t sè csa l'é al "stream of consciousness"? Mé an al sò brîṡa, in virtó dal trést dâto ed fât che äli cås ch'an sò brîṡa äli én infinitamänt pió numeråuṡi däli cås ch'a sò. Mo cgnoscänd la längua inglaiṡa e rafazonänd äli lacûni con la lågica, a m al imâgin, e s'a m duvéss ṡbaglièr al vrà dîr ch'al significhè ch'a stâg a eṡprémmer a l avrò inventè mé, e quasst l'é ancåura méi - sätta zêrt pónt ed vésta - che avairel savó par avairel aprais.
Ebén, tradótt in itagliàn, "stream of consciousness" al vål dîr "flóss ed cusiänza", e mé a argouéss che con quasst as intända l'ât d'eṡprémmers lenguésticamänt - verbalmänt o par iscrétt - con totèl libertè, ossî sänza progetèr in inción môd quall ch'as stà par dîr o par scrîver, lasänd sänplizemänt che tótt quall ch'ed lenguéstich la cusiänza la génera al gnéppa sóbbit esprès, in tänp reèl, sänza filtrèr col så giudézzi äli parål, äli frèṡ e i concèt. In st'mumänt an m sovgnånen brîṡa i particolèr vantâg̈ ch'da sta têcnica i gnarévnen fòra, ecetuè ón, ch'a ritègn notévvol: la mänt, sänza una direziån e un fén, l'é lébbera ed seguîr itinerèri inesplorè, e generèr concèt originèl e inédit, ch'mâi i sarévnen stè esprès se fén dal'inézzi as fóss savó quall ch'as srévv andè a dîr. S'an m ṡbâli brîṡa l'à druvè sta têcnica anc Joyce, mo l'é faciléssum ch'mé a m ṡbâglia, anc cunzideränd che Joyce an l ò mâi lèt. (A i ò pruvè con l'Ulisse, mo m'é sóbbit pasè la vòia.) D'èter cânt gnanc Joyce, con la scûṡa d'èser môrt prémma ch'mé a naséss, l'à mâi lèt mé.
Ecco, adès a stâg a fèr quèl dal gêner. Fén adès al discûrs l'é abastanza coeränt, o acsé am pèr, parché s'an m paréss coeränt la spiegaziån ch'a dâg ed quant mé a séppa faṡänd, cme psréss continuèr a fèrel?
«Dnanz ala tastîra dal mî computer, a prêm sänza rifléter i tâst, speränd che l'ât istàss d'eṡprémmerum al génera un significhè ch'al vâga la pêna d'èser trasmès, parché äli parål ch'automâticamänt a produṡ äli an certamänt un säns, e äli frèṡ ch'äli parål amucè inevitabilmänt äli compånen äli an ancåura pió säns däli parål.»
E s'anc quant mé a scrivéss an avéss un säns compé, al psrévv sänper zelèr quèlch significhè scåndó, ignåt anc a mé ch'a al scrîv. In definitîva, chi mâi al rîṡ a comunichèr eṡatamänt quant al séppa int äli så intenziån? Un scritåur al scrîv d'una deliziåuṡa ragazôla, sänza oviamänt aleghèrne la fotografî dâto ch'äla l'eṡésta såul int la så mänt, e ògni letåur al imaginarà quall ch'ai gnirà pió idåneo imaginèr; al cinaiṡ al imaginarà una ragâza cinaiṡa, al svedaiṡ una biondåna èlta un mêter e novanta, al beduén una bèla grasåna ipertetè, al pedåfil una ragazåla ed dîṡ ân, al gerontåfil una vècia vésta a l'ospézzi, al necråfil chal bèl cadâver ed dòna ṡbirsè a l'obitôri. E l'é acsé par ògni vocâbol: ògni parôla l'é un'etichèta drî ala quèl ognón as imâgina al cuntgnó ch'al vål. S'acsé an fóss brîṡa al månnd an pululrévv brîṡa ed malintaiṡ. Quand dû èser umàn i convêrsen, såul una ménima pèrt di significhè trasmès la ariva a destinaziån. Ai é conversaziån indóv ògni parôla la vén malintaiṡa. Al bâsta pinsèr a zêrti discusiån tra inamurè, indóv ògni tentatîv ed spiegaziån al sortéss l'efèt opåst a quall deṡiderè, e ala fén dla discusiån i dû amànt an én pió inamurè. Dåp i stan un påch ed tänp sänza parlèr tra ed låur e i tôrnen inamurè.
