meno. Si ve dà fastidio analizzà 'e vuoste cuncètte, pigliate a bersaglio chille 'e ll'ate. Cercate 'e capì quanto 'e 'nu cuncètto sia 'o prodotto d''a mente ca ll'ha espresso, e quanto sia 'mméce 'a pura ripetizione 'e argumiente già sentute 'n tutte 'e sarze, accussì chello ca io chiammo 'nu cuncètto fatto.
Pe oje è tutto. Scusàteme si nun me songo attenuto a cuncètte fatte, e scusàteme ancora 'e cchiù si 'mméce ll'aggio fatto.

Roberto Quaglia