A câmbi discûrs. L'é un påch ed tänp che int äli retrovî dla mî mänt, mäntr a scrivêva quant a i ò scrétt fén adès, am vén da pinsèr a un'aranza. Brîṡa un'aranza qualónqued. Mo l'aranza ed cui a i ò lèt in un lîber. L'êra un'aranza perfèta, tånda, paradosalmänt quêdra. An faṡêva gnínt ed spezièl. La gnêva såul descrétta, o méi, la gnêva citè par divaghèr, cumpâgna a cme a stâg a fèr mé adès. L'êra un scritåur famåuṡ, e mé an al sån brîṡa. L'êra un'aranza normèl, epûr evidentemänt impurtànta, s'la gnêva citè in un lîber d'un scritåur famåuṡ, e dåp, adès, ripiaiè anc da mé, scritåur tótt'èter che famåuṡ. L'aranza l'é l'årghen riprodutîv d'un zêrt tîp d'èlber. A prémma vésta, guardänd ed ṡbîgh sta fazända (qualsîasi cåsa l'espresiån ed guardèr ed ṡbîgh la påsa vlair dîr), nudrîres d'aranz al psrévv parair cme una prâtica dsguståuṡa e oscêna, cumpâgna al nudrîres d'ûv ed galén'na. Invêzi l'é pròpri quall ch'i aranz (i èlber) i vålen. Anc i pêr, i próggn, äli vît e tótt i vegetèl produtûr ed frót an vàdden brîṡa l'åura che quelcdón i i magna. E parché mâi, as dmandarà quelcdón? I én tèl vegetèl tótt masochésta? An én né masochésta, né stópid. I vegetèl produtûr ed frót i én invêzi diabålicamänt astót. I t métten lé al så frót in bèla vésta, sucolänt, dåulz e madûr, mo ripîn ed samàn dûr, fastidiåuṡ e indigèst. L'ariva l'animèl guluṡån, al s pâpa tótt al frót samàn comprais, al s in va in gîr a spass par la vèsta campâgna, e prémma o dåp al fa una bèla cachén'na o una brótta cacåna (al dipänd da che animèl), tótta pîna di samàn brîṡa digeré di frót magnè. I samàn i germåglien int la têra sätta ala câca dsòlta däli piåv, e ecco che cla piânta la s é riprodótta, sänza fadîga, a granda distanza dal sît dla så immåta eṡistänza. A st'pónt am vén un dóbbi: quant i gh avêven da avair gròsa la båca i animèl par fèrs magnèr dai quèl i cucómber i s én evolût acsé gròs e con la bóźga acsé dûra? As tratèva fårsi... di dinosâur? Chèr Maurizio Costanzo Show, la dmanda l'é gratuîta, cme tótti äli dmandi la cui rispôsta an s produṡ brîṡa un dirèt vantâg̈. As in pålen imaginèr d'ancåura pió gratuîti ed cla sudétta. Par eṡénpi: L'univêrs l'é infiné? Csa l'é l'Univêrs? Mo... al eṡésta un Univêrs, de là dla recänt acuiṡiziån umèna dla convinziån ch'un Univêrs al eṡésta, ôlter al zîl nostràn, là indóv èter che miriâd ed puntén luminåuṡ nuèter an vdän brîṡa?

Roberto Quaglia